လောကတစ်သောင်း နတ်ဘုရား - Chapter - 19 လူမဆန်တဲ့ ပြစ်မှု ( ၃ )
Chapter – 19 လူမဆန်တဲ့ ပြစ်မှု ( ၃ )
“ဟွား…”
“ဘာဖြစ်တာလဲ … ဘာဖြစ်တာလဲ …”
“တာအိုပိုင်းခြားခြင်း တစ်ပိုင်းအဆင့် သခင်ကြီးမူလို လူက နှစ်ပိုင်းပြတ် ထွက်ပြီး ဒီလို ပေါင်းပင် ဖြစ်သွားတယ်လား…”
“ထင်ယောင်ထင်မှား ဖြစ်တာ.. ဒါဟာ ထင်ယောင်ထင်မှား ဖြစ်တာပဲ ဖြစ်ရမယ်…”
အသက်တစ်ချက်ရှိုက်စာ အချိန်လေးအတွင်း ဖြစ်ပျက်သွားသော တိုက်ပွဲသည် တော်တော် လေး မြန်ဆန်လွန်းပြီး ထိတ်လန့်စရာလည်း ကောင်းသည်။ ယခုရှိနေသော လူအုပ်ကို ကိုယ့်မျက်လုံးပင် ကိုယ်မယုံနိုင်အောင် ဖြစ်စေပြီး ကယောင်ချောက်ချား ဖြစ်ရပ်များလားဟု ထင်မှတ်မှား စေသည်။
သို့သော်လည်း ဤဖြစ်ရပ်က အမှန်တရား ဖြစ်နေ၏။
ထိုအပြင် မြွေအကြေးခွံမှ ထွက်လာသော ဓါးချီသည် သခင်ကြီးမူကို သတ်ဖြတ် ပစ်လိုက်ပြီး မပျောက်ကွယ် သွားသေးဘဲ သခင်ကြီး နက်နဲလိပ်ကိုပါ ခြောက်လန့် လိုက်သေးသည်။
ပထမတစ်ခါ ပေါက်ကွဲစဉ်ကထက် ပိုမို၍ သြဇာကြီးလေသည်။
ထိုအချိန်၌ သခင်ကြီးမူနှင့် သခင်နက်နဲလိပ်တို့၏ ဟန့်တားမှု မရှိတော့သော အခါ ဓါးချီ၏ပစ်မှတ်က တိုင်မူတျန်ခီ ဖြစ်လာသည်။ ထို့ကြောင့် သူ့မှာ လိပ်ပြာလွှင့်သည် အထိ ကြောက်လန့်နေရသည်။
“သူသေပြီလား… ငါရော သေတော့မှာလား..”
“မဖြစ်ဘူး… ငါ့ပန်းတိုင်ကို ရောက်မလာသေးဘူး… ငါဟာ အနှိုင်းမဲ့ ပညာရှင် တစ်ယောက် ဖြစ်မလာသေးဘူး.. ငါလုံးဝ သေလို့ မဖြစ်ဘူး…”
တိုင်မူတျန်ခီ၏ ရင်ထဲမှ အော်သံကို ကြားလိုက်ရသကဲ့သို့ တိုင်မူမိသားစု၏ အကြီးအကဲ ခြောက်က အနက်ရောင် သံမဏိ တံဆိပ်တော်ကို ချက်ချင်း ထုတ်ယူလိုက်သည်။
ထိုအမှတ်တံဆိပ်ကို မြင်လိုက်ရသော အချိန်တွင် အကြီးအကဲ သုံးဦးက သူတို့၏ အရင်းအမြစ် စွမ်းအင်များကို ထိုတံဆိပ်တော်ထဲ တစ်ပြိုင်တည်း လောင်းထည့်လိုက် ကြသည်။
ရွှမ်း…. တစ်စက္ကန့် မပြည့်တပြည့်တွင် အနက်ရောင် သံမဏိ တံဆိပ်တော်က ပေါက်ကွဲ ပွင့်ထွက်သွားပြီး သစ်ပြင်အမြင့်ကြီး တစ်ပင် ဖြစ်လာသည်။
ထိုသစ်ပင်က သခင်ကြီးမူ၏ သစ်ပင်ထက် အဆပေါင်းများစွာ စွမ်းအားပို ကြီးလေသည်။ အစစ်အမှန်နှင့်လည်း ပိုတူ၏။
ထိုသစ်ပင်က ကြီးမားလွန်းသဖြင့် ပင်စည် တစ်ခုတည်းက မီတာပေါင်း ရာချီ ရှည်လျားသည်။ သစ်ပင်သည် ချန်မိသားစု ခြံဝင်းကိုပင် စင်စစ်အားဖြင့် ဟက်တက်ခွဲပစ်နိုင်သည်။
ဧည့်တော်သည်များနှင့် ပရိသတ်များသည် တွန်းအား တစ်ခုကြောင့် မီတာ လေးထောင်၊ ငါးထောင် အကွာအဝေးကို တွန်းထုတ် ခံလိုက်ရသည်။
ထိုကိစ္စများ အားလုံး ပြီးသွားပြီးနောက် တိုင်မူမိသားစု၏ အကြီးအကဲ သုံးဦးတို့က အလန့်တကြား ဖြစ်နေသော တိုင်မူတျန်ခီကို ဧရာမသစ်ပင်ကြီး နောက်သို့ ဆွဲယူလိုက် သည်။ ထို့နောက် ဓါးချီ ပေါက်ကွဲမည်ကို စောင့်ဆိုင်းနေ၏၊
ဘွန်း… ဘွန်း…ဘွန်း…
နောက်ဆုံးတော့ အနက်ရောင် ဓါးချီသည် ဧရာမ သစ်ပင်ကြီးနှင့် ဝင်တိုက်မိကြ၏။
လန့်ဖျပ်ဖွယ် ပေါက်ကွဲသံများကို မရပ်မနား ကြားလိုက်ရသည်။ ကောင်းကင်ကြီးက တုန်ဟီးပြီး မြေကြီးက အက်ကွဲ လာသည်ဟုလည်း ထင်ရသည်။
ထိုကြောက်စရာ အသံများ ပျောက်ကွယ် သွားပြီးနောက် ဧရာမ သစ်ပင်ကြီးလည်း လုံးဝပင် ပျောက်ကွယ် သွားတော့သည်။ ၎င်းကို အနက်ရောင်ဓါးချီက ဖျက်ဆီး ပစ်လိုက်ကြောင်း အတိုင်းသားပင် တွေ့မြင်လိုက်ကြရသည်။
သစ်ပင်ကြီးနောက် ပုန်းနေသော တိုင်မူတျန်ခီနှင့် အခြားသုံးယောက်ကမူ အနက်ရောင် ဓါးချီသည် သစ်ပင်ကြီးကို ဖြတ်သန်း လာရသဖြင့် တစ်စတစ်စ အားနည်း လာခဲ့သည်။ ထို့ကြောင့် သူတို့ဆီ ရောက်သည့် အချိန်၌ မူလစွမ်းအင်၏ တစ်ရာခိုင်နှုန်းပင် မရှိတော့ပေ။
သို့သော်လည်း သူတို့သုံးယောက်ကို ဝမ်းနည်းဖွယ် အခြေအနေမျိုး ရောက်အောင် လွှင့်စင် ပစ်လိုက်နိုင်ပြီး အကြီးအကျယ် ဒဏ်ရာ ရစေခဲ့သည်။
ထိုမြင်ကွင်းကို အတော်လေး ထိတ်လန့်စရာ ကောင်းသည်ဟု ပြောနိုင်ပေသည်။ အဘယ်ကြောင့်မူ ဤဖြစ်ရပ်များ အားလုံးသည် ရှီကျွမ်းကျိ ချန်ရစ်ခဲ့သည့် ဓါးချီကြောင့် ဖြစ်ပျက်ရခြင်း ဖြစ်သည်။
ထိုမှတစ်ဆင့် အကျော်အမော် ရှီကျွမ်းကျိ တစ်ယောက် မည်မျှ စွမ်းအားကြီးပုံ၊ သူ့စွမ်းအားများအား ဖြန့်ကျက်နိုင်ပုံ တို့ကို စိတ်ကူးနိုင်၍ ရပေသည်။
“အဲဒါ… အဲဒါ တကယ်လား….”
“ဘုရားသခင်… ချန်မိသားစုရဲ့ သခင်လေး… ချန်ဖုန်းက ကောင်းကင်ကိုတောင် ဖီဆန် နိုင်တာပါလား..”
“အဲဒီဓါးချီလှိုင်းက သခင်ကြီးမူကို သတ်ပစ်လိုက်တယ်၊ သခင်ကြီး နက်နဲလိပ်ကို ခြောက်လန့်ပြီး ထွက်ပြေးအောင်လည်း လုပ်နိုင်တယ်.. ပြီးတော့ တိုင်မူမိသားစုရဲ့ ‘ အထွတ်အထိပ် အကာအရံ’ ကိုတောင် ဖျက်ဆီး လိုက်နိုင်သေးတယ်… တိုင်မူအကြီးအကဲ သုံးယောက်ကိုပါ သခင်လေး ချန်ဖုန်း လက်ထဲက မြွေအကြေးခွံလေးက အကြီးအကျယ် ဒဏ်ရာ ရအောင် လုပ်နိုင်ခဲ့တယ်… ယုံနိုင်စရာကို မရှိဘူးကွာ….”
အကြီးအကဲ ခြောက် ထုတ်လိုက်သော အနက်ရောင် သံမဏိ တံဆိပ်တော်သည် တိုင်မူ မိသားစု၏ ‘အထွတ်အထိပ် အကာအရံ’ တစ်ခု ဖြစ်သည်။
ဤအနက်ရောင် သံမဏိ တံဆိပ်တော်ကို သံမဏိ နတ်သစ်ပင်၏ အစိတ်အပိုင်းများနှင့် ဖန်တီးထားခြင်း ဖြစ်သည်။ တိုင်မူမိသားစု၏ ထိပ်တန်း ပါရမီရှင် ဘိုးဘေးကြီး၏ အံ့မခန်း အစွမ်းများကိုလည်း ထည့်သွင်း ထားခဲ့သည်။
၎င်းကို အချိန်မီရုံကလေး အသက်သွင်း လိုက်နိုင်သဖြင့် ဤသို့သော အကာအရံမျိုး ဖြစ်ပေါ်လာခဲ့သည်။
တာအိုပိုင်းခြားခြင်း အထွတ်အထိပ် အဆင့်ရှိသူ တစ်ဦးဆီမှ ရိုက်ချက်ကို သူအစွမ်းကုန် ကာကွယ် တားဆီးခဲ့ခြင်း ဖြစ်သည်။
တိုင်မူ ဘိုးဘေး၏ ကျင့်ကြံရေး အဆင့်သည် ရှီကျွမ်းကျိနှင့် အတူတူပင် ဖြစ်သော်လည်း သူ့တိုက်ပွဲ စွမ်းအားတို့က အများကြီး နိမ့်ကျနေသည်။
ထို့ကြောင့်လည်း အနက်ရောင် ဓါးချီအောက် ပြိုလဲသွားရခြင်း ဖြစ်သည်။ အကြီးအကဲ ခြောက်နှင့် တကွ ကျန်လူများကို ဒဏ်ရာကြီးစွာ ရသွားစေတော့၏။
အကွက် တစ်ကွက်တည်းဖြင့် လုံးဝ တိုက်ခိုက်၍ မရနိုင်ဟု မှတ်ယူ၍ ရသော တိုင်မူတျန်ခီတို့ အဖွဲ့ကို အလှဲထိုးနိုင်ခဲ့သည်။ ထို့ကြောင့် ချန်ဖုန်း တစ်ယောက် အင်မတန်မှ ထိတ်လန့် သွားပြီး အတန်ငယ်ကြာမှသာ အသိစိတ် ကပ်နိုင်သည်။
ချန်ဖုန်းက အသက်ပြင်းပြင်း ရှူထုတ်၍ သူ့ရင်ထဲမှ ထိတ်လန့်မှုများကို ဖိနှိပ်ပစ်လိုက်သည်။ သူက အရောင်မှိန်နေသည့် အနက်ရောင် မြွေအကြေးခွံ ကြည့်နေရင်း ခေါင်းထဲမှ နာကျင်နေသဖြင့် ခပ်ကြမ်းကြမ်း ခါထုတ် ပစ်လိုက်သည်။
ထို့နောက်တွင် စုတ်ပြတ်သတ်နေသော ချန်မိသားစု ခြံဝင်းကို တစ်ချက် ကြည့်လိုက်ပြီး ချန်ဝူထျန်းနှင့် ကျန်သည့် လူများထံ အကြည့်ရောက်သည်။
ချန်မိသားစုဝင်များက လက်ရှိ အခြေအနေထိ ထိတ်လန့်တုန်လှုပ် နေကြဆဲ ဖြစ်သည်။ ချန်ဖုန်းက ချောင်းဖွဖွ ဆိုးကာ လှုပ်နှိုးလိုက်ရသည်။
“ဖုန်းအာ… ဒါက … ဒါတကယ်ပဲလား…” ချန်ဝူထျန်းနှင့် ချန်းရှင်းဟီ နှစ်ယောက်လုံး ဆွံ့အ နေကြသည်။
“အဘိုး.. အဖေ… သားက မြွေသခင်ရဲ့ ဘုန်းတန်ခိုးတွေ ကောင်းချီး ပေးတာကို ခံယူခဲ့ရုံပါ..”
ချန်ဖုန်းက ထိုသို့ပြောလိုက်ပြီးမှ စကားခေါင်းစဉ်ကို တိုင်မူတျန်ခီ အကြောင်းဆီ ရွေ့ပြောင်း လိုက်သည်။
“အဘိုး… ကျုပ်က ဒီတိုင်မူတျန်ခီနဲ့ ပတ်သက်ပြီး တစ်ခုခုတော့ မှားနေတယ်လို့ ခံစားခဲ့ရတာ ကြာပြီ.. အခုတော့ လူတစ်ယောက်က ရှေ့ထွက်လာပြီး အရုပ်ဆိုးတဲ့ သူ့မျက်နှာကို ဖော်ထုတ်လိုက်ပြီ.. တရားမျှတမှုကို လက်ကိုင်ထားပြီး မဂ်လာပွဲကို ဖျက်သိမ်းပေးဖို့ ကျုပ်မျှော်လင့်ပါတယ်”
“မဂ်လာပွဲကို ဖျက်သိမ်းရမှာလား..” ချန်ဝူထျန်းက မျက်မှောင်ကြုတ် နေသည်။
သူက အင်အားကြီး တိုင်မူမိသားစုကို အနည်းငယ် စိုးရိမ်နေဆဲ ဖြစ်သည်။
“အဘိုး တိုင်မူမိသားစုက အင်အားကြီးတယ် ဆိုပေမယ့်လည်း သခင်ရှီကျွမ်းကျိရဲ့ ကာကွယ်မှုအောက်က ကျုပ်တို့ကို တစ်ခုခုလုပ်ရဲမှာ မို့လား…”
ချန်ဖုန်းက သံကိုပူတုန်း ထုရိုက်နေတော့သည်။
“ပြီးတော့လည်း အဘိုးက ကျုပ်အစ်မကြီးကို တိုင်မူတျန်ခီလို သားရဲကောင်မျိုးနဲ့တော့ လက်မထပ်ခိုင်းလောက်ဘူး… ဟုတ်တယ် မလား…”
“မဂ်လာပွဲ ဖျက်သိမ်းဖို့ ကျုပ်သဘောတူတယ်..” ချန်ဝူထျန်းက ခေါင်းညိတ်ပြီး ချန်ဝမ်းထျန်းကို မေးကြည့်သည်။
“အစ်ကိုကြီး.. တတိယအစ်ကို .. ခင်ဗျားတို့ရော ဘယ်လို ထင်လဲ ..”
“မဂ်လာပွဲ ဖျက်သိမ်းဖို့ ကျုပ်လည်း သဘောတူတယ်…” ချန်ဝမ်ထျန်းက ပြောလိုက်သည်။
“ကျုပ်လည်း သဘောတူတယ်…” ချန်ချင်းတျန်ကလည်း ဆိုလေသည်။
ထိုသို့မြင်လိုက်သောအခါ ချန်ဝူထျန်းက အပိုစကား မဆိုတော့ဘဲ ချန်ဖုန်းအား တိုက်ရိုက်သာ ပြောလိုက်တော့သည်။
“ဖုန်းအာ… မင်းနားထောင်.. မဂ်လာဖျက်သိမ်းဖို့က မင်းအစ်မကြီးရဲ့ ပျော်ရွှင်မှုကိုလည်း စွန့်လွှတ်ရမှာဆိုတော့ …”
ချန်ဝူထျန်း၏ အပြောကြောင့် ချန်ဖုန်းက ချန်ရှင်းရွဲ့ဘက် လှည့်ကာ သူမအမြင်ကို ထုတ်မေးကြည့်သည်။
သူလုပ်သမျှသည် ချန်ရှင်းရွဲ့အတွက် ဖြစ်သော်လည်း ချန်ရှင်းရွဲ့၏ ခံစားချက်များကို ထည့်သွင်းစဉ်းစားရန် လိုအပ်သေးသည်။ မိန်းကလေး တစ်ဦး၏ စိတ်ဓါတ်ရေးရာ အခြေအနေက အားနည်းသဖြင့် စိတ်ပိုင်းဒဏ်ရာ အမာရွတ် မကျန်ခဲ့အောင် ဖြစ်သည်။
ထိုအချိန်၌ ၎င်းအနက်ရောင် ဇာပဝါနှင့် မိန်းကလေး ဝမ်ယုယန်၏ အသိပေးမှုအောက် ချန်ရှင်းရွဲ့တစ်ယောက် တိုင်မူတျန်ခီက မည်မျှ အရုပ်ဆိုးကြောင်း နားလည်သွားခဲ့ပြီး ဖြစ်သည်။
ထို့ကြောင့် သူမ၏နှလုံးသားကို ဓါးနှင့် ပိုင်းဖြတ်လိုက်သည့် အတိုင်း ခံစားရပါသော်လည်း ပြတ်ပြတ်သားသား ဖြေလိုက်သည်။
“ဖုန်း… မဂ်လာပွဲကို ဖျက်သိမ်းလိုက်…”
ချန်ရှင်းရွဲ့၏ ဖြူဖျော့နေသော မျက်နှာကို ကြည့်လိုက်ရင်း ချန်ဖုန်းလည်း ဝမ်းနည်းရသည်။ သို့သော် ယခုကဲ့သို့ နာကျင်နေရခြင်းက နောင်နာကျင်ရမည်ထက် ပိုကောင်း ပါသေး၏။ ချန်ရှင်းရွဲ့အား သူတတ်နိုင်သမျှ အမြန်ဆုံး ကယ်တင်ခြင်းဖြင့်သာ စစ်မှန်သော ပျော်ရွှင်မှုကို သူပေးစွမ်းနိုင်လိမ့်မည်။
ချန်ဖုန်းက မျက်လုံးကို မှေးကျဉ်းပြီး တိုင်မူတျန်ခီတို့ လေးယောက်ဆီ ရောက်လာသည်။ ထို့နောက် အရပ်လေးမျက်နှာမှ လူများအားလုံး ကြားအောင် အော်ပြောလိုက်၏။
“လျှို့ဝှက်နဂါး တိုင်းပြည်က နံပါတ်တစ် ပါရမီရှင် တိုင်မူတျန်ခီဟာ ကိုယ်ကျင့်တရား မကောင်းတဲ့သူ ဖြစ်တယ်…”
“ဒါကြောင့် ဒီနေ့ ကျုပ်အစ်မကြီး ချန်ရှင်းရွဲ့နဲ့ စေ့စပ်ပွဲကို ကောင်းကင်နဲ့ မြေကြီး သက်သေ ထားပြီး ဖျက်သိမ်းလိုက်တယ်…”
ထိုစကားများကို ပြောနေရသောအခါ ချန်ဖုန်းစိတ်ထဲ ပြောမပြတတ်အောင် ကျေနပ်နေမိသည်။
ယခင်က တိုင်မူတျန်ခီသည် သူနှင့် ချန်ရှင်းရွဲ့ကြား စေ့စပ်ပွဲကို ဤသို့သော အရှက်ခွဲသည့် နည်းလမ်းမျိုးနှင့် ဖျက်သိမ်း ပစ်ခဲ့သည်။ ချန်မိသားစုမှာ မျက်နှာပျက်၍ အလဲလဲ အပြဲပြဲ ဖြစ်ခဲ့ရလေသည်။
သို့သော် ယနေ့တွင် ချန်ဖုန်းက တူညီသော စကားလုံးမျိုးကို တူညီသော အသံတုံးမျိုးဖြင့် ပြန်ပြောနိုင်ခဲ့ပြီ။
အတော်လေး စိတ်သက်သာရာ ရခဲ့ပါ၏။
ချန်ဖုန်းက အမျက်ဒေါသများ ချက်ချင်း ဖြေလွှတ် လိုက်သည်နှင့် ဧည့်သည်တော်များကမူ မေးရိုးကြီးများပင် အောက်ကျနေလေသည်။
“ဒီမဂ်လာပွဲကို ချန်မိသားစုက ဖျက်သိမ်းလိုက်တယ်…”
“အိုး.. ဘုရားရေ၊ တော်တော် ကြည့်လို့ကောင်းတဲ့ပွဲ … လျှို့ဝှက်နဂါး တိုင်းပြည်ရဲ့ နံပါတ်တစ် ပါရမီရှင်ကြီးရဲ့ မဂ်လာပွဲက ဖျက်သိမ်း ခံလိုက်ရတယ်.. ဒါက တစ်ခါမှကို မကြားဖူးခဲ့တဲ့ ဖြစ်ရပ်ဆန်းကြီးပဲ …”
“ဒီတစ်ခေါက် တိုင်မူမိသားစု နာမည်ကြီး သွားမှာပဲ သူတို့ဘက်က… ရူးသွပ်သွားပြီး လက်စားပြန်ချေမှာကို ကျုပ်တွေးပူနေမိတယ်…”
“ဒါပေမယ့်လည်း ဒီလက်စားချေမှုက အလုပ်ဖြစ်မှာ မဟုတ်ပါဘူး… ချန်မိသားစုရဲ့ နောက်ကွယ်မှာ ကောင်းကင် တက်လှမ်းခြင်း အဆင့်ကို ချိုးဖျက်နေတဲ့ ကြောက်စရာ မိစ္ဆာကြီး တစ်ကောင်လုံး ရှိနေတာပဲ ..”
“ရှီကျွမ်းကျိသာ ကောင်းကင်တက်လှမ်းခြင်း အဆင့် မရောက်ခဲ့ရင် အဆင်ပြေပါသေးတယ်… ဒါပေမယ့် သူသာ အဆင့်တက်တာကို ကျော်ဖြတ်ပြီး သွားရင်တော့ ကောလာဟလတွေ အတိုင်း အောင်မြင်သွားရင် တိုင်မူမိသားစုမှာ အူကလီစာ ဆယ်ခုပါရင်တောင် ချန်မိသားစုကို မလေးမစား ပြုရဲမှာ မဟုတ်လောက်ဘူး…”
***