လောကတစ်သောင်း နတ်ဘုရား - Chapter - 32 ကိုယ့်သေတွင်း ကိုယ်တူး
Chapter – 32 ကိုယ့်သေတွင်း ကိုယ်တူး
“တိုင်မူရှောင်းဟွာ မင်းကိုယ်မင်း အနိုင်ရမယ်လို့ ထင်နေတာလား”
ခါးသီးခြင်း မြစ်ကမ်းစပ်ရှိ လူထောင်ပေါင်း များစွာ၏ အကြည့်အောက်တွင် ချန်ဖုန်းက နောက်ဆုံးတော့ စကားပြောလာခဲ့သည်။
“ဒီလိုဆိုမှတော့ ငါသဘောတူတယ်”
ချန်ဖုန်း၏ စကားကို ကြားသည်တွင် လူအုပ်ကြီးမှာ စိတ်လှုပ်ရှား သွားပုံရသည်။
“အဲဒီ ချန်ဖုန်းက တိုင်မူရှောင်းဟွာရဲ့ စကားကို တကယ်ကြီး သဘောတူ လိုက်တယ်လား။ သူ့ရဲ့ ခေါင်းက တစ်ခုခု မှားယွင်းနေတာလား”
“ချန်ဖုန်းနဲ့ သူတို့ကြားမှာ ခွန်အား ကွာခြားချက်က အတော်လေး ကြီးမားနေတယ် မဟုတ်လား။ သူဘာတွေ တွေးနေတာလဲ”
“သူက လူအားလုံးရဲ့ အာရုံစိုက်မှုကို ရဖို့အတွက် ကြွားဝါလိုက်တာနဲ့ တူတယ်… အရူးပဲ”
လူအုပ်ကြီး၏ ပြောဆိုမူများ အောက်တွင် တိုင်မူရှောင်းဟွာနှင့် အခြားနှစ်ယောက်မှာ စိတ်အားတက်ကြွ လာခဲ့သည်။ သူတို့က ဉီးဆောင်လျက် မြစ်တစ်ဖက်ကမ်းသို့ ဖြတ်ကျော်ရန် လှေများအား ထုတ်ယူလိုက်သည်။
ချန်ဖုန်းသည်တော့ နှေးလွန်း မြန်လွန်းခြင်း မရှိကာ စိတ်ပူနေပုံ မရချေ။
“ချန်ဖုန်း” ဝမ်ယုရန် စိတ်ရှုပ်ထွေး နေခဲ့သည်။
“မလောစမ်းပါနဲ့ … သူတို့တွေ အရင်ဆုံး ရောက်မှာ မဟုတ်ဘူး”
ချန်ဖုန်းက ထိုသို့ ပြောလိုက်ပြီး နောက်တွင် မြစ်အား ဖြတ်ကျော်ရန် နောက်ဆုံး၌ စတင် လိုက်လေသည်။
ထိုအချိန်၌ တိုင်မူရှောင်းဟွာနှင့် တခြား နှစ်ယောက်မှာ မီတာ ၃၀၀- ၄၀၀ ခန့်မျှ ရောက်နေခဲ့ပြီး ဖြစ်သည်။ သူတို့ ပုံရိပ်က အဝါရောင် လှိုင်းလုံးများ ကြားတွင် ဝိုးတဝါးသာ မြင်ရတော့သည်။
“ဟမ့် ပျင်းစရာ ကောင်းလိုက်တာ။ ဒီအလောင်းအစားက ဆုံးဖြတ်ပြီးသားပဲ။ ကြည့်ရဖို့ အတွက်တောင် မတန်တော့ဘူး”
ကြည့်ရှုသူ အားလုံးမှာ ချန်ဖုန်းအပေါ် မျှော်လင့်ချက် မရှိချေ။ သူ သေချာပေါက် ရှုံးလိမ့်မည်ဟုပင် ခံစားနေရသည်။ သို့သော်လည်းပဲ ချန်ဖုန်း၏ ကောင်းကင်လွန်ဆန်သော အပြုအမူကြောင့် လူတိုင်းမှာ မျက်လုံး ကျွတ်ကျလုမတတ် တုန်လှုပ်သွားကြသည်။
သူတို့မြင်လိုက်သည်က ချန်ဖုန်းက လှေပေါ်သို့ စရောက်သည်နှင့် သစ်သားလှေအား လေးကြိုးမှ ပစ်လွှတ်လိုက်သည့် မြားတစ်စင်းအလား ပြေးထွက်သွားစေပြီး အရှိန်အဟုန်ဖြင့် မြစ်ကို ဖြတ်ကျော် လိုက်သည်။
“ဝှစ်”
ချန်ဖုန်း၏ သစ်သားလှေမှာ အလွန်အမင်း လျင်မြန်လှသည် ဖြစ်ကာ လန်ကျိုး၏ သားတော် လီရှိဂျီထက်ပင် မနှေးချေ။ သူသာ ထိုကဲ့သို့သော အမြန်နှုန်းကို ထိန်းထားနိုင်သည် ဆိုပါက မြစ်ကို ဖြတ်ကျော်ရန် အချိန်အနည်းဆုံး ဖြစ်လာလိမ့်မည်။
“မြန်မြန် အားလုံး ကြည့်ကြစမ်း။ အနက်ရောင် ဝတ်ရုံနဲ့ ချန်ဖုန်းက တော်တော်လေးကို ရူးသွပ်နေတာပဲ။ သူက သူရဲ့လှေ အမြန်နှုန်းကို ဒီလောက်အထိ တိုးမြင့်ရဲသေးတယ်”
“သူရူးသွားတော့တာပဲ ဖြစ်ရမယ် ဒီလောက် အမြန်နှုန်းနဲ့ ဆိုရင် ခါးသီးခြင်း မြစ်ရဲ့ လှိုင်းလုံးတွေအောက်မှာ နစ်မြုပ်သွားမှာပဲ အသုံးမဝင်ဘူး”
“ဟမ့် ဒါ မဟုတ်သေးဘူး။ ဘာကြောင့် ခါးသီးခြင်းမြစ်က မတုံ့ပြန်တာလဲ။ ခါးသီးခြင်းမြစ်ရဲ့ ဒီရေလှိုင်းလုံးတွေက ကောင်းကင် အထိတောင် မြင့်တက်လာရမှာ မဟုတ်လား ဘာတွေဖြစ်နေတာလဲ”
ကြည့်ရှုသူ အပေါင်းက ချန်ဖုန်းသည် လှိုင်းလုံးများ အကြား နစ်မြုပ် သွားမည်ဟု ထင်ထားခဲ့သော်လည်း ထိုသို့ ဖြစ်မလာသည်ကြောင့် နေရာ၌ မှင်တက်နေကြသည်။ ယခင်က ထိုကဲ့သို့ အမြန်နှုန်းဖြင့် မြစ်ကို ဖြတ်ကျော်မည် ဆိုပါက ခါးသီးခြင်းမြစ်၏ အလွန်အမင်း ကြီးမားသည့် လှိုင်းလုံးများကို ရင်ဆိုင်ရမည်ဖြစ်သည်။
ထိုအခိုက်အတန့်၌ ချန်ဖုန်း၏ အလျင်မှာ အလွန်အမင်း မြန်ဆန် လှသော်လည်း ခါးသီးခြင်းမြစ်က တုံ့ပြန်ခြင်း မရှိချေ။
“ဘာတွေ ဖြစ်နေတာလဲ။ ခါးသီးခြင်းမြစ်က ပြဿနာ တစ်ခုခု ရှိပြီး တစ်စုံတစ်ယောက်က ချန်ဖုန်းကို ကာကွယ် ပေးနေတာလား”
ထိုအခိုက်အတန့်၌ လူတိုင်းမှာ ထိုမြင်ကွင်းကြောင့် ရှုပ်ထွေးနေကြပြီး စိတ်လှုပ်ရှားနေကြသည်။
ကောင်းကင်ထက်ရှိ ချန်းချင်းရီက လျှို့ဝှက် နဂါးကျောင်းတော်၏ ကြီးကြပ်သူ ဖြစ်ကာ သူလည်းပဲ မျက်မှောင်ကြုတ် နေမိသည်။ တစ်ခဏတာ တွေးကြည့်မိပြီး နောက်တွင် မနေနိုင်ပဲ ရယ်မောမိလိုက်၏။
“စီနီယာ အစ်ကိုချန်း ဘာကြောင့် ရယ်နေတာလဲ”
“ချန်ဖုန်းက မြစ်ကို ဖြတ်ကျော်တဲ့ နေရာမှာ လှည့်ကွက် သုံးနေတာ မမြင်ဘူးလား” ဘေးရှိ တိုင်မူတျန်ခီက ပြောလာသည်။
“အင်း ငါ နည်းနည်းတော့ မြင်တယ်” ချန်းချင်းရီ ရယ်မောလိုက်ကာ ပြောသည်။
“ချန်ဖုန်းက ခါးသီးခြင်းမြစ်ရဲ့ စွမ်းအားကို ငှားယူနေတာပဲ။ ခါးသီးခြင်းမြစ်ရဲ့ အကျယ်အဝန်းက မီတာ သောင်းကျော် ရှိတယ်။ ဒီလိုအလျင်နဲ့ ရှေ့ဆက်သွားဖို့က သာမန်လူသားတွေ လုပ်နိုင်တဲ့ အရာ မဟုတ်ဘူး။ ဒါပေမဲ့ ချန်ဖုန်းက ခါးသီးခြင်းမြစ်ရဲ့ စီးဆင်းပုံအတိုင်း နိယာမကို လိုက်နာပြီး သူရဲ့လှေကို ရွေ့လျား သွားစေတာပဲ။ ဒါကြောင့်မို့ ခါးသီးခြင်း မြစ်က ပြန်ပြီး တန်ပြန်တိုက်ခိုက်ဖို့ တုံ့ပြန်လာမှာ မဟုတ်ဘူး”
“စီနီယာ အစ်ကိုချန်း ခါးသီးခြင်း မြစ်ဆိုတာ လူတိုင်းရဲ့ စွမ်းရည်ကို စစ်ဆေးတာပဲ။ ဒါပေမဲ့ ဒီချန်ဖုန်းက အခွင့်အရေးယူပြီး ဒီနည်းလမ်းမျိုးတွေ သုံးနေတယ်။ သူက ဒီစမ်းသပ်မှုကို လှည့်စားနေတာ မဟုတ်လား”
ထိုအခိုက်အတန့်တွင် ချန်ဖုန်းအား ကြည့်ကာ တိုင်မူတျန်ခီ၏ မျက်လုံးထဲ သတ်ဖြတ်လိုစိတ်များ တောက်လောင်လာသည်။
“ဂျူနီယာ ညီလေး တိုင်မူတျန်ခီ မင်း ကိုယ့်ကိုယ်ကိုယ် လိမ်နေတာပဲ” ချန်းချင်းရီက တိုင်မူတျန်ခီအား တစ်ချက်ကြည့်လိုက်ကာ –
“အခြေအနေနဲ့ အချိန်အခါကို လိုက်နာတတ်ဖို့က ငါတို့ ကျောင်းတော်ရဲ့ လိုအပ်နေတဲ့ အချက်ပဲ။ ကိုယ်ရေးကိုယ်တာ ကိစ္စကြောင့် ကျောင်းတော်ရဲ့ ကျောင်းသားသစ် စုဆောင်းတဲ့ နေရာမှာ ပြဿနာ မရှာတာ ကောင်းလိမ့်မယ်”
အကြည့်တစ်ချက်နှင့်ပင် တိုင်မူတျန်ခီ၏ အတွေးများကို ချန်းချင်းရီ သိလိုက်သည်။
အခြားတစ်ဖက်တွင်တော့ တိုင်မူတျန်ခီမှာ ချန်းချင်းရီ၏ အကြည့်ကို ခံစားမိသည် အတွက်ကြောင့်မို့ စိတ်ထဲ တုန်လှုပ်သွားပြီး အတွေးများကို မျိုသိပ်လိုက်သည်။
“ကျွန်တော် ရှုပ်ထွေးမိသွားပါတယ်”
သူ့အရှေ့ရှိ ကျင့်ကြံသူက မည်မျှ ကြောက်စရာ ကောင်းကြောင်း သူသိသည်။ သူသာ ဒေါသ ထွက်သွားပါက တိုင်မူမိသားစု တစ်ခုလုံးကိုပင် ချေမှုန်းရန် တတ်နိုင်ပေသည်။ အခြား တစ်ဖက်တွင်လည်းပဲ အတွေ့အကြုံ ရှိသည့် ကြည့်ရှုသူများမှာ ချန်ဖုန်း၏ အပြုအမူကို နားလည် သဘောပေါက် သွားကြသည်။
“ချန်ဖုန်းက အခွင့်အရေးကို ဆုပ်ကိုင်ပြီး ခါးသီးခြင်းမြစ်ရဲ့ စွမ်းအားကို အသုံးချနေတာပဲ”
“ခါးသီးခြင်းမြစ်က အရှေ့ဘက် အရပ်ကို စီးဆင်းနေတာ။ ချန်ဖုန်းက ဒီအလျင်ကို အသုံးချပြီး သွားနေတာပဲ။ ခါးသီးခြင်းမြစ်ရဲ့ စွမ်းအားကို ငှားယူနေတဲ့ အတွက်ကြောင့်မို့ သူလှေရဲ့ အမြန်နှုန်းက အရမ်းမြင့်မားပြီး တန်ပြန် တိုက်ခိုက်မှုကို မခံရတာပေါ့”
“ဝိုး ချန်ဖုန်းက တကယ့် ပါရမီရှင်ပဲ”
လူအုပ်ကြီး၏ ချီးမွမ်းမှုအောက်တွင် ချန်ဖုန်း၏ သစ်သားလှေမှာ မြန်သထက် မြန်လာပြီး တိုင်မူရှောင်းဟွာနဲ့ တခြား နှစ်ယောက်ကို ကျော်တက်တော့မည်ဖြစ်သည်။
ချန်ဖုန်း၏ အမြန်နှုန်းကို သတိထားမိသည်တွင် တိုင်မူရှောင်းဟွာ၏ မျက်နှာမှာ လေးလံသွားပြီး သူ့ဘေးရှိ တိုင်မူမိသားစု၏ ပါရမီရှင် နှစ်ယောက်ကို မျက်ရိပ်ပြလိုက်သည်။ သူတို့နှစ်ယောက်က ခေါင်းညိတ်လိုက်ပြီး ဉီးတည်ရာကို ပြောင်းကာ ချန်ဖုန်းထံသို့ တိုးဝင်သွားကြသည်။
တိုင်မူရှောင်းဟွာသည်လည်းပဲ အရှက်မရှိ ချန်ဖုန်း၏ နည်းလမ်းကို အသုံးချကာ ခါးသီးခြင်းမြစ်၏ လှိုင်းလုံးများ အတိုင်း ရွေ့လျား သွားစေပြီး မြစ်တစ်ဖက်ကမ်းသို့ အလျင်စလို ဉီးတည်လိုက်သည်။
“အားလုံးပဲ ကြည့် .. အခြားသူတွေလည်း ချန်ဖုန်းရဲ့ နည်းလမ်းကို ကူးချနေပြီ”
“အမှန်ပဲ ချန်ဖုန်းရဲ့ ပါရမီရှင် အကြံအစည်က အားလုံးအတွက် အကျိုး ရှိသွားစေတာပဲ။ သူရဲ့ ပြိုင်ဘက် တိုင်မူရှောင်းဟွာ တောင်မှ ချွင်းချက်မရှိဘူး”
“အား… တိုင်မူမိသားစုရဲ့ ပါရမီရှင် နှစ်ယောက်က ချန်ဖုန်းဆီ ဉီးတည် လာနေတာပဲ။ သူတို့ ဘာလုပ်ချင်ကြတာလဲ”
“မကောင်းတော့ဘူး သူတို့က ချန်ဖုန်း မြစ်ကို ဖြတ်ကျော်တဲ့ နေရာမှာ သေချာပေါက် တားဆီးဖို့ ကြိုးစားကြမှာပဲ။ ဒါဆို တိုင်မူရှောင်းဟွာလည်း သေချာပေါက် နိုင်သွားလိမ့်မယ်။ အရှက်မရှိ ကြဘူး”
လူအုပ်ကြီး၏ ကျိန်ဆဲမှု အောက်တွင် တိုင်မူမိသားစု၏ ပါရမီရှင် နှစ်ယောက်မှာ ချန်ဖုန်းနှင့် ၁၀ မီတာ အကျော်မျှသာ ကွာဝေးတော့သည်။ ဒါ့အပြင် သူတို့၏ အလျင်မှာ အနည်းငယ်မျှပင် နှေးကွေးသွားခြင်း မရှိကြပေ။
သူတို့နှစ်ဉီး၏ အစီအစဉ်မှာ ချန်ဖုန်း၏ လှေကို မှောက်ချရန်သာ ဖြစ်သည်။ ချန်ဖုန်း၏ သစ်သားလှေသာ မှောက်ကျသွားမည် ဆိုပါက ချန်ဖုန်း အနေဖြင့် ကျောင်းတော်၏ ထုတ်ပယ်ခြင်း ခံရပြီး တိုင်မူရှောင်းဟွာလည်း အနိုင်ရရှိသွားပေမည်။
“သခင်လေးချန် သတိထား”
မနီးမဝေးတွင် ရှိနေသော ဝမ်ယုရန်သည်လည်း အန္တရာယ်ကို သတိထားမိကာ ချန်ဖုန်းအား သတိပေးလိုက်သည်။ ချန်ဖုန်းက ဝမ်ယုရန်အား နှစ်သိမ့်သည့် အကြည့်ဖြင့် ကြည့်လိုက်ကာ တိုင်မူမိသားစုမှ လူနှစ်ယောက်ကို ပြန်ကြည့်လိုက်သည်။
“မင်းတို့နှစ်ယောက်က ကိုယ်သေတွင်းကိုယ် တူးနေမှတော့ ငါလည်း ပြောစရာ မရှိတော့ဘူး”
ချန်ဖုန်း တိုးညင်းစွာ ရေရွတ် လိုက်ပြီး နောက်တွင် သူ့ကိုယ်ခန္ဓာထဲမှ အလွန် အေးစက်သည့် စွမ်းအားများ ပေါက်ကွဲ ထွက်လာခဲ့ပြီး ပတ်ဝန်းကျင် တစ်လျှောက် အေးခဲသွားစေသည်။ ယင်းက သူ၏ အဆင့်လွန် သိုင်းဝိညာဉ် နှိုးထလိုက်သည့် ပထမဆုံး အကြိမ်လည်း ဖြစ်ပေသည်။
“ဝုန်း”
သိုင်းဝိညာဉ်၏ ပံ့ပိုးမှုအောက်တွင် အလွန် အေးစက်သည့် စွမ်းအား လှိုင်းများမှာ ချန်ဖုန်း၏ ခန္ဓာကိုယ် တစ်လျှောက် ထွက်လာခဲ့ပြီး ခါးသီးခြင်း မြစ်တစ်လျှောက် မြစ်ရေများကိုပင် လွှမ်းမိုးသွားသည်။
“ဝုန်း”
ချန်ဖုန်း၏ ပတ်ဝန်းကျင် တစ်ဝိုက်တွင် မြစ်ရေများမှာ ရုတ်ခြည်းပင် အေးခဲသွားတော့သည်။ ချန်ဖုန်း ရှိနေသည့် နေရာကို အဝေးမှ ကြည့်ပါက မီတာများစွာ ရှည်သည့် သေးငယ်သည့် ရေခဲတောင် တစ်ခုကို မြင်ရမည်ဖြစ်ပြီး ပတ်ဝန်းကျင် တစ်ခွင်တွင်လည်းပဲ အေးစက်သည့် အားလှိုင်းများဖြင့် ပြည့်နှက်နေခဲ့သည်။
တစ်ချိန်တည်းမှာပင် အမြန်နှုန်း၏ ကန့်သတ်ချက်ကို ရောက်နေပြီ ဖြစ်သော တိုင်မူမိသားစု၏ ပါရမီရှင် များလည်းပဲ ရောက်ရှိလာသည်။ အားလုံး မျှော်လင့်ထားသည့် အတိုင်း သူတို့က ချန်ဖုန်းအား တိုက်ခိုက် လာလေသည်။
“ဝုန်း.. .ဝုန်း”
သို့သော်လည်းပဲ သစ်သားလှေလေး နှစ်ခု ပေါက်ကွဲသွားသည့် အသံသာ ကြားလိုက်ရပြီး တိုင်မူမိသားစုမှ ပါရမီရှင် မိသားစုဝင် နှစ်ယောက်မှာလည်းပဲ ချန်ဖုန်း၏ အအေး စွမ်းအားများနှင့် တိုက်မိ သွားတော့သည်။ သူတို့၏ လှေများမှာ အပိုင်းပိုင်း အစစ ကျိုးပြတ်သွားခဲ့ပြီး မြစ်ထဲ ပြုတ်ကျ သွားတော့သည်။ တစ်ဆက်တည်း သူတို့၏ အသက် နှင့် ခန္ဓာသည် အလွန်အမင်း အေးစက်သည့် စွမ်းအားအောက် ရေခဲရုပ်တုများ အသွင် ကူးပြောင်းကာ ကွဲကြေ ပျောက်ပျက် သွားတော့သည်။
အဖြစ်အပျက်က အလွန်အမင်း လျင်မြန်လွန်းလှသည့် အတွက်ကြောင့်မို့ လျှို့ဝှက်နဂါး ကျောင်းတော်၏ ထူးခြားသော အဇူရာ နဂါးတံခါး ရုပ်တုနှင့် သူတို့အား ကယ်တင်ရန် အချိန် မရှိလိုက်ချေ။ သူတို့မှာ ရေခဲတောင်နှင့် အရှိန်ပြင်းစွာ တိုက်မိလိုက်သည့် အတွက်ကြောင့်မို့ ရုပ်ခန္ဓာ ကွဲကြေသွားတော့သည်။
“လခွမ်း.. ဒါ အရမ်း ရက်စက်မလွန်းဘူးလား”
“အံ့ဩစရာပဲ.. .ဒီအဖြစ်ကို ပြောဖို့ ဒီစကားလုံးပဲ ရှိတယ်။ တကယ် အံ့ဩစရာပဲ”
“ဝိုး.. ငါထင်ထားတာက တိုင်မူမိသားစုက ပါရမီရှင် နှစ်ယောက်က ချန်ဖုန်းကို ဒုက္ခ ပေးတော့မယ်လို့.. ဒါပေမဲ့ အဲဒီနှစ်ယောက်က ကိုယ့်သေတွင်းကိုယ် တူးလိမ့်မယ်လို့ မထင်ထားခဲ့ဘူး”
“အဲဒီချန်ဖန်းကိုတော့ ငါလေးစားလာမိပြီ”
ပြင်းထန်သည့် မြင်ကွင်းအား မြင်လိုက်သည်တွင် ကြည့်ရှုနေသူများမှာ စိတ်လှုပ်ရှားလာပြီး အားပေးလာကြသည်။
အဘယ်ကြောင့်ဆိုသော် ချန်ဖုန်း၏ တန်ပြန် တိုက်ခိုက်မှုက အလွန်အမင်း ပြင်းထန်လွန်းပြီး အများစုကို စိတ်လှုပ်ရှား သွားစေခဲ့ခြင်းကြောင့် ဖြစ်သည်။ ကြည့်ရှုနေသူများနှင့် ကွဲပြားစွာဖြင့် တိုင်မူတျန်ခီနှင့် တိုင်မူရှောင်းဟွာတို့၏ မျက်နှာများမှာ ဖြူဖျော့သွားသည်။
အထူးသဖြင့် တိုင်မူရှောင်းဟွာပင်ဖြစ်၏။ သူမမှာ အလွန်အမင်း ဒေါသထွက်နေပြီး သွေးအန်လုနီးပါး ဖြစ်နေလေသည်။
အဆုံးသတ်၌ တိုင်မူမိသားစု၏ ပါရမီရှင် နှစ်ယောက်မှာ သူမ၏ အမိန့်အောက်၌ ချန်ဖုန်းကို ဒုက္ခပေးရန် ဉီးတည်လိုက်ခြင်း ဖြစ်သည်။ ယင်းမှာ တိုင်မူမိသားစု၏ ပါရမီရှင် နှစ်ယောက်သည် တိုင်မူရှောင်းဟွာ၏ အမိန့်ကြောင့်မို့ သေဆုံးသွားရသည်ဟု ပြောနိုင်ပေသည်။
***