သုခကမ္ဘာက ရှီဟောင် - Chapter - 1066 ပြန်လည်ထွက်ပေါ်လာခြင်း
အပြာရောင်ကျောက်လမ်းသုံးထောင်တွင် အစီအရင်အဆောင်များ တလူလူဖြစ်နေသည်။ အဆောင်များမှာ ဒါဇင်ပေါင်းများစွာရှိနေပြီး ဤအစီအရင်ကို အသက်သွင်းလိုက်သည်နှင့် ဤထဲသို့ ဝင်လာသည့်နတ်ဘုရားပေါင်းများစွာမှာ ချက်ချင်းသေဆုံးသွားမည်ပင်။
သူတို့သည် ဤအစီအရင်ကို ရက်ပေါင်းများစွာ ပြလုပ်ခဲ့ခြင်းဖြစ်ပြီး ကောင်းကင်ပစ္စည်းကိုလည်း အပုံလိုက် အသုံးပြုလိုက်ရသည်။
ရှီဟောင်သည် ထာဝရနန်းတော်သခင်လေး တိချုန်းကို သတ်ပြီး အလင်းတန်းမြို့ရှိ ကလန်ပေါင်းများစွာထံသို့ သွားလည်ထားခြင်းကြောင့်သာမဟုတ်ပါက ဤမျှနတ်ပစ္စည်းပမာဏများစွာကို သူစုဆောင်းနိုင်မည်မဟုတ်ပေ။ သူတို့၏တန်ဖိုးများမှာ တိုင်းတာ၍မရနိုင်လောက်အောင်ပင်။
“ငါတို့ဒီပစ္စည်းတွေကို နောက်ကျရင်လည်း သုံးလို့ရသေးတယ် … ဒီပစ္စည်းတွေအားလုံးက မှော်နဲ့ အစီအရင်အဆောင်တွေဖြစ်သွားပြီ .. အဲဒီတော့ငါတို့နေရာပြောင်းရင် သူတို့ကို သုံးလို့ရသေးတယ်” နတ်ဘုရားပစ်ချက်ကျောက်တုံးလေး ပြောလိုက်သည်။ သူသည် သတိလစ်လဲကျမတတ်ကို ပင်ပန်းနေပြီဖြစ်သည်။ ဤအရာအားလုံးကို ပြုလုပ်ရန် လူအင်အား၊ စိတ်အင်အား အများကြီး အသုံးပြုထားရသည်ပင်။
အစီအရင် ၁၀ ခု၏အလယ်တွင် ဖက်တီးလေး၏ သတ်ဖြတ်ခြင်းအစီအရင်၏ ရိုးရှင်းသည့်ပုံစံရှိနေသည်။ သူ၏လက်ရှိ ကျင့်ကြံဆင့်နှင့်ဆိုလျှင် သူသည် သင်္ကေတအားလုံးကို အသုံးမပြုနိုင်သေးပေ။
ဖက်တီးလေးသည် အပြင်လူများ ဤအစီအရင်ကို ကြည့်၍မနိုင်စေရန်အတွက် သူ၏နတ်အာရုံကို အသုံးပြုကာ ဤနတ်ပစ္စည်းများထဲတွင် သင်္ကေတများရေးထိုးထားသည်သာ။
အစီအရင်ကို အသက်သွင်းလိုက်သည့်အချိန်တွင် ဤနေရာမှာ ချက်ချင်းပင် ပြောင်းလဲသွားလေ၏။ အစီအရင်အဆောင်များ လူးလွန့်နေကာ တာအိုစင်္ကြံများလည်း တောက်ပနေသည်။ အလင်းလွှာ ၁၀ လွှာပေါ်လာပြီး ဤနေရာကို ကာကွယ်ပေးထားလေသည်။
ရှီဟောင်သည် အလယ်တွင် ထိုင်လိုက်ကာ “မင်းတို့နှစ်ယောက်က ယုံလို့ရလို့လား … ဒီသတ်ဖြတ်ခြင်းအစီအရင်တွေက ငါ့ကိုတော့ လာမရိုက်ခတ်လောက်ဘူးမလား”
“စိတ်လျော့ .. အဲဒီနေရာ အရမ်းလုံခြုံတယ် .. မင်းကို ထိခိုက်မှာမဟုတ်ဘူး” နတ်ဘုရားပစ်ချက် ကျောက်တုံးလေး ပြောလိုက်သည်။
“ငါက အပြာရောင်ကျောက်လမ်းရဲ့ သင်္ကေတမီးတောက်တွေကို သုံးပြီးတော့ ငါ့ခန္ဓာကိုယ်ကို လောင်ကျွမ်းအောင်လုပ်မှာ .. အဲဒါဆိုရင်ရော ဒီအစီအရင်တွေကို ထိခိုက်နိုင်လား” ရှီဟောင်မေးလိုက်၏။
“ငါအခု အတွင်းဘက်အကျဆုံး အစီအရင်ကို ဖယ်ထားလိုက်မယ် .. အဲဒါဆိုရင် အစီအရင်ကို အသက်မသွင်းနိုင်တော့ဘူး .. မူမမှန်တာဖြစ်လာရင် ငါအဲဒါကို ချက်ချင်းနေရာပြန်ရွေ့ပြီးတော့ အသက်သွင်းလိုက်မယ်” နတ်ဘုရားပစ်ချက်ကျောက်တုံးလေး ပြောလိုက်သည်။
သူတို့သည် ဖြစ်လာနိုင်သည့်ပြဿနာမျိုးစုံကို စဉ်းစားပြီး သေချာဆွေးနွေးခဲ့ကြသည်။ ဘာမှမဖြစ်နိုင်ကြောင်း သေချာသွားသည့်အချိန်မှသာ သူတို့၏တံခါးပိတ်ကျင့်ကြံခြင်းကို စတင်လိုက်သည်။
ရှီဟောင်သည် အရေးကြီးသည့်ပစ္စည်းအားလုံးကိုထုတ်ကာ သူတို့အားပေးထားလိုက်သည်။ အဘယ်ကြောင့်ဆိုသော် တာအိုမီးတောက် တစ်ထောင်ကျော်ကို သူ၏ခန္ဓာကိုယ်တွင် လောင်ကျွမ်းစေလိုက်လျှင် သူ၏အသွေးအသားများ ခမ်းခြောက်သွားမည်ဖြစ်ပြီး သူ၏ခန္ဓာကိုယ်လည်း ပျက်စီးသွားလိမ့်မည်။ ထိုအချိန်ကျလျှင် သူ၏ခန္ဓာကိုယ်ပေါ်တွင် သယ်ထားသည့် ပစ္စည်းများကိုပင် ကာကွယ်နိုင်ရန် ခက်ခဲလိမ့်မည်။
သူသည်ပါးစပ်ထဲတွင်သာ ဂျင်ဆင်းတစ်ဝက်သစ်သီးနှစ်လုံးကို ကိုက်ထားသည်။ သို့မှသာ အရေးကြီးသည့်အချိန်တွင် သူ့အသက်ကို ကယ်နိုင်လိမ့်မည်။
ဒုန်း..
တာအိုလေ့လာခြင်းကျောက်တုံးကို အပြာရောင်ကျောက်လမ်းပေါ်သို့ ချလိုက်သည့်အချိန်တွင် ဤနေရာတစ်ခုလုံး တုန်ခါသွားသော်လည်း ဤနေရာကိုတော့ မပျက်စီးစေပေ။ ဤထူးဆန်းသည့်ကျောက်တုံးသည် မီးခိုးရောင်ရှိပြီး အလွန်ပင်သာမန်ဆန်သော်လည်း သူ၏အစွမ်းမှာ သာမန်မဆန်ပေ။
ရှီဟောင်သည် ထိုကျောက်တုံးပေါ်တွင် ထိုင်ချလိုက်ကာ သီးသန့်ကျင့်ကြံခြင်းတွင် အသုံးပြုရန်အတွက် ပြင်ဆင်ထားလိုက်သည်။
“ပစ္စည်းကောင်းပဲ” အပြင်ဘက်တွင်ရှိနေသည့် နတ်ဘုရားပစ်ချက်ကျောက်တုံးလေး၊ ဖက်တီးလေးနှင့် ချင်းရိတို့အားလုံး အလွန်ပင် ပျော်ရွှင်သွားကြသည်။ ဘိုးဘေးများ၏ အမြင်များကို ရေးသားထားသည့် အရိုးစာအုပ်အပုံလိုက်လည်း ရှိနေသေးသည်။
ရှီဟောင်သည် ထာဝရနန်းတော်သခင်လေးကို သတ်လိုက်ခြင်းမှ အဖိုးတန်ပစ္စည်းအတော်များများကို ရလိုက်သည်။
သို့သော် ကံမကောင်းစွာဖြင့်ပင် ထာဝရနန်းတော်၏ အကောင်းဆုံးအဖိုးတန် နတ်စွမ်းရည်များကိုမူ မရလိုက်ပေ။ ဤသည်မှာ သူ့အား အတော်လေးပင် ဝမ်းနည်းစေလေသည်။ သို့သော်လည်း သူရရှိလိုက်သည့်အရာများမှာ အခြားသူများကို ရူးသွပ်သွားစေနိုင်လောက်သည့်အရာများပင်။
“နတ်တစ်ဝက်အသီးတွေ အပြည့်နဲ့ ခြင်းကြီး..” ယုန်ဖြူလေးသည် ထိတ်လန့်တကြားပင် အော်ဟစ်လိုက်သည်။ ထို့နောက်တွင် သူသည် ထိုခြင်းကို ဆွဲယူလိုက်ကာ ခုန်ပေါက်နေလေသည်။
သူမ ထိုအသီးများကို မစားချင်ပေ။ မည်သည့်ဝိဉာဉ်ဆေးပင်မဆို တစ်ပင်တည်းဖြင့် လုံလောက်ပါသည်။ သူမသည် ထိုအသီးများထဲမှ အသက်စွမ်းအင်ကို နားလည်အောင်လုပ်ရန်သာလိုအပ်သည်။ ယခုအချိန်တွင် အသီးမျိုးစုံကို တွေ့လိုက်ရသောကြောင့် သူမအလွန်ပျော်ရွှင်သွားရသည်သာ။
ရှီဟောင်သည် အလွန်ပင် ရက်ရောလှကာ ဤအသီးများကို သုံးချင်လျှင် သုံးနိုင်ကြောင်း ပြောလိုက်လေသည်။
“ကောင်းပြီလေ .. ငါစတော့မယ်”
သူ တာအိုလေ့လာခြင်းကျောက်တုံးပေါ်တွင် မလှုပ်မယှက်ထိုင်ချလိုက်ပြီးနောက် အားလုံးတိတ်ဆိတ်သွားလေသည်။ ရုတ်တရက်ပင် အပြာရောင်ကျောက်လမ်းများတောက်ပလာပြီး အလင်းများလည်း တစ်ခုပြီးတစ်ခု တောက်ပလာလေသည်။
နတ်မီးတောက်များ ထွက်ပေါ်လာပြီး ဤနေရာတစ်ခုလုံးကို လွှမ်းခြုံသွားလေသည်။ ကောင်းကင်ကြီးမှာ အလွန်ပင် တောက်ပလာပြီး တိမ်များလည်း လောင်ကျွမ်းသွားလေသည်။
“တကယ်မိုက်တာပဲ..” ချောင်ယုရှန်း သက်ပြင်းချလိုက်သည်။
“ဒီကောင်ရူးနေတာလား … သူ့ကိုသူ အရှင်လတ်လတ်ချက်စားချင်လို့ ဒီလိုမျိုး လောင်ကျွမ်းအောင်လုပ်နေတာလား” ယုန်ဖြူလေးမှာ သူ့ခေါင်းကို ခေါက်သွားသောကြောင့် ရှီဟောင်အား မကျေနပ်သေးပေ။
အချိန်မည်မျှကြာသွားမှန်းမသိလိုက်သည့်အချိန်မှာပင် ရှီဟောင်အနား၌ မီးတောက်ပေါင်း ၁၅၀၀ ပေါ်လာလေသည်။ ထိုမီးတောက်မှာ တစ်ဖြည်းဖြည်းဖြင့် တိုးများလာပြီး ၁၆၀၀ နားသို့ ရောက်နေလေပြီ။
“ငါ့ရဲ့ အဆင့်လွန်သွေး နှိုးထလာတော့ မီးတောက်တွေကို ခုခံနိုင်စွမ်းကလည်း နည်းနည်းလေး တိုးလာတာပဲ” ရှီဟောင် အံ့အားသင့်သွားရသည်။
ယခင်ကဆိုလျှင် သူ့တစ်ကိုယ်လုံး မည်းတူးနေလောက်လေပြီ။
သို့သော်လည်း အချိန်ကြာလာသည်နှင့်အမျှ မီးတောက်များမှာ ပို၍အားကောင်းလာသည်။ ၁၆၀၀ မြောက်မီးတောက်ကို ရောက်သွားသည့်အချိန်တွင် သူ၏ဒဏ်ရာများ ပြင်းထန်လာသည်။ သူ၏အရေပြားများ အက်ကွဲလာပြီး အသားများလည်း ကွဲထွက်လာသည်။ သူ၏ခန္ဓာကိုယ်တစ်ခုလုံးကို သင်္ကေတများ သိပ်သည်းစွာ ဖုံးလွှမ်းသွားပြီး ထိုသင်္ကေတများမှာ သူ၏အရိုးများနှင့် ကြွက်သားများထံသို့ ဦးတည်သွားလေသည်။
လေဟာနယ်ထဲမှ ဖန်တီးထားသည့် မီးဖိုလည်း ယခုအချိန်တွင် ပျက်စီးတော့မည်။ သူ၏ခန္ဓာကိုယ်မှာလည်း မီးသွေးပုံဖြစ်တော့မည်။
“လုံးဝကျက်သွားပြီ .. အသားနံ့လေးက လေထဲမှာ မွှေးနေတာပဲ .. ငါနောက်တစ်ခေါက် ထပ်သောက်ချင်လာပြီ” ယုန်ဖြူလေး ပြောလိုက်သည်။
ကံကောင်းစွာဖြင့်ပင် ရှီဟောင်သည် သူတို့နှင့် သီးသန့်ဖြစ်နေသောကြောင့် ဤစကားများကို မကြားလိုက်နိုင်ပေ။ မဟုတ်ပါက သူမနောက်တစ်ခေါက် ထပ်ရိုက်ခံရလိမ့်မည်။
ဖုန်း..
သင်္ကေတများမှ အသွေးအသားများကို သန့်စင်ပြီးသွားသည့်အချိန်တွင် ကျောက်လမ်းများမှ ကျမ်းစာသံများ ထွက်ပေါ်လာသည်။ ရှီဟောင်၏ခန္ဓာကိုယ်မှာ တုန်ယင်လာလေ၏။ သူသည် ထိုတာအိုများတွင်သာ စိတ်နှစ်ထားလိုက်လေသည်။
နောက်ဆုံးတွင် သူသည် ဟစ်ကြွေးသံတစ်ခုကို ပြုလုပ်လိုက်ပြီး မီးဖိုကို ဖျက်ဆီးလိုက်သည်။ မရေမတွက်နိုင်သည့်သင်္ကေတများမှာ သူ့အနားမှ ထွက်ခွာသွားကြလေ၏။ သူသည် လေဟာနယ်ထဲတွင် ထိုင်နေကာ တာအိုလေ့လာခြင်းကျောက်တုံးပေါ်သို့ ဆင်းသက်လာလေ၏။
၁၆၀၀ သောမီးတောက်များ ထွက်ခွာသွားသည်နှင့် ဤနေရာမှာ တိတ်ဆိတ်သွားလေသည်။ ရှီဟောင်သည် မလှုပ်မယှက်ဖြင့် တာအိုများကို လေ့လာနေဆဲပင်။
“ကြောက်စရာကောင်းလိုက်တာ .. ဒါက ကိုယ့်ကိုကိုယ်နှိပ်စက်ပြီးတော့ ကိုယ့်အသက်ကိုကိုယ် လောင်းကစား လုပ်နေတာပဲ”
ချောင်ယုရှန်းသက်ပြင်းချလိုက်ကာ သူသည်လည်း သူ၏တာအိုကို လေ့လာနေလိုက်သည်။
ယခုတစ်ကြိမ်တွင် ရှီဟောင်သည် ယခင်အခေါက်များထက်ပင် ပိုမြန်နေသေးသည်။ သို့သော်လည်း ဒဏ်ရာများမှာ ယခင်ကကဲ့သို့ပင် ပြင်းထန်လှသည်။ သူ၏ပါးစပ်ထဲတွင်ရှိနေသည့် နတ်တစ်ဝက်သစ်သီးသည် အရည်ပျော်ကျသွားပြီး သူ၏ခန္ဓာကိုယ်ထဲသို့ စီးဆင်းသွားလေ၏။
နတ်ဘုရားပစ်ချက်ကျောက်တုံးလေးသည် ရှီဟောင်၏ဒဏ်ရာများ သက်သာစေရန်အတွက် မြင့်မြတ်ဆေးပင်အချို့နှင့် နတ်တစ်ဝက်သီးများကို ပစ်ပေးလိုက်သည်။
ပုံမှန်မဟုတ်သည့်အရာများမှာ ယခုတစ်ကြိမ်တွင်တော့ မဖြစ်ခဲ့ပေ။
ရှီဟောင်သည် ထိုကဲ့သို့ပင် ဆက်လက်ကျင့်ကြံနေခဲ့သည်။ သူ၏ဒဏ်ရာများ ပျောက်ကင်းသွားပြီးသည့်နောက်တွင် သူသည် တာအိုသင်္ကေတမီးတောက်များကို အသုံးပြုကာ သူ၏ခန္ဓာကိုယ်ကို ပြုပြင်လိုက်သည်။
၁၈၀၀၊ ၁၉၀၀၊ ၂၀၀၀….
“လာနေပြီ…”
မီးတောက် ၂၁၀၀ ကိုအသုံးပြုပြီးသွားပြီး ရှီဟောင်ပြန်လည်ကောင်းမွန်လာသည့်အချိန်တွင် ထူးဆန်းသည့်စွမ်းအင်လှိုင်းရောက်ရှိလာပြီး ဤနေရာကို ဝန်းရံသွားလေသည်။
နတ်ဘုရားပစ်ချက်ကျောက်တုံးလေးနှင့် အခြားသူများအားလုံးလည်း အစီအရင်အတွင်းသို့ ဝင်လာလိုက်ကြပြီး ဗဟိုချက်ကျသည့်အစီအရင်ကို အသက်သွင်းလိုက်သည်။ အကန့်အသတ်မရှိသည့် အလင်းအကာအကွယ်များ ထွက်ပေါ်လာပြီး ဤနေရာကို ဝန်းရံသွားလေသည်။
ရှေးဟောင်းမီးအိမ်တစ်လုံးသည် ဖြေးညှင်းစွာဖြင့်ပင် ရောက်လာလေသည်။ ဤမီးအိမ်မှာတောက်ပနေသော်လည်း အေးစက်သည့်ခံစားချက်များထုတ်လွှတ်နေလေသည်။ ထိုမီးအိမ်သည် အစီအရင်အတွင်းသို့ ဝင်ရောက်လာပြီး ရှီဟောင်၏ဦးခေါင်းထက် ကျန်းတစ်ရာအကွာတွင် ရပ်တန့်နေလေသည်။
နတ်ဘုရားပစ်ချက်ကျောက်တုံးလေးသည် ထူးဆန်းစွာပင် အော်ဟစ်လိုက်သည်။ ဤသည်မှာ ထူးဆန်းလွန်းလှသည်။ သူ၏အစီအရင်မှာ ဘာမှအသုံးမဝင်ပေ။ ထိုရှေးဟောင်းမီးအိမ်သည် အရာအားလုံးကို လျစ်လျူရှုပြီး သရဲတစ်ကောင်ကဲ့သို့ပင် အစီအရင်ထဲသို့ ဝင်ရောက်လာလေသည်။
“ဘာဖြစ်နေတာလဲ” ချောင်ယုရှန်း၏အမူအရာ ပြောင်းလဲသွားလေသည်။
ချင်းရိသည် အစိမ်းရောင်လကို အသက်သွင်းလိုက်ကာ ဤရှေးဟောင်းမီးတောက်ကို ငြိမ်းသတ်နိုင်ရန်အတွက် အသင့်ပြင်ထားလိုက်သည်။
“ဒါက တကယ်ထူးဆန်းတယ်” ယုန်ဖြူလေးမှာ အလွန်ပင် စိုးရိမ်လာသည်။
ထိုရှေးဟောင်းမီးအိမ်သည် လွှဲရမ်းနေကာ လေထဲတွင်လည်း မီးခိုးရောင်မြူများ ရစ်ဆိုင်းလာလေ၏။ ထိုမြူခိုးများသည် ဤနေရာကို လွှမ်းခြုံသွားကာ အစီအရင်ကို ဖြတ်ကျော်သွားလေသည်။
“ရှီဟောင် သက်ပြင်းချလိုက်သည်။ “မင်းတို့အားလုံး နောက်ဆုတ်လိုက်ကြတော့ .. ဒီအရာက ငါ့ကိုလာရှာတာ .. ငါကိုယ်တိုင်မဖြေရှင်းရင် ဒီကိစ္စကို ရှင်းလို့ရမှာမဟုတ်ဘူး”
သူတစ်ဖြည်းဖြည်းချင်း နားလည်သွားရသည်။ သူတို့နှစ်ဦးထဲမှ တစ်ယောက်မသေလျှင် ဤကိစ္စပြီးဆုံးမည်မဟုတ်ပေ။ ဤအရာကို အပြင်ဘက်လူမှ ဝင်ရောက် မစွက်ဖက်နိုင်ပေ။ အစီအရင်များပင်လျှင် သူ့ကို မတားဆီးနိုင်ပေ။ ဤနေရာကို ဝန်းရံထားသည့် ထူးဆန်းသည့်စွမ်းအားတစ်ခု ရှိနေလေ၏။
သူထပ်ခါတလဲလဲသတိပေးနေသောကြောင့် ထိုလူများ ပြန်ထွက်သွားလိုက်ကြသည်။
ထိုမီးခိုးရောင်မြူထဲမှ ပုံရိပ်တစ်ခု လျှောက်ထွက်လာလေသည်။ ထိုပုံရိပ်ထံမှ မည်သည့်အသက်လှိုင်းမှ ထွက်မလာပေ။ ဤသည်မှာ နတ်ဆိုးတောင်တစ်လုံးကဲ့သို့ပင်။
ရှီဟောင်သည် ယခင်က အတွေ့အကြုံရှိထားသောကြောင့် သူ၏နတ်စွမ်းရည်များကို ချက်ချင်းအသုံးမပြုတော့ပေ။ တစ်ဖက်လူမှ သူ၏ပညာများကို အသုံးပြုပြီး သူ့အားသတ်လိုက်မည်ကို စိုးရိမ်သောကြောင့်ပင်။
သို့သော် ယခုတစ်ခေါက် သူတွေးတာ များသွားလေပြီ။ ဤလူသည် အစကတည်းက သူ၏အရက်စက်ဆုံးပညာများဖြင့် တိုက်ခိုက်လာလေ၏။
ဤသက်ရှိသည် လူသားဧကရာဇ်တစ်ယောက်ကဲ့သို့ပင် ကောင်းကင်ရဲဒင်းကို ကိုင်ထားလေ၏။ သူ၏အော်ရာမှာ ရေလှိုင်းတစ်ခုကဲ့သို့ပင် ထွက်ပေါ်လာလေ၏။ ထိုအော်ရာများသည် ရှီဟောင်ထံသို့ ဦးတည်လာလေ၏။
မီးခိုးရောင်မြူများ ဝန်းရံနေသောကြောင့် သူ၏ပုံပန်းသွင်ပြင်အမှန်ကို မမြင်ရပေ။ မီးခိုးရောင်ဖြစ်နေသည့် သူ၏မျက်လုံးကိုသာ မြင်နေရလေသည်။
ဒုန်း…
ရှီဟောင်သည် လေဟာနယ်ရဲဒင်းကို ထုတ်လိုက်ပြီး ထိုရိုက်ချက်ကို ခုခံလိုက်သည်။ သူ၏လက်မောင်းများမှာ ချက်ချင်းပင် ထုံကျဉ်သွားလေ၏။ နာကျင်မှုများမှာ သူ၏လက်ချောင်းများထိသို့ပင် ရောက်ရှိလာသည်။
မီးပွားများမှာ နေရာအနှံ့သို့ လွင့်စင်သွားလေ၏။
ခပ်ဝေးဝေးတွင်ရှိနေသည့် ချင်းရိနှင့် အခြားသူများအားလုံး၏ အမူအရာများ ပြောင်းလဲသွားကြသည်။ ဤသက်ရှိမှာ စွမ်းအားကြီးလွန်းလှပြီး မကုန်ဆုံးနိုင်သည့် ခွန်အားများကို ပိုင်ဆိုင်ထားလေသည်။
ဒုန်း ဒုန်း..
သင်္ကေတများ ထွက်ပေါ်လာပြီး နတ်အလင်းများလည်း ကောင်းကင်ထက်သို့ တရှိန်ထိုး တက်သွားလေသည်။ ရဲဒင်းများထိခတ်မိသည့်အသံမှာ ကောင်းကင်ကိုပင် တုန်လှုပ်သွားစေနိုင်လေသည်။
“သူက ဘယ်လိုလုပ် ရှီဟောင်လောက် ခွန်အားကြီးနေရတာလဲ” ချင်းရိ ပြောလိုက်သည်။ သူမ သဲလွန်စအချို့ကို သတိပြုမိသွားသည်။ သူတို့သုံးသည့် သင်္ကေတများနှင့် အဖိုးတန်ပညာများမှာ အလွန်တူညီလွန်းနေသည်။
“ဟုတ်တယ် .. အကုန်အတူတူပဲ .. ဒါက ကိုယ့်ကိုကိုယ် ပြန်တိုက်နေရတာနဲ့ အတူတူပဲ” ချောင်ယုရှင်း၏အမူအရာများ လေးနက်သွားရသည်။
“အစီအရင်တွေကို ပြန်ဖယ်လိုက်” ရှီဟောင် အော်ဟစ်လိုက်သည်။
ထိုစကားကို ကြားလိုက်ရသည့်အချိန်တွင် နတ်ဘုရားပစ်ချက်ကျောက်တုံးလေးသည် အစီအရင်အဆောင်များကို ချက်ချင်းပင် ဖယ်ရှားလိုက်သည်။
“မကောင်းတော့ဘူး .. နောက်တစ်ယောက်လာနေပြီ” ယုန်ဖြူလေး အော်ဟစ်လိုက်သည်။
ခြေသံများ ကြားလာရပြီး မီးခိုးရောင်မြူထဲတွင် အခြားမျက်လုံးတစ်စုံ ထွက်ပေါ်လာသည်။ ထိုပုံရိပ်သည်လည်း ကောင်းကင်ရဲဒင်းကို ကိုင်ဆောင်ထားပြီး သတ်ဖြတ်လိုသည့်အငွေ့အသက်များ ထုတ်လွှတ်ကာ သူ့ထံသို့ လျှောက်လာလေသည်။
ဝုန်း..
ဤသက်ရှိ၏ခွန်အားမှာ ယခင်တစ်ယောက်နှင့်အတူတူဖြစ်သကဲ့သို့ ရှီဟောင်နှင့်လည်း အတူတူပင်။
ဤတိုက်ပွဲမှာ ခက်ခဲလွန်းလှပြီး မျှော်လင့်ချက် ရေးရေးလေးတောင် မရှိပေ။
ချင်းရိ၊ နတ်ဘုရားပစ်ချက်ကျောက်တုံးလေးနှင့် အခြားသူများအားလုံး ကြက်သီးများ ထသွားရသည်။ ဤသက်ရှိနှစ်ယောက်မှာ ရှီဟောင်နှင့်တူလွန်းလှသည်။ သူက ဘယ်လိုလုပ် တိုက်ခိုက်နိုင်တော့မည်နည်း…
လေဟာနယ်ကောင်းကင်နတ်နွယ်ပင်သည် ကောင်းကင်နှင့်မြေကြီးရှုံ့အိတ်လေးထဲမှ ခေါင်းထောင်ကြည့်လာသော်လည်း ထွက်မလာရဲပေ။
ယခုတစ်ကြိမ်တွင် ရှီဟောင်နောက်တစ်ကြိမ် တိတ်ဆိတ်သွားရသည်။ အချိန်တစ်ခဏခန့် ငြိမ်နေပြီးသည့်နောက်တွင် သူသည် အဆုံးမရှိသည့် သင်္ကေတများကို ထုတ်လွှတ်ကာ သွေးလွှမ်းသည့်တိုက်ပွဲကို ဖန်တီးလိုက်သည်။
ဤနေရာမှာ ဖရိုဖရဲဖြစ်လာပြီး တာအိုအသံများ ထွက်ပေါ်လာကာ အဖိုးတန်ပညာများလည်း ကောင်းကင်ထက်သို့ တရှိန်ထိုး ပြေးတက်သွားလေသည်။
“သူတို့တွေက ပုံစံတူပေမယ့် သူတို့သုံးတဲ့ အဖိုးတန်ပညာတွေကတော့ ရှီဟောင်သုံးတာနဲ့ တစ်ထပ်တည်းတူတာမဟုတ်ဘူး .. ဆင်နေရုံလေးပဲ” ချင်းရိ ပြောလိုက်သည်။
“ငါတို့ တိုက်လိုက်ရင် ဘာဖြစ်သွားမလဲ” ချောင်ယုရှန်း မေးလိုက်သည်။
ယုန်ဖြူလေးသည် တစ်ခဏခန့် စဉ်းစားပြီးသည့်နောက်တွင် လက်ညှိုးတစ်ချောင်း ညွှန်လိုက်သည်နှင့် ယင်စွမ်းအင်များသည် နတ်အလင်းတန်းတစ်ခုအဖြစ်သို့ ပြောင်းလဲသွားလေသည်။ ထိုနတ်အလင်းတန်းသည် စစ်မြေပြင်ထဲသို့ ပြေးဝင်သွားလေ၏။ အခြားသင်္ကေတတစ်ခုလည်း ပေါ်လာကာ ရှီဟောင်ထံသို့ တရှိန်ထိုး ပြေးဝင်သွားလေသည်။
ဒုန်း…
အလင်းတန်းတစ်ခုသည် ထူးဆန်းသည့်သက်ရှိ၏ ကောင်းကင်ရဲဒင်းပေါ်သို့ကျရောက်သွားပြီး အခြားအလင်းတန်းတစ်ခုမှာ ရှီဟောင်၏ရဲဒင်းပေါ်သို့ ကျရောက်သွားကာ မီးပွားများ လွင့်ထွက်လာလေသည်။
“မကောင်းဘူး .. ငါတို့ အလောတကြီးလုပ်လို့မရဘူး .. ဒါက သဘာဝဥပဒေသတစ်မျိုးနဲ့တူတယ် … ဒီနေရာမှာ အသက်ဝင်နေတဲ့ ထူးဆန်းတဲ့စွမ်းအားတစ်မျိုးပဲ” ချင်းရိ ပြောလိုက်သည်။
ရှီဟောင်သည် မတူညီသည့် နည်းလမ်းများကို အသုံးပြုရန် စဉ်းစားနေမိသည်။ သူသည် ယခင်က သုံးခဲ့သည့်ပညာများအားလုံးကို ဆက်စပ်လိုက်ပြီး ရူးသွပ်စွာပင် တိုက်ခိုက်လိုက်သည်။
သို့သော်လည်း ဤသည်မှာ အသုံးမဝင်ပေ။
ထိုသက်ရှိနှစ်ယောက် ပူးပေါင်းကာ သူ့အားတိုက်ခိုက်နေခြင်းပင်။ ယခုအချိန်တွင် သူ၏ခန္ဓာကိုယ်ပေါ်၌ ပြင်းထန်သည့်ဒဏ်ရာများ ရရှိနေလေပြီ။ ဤသည်မှာ သူနှင့်တူသည့် လူနှစ်ယောက်ကို တစ်ပြိုင်တည်း တိုက်ခိုက်နေရသလိုပင်။ ဤသည်မှာ သူ၏ကန့်သတ်ချက်ကို စိန်ခေါ်နေခြင်းပင်။
“ငါ့ရဲ့ ကန့်သတ်ချက်ကို စိန်ခေါ်နေတာလား .. ငါ့ကိုယ်ငါထက် ပိုပြီးတော့ ကျော်လွန်နေရမှာလား” ရှီဟောင်၏ခန္ဓာကိုယ်တစ်ခုလုံးတွင် သွေးများဖုံးလွှမ်းနေလေပြီ။ အစောပိုင်းက ရဲဒင်း၏ရိုက်ချက်ကြောင့် သူနှစ်ပိုင်းပြတ်မလို ဖြစ်သွားသေးသည်။
အား..
ရှီဟောင် ဟစ်ကြွေးလိုက်ပြီးနောက် သူ၏ခန္ဓာကိုယ်လည်း တောက်ပလာသည်။ နတ်သင်္ကေတမျိုးစုံထွက်ပေါ်လာပြီး ဤသက်ရှိနှစ်ယောက်ကို ရင်ဆိုင်နိုင်ရန်အတွက် သူ၏ခန္ဓာကိုယ် အသက်ဓာတ်ကို အသုံးပြုလိုက်သည်။
ဖုန်း..
သို့သော်လည်း သူ၏ခန္ဓာကိုယ် လွင့်ထွက်သွားပြီး သူ၏ခန္ဓာကိုယ်လည်း စုတ်ပြတ်နေကာ သေမလိုဖြစ်နေလေပြီ။
“ငါ့ရဲ့ ကန့်သတ်ချက်က သူတို့ရဲ့ ကန့်သတ်ချက်လည်း ဟုတ်တယ် .. ငါ တစ်ခြားနည်းလမ်းစဉ်းစားရမယ်” ရှီဟောင် လျင်မြန်စွာ စဉ်းစားလိုက်သည်။
သူသည် ပြင်းထန်သည့်ဒဏ်ရာများဖြင့်ပင် ဤနှစ်ယောက်ကို ဆက်တိုက်နေသည်။ သူ၏ခန္ဓာကိုယ်ထဲတွင်ရှိနေသည့် အဆင့်လွန်သွေးများသည် ငြင်သာစွာပင် စီးဆင်းနေပြီး သင်္ကေတနှစ်မျိုးကို ပေါင်းစည်းလိုက်သည်။
“ကန့်သတ်ချက်ကို ဖျက်ဆီးမယ်…”
“ဖူး…”
ထိုနှစ်ယောက်ထဲမှ တစ်ယောက် လွင့်ထွက်သွားသော်လည်း ရှီဟောင်၏ညာလက်မှာ ပြင်းထန်စွာပင် ဒဏ်ရာရရှိသွားသည်။ ရဲဒင်းအသွားမှာ သူ၏အရိုးများထဲသို့ပင် ဝင်ရောက်သွားသည်။
“ချိုးဖျက်မှုကို .. ပဲ့တင်ထပ်အောင် လုပ်မယ်”
မွေးရာပါ အဖိုးတန်ပညာနှစ်ခုမှာ တစ်ခုတည်းကဲ့သို့ပင် ပေါင်းစည်းသွားလေသည်။ ထိုသို့ပေါင်းစည်းလိုက်သည်နှင့် စွမ်းအားများလည်း အလွန်တိုးတက်လာသည်။
“သတ်…”
ရှီဟောင် ဒေါသတကြီး ဟစ်ကြွေးလိုက်သည်။ အဆင့်လွန်သွေးများ ထွက်ပေါ်လာပြီး သူ၏ခြေလက်လေးချောင်းနှင့် အရိုးပေါင်းတစ်ရာထံသို့ စီးဆင်းသွားလေသည်။ ထိုသင်္ကေတများမှာ တစ်ဖြည်းဖြည်းပင် တောက်ပလာလေသည်။
သူ၏ခန္ဓာကိုယ်အနားတွင် ထာဝရစွမ်းအင် မှုန်ဝါးဝါးလေးကို မြင်နေရလေသည်။
ဝုန်း..
အဆင့်လွန်ပညာများ ထွက်ပေါ်လာလေပြီ။ သူသည် အရှေ့ဘက်သို့ ခြေလှမ်းကျယ်ပြီး လျှောက်လိုက်ကာ ထိုနှစ်ယောက်နှင့် တိုက်ခိုက်လိုက်သည့်အချိန်တွင် သူ၏နတ်ခွန်အားများထွက်ပေါ်လာပြီး မှော်စွမ်းအားများလည်း ပင်လယ်တစ်စင်းကဲ့သို့ပင် ထွက်ပေါ်လာလေသည်။ သူ၏အသွေးအသားများလည်း အနည်းငယ် ပို၍ စွမ်းအားကြီးလာသည်။
ဖူး ဖူး..
အသံနှစ်သံ ထွက်ပေါ်လာလေ၏။ သူသည် ဤသက်ရှိကို သတ်နိုင်ရန်အတွက် သင်္ကေတများကို ပေါင်းစပ်အသုံးပြုလိုက်ရခြင်းပင်။ သူတို့၏စုတ်ပြတ်နေသည့် ခန္ဓာကိုယ်များသည် အပြာရောင်ကျောက်လမ်းပေါ်သို့ ပြုတ်ကျသွားလေသည်။
ထိုအချိန်တွင် ရှီဟောင်သည် စစ်မြေပြင်တွင် တစ်ယောက်တည်း ရပ်နေပြီး သူ၏ခန္ဓာကိုယ်နှင့် စိတ်မှာ ကြည်လင်နေလေသည်။ သူ့ကိုယ်သူ ပြန်သုံးသပ်နေခြင်းပင်။ သင်္ကေတနှစ်မျိုးမှာ တစ်မျိုးတည်းအဖြစ် ပေါင်းစည်းနိုင်နေသည်…
သူသည် ဤကပ်ဆိုးကြီးကို ကျော်လွှားလိုက်နိုင်ယုံသာမက အကျိုးကျေးဇူးများစွာလည်း ရရှိခဲ့သည်။
ထို့အပြင် ထာဝရစွမ်းအင်တစ်ကြောင်းလည်း သူ့ခန္ဓာကိုယ်တစ်ဝိုက်တွင် ပေါ်လာလေသည်။ ဤသည်မှာ သူဤလမ်းကြောင်းတွင် အဆင့်တက်နိုင်သွားပြီဟု ဆိုလိုခြင်းပင်။
“ငါလမ်းဆုံးရောက်တော့မယ် .. မီးတောက်သုံးထောင်လုံးကို သုံးပြီးတော့ ငါ့ကိုယ်ငါ လောင်ကျွမ်းပစ်မယ်” ရှီဟောင် ခိုင်မာစွာပင် ဆုံးဖြတ်ချက် ချလိုက်သည်။