ဓားနတ်ဘုရား ဂျင်ချန် - Chapter - 910 ထိုက်ဟုန်ကလန်
“လိပ်ကလန်က မဟာအကြီးအကဲကို သဂြိုလ်ဖို့ လုပ်နေကြတယ်။ ငါတို့တွေ အဲ့ဒီသဂြိုလ်ပွဲပြီးရင်သွားကြတာပေါ့။ ဒီလိုနည်းနဲ့ ငါတို့တွေ ခပ်မြန်မြန်သူတို့ကို ကိုင်တွယ်နိုင်လိမ့်မယ်”
နောက်ဆုံးကျန်ရှိသည့်သူက ပြောလိုက်ခြင်းဖြစ်ပေသည်။
မဟာအကြီးအကဲ သေဆုံးသွားသည့်သတင်းက ပင်လယ်နယ်မြေတစ်ခုလုံးကို ပျံ့နှံ့သွားခဲ့သည်။ ရေဘဝဲမြေပုံရှစ်ခုဟာ နေရာအနှံ့ပေါ်လာခဲ့ပြီဖြစ်ကာ ပိုင်နက်နယ်မြေတစ်ခုဆီတွင် တစ်စုတစ်စည်းတည်း စုစည်းရန် ဖြစ်လာသည်။ သူတို့တွေအားလုံးဟာ ရေဘဝဲနတ်ဘုရားခန်းမကို ရှာဖွေကြလေတော့၏။
ပင်လယ်နယ်မြေတစ်ခုလုံးတွင် အုတ်အော်သောင်းနင်းဖြစ်နေကြကာ ရေဘဝဲနတ်ခန်းမဟာ ပေါ်ထွက်လာတော့မည်ဖြစ်ကြောင်း သိနေကြလေသည်။ ထိုနတ်ခန်းမကို ရေဘဝဲအင်ပါယာက ချန်ရစ်ခဲ့ခြင်းဖြစ်သည်။ ကောလဟာလအရ သူကတပည့်ဂိုဏ်းသားတွေခေါ်မသွားခဲ့လေဘဲ တစ်ယောက်တည်း ထွက်သွားခဲ့ရင်းမှ သေဆုံးသွားခဲ့သည်ဟု ဆိုသည်။ သူကနောက်ဆုံးကျန်ရှိသည့် ချမ်းသာကြွယ်၀မှုအားလုံးကို ထိုခန်းမထဲတွင် ထားခဲ့သည်ဟု ဆိုထသေးပေ၏။
ထို့နောက် သူက အင်ပါယာဖြစ်နိုင်သည့် စွမ်းအင်တွေအားလုံးကို ထိုခန်းမထဲတွင် သိမ်းဆည်းထားခဲ့ကာ မည်သူမှ ရှာမတွေ့နိုင်တော့ချေ။ ထို့ကြောင့် ရေဘဝဲမြေပုံရှစ်ခုကသာလျှင် ကျန်ရစ်ခဲ့ကာ ထိုနည်းသာလျှင် ရှာဖွေနိုင်စွမ်းရှိနိုင်မည်ဖြစ်ပေသည်။
ပင်လယ်နတ်ဘုရားမခန်းမ၏ ပိုင်နက်နယ်မြေထဲတွင် မြေပုံနှင့်ပတ်သတ်သည့် သတင်းတွေရရှိလာသည်။ များစွာသော အဖွဲ့အစည်းတွေနှင့် ကလန်တွေအားလုံးဟာ ပြင်းထန်စွာပြင်ဆင်ကြ၏။
သူတို့အားလုံးဟာ ကောင်းကင်လွှာအဆင့်ကိုးသို့ရောက်နေသည့် အထွတ်အထိပ်ကျွမ်းကျင်ပညာရှင်တွေနဲ့အတူ ပါ၀င်နိုင်ရန် ကြိုးစားကြမည်ဖြစ်သည်။ သူတို့၏ခွန်အားကို တတ်နိုင်သမျှမြန်မြန်တိုးမြင့်ကာ သူတို့က ပင်လယ်နတ်ဘုရားမ ခန်းမထံသို့ ရေဘဝဲနတ်ဘုရားခန်းမသို့ ၀င်ရောက်ခွင့်ရရန် မျှော်လင့်ချက်ဖြင့် ပို့လွှတ်နေကြသည်။
များစွာသောအဖွဲ့အစည်းတွေအားလုံးဟာ အခွင့်အရေးကို ဖမ်းဆုပ်ရန် ကြိုးစားနေကြသည်။ သူတို့အားလုံးဟာ များစွာသောကလန်တွေနှင့် အဆက်အသွယ်လုပ်ထားကြကာ အမျိုးမျိုးသော ရတနာတွေဖြင့် ဆွဲဆောင်ကြသည်။ ဒီနည်းဖြင့် သူတို့ကိုအခွင့်အရေးပေးရန် မျှော်လင့်နေကြ၏။
အကြောင်းမူကား နတ်ဘုရားခန်းမထဲသို့ ၀င်ခွင့်ရသူသာလျှင် ရေဘဝဲအင်ပါယာ၏ ပိုင်ဆိုင်မှုတွေကို ရရှိနိုင်မည်ဖြစ်ပေသည်။ ထိုကဲ့သို့သော အရာမျိုးတွေဟာ ပိုက်ဆံဖြင့် ၀ယ်ယူ၍တောင်မရသည့် အရာမျိုးတွေ ပါ၀င်နိုင်သေးပေသည်။
ပင်လယ်နယ်မြေထဲရှိ ကျွမ်းကျင်ပညာရှင်တိုင်းကို ဆွဲဆောင်နိုင်စွမ်း ရှိနေပေတော့၏။ များစွာသောသူတွေဟာ မနာလိုမှုတွေကြောင့် မျက်နှာတွေ စိမ်းဖန့်ကုန်ကြသည်။ ထိုသည်ကား အလွန်အရေးကြီးပေသည်။ သူတို့တွေအနေနှင့် အင်ပါယာ၏ရတနာတွေကို နတ်ဘုရားမခန်းမအတွင်းတွင် ထားခဲ့ရာမှ ထိုအရာတွေကို ရအောင်ရယူနိုင်ရန် လိုအပ်သေးပေသည်။ ထိုအရာတွေသည် အလွန့်အလွန်စွမ်းအားကြီးကာ တန်ဖိုးရှိနေမည်မှာ သေချာနေပေတော့သည်။
လိပ်ကလန်တစ်ခုလုံးဟာလည်း ၀မ်းနည်းညိုးငယ်နေကြကာ မဟာအကြီးအကဲ၏ သေဆုံးမှုပွဲကို ကျင်းပနေကြသည်။ကလန်တစ်ခုလုံးဟာ နှလုံးသားလေးလံနေကြသည်။ မဟာအကြီးအကဲသည် သူတို့၏ကလန်တွင် အစွမ်းအထက်ဆုံးဖြစ်သည်။ သို့သော် သူကမရှိတေ့ာသည့်အတွက် ကလန်၏အင်အားက ထပ်မံ၍ လျော့ကျသွားချေပြီ။
“ဒီနှစ်အတွင်းမှာ ရေဘဝဲမြေပုံရှစ်ခုကို စုစည်းနိုင်လိမ့်မယ်။ ပြီးရင် ရေဘဝဲနတ်ဘုရားခန်းမကိုလည်း ဖွင့်လှစ်နိုင်လိမ့်မယ်”
ဂျင်ချန်က ထိုသတင်းကိုကြားလိုက်ရသည်။ သူကလက်သီးတင်းကြပ်စွာဆုပ်ကာ တွေးတောလိုက်သည်။
“ငါသေချာပေါက် အဲ့ဒီခန်းမထဲကို၀င်ရမယ်။ အဲ့ဒီခန်းမက ငါ့ကိုစိတ်ပျက်အောင် အလုပ်ဖို့တော့ မျှော်လင့်ရမှာပဲ။ ငါလုံလောက်တဲ့ စွမ်းအင်သာရှိမယ်ဆိုရင် ကောင်းကင်စိတ်ဝိဥာဉ်ခန်းမနဲ့ ဆားပန့်နတ်ဘုရားမခန်းမကို ကိုယ်တိုင်သွားပြီး သတ်ဖြတ်ရမယ်။ငါသေချာပေါက် လီဖုန်းရှန်းနဲ့ ကျောက်ထန်းဇီ ပြီးတော့ ကျောက်ယွန်ဇီ သူတို့အားလုံးကို မဟာအကြီးအကဲအတွက် ကလဲ့စားချေပေးရမယ်”
ဂျင်ချန့်ထံမှ သတ်ဖြတ်ခြင်း အရှိန်အဝါအပြည့် ထွက်ပေါ်လာလေတော့သည်။ မဟာအကြီးအကဲ၏ သဂြိုလ်ခြင်းအခန်းအနားသည် ပြီးဆုံးရန် အချိန်နီးကပ်လာသည်။ သို့ရာတွင် ကလန်တစ်ခုလုံးဟာ မတိတ်ဆိတ်ကြသေးချေ။ အားလုံးဟာ ပွဲပြီးသွားသည့်တိုင်အောင် ၀မ်းနည်းညိုးငယ်နေကြသည်။
ထိုအခိုက်ကလန်သို့ ကျွမ်းကျင်ပညာရှင်ဆယ်ယောက် ရောက်လာသည်။ သူတို့အားလုံးဟာ ကောင်းကင်တွင်လွင့်မျောနေခဲ့ကြကာ လိပ်ကလန်ကို အေးစက်စွာကြည့်၏။သူတော်စင်အုပ်ချုပ်သူတစ်ယောက်က ကျယ်လောင်စွာအော်ဟစ်သည်။
“ငါတို့က ထိုက်ဟုန်ကလန်ကလူတွေပဲ။ မင်းတို့အားလုံးနားထောင်ကြ။ ဒီနေ့ကစပြီး မင်းတို့ရဲ့လိပ်ကလန်ကို ထိန်းချုပ်မယ်။ ငါတို့ထိုက်ဟုန်ကလန်က မင်းတို့ကို ထိန်းချုပ်လိုက်မယ် ။ အခုကစပြီး မင်းတို့က ငါတို့ရဲ့အစေအပါးဖြစ်သွားပြီ။ သဘောမတူတဲ့သူရှိရင်…”
သူကပြောလေရင်း ပြင်းထန်သည့်စွမ်းအင်တွေဖြင့် အောက်သို့ လက်ညိုးညွှန်ကာ ကျောက်တုံးတစ်ခုကို ပစ်ခတ်လိုက်လေတော့သည်။ ထိုအခါကျောက်တုံးက အစိတ်စိတ်အပိုင်းပိုင်းဖြစ်ကာ ပေါက်ကွဲသွားလေတော့၏။ သူက ဆက်ပြောသည်။
“မင်းတို့မြင်ကြလား။ သဘောမတူတဲ့သူရှိရင် ဒီလိုရလဒ်ကိုပဲရလိမ့်မယ်”
လိပ်ကလန်ဟာ အလွန်အမင်းတိတ်ဆိတ်သွားသည်။ အချိန်တိုအတွင်းတွင်ပင် ကလန်သားတွေအားလုံးဟာ လေထဲရှိသူတွေကို စူးရဲစွာကြည့်ကာ ဒေါသတကြီး အော်ဟစ်ကြတော့သည်။
“ထိုက်ဟုန်ကလန်က ငါတို့ကို သိမ်းပိုက်ချင်နေတယ်။ သူတို့ဘယ်လိုတောင် လုပ်ရဲရတာလဲ။ ငါတို့ကစွမ်းအားကြီးတဲ့အချိန်တုန်းက ထိုက်ဟုန်ကလန်က ရှိတောင်မရှိခဲ့သလိုမျိုးပြုမူခဲ့တယ်…”
“မင်းတို့က ငါတို့ကလန်ရဲ့ ဂိုဏ်းခွဲလေးတွေပဲလေ”
“မင်းတို့နောက်ကိုလိုက်မဲ့အစား ငါတို့အသေပဲခံလိုက်မယ်။ ငါတို့ရဲ့မြေပေါ်မှာ ငါတို့ရဲ့သွေးတွေနဲ့ ဆေးကြောလိုက်မယ်”
“ကောင်းပြီ ငါလည်းသူတို့နောက်ကို လိုက်မဲ့အစားအသေပဲခံလိုက်မယ်။ ငါသေသွားခဲ့ရင်တောင်မှ ထိုက်ဟုန်ကလန်က တန်ကြေးကြီးကြီးပေးဆပ်စေရမယ်”
အဖွဲ့သားတွေအားလုံးဟာ ကျယ်လောင်စွာအော်ဟစ်နေကြသည်။ သူတို့က အလွန်အမင်းမောက်မာကြ၏။ လိပ်ကလန်သည် ယခင်ကကဲ့သို့ အောင်နိုင်မှုအခမ်းအနားတွေမရှိသည့်တိုင်အောင် သူတို့က ညစ်ပတ်သည့်အဆင့်အတန်းကိုတော့ ကျဆင်းခံလိမ့်မည်မဟုတ်ချေ။
ဒုတိယနှင့် တတိယအကြီးအကဲအကြီးတွေက တစ်ယောက်မျက်နှာ တစ်ယောက်ကြည့်ကြသည်။ သူတို့က ချက်ချင်းပင် ကောင်းကင်သို့ မြောက်တက်သွားလေတော့၏။
“ထိုက်ဟုန်ကလန် မင်းတို့တွေ နေ့ခင်းကြောင်တောင် အိမ်မက်မက်နေကြတာပဲဖြစ်လိမ့်မယ်။ ဒီတော့ မြန်မြန်ထွက်သွားကြပါ”
ဒုတိယအကြီးအကဲက အော်လိုက်သည်။
“ဟုတ်တယ်။ ငါတို့တွေ ဘယ်သူ့ကိုမှဦးမညွှတ်နိုင်ဘူး”
အောက်ကလူတွေကလည်း အော်ဟစ်သည်။
ထိုက်ဟုန်ကလန်ကလူတွေအားလုံးကို သက်လတ်ပိုင်းလူတစ်ယောက်က ဦးဆောင်လာသည်။ သူကနှာခေါင်းရှုံ့ကာ ပြော၏။
“မင်းတို့ရဲ့လိပ်ကလန်က သွေးမြစ်ဖြစ်ချင်နေတာလား။ ငါတို့ရဲ့ထိုက်ဟုန်ကလန်ရဲ့ခွန်အားနဲ့ဆိုရင် ငါတို့ကမင်းတို့ကို အသာအယာ ဖယ်ရှားနိုင်စွမ်းရှိနေတယ်နော်။ ဒါတောင်မှ မင်းကိုယ်မင်း ကလန်ရဲ့ဒုတိယအကြီးအကဲလို့ သတ်မှတ်နိုင်သေးလို့လား”
သက်လတ်ပိုင်းလူကပြောသည်။ သူကထိုက်ဟုန်ကလန်၏ ဘိုးဘေးဖြစ်သည်။သူသည် ထိုက်ထောင်ဟုခေါ်ကာ ကလန်တွင် စွမ်းအားအကြီးဆုံးလည်းဖြစ်သည်။ သူသည် ကောင်းကင်တွင် စွမ်းအားအကြီးဆုံးလည်း ဖြစ်ပေ၏။
ဒုတိယအကြီးအကဲက ဆက်ပြောသည်။
“မင်းက တတိယအကြီးအကဲနဲ့ ငါ့ကိုအနိုင်တိုက်နိုင်ပေမဲ့ ငါတို့လိပ်ကလန်က မင်းတို့ရဲ့ထိုက်ဟုန်ကလန်ကို ယာယီပဲ ဦးညွှတ်နိုင်လိမ့်မယ်”
ထိုက်ထောင်က ရယ်သည်။
“ကောင်းပြီ။ ငါမင်းတို့နှစ်ယောက်နဲ့တိုက်ခိုက်မယ်။ ဒီလိုဆိုရင် မင်းတို့ရဲ့လိပ်ကလန်က ဘယ်လောက်ခုခံအားပြင်းလဲဆိုတာကို ငါသိ၇မှာပဲ”
ထိုက်ဟောင်ကထိုသို့ပြောလိုက်လေရင်း အနားတစ်နေရာသို့ ပျံသန်းသွားလေတော့သည်။
အကြီးအကဲနှစ်ယောက်ဟာလည်း ထိုက်ထောင်အနားသို့ ရောက်သွားလေတော့၏။ ထိုသိုဖြင့် သူတော်စင်ဘုရင်တွေကြားက တိုက်ပွဲက ဖြစ်ပျက်လေသည်။
လိပ်ကလန်မှ သူတော်စင် အုပ်ချုပ်သူတိုင်းဟာလည်း နောက်မှ လိုက်သွားကြသည်။ ဂျင်ချန်နှင့် ရှဲ့၀မ်သာလျှင် တည်ရှိ၏။
“မင်းသွားကြည့်ချင်လား”
ရှဲ့၀မ်ကပြောသည်။ ဂျင်ချန်က ခေါင်းခါ၏။
“မလိုတော့ဘူး။ ရလဒ်က သိသာနေပြီပဲ”
ကီလိုမီတာများစွာ ဝေးကွာသည့်နေရာမှ ပေါက်ကွဲသံတွေထွက်လာသည်။ ကောင်းကင်တွင် ပြောင်းလဲမှုတွေ ဆက်တိုက်ဖြစ်ပျက်နေတော့သည်။ အရာအားလုံးသည် သူတော်စင်ဘုရင်တွေ၏ တိုက်ပွဲကြောင့် ဖြစ်ပျက်နေခြင်းဖြစ်ပေ၏။
လိပ်ကလန်မှ အဖွဲ့သားတိုင်းဟာ အလွန်အမင်းစိုးရိမ်နေကြသည်။ သူတို့ဟာကံကြမ္မာကို ဆုံးဖြတ်ပေးမည့် ထိုတိုက်ပွဲကို ကြည့်ရှုနေကြသည်။ တိုက်ပွဲကသိပ်မကြာချေ။ သိပ်မကြာခင်အချိန်တွင်ပင် လိပ်ကလန်မှ အကြီးအကဲနှစ်ယောက်ဟာ ဖြူဖျော့နေသည့် မျက်နှာတွေဖြင့် ပြန်ရောက်လာကြသည်။ သူတို့အားလုံးက စိုးရွားသည့်အနေအထားသို့ ရောက်နေပေ၏။
သိသာစွာပင် နှုတ်ခမ်းထောင့်တွေမှ သွေးတွေတောင် ထွက်နေလေသေးသည်။ လိပ်ကလန်မှ သူတော်စင်အုပ်ချုပ်သူတွေအားလုံးဟာ တိုက်ပွဲကိုစောင့်ကြည့်နေရင်း ချက်ချင်းပင် စိတ်ဓာတ်ကျသွားလေတော့သည်။ အကြီးအကဲနှစ်ယောက်က ကလန်သို့ပြန်လာကာပြောသည်။
“ငါတို့ရှုံးသွားပြီ”
ကလန်တစ်ခုလုံး တိတ်ဆိတ်သွားတော့သည်။ ကလန်သားတွေအားလုံးဟာ နှလုံးသားလေးလံသွားကြ၏။ ဒုတိယနှင့် တတိယအကြီးအကဲတို့က လိပ်ကလန်တွင် အသန်မာဆုံးသူတွေဖြစ်ကြသည်။ သို့သော် သူတို့ကတောင်မှ ထိုက်ဟုန်ကလန်ကို မနိုင်နိုင်ကြတော့ချေ။ ထို့ကြောင့် သူတို့တွေအနေနှင့် မျှော်လင့်ချက်မကျန်ရှိတော့ဟု ဆိုရပေမည်။
ထိုက်ဟုန်ကလန်မှလူတွေအားလုံးဟာလည်း လိုက်လာကြသည်။ ထိုက်ဟုန်ကလန်မှ ဘိုးဘေးက အလွန်အမင်းပျော်ရွှင်နေခဲ့ကြကာ လူအုပ်ကို ဦးဆောင်လာခဲ့ကာပြော၏။
“ငါတို့ခုဏက သဘောတူညီထားတဲ့အတိုင်းဆိုရင် မင်းတို့ရဲ့လိပ်ကလန်က ငါတို့ထိုက်ဟုန်ကလန်ရဲ့အခွဲဖြစ်သွားပြီ။ ငါတို့က မင်းတို့ကို ထိန်းချုပ်ပိုင်ခွင့်ရှိသွားပြီ”
“ဒုတိယအကြီးအကဲ တတိယအကြီးအကဲ မင်းတို့အခု ဦးညွှတ်ဖို့တော့ မလိုအပ်ပါဘူး။ ဒီအတိုင်း ငါတို့အဖွဲ့က ကျွမ်းကျင်ပညာရှင်တွေကို စေလွှတ်ပြီး မင်းတို့အတွက် ပြန်လည်သတ်ဖြတ်ဖို့ လုပ်ဆောင်ပေးလိုက်ပါမယ်”
လိပ်ကလန်မှ သူတော်စင်အုပ်ချုပ်သူတွေကပြောသည်။ သူတို့က လက်လျော့ချင်သေးသည့်ပုံမရပါချေ။
‘ကောင်းပြီ ငါတို့က မင်းတို့တွေဆီက ကျွမ်းကျင်ပညာရှင်တွေကို သတ်ဖြတ်ပေးရမှာပေါ့”
လူများစွာက သဘောတူကြသည်။
“တိတ်စမ်း”
တတိယအကြီးအကဲက မဲမှောင်သည့် မျက်နှာအမူအရာဖြင့် ပြောသည်။
“ထိုက်ဟုန်ကလန်က ကျွမ်းကျင်ပညာရှင်နည်းနည်းလောက် သတ်ဖြတ်လိုက်ရုံနဲ့ အဆင်ပြေနိုင်မယ်လို့ထင်လို့လား။ ငါတို့ခုဏက သဘောတူညီချက်က ဘာဖြစ်သွားလဲ။ လိပ်ကလန်က လူလိမ်တွေလို့ မင်းတို့က သတင်းအထွက်ခံမလို့လား”
“တတိယအကြီးအကဲပြောတာမှန်တယ်။ ငါတို့ကလူလိမ်တွေဖြစ်လို့မရဘူး”
ဒုတိယအကြီးအကဲကလည်း ပြောပြန်သည်။ သူကထိုက်ဟုန်ကလန်က ဘိုးဘေးကိုကြည့်ကာပြောသည်။
“ထိုက်ဟုန်ကလန် မင်းတို့နိုင်ပါတယ်။ ဒီနေ့ကစပြီး ငါတို့လိပ်ကလန်က မင်းတို့ထိုက်ဟုန်ကလန်ရဲ့ အခွဲဖြစ်သွားပါပြီ”
“နေဦး”
ဒုတိယအကြီးအကဲ၏ စကားမဆုံးသေးသည့်အချိန်တွင်ပင် ရုတ်တ၇က် အသံတစ်သံထွက်လာကာ ဖြတ်ချလိုက်သည်။ ဂျင်ချန်က အဝေးမှလျှောက်လာကာ ကျယ်လောင်ကာ ရှင်းလင်းသည့်အသံဖြင့်ပြောလိုက်၏။
“ငါက လိပ်ကလန်ရဲ့အုပ်ချုပ်သူပဲ။ လိပ်ကလန်ရဲ့ကိစ္စတွေကို ငါတောင်မှ ၀င်မပါရသေးဘဲ ဘယ်သူကအတင့်ရဲပြီး ဆုံးဖြတ်ပိုင်ခွင့်ရှိနေရတာလဲ။ ဟမ့် လိပ်ကလန်က ဘယ်တော့မှ ထိုက်ဟုန်ကလန်ရဲ့ အခွဲဖြစ်မှာမဟုတ်ဘူး”
ဂျင်ချန်က လိပ်ကလန်ရဲ့အုပ်ချုပ်သူ မည်သည့်အချိန်ကမှ မဖြစ်ချင်ခဲ့ပေ။ သို့သော် နောက်ဆုံးတွင် မဟာအကြီးအကဲ၏ဆန္ဒကြောင့် သူကလုပ်ဆောင်၇တော့ပေမည်။ သူကလိပ်ကလန်၏ လေးလံသည့် နှလုံးသားတွေအားလုံးကို ရှင်သန်အောင်လုပ်ဆောင်ကာ ယခင်အချိန်တွေသို့ ပြန်လည်ရောက်ရှိအောင် ကူညီပေးရမည်ဖြစ်ပေသည်။
ဒုတိယနှင့် တတိယအကြီးအကဲတွေ၏ မျက်နှာတွေက မဲမှောင်သွားကြသည်။ ဒုတိယအကြီးအကဲက ဂျင်ချန့်ကိုကြည့်ကာ အော်ဟစ်သည်။
“ကလန်ကိုတောင် မင်းက မအုပ်ချုပ်နိုင်သေးပဲ အခုချိန်မှလာပြီး ကလန်ကိုဖျက်ဆီးဖို့ မင်းက ဆုံးဖြတ်မလို့လား”
“မဟာအကြီးအကဲက မင်းကြောင့်သေသွားရတာ။ ကလန်ကို မင်းက ဆွဲချချင်နေသေးပြန်တာလား”
တတိယအကြီးအကဲက ပြောပြန်သည်။ သူကအလွန်အမင်းရိုင်းစိုင်းပေ၏။
ဂျင်ချန်က ထိုအကြီးအကဲနှစ်ယောက်ကို ဂရုပင်မစိုက်ပေ။ သူက ပတ်၀န်းကျင်မှ ကလန်သားတွေကိုသာလျှင်ကြည့်ကာ ကျယ်လောင်စွာအော်သည်။
“အားလုံးပဲ ငါ့အကြံကို ထောက်ခံလား။ ဒီအကြီးအကဲနှစ်ယောက်ရဲ့အကြံကိုထောက်ခံမှာလား”
“ငါတို့တွေ တစ်ချိန်ကလို ပြန်လည်အောင်မြင်ဖို့အတွက်ပဲတွေးတောတယ်။ ဘယ်တော့မှ အခြားသူတွေကို ဦးမညွှတ်ဘူး။ သေချာပေါက်ငါက အုပ်ချုပ်သူကိုထောက်ခံတာပေါ့”
“ဒါပေါ့ ငါကလည်း အုပ်ချုပ်သူကိုထောက်ခံတာပေါ့”
“လိပ်ကလန်ရဲ့အနာဂတ်အတွက်တော့ အုပ်ချုပ်သူရဲ့အကြံအစည်အဆုံးအဖြတ်တွေကို သေချာပေါက်လိုက်နာရမယ်”
***°°