လောကတစ်သောင်း နတ်ဘုရား - Chapter - 37 ပန်းချီ သိုင်းဝိညာဉ်
Chapter – 37 ပန်းချီ သိုင်းဝိညာဉ်
“သြော် ဒီလိုကိုး… ငါ့ အထင် မင်းသမီး ဖန်ဖေးက ဒီကောင်လေးနဲ့ ပတ်သက်နေရမယ်…”
“ကပ်လျှက်ဖားကောင်… ဒီကောင် ဂူကိုင်ကောက တကယ့် အခွင့်အရေးသမားပဲ .. သူသာ ချန်ဖုန်းကို ဒီတစ်ခေါက် သင်ခန်းစာ ကောင်းကောင်း ပေးနိုင်ခဲ့ရင် မင်းသမီးဖန်ဖေးက သူ့ကို အထင်ကြီးရင်လည်း ကြီးလောက်မှာပေါ့ ….”
ထိုအခိုက်တွင် ပါရမီရှင် လူငယ်များ အားလုံးသည် ဂူကိုင်ကောကို အားကျကာ မနာလိုဝန်တို ဖြစ်နေကြလေသည်။ သူ့နေရာတွင် သူတို့သာ ဖြစ်လိုက်ချင်ကြ၏။
ချန်ဖုန်းက ရုတ်တရက်ကြီး ထရယ်မောလေ၏။
“ခွေးမသား.. မင်းက ဘာရယ်တာလဲ …” ဂူကိုင်ကောမှာ သူ့အပြုံးကြောင့် မှင်တက် ကြောင်အနေသည်။
“ငါ က ရယ်ရတယ်ပေါ့ …” ဂူကိုင်ကောက မျက်နှာကြီး မှောင်မည်းသွားသည်။
“မှန်ပြန်ကြည့်လိုက်ရင် မင်းကိုယ်မင်း ဘယ်လို မြင်ရလဲ … ငန်းဖြူလေးကို မှန်းနေတဲ့ ဖားပြုပ်တစ်ကောင်နဲ့ တူမနေဘူးလား..”
ချန်ဖုန်း၏ စကားက လူငယ် ပါရမီရှင်များ၏ မနာလိုမှုကို အစပျိုးပေး လိုက်သည်။ ထိုသို့ဖြင့် သူတို့က ဝိုင်းသရော်ကြသဖြင့် ဂူကိုင်ကော၏ မျက်နှာကြီး နီရဲ၍လာသည်။
“ငါက ဖားပြုပ်ဟုတ်လား… မင်းလို… သောက်တလွဲ ချန်ဖုန်းက ငါ့ကို ဖားပြုပ်လို့ ခေါ်ရဲသေးတယ်ပေါ့ …”
ဂူကိုင်ကောမှာ အရူးတစ်ယောက်နှယ် စိတ်ကယောက်ကယက် ဖြစ်သွားသည်။
“မင်းကရော…”
ချန်ဖုန်းက အလေးအနက်ထား၍ ပြောလိုက်သည်။
“အကယ်၍ မင်းသာ ဖားပြုပ် တစ်ကောင် မဟုတ်ဘူးဆိုရင် အားလုံးကို သက်သေပြလိုက်လေ.. အဲဒီ လှပတဲ့ ငန်းမလေး ဖုန်းဖန်ဖေးက မင်းအတွက် တစ်ခုခု တုံ့ပြန်ပေးမလား ဆိုတာကိုလေ.. စကားလေး တစ်ခွန်းလောက်နဲ့ပဲ ဖြစ်ဖြစ်…”
ယခုတော့ ဂူကိုင်ကောမှာ ဆွံ့အနေရပြီ။
ဖုန်းဖန်ဖေး တစ်ခုခု ပြောရန်က မည်သို့ ဖြစ်နိုင်ပါ့မည်နည်း။
ဖုန်းဖန်ဖေးသည် ကောင်းကင်ဘုံ၏ သခင်မလေးဖြစ်ကြောင်း လူတိုင်း သိပေသည်။ အနှိုင်းမဲ့ ပါရမီရှင် တစ်ဦးဖြစ်သော လီရှိဂျီပင် သူမနှင့် နက်နက်ရှိုင်းရှိုင်း မဆက်သွယ် နိုင်သဖြင့် ဂူကိုင်ကော ဆိုပါက ဆိုနိုင်ဖွယ် မရှိပေ။
ထို့ကြောင့် နေရာကြီး တစ်ခုလုံးလည်း တိတ်ဆိတ်ငြိမ်ကျ သွားရသည်။ ဂူကိုင်ကောက ဖုန်းဖန်ဖေးကို ကြည့်လျက် အံ့ဖွယ်ဖြစ်ရပ်လေးများ ဖြစ်လာလေမလားဟု မျှော်လင့် နေပေသည်။
သို့သော်
ဖုန်းဖန်ဖေးက အချိန်အကြာကြီး တိတ်ဆိတ်နေခဲ့သည်။ အဓိက အကြောင်းအရင်းမှာ ဘာပြောရမည်ကို မသိ၍လည်း ဖြစ်လိမ့်မည်။
အဘယ်ကြောင့်မူ ချန်ဖုန်းက သူမအား ဖြေရှင်းရန် ခက်ခဲသော ပုစ္ဆာတစ်ခုကို ပေးခဲ့ပြီး ဂူကိုင်ကောကို တုံ့ပြန်စေခြင်း ဖြစ်သည်။ သူမ စကားပြောလိုက်ပါက ဂူကိုင်ကောနှင့် သူမ ဆက်နွယ်မှု ရှိသည်ဟု ထုတ်ပြောလိုက်သည့် အတိုင်း ဖြစ်သွားလိမ့်မည်။ ဖုန်းဖန်ဖေးက ယင်းသို့ အဘယ်ကြောင့် အဖြစ်ခံနိုင်ပါ့မည်နည်း။
ရလဒ်အနေဖြင့် သူမက ချန်ဖုန်းကို အေးစက် ခက်ထန်သော မျက်နှာဘေးနှင့် စိုက်ကြည့်နေကာ စကားတစ်ခွန်းမှ မဆိုပေ။
၎င်းအကျိုးဆက်ကြောင့် ….
“ဖားပြုပ်… ဖားပြုပ်… ဖားပြုပ်…”
အလွန်အကြူး တိတ်ဆိတ်မှုလွန်သော် အော်သံ ဆူနာမီကြီး လှိုက်၍လာသည်။
ထို့နောက် အထိတ်တလန့် ဖြစ်ဖွယ် အော်ဟစ်သံများက ဂူကိုင်ကောအပေါ် မိုးကြိုး ပစ်ချလိုက်သည့်နှယ်။ ဂူကိုင်ကောမှာ ထိန်းမရတော့ဘဲ ပါးစပ်အပြည့် သွေးတစ်ပွက် အန်ထုတ်ပစ်လိုက်သည်။
သို့သော် ဂူကိုင်ကောသည် အဆင်ခြင်မဲ့သော လူတစ်ဦး ဖြစ်သဖြင့် ဤသို့သော ရိုက်ချက်မျိုးကို ခံရပြီးနောက် ပြန်လည် တိုက်ခိုက်တော့သည်။
“ချန်ဖုန်း… ခွေးမသား… သွားသေလိုက်တော့ …”
ဒေါသတကြီး ဟိန်းဟောက်သံကြား ဂူကိုင်ကော တစ်ယောက် ဒြပ်စင်စွမ်းအင်များနှင့် ရုတ်တရက်ကြီး ပေါက်ကွဲတော့သည်။
ထိုဒြပ်စင်လှိုင်းများက အတော်လေး စွမ်းအားကြီးသည်။ ရုတ်တရက် ပေါက်ကွဲလာသော အခါ မြေကမ္ဘာ အဆင့်မှာ ကျင့်ကြံသူ တစ်ဦးကိုပင် အလွယ်တကူလေး သုတ်သင်ပစ် နိုင်သည်။
လက်ရှိချန်ဖုန်းက မြေကမ္ဘာ တစ်ပိုင်းအဆင့်သာ ရှိသေးသည်။
ဝီး….
ဒြပ်စင်စွမ်းအင်လှိုင်းများ ချန်ဖုန်းကို ရိုက်ခတ်ကြသော အခါတွင် ချန်ဖုန်းက စင်စစ် အသင့်ပြင်ပြီး ဖြစ်သောကြောင့် သူ့စွမ်းအား အကုန်လုံးကို ချက်ချင်း ထုတ်သုံး လိုက်သည်။ ကြောက်စရာ အအေးချီများက ပတ်ဝန်းကျင်ကို ဖုံးလွှမ်းသွားပြီး ချန်ဖုန်း၏ ခြေဖဝါးအောက် ကြီးမားသော ရေခဲတုံးကြီး ဖြစ်၍သွားသည်။
ထို့ကြောင့် ချန်ဖုန်းအတွက် နှစ်မျိုးလုံး ပိုပြီး အန္တရာယ် များလာတော့သည်။ သူ့အား ဒြပ်စင်စွမ်းအင်များ၏ ထိုးနှက်မှုကို ကြံ့ကြံ့ဆိုင်ရန် တွန်းပို့သည့်အတိုင်း ဖြစ်နေခဲ့သည်။
ချန်ဖုန်းက ထိုအပေါ် တည်တည်ငြိမ်ငြိမ် မတ်တတ် ရပ်နေနိုင်သည်ကို မြင်လိုက်ရသောအခါ ဂူကိုင်ကောလည်း အံ့သြနေမိသည်။
သူက မြေကမ္ဘာအဆင့် အထွတ်အထိပ် ကျင့်ကြံသူ တစ်ဦး ဖြစ်သည်။ သူသည် စည်းမျဉ်း များကို လိုက်နာရကာ ချန်ဖုန်းက သူ့အား တိုက်ရိုက် မတိုက်ခိုက်နိုင်သဖြင့် သူ့အစွမ်းနှင့် ဖိနှိပ်ခဲ့ခြင်း ဖြစ်သည်။ သူစွမ်းအားများက မြေကမ္ဘာတစ်ပိုင်း အဆင့်သာ ရှိသော ကျင့်ကြံသူ တစ်ယောက် ခုခံနိုင်သည့် အရာမျိုးလည်း မဟုတ်ပါပေ။
သို့သော် ချန်ဖုန်းကမူ ၎င်းကို အားအပြည့်နှင့် တားဆီးခဲ့သည်။ ကြည့်ရသည်မှာ တည်ငြိမ်ပြီး စူးစူးစိုက်စိုက်လည်း ရှိ၏။
“ဟမ်…. ဒါက အချိုပွဲလေးပဲ ရှိသေးတယ်… တကယ့်ဟင်းပွဲ အစစ်က အခုမှ လာမှာ..”
ဂူကိုင်ကောက ဆိုလိုက်ရင်း သူ့ကိုယ်တွင်းရှိ ဒြပ်စင်များကို မြင်းရိုင်း တစ်ကောင်ပမာ ပိုမို လှုပ်ရှားစေသည်။ ထို့နောက် နေရာအနှံ့နှံ့မှ ဒုန်းစိုင်း၍ စေလွှတ်လိုက်သည်။
ချန်ဖုန်းက သူ့ရှေ့တည့်တည့်၌ ရှိနေသဖြင့် ထိုတိုက်ကွက်ကို အများဆုံး ခံရတော့သည်။
ဘွန်း… ဘွန်း… ဘွန်း… ဘွန်း… ဘွန်း…
ဒြပ်စင်စွမ်းအင် လှိုင်းလုံးများက ကသောင်းကနင်း ဖြစ်ကုန်ကြသည်။ အထူးသဖြင့် ဂူကိုင်ကောပင်။ လှိုင်းလုံးများကို ပိုမို တိုးမြှင့်စေရန် ဂူကိုင်ကောက သူ့သိုင်းဝိညာဉ်ကိုပင် အသုံးချနေသဖြင့် ဒြပ်စင်စွမ်းအား လှိုင်းများက ထိန်းမနိုင် သိမ်းမရ ဖြစ်လာခဲ့သည်။
ထိုနည်းဖြင့် ချန်ဖုန်းက နောက်ထပ် တောင့်ခံ၍ မရတော့ဘဲ ခြေတစ်လှမ်း ပြန်ဆုတ်လိုက် ရသည်။
ထိုအချိန်တွင် ခြေတစ်လှမ်း နှေးသွားသော ဝမ်ယုရန်က အပြေးရောက်လာ၏။ ချန်ဖုန်း၏ ကျောပြင်ကို လက်ဝါးဖြင့် ထိကပ်ရင်း လှိုင်းလုံးများကို ရပ်တန့်နိုင်အောင် ကြိုးစားသည်။
“သခင်လေးချန်..” ဝမ်ယုရန်က မျက်မှောင်ကြုတ်၍ နေသည်။
“ကျုပ် အဆင်ပြေတယ်…”
ချန်ဖုန်းက သူ့အရှိန်အဝါကို ပြန်လည် ထိန်းညှိလိုက်ပြီး ဂူကိုင်ကောကို စိုက်ကြည့်၏။
“ခေါင်းမာတဲ့ အရူး… ဒီတစ်ခေါက် ငါ့ သိုင်းဝိညာဉ်ကို အသုံးပြုလိုက်ရင် မင်းတို့ စွမ်းအားတွေ အားလုံး ပေါင်းရင်တောင် လွှင့်ထွက်ကုန်မှာပဲ ..”
ဂူကိုင်ကောက ဒေါသများနှင့် လောင်မြိုက်နေခဲ့ပြီး နောက်ဆုံးတော့ သူ့သိုင်းဝိညာဉ်ကို အသက်သွင်း လိုက်လေသည်။
သိုင်းဝိညာဉ် ထွက်ပေါ်လာသောအခါ ၎င်း၏ ခန္ဓာကိုယ် တစ်ခုလုံးက နက်ပြာရောင် ဖြစ်သည်။
သိုင်းဝိညာဉ်က ပန်းချီကားပင် ဖြစ်လေသည်။ အထူးသီးသန့် သိုင်းဝိညာဉ် တစ်မျိုးလည်း ဖြစ်ကာ ထိုသိုင်းဝိညာဉ်က ပန်းချီတစ်ချပ် ဖြစ်နေခဲ့သည်။ ပန်းချီကားထဲ၌ အရာဝတ္ထု တစ်ခုခု ရှိပါက သိုင်းဝိညာဉ် ပိုင်ရှင်သည် ၎င်းအရာဝတ္ထု၏ အနှိုင်းမဲ့ စွမ်းအားများကို ရရှိနိုင် ပေလိမ့်မည်။
ဂူကိုင်ကော၏ သိုင်းဝိညာဉ် ပန်းချီကားက ထိတ်လန့်ဖွယ် ရေစီးနေသော မြစ်တစ်စင်း ဖြစ်သည်။
၎င်းမြစ်ကြီး၏ အစွမ်းက ဂူကိုင်ကော၏ ဒြပ်စင်စွမ်းအင်ကို တိုးမြှင့်စေနိုင်သည်။ ၎င်းက ချန်ဖုန်းနှင့် သူ့အဖော်တို့ကို လေထဲ လွှင့်ထွက်သွားအောင် အသုံးချ၍ ရသည်။
ထိုအချိန်၌ ချန်ဖုန်းနှင့် ဝမ်ယုရန်က ပူးပေါင်း လိုက်ကြပြီး တစ်ဦးနှင့်တစ်ဦး ဆန့်ကျင်ရန် အခိုင်အမာ ရှိနေခဲ့သည်။
သို့သော် ချန်ဖုန်းက ထိုအချိန်၌ ရင်သပ် ရှုမောဖွယ် အပြုအမူ တစ်ခုကို ထလုပ်တော့သည်။ အမှန်ပင် ဝမ်ယုရန်အား နောက်ဆုတ်စေပြီး ဂူကိုင်ကော၏ တိုက်ကွက်ကို သူ့စွမ်းအား တစ်မျိုးတည်းနှင့် တားဆီးလိုက်သည်။
“ဟီးဟီး… မင်းက မကြာခင် အဆုံးသတ် ရတော့မယ် ဆိုတာကို သိလို့ နောက်ဆုံး အချိန်လေးမှာ သူရဲကောင်း လုပ်ပြသွားမယ်ပေါ့ …” ဂူကိုင်ကောက ခနဲ့တဲ့တဲ့ ပြုံးရင်း သရော်လိုက်သည်။
“သခင်လေးချန်…” ဝမ်ယုရန်က အနည်းငယ် စိုးရိမ်တကြီး ဖြစ်နေခဲ့သည်။
“မစိုးရိမ်နဲ့ … ကျုပ်က သူရဲကောင်း လုပ်ရတာကို မကြိုက်မှန်း မင်းလဲ သိတယ်..”
ချန်ဖုန်းက ဝမ်ယုရန်ကို နှစ်သိမ့်လိုက်ပြီး “ဒီသွေးဆူနေတဲ့ ကောင်က သိပ်မဆိုးမှန်း မင်းသိတာပဲ.. သူက ကျုပ်တို့ကို တကယ် မတိုက်ရဲပါဘူး.. ဒီလို နည်းလမ်းလေးတွေပဲ တတ်နိုင်တာ… ပြီးတော့ အဲဒီ နည်းလမ်းလေးတွေက ကျုပ်ကို ခြောက်လန့်ဖို့ပဲ မဟုတ်ဘူး ကျင့်ကြံရေး အဆင့် တက်သွားအောင်လည်း ကူညီပေးနိုင်သေးတယ်လေ… ကျုပ်က ဒီလိုမျိုး အခမဲ့ စမ်းသပ်ခွင့်ကို ဘယ်လို လက်လွတ် ခံလိုက်လို့ ဖြစ်ပါ့မလဲ …”
“ချန်ဖုန်း… သွားသေလိုက်စမ်း…”
ချန်ဖုန်း စကားများကို ကြားပြီးနောက် တည်ငြိမ်နေပြီ ဖြစ်သော ဂူကိုင်ကော၏ ဒေါသများ နောက်တစ်ခေါက် ပွက်ပွက်ဆူ လာပြန်သည်။
ထို့နောက် ဂူကိုင်ကော၏ အနောက်တွင် ရှိနေသော မြစ်ကြီးက ရုတ်တရက် အသက် ဝင်လာခဲ့သည်။
သရဲတောင်ကြား ပတ်ပတ်လည်ရှိ ပရိသတ်များက ထိုမြင်ကွင်းကြောင့် အသက်ရှူ မရနိုင်အောင် ဖြစ်နေကြသည်။
“အခု ချန်ဖုန်းမှာ အန္တရာယ် ရှိနေပြီ…”
“ဟုတ်တယ်… ကောင်းကင်မီးတောက် ဂူမိသားစုက ထူးခြားအံ့ဖွယ် သိုင်းဝိညာဉ်တွေ နဲ့အတူ ရှင်သန်နေကြတာ… ပြီးတော့ ဒီဂူကိုင်ကော ဆိုတာကလည်း ဂူမိသားစုရဲ့ အထူးချွန်ဆုံး ပါရမီရှင် တစ်ဦးပဲ … သူ့လက်ထဲက ပန်းချီကားနဲ့သာ ဆိုရင် ကောင်းကင်ဘုံအဆင့် ကျင့်ကြံသူတောင် သူ့ကို ဖက်ပြိုင်ဖို့ ခက်ခဲမှာပဲ …”
“ချန်ဖုန်းတစ်ယောက် ဒီလိုလူမျိုးနဲ့ တိုးမှတော့ အန္တရာယ် ရှိနေပြီ…”
ပရိသတ်ထဲတွင်လည်း မည်သူကမှ ချန်ဖုန်းအတွက် အကောင်းမြင်သော ထင်မြင်ချက် မရှိတော့ပေ။
သို့သော် ချန်ဖုန်းကမူ ယုံကြည်မှု အပြည့်အဝ ရှိနေခဲ့သည်။ အဘယ်ကြောင့်မူ သူသည် ကြွားဝါဖို့အတွက် မလုပ်ဆောင်သည့်အပြင် သူ့အစွမ်းဖြင့် လူများကို ဖိနှိပ်နိုင်စွမ်း ရှိသောကြောင့်လည်း ဖြစ်ပေသည်။ ချန်ဖုန်းက သူ့စွမ်းအား၏ ဆယ်ပုံတစ်ပုံကိုပင် ထုတ်လွှတ်ထားခြင်း မရှိပေ။
ယခုမူ ချန်ဖုန်းက မြေကမ္ဘာ တစ်ပိုင်းအဆင့် ကျင့်ကြံသူ ဖြစ်သည်။ သူ့စွမ်းအားများက မူလတိုက်ခိုက်သူထက် အားနည်းမနေချေ။ သူ၏ ထိပ်တန်း သိုင်းဝိညာဉ်ကို ထည့်ပေါင်း လိုက်ပါက ဂူကိုင်ကောက သူ့အား လွင့်ထွက်စေချင်လျှင်ပင် ဆုတောင်းနေရုံသာ ရှိတော့သည်။
ဂျိန်း…
ကြီးမြတ်သော မြစ်ကြီး လှိုက်တက်လာသည်။
ဂူကိုင်က သူ့မီးစွမ်းအားကို ထုတ်လွှင့်လိုက်သည်။ ဒြပ်စင်၏ ကြောက်မက်ဖွယ် သက်ရောက်မှုက စက်ဝိုင်းပုံသဏ္ဍာန် လှည့်ပတ်သွားပြီး တစ္ဆေမြူခိုး အလွှာများကို ပေါက်ကွဲ သွားစေသည်။
ထို့နောက် ရုတ်ခြည်း ချန်ဖုန်း ရှေ့မှောက် ရောက်၍ လာ၏။
လှိုင်းလုံးကြီးကို ရင်ဆိုင်ပြီး ချန်ဖုန်းက သူ့ကိုယ်တွင်းရှိ အရည်ဒြပ်စင်ကို အသက် သွင်းလိုက်ကာ ပထဆုံး အကြိမ်အဖြစ် အသုံးပြုလေသည်။ ထိုအခါ ခရမ်းရောင် ဝက်ဝံ တစ်ကောင်က ချန်ဖုန်းကို မ,တင်ပေးထားသည်။
ဘွန်း….
ဒြပ်စင်စွမ်းအားက ချန်ဖုန်းကို ရိုက်ခတ်သောအခါ ခရမ်းရောင် ဝက်ဝံကြီးက ပါးစပ်ကို ဟ၍ ဟိန်းဟောက် လိုက်သည်။
ထိုအချိန်၌ ချန်ဖုန်း ခန္ဓာကိုယ်ထဲရှိ ကိုးဆယ့်သုံးမျိုးသော ဆဲလ်များ၏ သက်ရောက်မှုက ပိုမို ကျယ်ပြန့် လာခဲ့သည်။ သွေးကြောထဲရှိ ဒြပ်စင်စွမ်းရည် အရည် ၉၉၀ က စီးချောင်း တစ်ခုအဖြစ် ချက်ချင်း သိပ်သည်း သွားသည်။ ထို့နောက် ဒြပ်စင်စွမ်းအင် စမ်းချောင်း တစ်ခု ဖြစ်တည်လာခဲ့သည်။
ချန်ဖုန်း၏ ခန္ဓာကိုယ်က ပေါက်ကွဲလာပြီး သူ့ဖိနပ်က သံကြိုးကို ပွတ်တိုက် နေကြသည်။
သို့သော် ချန်ဖုန်းက ဟားတိုက် ရယ်မောနေလျက် ရှိ၏။
အဘယ်ကြောင့်မူ ယခုတွင် အချိန် အကြာကြီး တင်းခံနေသော သူ့ကျင့်ကြံရေးက ဂူကိုင်ကော၏ လှိုင်းများကြောင့် အဆင့် တက်လာခဲ့ပြီ။
“ဘာတွေ ဖြစ်နေတာလဲ … အဲဒီချန်ဖုန်းက လေပေါ် လွှင့်ပစ်ခံနေရတာ အထင်းသားကြီးလေ… သူက ချောက်နက်ထဲ ပြုတ်ကျပြီး သေရတော့မှာကို ရယ်နေနိုင်သေးတယ်ပေါ့ ..”
“သူဘာလို့ ရယ်နေတာလဲ … အဲဒါက ရယ်ရတယ်ပေါ့ …”
အားလုံးက ချန်ဖုန်း ရယ်မောနေသည်ကို ကြည့်ရင်း ဇဝေဇဝါ ဖြစ်လာကြသည်။
သံကြိုးပေါ်က ဂူကိုင်ကောလည်း အလားတူ ပဟေဠိ ဖြစ်နေခဲ့သည်။ သို့သော် သူက မေးခွန်းများ ထူးထွေမေးမနေခဲ့ပေ။ ထိုအစား ချန်ဖုန်းဆီ အပြေးလာပြီး ချောက်နက်ထဲ တွန်းချပစ်ရန် ရည်ရွယ် ထားတော့သည်။
သို့သော် ချန်ဖုန်းဆီ သူ့စွမ်းအားများ ရောက်ရှိ သွားသည်နှင့် တစ်ခုခုဖြင့် မှားနေကြောင်း ချက်ချင်း ခံစားမိလိုက်၏။
အဘယ်ကြောင့်မူ သူ့တိုက်ကွက်ကို တောင့်ခံ ထားရသော ချန်ဖုန်းသည် သူမရပ်ခင် နောက်သို့ ခြေတစ်လှမ်း ပြန်ရုတ်သွားသောကြောင့် ဖြစ်လေသည်။
ဂူကိုင်ကောက အထိတ်တလန့်ဖြင့် သူ့နှလုံးသာ တဒိတ်ဒိတ် ခုန်သွားလေသည်။
“ဘာဖြစ်တာလဲ … ချန်ဖုန်းက ငါ့စွမ်းအားကို ငှားယူပြီး အဆင့် တက်သွားတာလား.. ဒါဘယ်လို ဖြစ်နိုင်မှာလဲ …”
***