ပြန်လည်မွေးဖွားလာသော ဓားနတ်ဘုရား - Chapter - 396
တောင်တန်းပြာစားသောက်ဆိုင်သည် အဖြူရောင်မြစ်မြို့ကြီး၏ အထက်တန်းစားဧရိယာတွင်ရှိသော အဆင့်မြင့်စားသောက်ဆိုင်တစ်ခု ဖြစ်သည်။ အဖြူရောင်မြစ်မြို့ကြီး၏ အထက်တန်းစားဧရိယာတွင် နေထိုင်စားသောက်စရိတ်က အလွန်မြင့်မား၏။ ထိုနေရာက သာမန်ကစားသမားများ တော်ရုံတန်ရုံ မလာသည့် နေရာဖြစ်သည်။
သို့သော်လည်း လက်ရှိအချိန်တွင် ထိုစားသောက်ဆိုင်၌ ကစားသမား ၃ယောက် ရှိနေသည်။ သူတို့မှာ အမျိုးသမီး ၂ယောက်နှင့် ယောက်ျားသား ၁ယောက် ဖြစ်သည်။ သူတို့က တောင်တန်းပြာစားသောက်ဆိုင်၏ အပြင်ဘက်အဆောက်အဦးငယ်တစ်ခု၏အောက်တွင် ထိုင်နေကြ၏။
အမျိုးသမီး နှစ်ဦးထဲမှ တစ်ဦးသည် ဆက်စီကျကျ ဆွဲဆောင်မှုရှိပြီး ကျန်တစ်ဦးကတော့ နတ်သမီးအလား လှပသူလေးတစ်ယောက် ဖြစ်သည်။ ထိုစဉ် သူမတို့ဘေးတွင် ထိုင်နေသည့် အမျိုးသားက အေးရက်ကြမ်းကြုတ်သည့် အရှိန်အဝါတစ်ခု ထုတ်လွှတ်ထားပြီး ရဲစွမ်းသတ္တိရှိသည့်ဟန် ပေါ်သည်။ သူက ခန့်ညားသော မျက်နှာနှင့် အေးစက်မှုအရှိန်အဝါကို ပေါင်းစပ်ထားသည့်အတွက် ငယ်ရွယ်သည့် မိန်းမပျိုအများအပြားက သူ့ကို ကြွေကျနိုင်သည်။
“စနိုး… သူက ဘယ်သူလဲဆိုတာ နင် အခု ငါ့ကို ပြောလို့ ရပြီမလား… နင် ခေါ်ထားတဲ့ လျှို့ဝှက်တဲ့လူက ဘယ်သူလဲ… “ ကျောက်ယွဲ့ရူက ဂျမ်းတဲလ်စနိုး၏အနားသို့ ကပ်၍ တိုးတိုးလေး မေးသည်။ သူမ၏မျက်နှာအမူအရာက ‘ငါ တခြားဘယ်သူကိုမှ မပြောပြဘူး’ဆိုသည့်အလား ဖြစ်သည်။
“မလောပါနဲ့… နင် သူ့ကို တွေ့ဖူးပြီးသားပါ… သူ ခဏနေရင် ရောက်လာလိမ့်မယ်… “ ဂျမ်းတဲလ်စနိုးက မသိမသာ ပြုံးလိုက်သည်။
“ငါ အဲ့လူကို သိတာလား… ကျောက်ယွဲ့ရူက သူမ၏မှတ်ဉာဏ်ထဲရှိ ကျွမ်းကျင်သူများကို ချက်ချင်း ရှာဖွေစဉ်းစားကြည့်သည်။ သူမက အချိန်တချို့ကြာအောင် ပြင်းပြင်းထန်ထန် စဉ်းစားသော်လည်း အများစုက မဖြစ်နိုင်ပေ။ နောက်ဆုံးတွင် သူမက ခေါင်းခါပြီး အရှုံးပေးလိုက်သည်။ သူမ၏သူငယ်ချင်း ဖိတ်ခေါ်သော အံ့ဩစရာကောင်းသည့် ကျွမ်းကျင်သူကို သူမက စဉ်းစားမရချေ။
ကျောက်ယွဲ့ရူ ယခင်က တွေ့ဆုံဖူးသော အံ့ဩစရာကောင်းသည့် ကျွမ်းကျင်သူဆိုလျှင် ထိုသူက စတားမွန်းနိုင်ငံ၏ နံပါတ် ၁ ကျွမ်းကျင်သူ ဓားတစ်ချက် အဇူရာ ဘလက်ဖလိမ်းသာလျှင် ရှိသည်။
သို့သော်လည်း ဇီးရိုးဝင်း၏အစည်းအရုံးခေါင်းဆောင် ဘလက်ဖလိမ်းက ဤတစ်ကြိမ်၌ မသင့်တော်ပေ။ သူမတို့က သူ့ကို ဖိတ်ခေါ်မည်ဆိုလျှင် ထိုလူများက ပြိုင်ပွဲကို ငြင်းပယ်ကာ အကြောင်းပြချက်များ အမျိုးမျိုးပေးလိမ့်မည်ဖြစ်သည်။
နတ်ဘုရားနယ်မြေတွင် ကျွမ်းကျင်သူ အမြောက်အများ ရှိ၏။ ထိုစဉ် ဘလက်ဖလိမ်းက နတ်ဘုရားနယ်မြေကျွမ်းကျင်သူစာရင်းတွင် အဆင့် ၄၈၁ ဖြစ်ပြီး လျှို့ဝှက်ခန်းမမှ ပေးသော အဇူရာဘွဲ့ကို ရရှိထားသူ ဖြစ်သည်။ စတားမွန်းနိုင်ငံတွင် မဆိုထားနှင့် နတ်ဘုရားနယ်မြေတစ်ခုလုံးတွင်တောင် သူ့ထက် ပိုအစွမ်းထက်သူ အနည်းငယ်သာလျှင် ရှိ၏။
ကျောက်ယွဲ့ရူ၏ လက်လျှော့သည့် အမူအရာကို ကြည့်ပြီး ဂျမ်းတဲလ်စနိုးက ပို၍ ပြုံးလိုက်သည်။
သူမနှင့် အရင်းနှီးဆုံးဖြစ်သည့် ကျောက်ယွဲ့ရူတောင် သူမ ဖိတ်ခေါ်သည့် လူကို မခန့်မှန်းနိုင်လျှင် တခြားသူများအတွက် ပို၍တောင် မဖြစ်နိုင်ပေ။ သူမက ထိုလူ၏နာမည်ကို ထုတ်ပြောလျှင်တောင် ထိုလူများက ထိုလူကို မသိနိုင်သည်လည်း ဖြစ်နိုင်သည်။
ဂျမ်းတဲလ်စနိုးနှင့်ကျောက်ယွဲ့ရူ၏ စကားများကို နားထောင်ပြီး အေးစက်စက်အရှိန်အဝါနှင့် အမျိုးသားက ထိုကျွမ်းကျင်ကို ပို၍ သိချင်လာသည်။
ဤတစ်ကြိမ် စစ်ဆင်ရေးက လျှို့ဝှက်ရန် လိုအပ်ပြီး အပြင်လူကို ထုတ်မပြောသင့်ပေ။ အဘယ်ကြောင့်ဆိုသော်လည်း ဤတစ်ကြိမ်စစ်ဆင်ရေးသည် ဂျမ်းတဲလ်စနိုးအတွက် အလွန်အမင်း အရေးကြီးသောကြောင့် ဖြစ်သည်။
သို့သော်လည်း ဂျမ်းတဲလ်စနိုးက သူမ၏လက်အောက်ရှိ ကျွမ်းကျင်သူများကို မရွေးချယ်ဘဲ အပြင်လူကို အကူအညီတောင်းခဲ့သည်။ ဤဆုံးဖြတ်ချက်က သူ့ကို ဝေခွဲမရ ဖြစ်စေပြီး ဂျမ်းတဲလ်စနိုး ဖိတ်ခေါ်သည့် ကျွမ်းကျင်သူနှင့်ပက်သတ်၍ အလွန် သိချင်လာစေသည်။
“ရက်စက်မြွေ… လျှပ်တစ်ပြက်မြွေက နင်နဲ့အတူ ဘာလို့ ပါမလာတာလဲ… “ ဂျမ်းတဲလ်စနိုးက သူမ၏ဘေးရှိ လူငယ်ကို ကြည့်ပြီး မေးလိုက်သည်။
အိုရိုဘိုရို့စ်က ပုံရိပ်ယောင်ဂိမ်းလောကတွင် အင်အားစုကြီးတစ်ခု ဖြစ်လာရခြင်းမှာ အကြောင်းရင်းတချို့ကြောင့် ဖြစ်သည်။ တည်ထောင်သူအဖွဲ့ဝင်များဖြစ်သည့် အစည်းအရုံးခေါင်းဆောင်၊ အစည်းအရုံးခွဲခေါင်းဆောင်နှင့် အကြီးအကဲများအပြင် အိုရိုဘိုရို့စ်၌ ထောက်ခံသူ ၃၂ဦးနှင့် သွေဖယ်သူ ၁၂ဦးလည်း ရှိသေး၏။
နောက်ဆုံးအုပ်စု ၂စုကို နတ်ဘုရားသတ်ဖြတ်သူစစ်သည်များထဲမှ သေသေချာချာ ရွေးချယ်ထားခြင်းဖြစ်သည်။ သူတို့က အိုရိုဘိုရို့စ်၏ စွမ်းအားအကောင်းဆုံးဟု ဆိုနိုင်သည်။
အထူးသဖြင့် သွေဖယ်သူ ၁၂ဦး ဖြစ်သည်။ တစ်ယောက်ချင်းစီတိုင်းက ဂျမ်းတဲလ်စနိုးတောင် အလွယ်တကူ မထုတ်ပယ်နိုင်သည့် အင်အားကို ပိုင်ဆိုင်ထားကြသည်။
ထိုစဉ် သူမ၏ဘေးရှိ အေးစက်စက်လူငယ်က သွေဖယ်သူ ၁၂ဦးထဲမှ ရက်စက်မြွေဖစ်သည်။
သူမ ပြောလိုက်သည့် လျှပ်တစ်ပြက်မြွေသည်လည်း သွေဖယ်သူ ၁၂ဦးထဲမှ တစ်ဦးဖြစ်၏။ သို့သော်လည်း လျှပ်တစ်ပြက်မြွေ၏စွမ်းအားက ရက်စက်မြွေထက် သာသည်။ သွေဖယ်သူ၁၂ဦးထဲတွင် လျှပ်တစ်ပြက်မြွေက ထိပ်တန်းဖြစ်ပြီး ဤတစ်ကြိမ်စစ်ဆင်ရေးတွင် အရေးကြီးလူတစ်ယောက် ဖြစ်၏။
“လျှပ်တစ်ပြက်မြွေက လုပ်စရာတစ်ခုခု ရှိနေလို့ နောက်ကျနေတာ ဖြစ်ပါလိမ့်မယ်… ဒါပေမယ့် သူက အမြဲတမ်း အချိန်မှန်လို့ စိတ်ချချနေပါ အစ်မကြီးစနိုး… ပြီးတော့ အခု စစ်ဆင်ရေးက အရမ်းအရေးကြီးတယ်… သူ လာပါလိမ့်မယ်… “ ရက်စက်မြွေက အခိုင်အမာ ပြောလိုက်သည်။
ဂျမ်းတဲလ်စနိုးက တုန့်ပြန်သည့်အနေဖြင့် ခေါင်းညိတ်သည်။
ဂျမ်းတဲလ်စနိုးက အိုရိုဘိုရို့စ်ထဲတွင် လူယုံတချို့ ပျိုးထောင်ထား၏။ သွေဖယ်သူ၁၂ဦးအပြင် သူမက ထောက်ခံသူအနည်းငယ်ကိုလည်း ပျိုးထောင်ထားသည်။ သို့သော်လည်း ဤတစ်ကြိမ်စစ်ဆင်ရေးကို စွမ်းအားကောင်းသည့် ကျွမ်းကျင်သူတစ်ချို့ဖြင့် ဆောင်ရွက်ရပေမည်။ ထောက်ခံသူများက အစွမ်းထက်သော်လည်း သွေဖယ်သူများနှင့် မယှဉ်နိုင်ပေ။
သူမက ဤတစ်ကြိမ်စစ်ဆင်ရေးကို အရေးမထားစွာ မဆောင်ရွက်ရဲပေ။ သူမ ရှုံးနိမ့်လျှင် ရလဒ်က ပြန်မကောင်းနိုင်သည့် အခြေအနေသို့ ရောက်သွားပေလိမ့်မည်။ ထို့ကြောင့် သူမက ရက်စက်မြွေနှင့်လျှပ်တစ်ပြက်မြွေကို ခေါ်ထားခြင်းဖြစ်၏။ ထို့အပြင် သူမက မမျှော်လင့်ထားသည့် အခြေအနေများဖြင့် ကြုံတွေ့ရပြီး ရှုံးနိမ့်သွားမည်ကို စိုးရိမ်သောကြောင့် သူမက ရီဖုန်းကိုပါ ဖိတ်ခေါ်ခဲ့သည်။
ဂျမ်းတဲလ်စနိုးတို့ ၃ယောက် စကားပြောနေစဉ် အနက်ရောင်ဝတ်ရုံဖြင့် အမျိုးသားတစ်ယောက်က သူမတို့ဆီသို့ လျှောက်လာသည်။
နဂိုကတည်းက ပျင်းရိနေသည့် ကျောက်ယွဲ့ရူက လျှောက်လာသည့်လူကို မြင်ပြီး မျက်လုံးများ ပြူးကျယ်သွားသည်။
“စနိုး… သူက နင် ခေါ်ထားတဲ့လူတော့ မဟုတ်ပါဘူးနော်… “
“ဟုတ်တယ်… သူ မဟုတ်ရင် နင်က ဘယ်သူလို့ ထင်လို့တုန်း… “ ဂျမ်းတဲလ်စနိုးက တခစ်ခစ်ရယ်ပြီး သာမန်ရုပ်ရည်ဖြင့် အမျိုးသားကို ကြိုဆိုရန် မတ်တပ်ထရပ်လိုက်သည်။
ထိုသာမန်ရုပ်ရည်ဖြင့် အမျိုးသားက ရှီဖုန်း ဖြစ်သည်။
ကျောက်ယွဲ့ရူက ရီဖုန်း၏စွမ်းအားကို အတိုင်းအတာ တစ်ခုအထိ သိ၏။ သူမက ရီဖုန်းကို အနည်းငယ် မုန်းသော်လည်း ရီဖုန်းက အလွန်သန်မာသည်ကိုတော့ ဝန်ခံသည်။
တခြားလူဆိုလျှင် သူတို့က ဤသာမန်အသွင်အပြင်ကြောင့် ကျိန်းသေ အရူးလုပ်ခံရပေမည်။ သူမသည်လည်း ထိုကဲ့သို့ မှားယွင်းသုံးသပ်မိပြီး အရူးလုပ်ခံခဲ့ရသည်။ သို့သော်လည်း ရီဖုန်း၏စွမ်းအားကို လက်တွေ့မြင်ဖူးသည့် လူတစ်ယောက်အနေဖြင့် ကျောက်ယွဲ့ရူက ရီဖုန်း၏စွမ်းအားသည် သူတို့အောက် မကျကြောင်း ကောင်းကောင်းသိ၏။ မြေအောက်ခန်းသိမ်းပိုက်ခြင်း၊ သူ၏တိုက်ပွဲများ၊ အဖြူရောင်မြစ်မြို့ကြီးသို့ ပထမဆုံးဝင်နိုင်သူ စသည့်အချက်များက ရီဖုန်း၏စွမ်းအားကို ရှင်းလင်းစွာ သက်သေပြနေသည်။
သို့သော် ဘလက်ဖလိမ်း၏ရုတ်တရက် ပေါ်ပေါက်လာမှုကြောင့် ရီဖုန်း၏တည်ရှိမှုက အားလုံး၏စိတ်အာရုံထဲမှ တဖြည်းဖြည်း ပျောက်ကွယ်သွားခဲ့သည်။ ကျောက်ယွဲ့ရူတောင် ဤမုန်းစရာကောင်းသည့် လူကို မေ့ပျောက်လုနီးပါး ဖြစ်နေလေပြီ။
“မိန်းကလေးစနိုး… ဒီတစ်ကြိမ် ငါ့ကို ဘာကြောင့်ခေါ်တာလဲ သိလို့ရမလား… “ ရှီဖုန်းက ဂျမ်းတဲလ်စနိုး၏ဖိတ်ခေါ်မှုနှင့်ပက်သတ်၍ သိချင်စိတ် ပြင်းပြနေသည်။ ဖိတ်ခေါ်စဉ်က ဂျမ်းတဲလ်စနိုးသည် ပါးစပ်ပိတ်နေသောကြောင့် ရှီဖုန်းကလည်း မမေးခဲ့ပေ။ ယခု လုပ်ငန်းက စတင်ပြီဖြစ်သောကြောင့် သူက အခြေအနေကို နားလည်ရန် လိုအပ်သည်။
“မိန်းကလေးစနိုးအနေနဲ့ ပြောဖို့ အဆင်မပြေရင်လည်း ပြောနိုင်သလောက်တော့ ပြောပြပေးပါ… “
“နင် ဒီရောက်ပြီဆိုမှတော့ ဒီကိစ္စကို ဖုံးကွယ်ထားဖို့ မလိုတော့ပါဘူး… အခုကိစ္စက ပြိုင်ပွဲတစ်ခုပဲ… ကစားသမား ၅ယောက်… ပြိုင်ပွဲ ၅ပွဲ… ဒီယှဉ်ပြိုင်ပွဲ နိုင်ဖို့အတွက် အနည်းဆုံး ၃ပွဲနိုင်ဖို့ လိုအပ်တယ်… နင့်ကို ဖိတ်ခေါ်တာ တစ်ဖက်အသင်းက လူတစ်ယောက်ကို အနိုင်ယူပေးဖို့ပဲ… ဝန်ဆောင်ခအတွက် ခရက်ဒစ် သန်း၂၀ ရမယ်… “ ဂျမ်းတဲလ်စနိုးက အမှန်အတိုင်း ပြောပြသည်။
“သန်း၂၀လား… “ ရှီဖုန်းက ငွေပမာဏကို ကြားပြီး အံ့အားသင့်သွား၏။
ယခင်က ဂျမ်းတဲလ်စနိုးသည် သူ့အား ဖိတ်ခေါ်ခြင်းအတွက် ၅သန်း အသုံးပြုပြီး ဖြစ်သည်။ ယခု သန်း၂၀ ထပ်ပေါင်းလျှင် စုစုပေါင်း ခရက်ဒစ် ၂၅သန်း ဖြစ်ပေလိမ့်မည်။
‘ပြိုင်ပွဲတစ်ခုအတွက် ဒီလောက်အထိ သုံးဖို့ လိုလို့လား… ‘
ကမ္ဘာတစ်ခုလုံးတွင် တစ်သက်လုံး ခရက်ဒစ် ၁သန်း ပြည့်အောင် မစုဆောင်းနိုင်သည့် လူပေါင်းများစွာ ရှိသည်။ သို့သော်လည်း ယခု ဂျမ်းတဲလ်စနိုးက ပြိုင်ပွဲတစ်ခုအတွက် ခရက်ဒစ် သန်းဆယ်ချီ၍ သုံးစွဲရန် ဆုံးဖြတ်ထားသည်။
မူလက ရှီဖုန်းသည် သူ့ကိုယ်သူ အတော်အသင့် ချမ်းသာသည့် လူတစ်ယောက်ဖြစ်ပြီဟု မှတ်ယူထားခဲ့သည်။ ယခု ဂျမ်းတဲလ်စနိုးနှင့် ယှဉ်လိုက်လျှင် သူက လူမွဲတစ်ယောက်သာ ဖြစ်၏။
“ဟုတ်တယ်… သန်း ၂၀က အခြေခံပဲ ရှိသေးတယ်… ပြိုင်ဘက်ရဲ့စွမ်းအားပေါ် မူတည်ပြီး ဝန်ဆောင်ခကို ထပ်တိုးပေးဦးမယ်… “ ဂျမ်းတဲလ်စနိုးက ခေါင်းညိတ်လိုက်သည်။
“ကောင်းပြီ… ငါ လက်ခံတယ်… “ ရှီဖုန်းက ဤသဘောတူညီမှုကို အလွန်ကျေနပ်သည်။
လက်ရှိတွင် ဇီးရိုးဝင်းက ဖွံ့ဖြိုးခါစဖြစ်ပြီး ရှီဖုန်းက နေရာများစွာတွင် ပိုက်ဆံ လိုအပ်နေသည်။ သို့သော်လည်း သူက သူ၏ဂိမ်းငွေကြေးများကို ခရက်ဒစ်ဖြင့် အမြဲတမ်း မလဲနိုင်ပေ။ ထို့ကြောင့် ခရက်ဒစ် သန်း၂၀က အချိန်ကိုက်ရောက်ရှိလာသည့် ရင်းနှီးငွေများ ဖြစ်လာနိုင်သည်။
ရှီဖုန်း၏သဘောတူညီမှုကို ရရှိပြီးနောက် ဂျမ်းတဲလ်စနိုးက စိတ်သက်သာရာ ရသွားဟန်ဖြင့် သက်ပြင်းချသည်။ ရှီဖုန်းကဲ့သို့ မဟာကျွမ်းကျင်သူတစ်ယောက်ဖြင့်ဆိုလျှင် နောက်ပိုင်းကိစ္စများက ပို၍လွယ်ကူစွာ ပြီးသွားသင့်၏။
သို့သော်လည်း သူမက ပျော်ရွှင်မှုကို မခံစားနိုင်ခင် မက်ဆေ့တစ်စောင်ကို ရုတ်တရက် လက်ခံရရှိသည်။
သူမက မက်ဆေ့ကို ဖတ်လိုက်သောအခါ သူမ၏အမူအရာက ချက်ချင်း ခက်ထန်သွား၏။ ထိုအခိုက်အတန့်တွင် ဂျမ်းတဲလ်စနိုး၏ဘေးရှိ အားလုံးက သူမထံမှ အလွန်အေးစက်သော အရှိန်အဝါကို ခံစားလိုက်ကြရသည်။
***°