သုခကမ္ဘာက ရှီဟောင် - Chapter - 1069 လမ်းသုံးထောင်၏လမ်းဆုံး
သူ၏အသွေးအသားထဲတွင် အလင်းရောင်လေးတစ်ခုကို မြင်နေရပြီး ထိုအလင်းရောင်သည် တည်ငြိမ်နေကာ မလှုပ်မယှက်ပင် ရှိနေလေသည်။
ကောင်းကင်မျက်လုံးနှင့်ဆိုလျှင်ပင် ဤအလင်းလေးကို မှုန်ဝါးဝါးသာ မြင်နေရလေသည်။ သို့သော်လည်း ဤမီးတောက်ကို သူအလွန်ရင်းနှီးနေသည်။ ယခင်ကတည်း ဤမီးတောက်ကို သူတွေ့ဖူးသည်။
“အဲဒီမီးတောက်က တကယ်ငါ့ခန္ဓာကိုယ်ထဲကို ဝင်သွားတာလား .. ငါတစ်ခါမှသတိမပြုမိခဲ့ဘူး .. ဒါပေမဲ့ ဒါက ငါ့ကိုလည်း မထိခိုက်စေပါဘူး”
ရှီဟောင် အလွန်ပင် ထိတ်လန့်သွားရသည်။ ဤသည်မှာ အလွန်ထူးဆန်းသည့် အခေါင်းကိုးခုအနားတွင် ရှိနေခဲ့သည့် မီးတောက်ပင်။ ဤမီးတောက်သည် အစိမ်းရောင်လမီးတောက်ကိုပင် မောင်းထုတ်ခဲ့နိုင်သောကြောင့် ဤမီးတောက်မှာ မည်မျှပင်စွမ်းအားကြီးသည်ကို ခန့်မှန်းကြည့်နိုင်သည်။
ဤမီးတောက်သည် နတ်ဆိုးများအားလုံးကို လောင်ကျွမ်းအောင် ပြုလုပ်နိုင်ကြောင်း ချီသော်လင်း ပြောသည်ကို သူကြားဖူးသည်။ ရှု့ထောင့်အချို့မှ ကြည့်မည်ဆိုလျှင် ဤသည်မှာ မီးတောက်တစ်ခုဟု သတ်မှတ်၍မရပေ။ အဘယ်ကြောင့်ဆိုသော် ဤသည်မှာ သင်္ကေတများဖြင့် ပြုလုပ်ထားသောကြောင့်ပင်။
သူ့ကို မီးတောက်ဟုခေါ်ရခြင်းမှာ ဤထူးဆန်းသည့်သင်္ကေတမှာ တောက်ပနေသောကြောင့်ပင်။
သူကဘယ်လိုလုပ် အဲဒီမီးတောက်ကို ဆင့်ခေါ်ပြီးတော့ ယူနိုင်ခဲ့တာလဲ.. ထိုထူးဆန်းသည့်သင်္ကေတများတွင် များပြားလှသည့် လျှို့ဝှက်ချက်များပါဝင်နေလေသည်။ သူသာ ဤသင်္ကေတများကို နားလည်အောင်လုပ်နိုင်ပါက ဤထူးဆန်းသည့်အရာများကို ကျော်ဖြတ်နိုင်မည့် အဖြေရှိလာနိုင်သည်။
ဘယ်နှယောက်ပဲလာလာ သူတို့အားလုံးကို မီးလောင်တိုက်သွင်းပစ်မည်ပင်။
ရှီဟောင် ထိုမီးတောက်နှင့် ဆက်သွယ်နိုင်ရန် ကြိုးစားခဲ့သော်လည်း ထိုမီးတောက်မှာ မလှုပ်မယှက်ပင်။
နောက်ရက်အနည်းငယ်တွင် ရှီဟောင်သည် သူ၏နတ်အာရုံကို သူ၏ခန္ဓာကိုယ်ထဲသို့ ဝင်ရောက်စေလိုက်ပြီး ထိုထူးဆန်းသည့်သင်္ကေတအနားတွင် လှည့်ပတ်သွားလာစေလိုက်သည်။ သူသည် ဤမီးတောက်ကို ပြန်လည်အသက်သွင်းကာ ဆက်သွယ်လိုခြင်းပင်။
သို့သော် အနည်းငယ်မျှပင် တိုးတက်မလာသောကြောင့် သူစိတ်ပျက်သွားရသည်။
သက်ပြင်းချပြီးသည့်နောက်တွင် ရှီဟောင်သည် တာအိုလေ့လာခြင်းကျောက်တုံးပေါ်မှ ခုန်ဆင်းလိုက်ပြီး ခပ်ဝေးဝေးသို့ ကြည့်လိုက်သည်။
“ချင်းရိ .. ငါ့ကို မင်းရဲ့အစိမ်းရောင်လမီးတောက်နဲ့ လောင်ကျွမ်းသွားအောင် လုပ်ပေးပါဦး” သူရုတ်တရက် ပြောလိုက်သည်။
“နင်ရူးသွားပြီလား” ယုန်ဖြူလေးမှ ပြူးကျယ်နေသည့် မျက်ဝန်းများဖြင့် ပြောလိုက်သည်။
ချင်းရိနှင့် ချောင်ယုရှန်းတို့လည်း ဆွံ့အသွားရသည်။ ဤအစိမ်းရောင်ရှေးဟောင်းမီးတောက်၏ မူလဇစ်မြစ်မှာ အံ့အားသင့်စရာကောင်းလွန်းလှပြီး ထာဝရအစစ်အမှန် ချင်းယွဲ့ထံမှ ချန်ထားခဲ့သည် ‘ထာဝရမျိုးစေ့’ဟုလည်း ပြောကြလေသည်။
ဤမီးတောက်ကို အသုံးပြုပြီး ကိုယ့်ကိုကိုယ်လောင်ကျွမ်းစေလိုက်လျှင် သေချာပေါက် ရလဒ်ကောင်း ရလာမည်မဟုတ်ပေ။
ဤမီးတောက်မှ ချင်းရိအား အန္တရာယ်မပြုခြင်းမှာ မီးတောက်သည် သူမအား အသိအမှတ်ပြုထားသောကြောင့်ပင်။
“စိတ်မပူပါနဲ့ .. နည်းနည်းလောက်အားပျော့နေရင် အဆင်ပြေပါတယ် .. ငါ့ခန္ဓာကိုယ်ထဲမှာ ငါစမ်းသပ်ချင်နေတဲ့ တစ်ခုခုရှိနေလို့” ရှီဟောင်ပြောလိုက်သည်။
အခြားမီးတောက်တစ်ခုမှာ ရှီဟောင်၏ခန္ဓာကိုယ်ထဲတွင်ရှိနေသည်ဟု သိလိုက်ရသည့်အချိန်တွင် ချင်းရိအံ့အားသင့်သွားရသည်။
အစိမ်းရောင်မီးတောက်တစ်ကြောင်း ပေါ်လာပြီး ရှီဟောင်ထံသို့ ဖြည်းညှင်းစွာပင် ချဉ်းကပ်သွားလေ၏။ ထိုမီးတောက်သည် ငြင်သာစွာဖြင့်ပင် သူ၏ခန္ဓာကိုယ်ထဲသို့ ဝင်ရောက်သွားလေသည်။
“နာလိုက်တာ” ရှီဟောင် ညည်းတွားလိုက်သည်။ သူ၏အသွေးအသားများမှာ ဓားဖြင့်မွှန်းခံနေရသကဲ့သို့ပင်။
ချင်းရိသည် ထိုမီးတောက်ကို သေချာထိန်းချုပ်ထားပြီး သူ၏တိုက်ခိုက်သည့်စွမ်းအားကို လျော့ချလိုက်သည်။ သူမသည် ထိုမီးတောက်အား ထူးဆန်းသည့်မီးတောက် ရှိနေသည့်နားသို့ ရွေ့သွားစေလိုက်သည်။
ရုတ်တရက်ပင် ရောင်စုံအလင်းတန်းများ ထွက်ပေါ်လာပြီး သင်္ကေတများလည်း တောက်ပလာလေသည်။ အစိမ်းရောင်လမီးတောက်သည် သူ့ဘာသာသူပြန်ဆုတ်သွားပြီး ရှေ့ဆက်မသွားတော့ပေ။ သူမထိန်းချုပ်ဖို့ ကြိုးစားလျှင်ပင် မရနိုင်တော့ပေ။
ရှီဟောင် သက်ပြင်းချလိုက်သည်။ ကြည့်ရသည်မှာ သူဤမီးတောက်ကို မှီခို၍ မရတော့ဘူးထင်သည်။
“ဒီစစ်ဆေးခြင်းကို ဖြတ်ကျော်နိုင်တဲ့သူတွေ ရှိနေမှတော့ ငါလည်း ဖြတ်ကျော်နိုင်ရမယ် .. ဒီပြဿနာကို ဖြေရှင်းဖို့ နည်းလမ်းရှာရမယ်” ရှီဟောင်သည် ထိုမီးတောက်ကို အသုံးပြုမည့်အကြံအား ခဏလက်လျော့ထားလိုက်ရသည်။
မီးတောက်မှာ သူ၏နောက်ဆုံးလက်နက်ပင်။ မဖြစ်မနေမဟုတ်လျှင် သူဤမီးတောက်ကို ထုတ်သုံးမည်မဟုတ်ပေ။ အဘယ်ကြောင့်ဆိုသော် သူ့ခန္ဓာကိုယ်ကို နှစ်ခြမ်းခွဲလိုက်လျှင်ပင် ဤသင်္ကေတများမှ လှုပ်ရှားမှုများ မရှိလာပါက သူ့ကို အကူအညီဖြစ်စေမည်မဟုတ်ပေ။
“အရင်တုန်းက အောင်မြင်ခဲ့တဲ့သူတွေအားလုံးက အဲဒီထာဝရစွမ်းအင်ကို သုံးခဲ့ကြလို့ပဲ .. မင်းအဲဒီထာဝရစွမ်းအင်ကို ထိန်းသိမ်းထားပြီးတော့ ထိန်းချုပ်နေနိုင်သရွေ့ မင်းရဲ့လမ်းကြောင်းမှာ ရှိနေတဲ့သူအားလုံးကို အနိုင်ယူနိုင်မှာပဲ” ချောင်ယုရှန်း ပြောလိုက်သည်။
ရှီဟောင်ခေါင်းညိမ့်လိုက်ပြီးနောက် ဘာမှမပြောတော့ပေ။
ရှီဟောင် နောက်တစ်ကြိမ် သီးသန့်ကျင့်ကြံလိုက်သည်။ သို့သော် ဤတစ်ကြိမ်မှာ တာအိုမီးတောက်များကို တောက်လောင်စေရန်မဟုတ်တော့ပဲ သူ့ကိုယ်သူ ပိုနားလည်စေရန်ပင်။
“မင်းတို့ပြောတာ တကယ်လား .. မင်းတို့ပြောတဲ့ ရှေးဟောင်းဆိုတာက ထာဝရရှေးဟောင်းခေတ်ကို ပြောတာမလား .. အဲဒီအချိန်တုန်းက ဒီလိုမျိုး ထူးဆန်းတဲ့အဖြစ်အပျက်ရှိတာ သေချာလို့လား” ယုန်ဖြူလေး ရေရွတ်လိုက်သည်။
“အဲဒါက ငါခန့်မှန်းကြည့်လိုက်တာပါ .. အခု သူယုံကြည်မှုလိုအပ်နေတယ်လေ” ချောင်ယုရှန်း ပြောလိုက်သည်။
လကျောက်စိမ်းယုန်လေးသည် မျက်ဖြူလှန်ပြလိုက်ပြီး ဘာမှထပ်မပြောတော့ပေ။
ယခုအချိန်တွင် ချင်းရိပင်ဖြစ်စေ နတ်ဘုရားပစ်ချက်ကျောက်တုံးလေးပင်ဖြစ်စေ ရှီဟောင်အား ဘာမှသိပ်မကူညီနိုင်ကြပေ။ စိုးရိမ်ပေးရုံသာ သူတို့တတ်နိုင်သည်။ သို့သော် ဖက်တီးလေး ချောင်ယုရှန်း၏မျိုးဆက်မှာမူ ထူးခြားသည်။ သူသည် အခြားသူများထက် အနည်းငယ်ပိုသိသည်သာ။
ရှီဟောင်သည် အလျင်စလိုမလုပ်ပဲ သူ၏အဆင့်လွန်သွေးကိုသာ လေ့လာနေလေသည်။ အဘယ်ကြောင့်ဆိုသော် ထာဝရစွမ်းအင်သည် ပျက်ပြယ်သွားခြင်းမဟုတ်ပဲ သူ၏ခန္ဓာကိုယ်မှ စုတ်ယူလိုက်ခြင်းဖြစ်သည်ဟု သူခံစားနေရသောကြောင့်ပင်။ ထို့ကြောင့် ပြောင်းလဲမှုမဖြစ်နိုင်စရာ အကြောင်းမရှိပေ။
သူစိတ်ရှည်စွာပင် စောင့်ဆိုင်းခဲ့သည်။ လဝက်ကြာပြီးသည့်နောက်တွင် သူ၏တာအိုကောင်းကင်မျက်လုံးဖြင့် သူတစ်ခုခုကို အမှန်တကယ် ရှာဖွေတွေ့ရှိခဲ့သည်။
“သင်္ကေတအသစ်တစ်ခု ပေါ်လာနေတယ်” ရှီဟောင် ထိတ်လန့်သွားရသည်။
ကောင်းကင်လက်နှင့် ပြန်လည်ဝင်စားခြင်းသင်္ကေတအပြင် သူ၏အဆင့်လွန်သွေးထဲတွင် တတိယ သင်္ကေတတစ်မျိုးရှိနေလေသည်။ ဤသင်္ကေတသည် အစပျိုးဆဲအဆင့်သာရှိနေသေးပြီး သူ့ထံတွင် မည်ကဲ့သို့သော စွမ်းရည်မျိုးရှိနေသလဲဆိုသည်ကို သိနိုင်ရန် ခက်ခဲသည်။
သူသည် ထိုသင်္ကေတကိုသာ အာရုံစိုက်လိုက်ပြီး ပြောင်းလဲမှုများကို သေချာစောင့်ကြည့်လိုက်သည်။ သူ့အတွက်တော့ ဤသည်မှာ အတွေ့အကြုံအသစ်ပင်။ သူသည် အလွန်စွမ်းအားကြီးသည့်အဖိုးတန်ပညာတစ်ခု မွေးဖွားလာခြင်းကို ကိုယ်တိုင်မြင်နေရလေပြီ။
ဤသည်မှာ ကျင့်ကြံသူများအတွက် ရရှိနိုင်ရန် ခက်ခဲလှသည့် တိုးတက်မှုပင်။
သို့သော် ဤသည်ကို လူဘယ်နှယောက် လုပ်နိုင်ပြီးသွားပြီနည်း… ကောင်းကင်မျက်လုံးကို ရရှိထားသည့်သူများမှာ နည်းပါးသကဲ့သို့ သူတို့ဤမျက်လုံးကို ရပြီးသွားလျှင်ပင် သူတို့သည် ဘယ်လိုလုပ် ဤကဲ့သို့သော အခွင့်အရေးကို ရရှိနိုင်မည်နည်း..
ဤကဲ့သို့သော ပြောင်းလဲမှုကို ကြည့်နေရခြင်းမှာ ရှီဟောင်အတွက် လောကကြီးအသစ်တစ်ခုကို ဖွင့်လိုက်သကဲ့သို့ပင်။
“ကျင့်ကြံခြင်းလမ်းကြောင်း၊ လမ်းကြောင်းတွေရဲ့ မူလစမှတ်၊ အဆင့်တက်တဲ့လမ်းကြောင်း .. ဒါတွေအားလုံးလည်း အတူတူပဲ .. တစ်ဆင့်ချင်းစီဖြစ်လာပြီး ဒီနေ့လိုမျိုး တောက်ပလာကြတာ”
အချိန်မည်မျှကြာသွားမှန်း မသိလိုက်သည့်အချိန်တွင် အဆင့်လွန်သွေးမှာ တစ်ဖြည်းဖြည်းချင်း တည်ငြိမ်သွားပြီး ထိုသင်္ကေတများလည်း ပြောင်းလဲခြင်းမရှိတော့ပေ။
တတိယမြောက်ပညာမှာ သေချာပေါက်ပင် ပုံစံပေါ်လာတော့မည်ပင်။
ထို့ကြောင့်ပင် ရှီဟောင်သည် မျက်လုံးမှိတ်လိုက်ပြီးနောက် အချိန်အတော်ကြာသည်အထိ သေချာစဉ်းစားနေခဲ့သည်။ ထို့သို့စဉ်းစားပြီးသည့်နောက်မှာ ထာအိုလေ့လာခြင်းကျောက်တုံးပေါ်မှ ဆင်းလိုက်လေ၏။ ယခုအကြိမ်တွင် သူအကျိုးအမြတ်အများကြီး ရလိုက်သည်။
“တစ်နေ့ကျရင်တော့ ငါကျင့်ကြံနည်းအသစ်တစ်ခုကို သေချာပေါက် ဖန်တီးနိုင်တော့မှာ .. အဲဒီပညာက ထာဝရရှေးဟောင်းခေတ်နဲ့လည်း မတူသလို အရှေ့မှာ ရှိခဲ့တဲ့ပညာတွေနဲ့လည်း လုံးဝမတူဘူး”
ရှီဟောင် တိုးတိတ်စွာပင် ပြောလိုက်သည်။
ဤစကားကို ကြားလိုက်ရသည့်အချိန်တွင် အခြားသူများအားလုံး ဆွံ့အသွားရသည်။ ဤသည်မှာ မည်ကဲ့သို့သော ရဲတင်းမှုမျိုး ဖြစ်သနည်း… လုံးဝကွဲပြားတဲ့ ကျင့်ကြံရေးနည်းလမ်းကို သူတီထွင်မလို့လား..
ဤသည်မှာ မဖြစ်နိုင်ဘူးဟု သူတို့ခံစားနေရသည်။ နည်းလမ်းအသစ်ဖော်ထုတ်ခြင်းမှာ ကောင်းကင်ဘုံသို့ တက်ခြင်းထက်ပင် ပို၍ခက်ခဲသေးသည်။
“ဘဝခရီးက အရှည်ကြီးရှိပါသေးတယ် .. အခုတော့ ငါက အတွေ့အကြုံနည်းနည်းပဲရှိသေးတယ် .. ဘာမှလုပ်နိုင်စွမ်းမရှိသေးဘူး .. ဒါပေမဲ့ နောင်ကျရင်တော့ အဲဒီလိုနေ့မျိုး ရောက်လာမှာပဲ” ရှီဟောင် ပြောလိုက်သည်။
ဝုန်း..
ရုတ်တရက်ပင် ကောင်းကင်လက်မှ လျှပ်စီးတန်းတစ်ခု ထွက်ပေါ်လာပြီး ရှီဟောင် လွင့်ထွက်သွားပြီး သွေးများလည်း စီးကျလာလေ၏။ လျှပ်စီးမှာ အလွန်ပင် ကြောက်စရာကောင်းလွန်းလှသည်။
အခြားသူများသာဆိုပါက သူတို့ပြာမှု့န်များပင် ဖြစ်သွားလိမ့်မည်။ သို့သော်လည်း ရှီဟောင်သည် ဤလျှပ်စီးကို တောင့်ခံလိုက်နိုင်သည်။
ယုန်ဖြူလေးသည် ဆွံ့အနေပြီးသည့်နောက်တွင် ထိတ်လန့်တကြားဖြင့် အော်ဟစ်လိုက်လေ၏။ “ကြည့်လိုက် .. နင်လျှောက်ပြောနေတာ နင့်ကို မိုးကြိုးပစ်သွားပြီ”
နတ်ဘုရားပစ်ချက်ကျောက်တုံးလေး၊ ချင်းရိနှင့် ချောင်ယုရှန်းတို့၏ အမူအရာများ ပြောင်းလဲသွားသည်။
ဤခေတ်တွင် လျှပ်စီးအတိဒုက္ခမရှိတော့ပေ။ လွန်ခဲ့သည့်ခေတ်ကတည်းက ပျောက်ကွယ်သွားပြီဖြစ်သည်။ သို့သော်လည်း မထင်မှတ်ပဲ ယခုအချိန်တွင် ပြန်ပေါ်လာလေပြီ။
ထာဝရရှေးဟောင်းမြေတွင် သူတို့၏စကားလုံးများဖြင့် ကောင်းကင်ကိုလှုပ်ခါနိုင်သည့် ပြိုင်ဘက်ကင်းသက်ရှိများ ရှိသည်ဟု ပြောကြသည်။ သူတို့သည် လျှပ်စီးအတိဒုက္ခကို ဆက်တိုက်ပင် ပြုလုပ်ကြလေသည်။ သို့သော်လည်း ဤသည်မှာ ထာဝရရှေးဟောင်းခေတ်ထဲတွင် ဖြစ်ပျက်ခဲ့ခြင်းဖြစ်ပင်။ အဘယ်ကြောင့် ဤခေတ်တွင် ပြန်ပေါ်လာသနည်း…
သူတို့ရှီဟောင်ကို ကြည့်လိုက်ကြသည်။ နောင်ကျလျှင် ဤကဲ့သို့သော ကျင့်ကြံမှုမျိုး တကယ်ပေါ်လာမည်လား…
ဤသို့သာဆိုလျှင် အကျိုးရလဒ်များမှာ မဆုံးနိုင်အောင်ပင် များပြားလိမ့်မည်။
ရှီဟောင်သည် တည်ငြိမ်စွာဖြင့်ပင် နောက်တစ်ကြိမ် လေ့လာလိုက်သည်။ သူ၏အဆင့်လွန်သွေးထဲတွင် ပြောင်းလဲမှုများ ရှိနေသည်ကို သူတွေ့လိုက်ရသည်။ တစ်လကြာပြီးမှသာ သူ၏မျက်လုံးများ ပြန်ပွင့်လာပြီး တာအိုမီးတောက်သုံးထောင်ကို လောင်ကျွမ်းစေလိုက်လေသည်။
“သတိထား .. မင်းလုပ်နိုင်သလောက်ပဲလုပ်” သူတို့ဘာများ ပြောနိုင်တော့မည်နည်း.. သူတို့သည် သူ့ကို အကြံမပေးနိုင်သောကြောင့် သူအဆင်ပြေစေရန် ဆုတောင်းပေးရုံသာ တတ်နိုင်တော့သည်။
ခဏကြာသည့်နောက်တွင် အပြာရောင်ကျောက်လမ်းသုံးထောင်လုံးတွင် မီးတောက်များ ထွက်ပေါ်လာပြီး သင်္ကေတများလည်း ကောင်းကင်ကိုပင် လွှမ်းမိုးသွားလေသည်။ ဤသည်မှာ ကောင်းကင်ကိုပင် ထိုးဖောက်သွားတော့မတတ်ပင်။
ဤကဲ့သို့သော မူမမှန်မှုများကို ကမ္ဘာငယ်လေး အချို့များမှ သတိပြုမိသည်သာ။
အားလုံးသည် လေထဲတွင် ပျံ့လွင့်လာသည့် ထူးဆန်းသည့်စွမ်းအင်ကို ခံစားမိကြသည်။ ဤသည်မှာ သူတို့ကို ထိတ်လန့်ပြီး စိတ်ရှုပ်သွားစေသည်။
အပြာရောင်ကျောက်လမ်းများ၏ မီးတောက်များသည် ကောင်းကင်ဘုံကိုးခုကိုပင် လောင်ကျွမ်းစေလေသည်။ မီးဖိုတစ်ခု ဖြစ်ပေါ်လာပြီး ရှီဟောင်ကို ရစ်ပတ်သွားလေသည်။
ဤနေရာတွင် တာအိုအသံများ မြည်ဟီးနေပြီး ကောင်းကင်နှင့် ကမ္ဘာမြေကြီးကိုပင် တုန်ခါစေလေသည်။
ဤသည်မှာ သူတို့အားလုံး ထင်ထားသည်ထက် ပိုနေသည်။
နတ်ဘုရားပစ်ချက်ကျောက်တုံးလေးသည် ဤနေရာကိုပင် သီးသန့်ဖြစ်စေရန်အတွက် အစီအရင်ပင် ချလိုက်သေးသည်။ သို့သော်လည်း အဆုံးမရှိသည့် လှိုင်းများသည် နေရာအနှံ့သို့ ပျံ့နှံ့သွားနေဆဲပင်။
အား…
အချိန်မည်မျှကြာမှန်း မသိလိုက်သည့်အချိန်မှသာလျှင် ရှီဟောင် ဟစ်ကြွေးလိုက်သည်။ သူ၏ခန္ဓာကိုယ်တစ်ခုလုံး မည်းတူးနေသော်လည်း အပြင်ဘက်သို့ လွင့်ထွက်လာသည့် အားပြင်းလှသော အသက်ဓာတ်များ ရှိနေသည်။ သူ၏မျက်လုံးများမှာ လျှပ်စီးကဲသို့ပင်။
သူမတ်တပ်ထရပ်လိုက်သည်။ ယခုတစ်ကြိမ်တွင်လည်း သူ၏ဒဏ်ရာများ ပြင်းထန်နေသော်လည်း သူတို့ထင်ထားသလောက် မဆိုးရွားပေ။ သူ၏ခန္ဓာကိုယ်ထဲတွင် တောက်ပနေလေသည်။
ခဏကြာပြီးသည့်နောက်တွင် အတွင်းဘက်မှ စွမ်းအားတစ်ခု ပေါက်ကွဲထွက်လာပြီး သူ၏ဒဏ်ရာများကို ကုသပေးသွားလေသည်။
ယခုအချိန်တွင် သူသည် ပို၍ပင် စွမ်းအားကြီးနေသည်ဟု ခံစားနေရသည်။ သူသည် ဂျင်ဆင်းတစ်ဝက်သီးကို မသုံးရသေးသော်လည်း သူ၏ဒဏ်ရာများမှာ အကြမ်းဖျင်းတော့ ပျောက်ကင်းသွားလေပြီ။
ထာဝရစွမ်းအင်တစ်ကြောင်းလည်း နဂါးတစ်ကောင်ကဲ့သို့ပင် သူ့အား ရစ်ပတ်နေလေသည်။ သူအောင်မြင်သွားလေပြီ…
ရှီဟောင်သည် အချိန်ဆွဲမနေပဲ ချင်းရိ၊ ယုန်ဖြူလေးနှင့် အခြားသူများကို ဆေးပင်များ လှမ်းတောင်းလိုက်သည်။ သူသည် ထိုဆေးပင်များကို လျင်မြန်စွာပင် စားသုံးလိုက်ပြီး အကောင်းဆုံးအခြေအနေရောက်အောင် ပြုလုပ်လိုက်သည်။
အဘယ်ကြောင့်ဆိုသော် ထူးဆန်းသည့်အရာများမှာ သူ့အနားသို့ ချဉ်းကပ်လာနေပြီဖြစ်ပြီး အပြာရောင်ကျောက်လမ်းအပြင်ဘက်ပင် ရောက်နေလေပြီ။
ယခုတစ်ကြိမ်တော့ သိပ်မတူတော့ပေ။ ဤသည်မှာ မီးခိုးရောင်မြူများ မဟုတ်တော့ပဲ မင်ကဲ့သို့ မည်းနက်နေသည့် စွမ်းအင်စီးကြောင်းများပင်။ ဤစွမ်းအင်များတွင် အသက်ဓာတ်ကင်းမဲ့နေလေသည်။ ပုံရိပ်များစွာမှ ချဉ်းကပ်လာနေသည်ကိုလည်း မြင်နေရသည်။
ရှေးဟောင်းမီးအိမ်သည် ကောင်းကင်ထက်တွင် ရှိနေပြီး အေးစက်သည့်အလင်းတန်းများကို ထုတ်လွှတ်နေလေသည်။
ယခုတစ်ကြိမ်ရောက်လာသည့် အရေအတွက်မှာ အနည်းငယ် နည်းလေသည်။
“အရင်ကလောက် မခက်တော့ဘူးလား .. ကောင်းကင်ဘုံတောင်မှ သူ့ကို ကူညီပေးချင်နေပြီထင်တယ်” နတ်ဘုရားပစ်ချက်ကျောက်တုံးလေး ပျော်ရွှင်စွာဖြင့် ပြောလိုက်သည်။
“အဲဒီလိုဖြစ်ဖို့ပဲ မျှော်လင့်ကြတာပေါ့” ချောင်ယုရှန်း ပြောလိုက်သည်။
သို့သော် ခဏကြာပြီးသည့်နောက်တွင် သူတို့ပါးစပ်ပိတ်သွားကာ လေးနက်သည့်အမူအရာများ ဖြစ်လာလေသည်။ သူတို့သည် မယုံကြည်နိုင်စွာဖြင့် အရှေ့ဘက်သို့ ကြည့်နေကြလေသည်။
ပထမဆုံးပုံရိပ်မှာ အရပ်ရှည်ပြီး သူ၏နောက်ကျောဘက်တွင် ရွှေရောင်သင်္ကေတများပါဝင်သည့် မည်းနက်နေသည့် အတောင်ပံတစ်စုံ ပါရှိလေသည်။
“ဘုရားရေ .. ဒါတွေက ခွန်ပန်အတောင်ပံတွေ .. အရောင်ပဲနည်းနည်းကွာတာ” ယုန်ဖြူလေးမှ ထိတ်လန့်တကြား အော်ဟစ်လိုက်သည်။
ဒုတိယပုံရိပ်ပေါ်လာလေပြီ။ ဤသည်မှာ အနက်ရောင်လျှပ်စီးများ ရစ်သိုင်းထားပြီး သူ၏ခန္ဓာကိုယ်တွင် အနက်ရောင်သွေးများ စွန်းထင်းနေလေသည်။ သူ့ကိုကြည့်ရသည်မှာ စစ်မြေပြင်ထဲမှ ထွက်လာသည့်လူလိုပင်။ သူ၏ခန္ဓာကိုယ်ပေါ်ရှိ ချပ်ဝတ်တန်ဆာတွင် အပေါက်များဖြင့် ပြည့်နေလေသည်။
“ဒါက .. လျှပ်စီးဧကရာဇ်ရဲ့ ပုံရိပ်လို့ ငါ့ကို လာမပြောနဲ့နော်…” နတ်ဘုရားပစ်ချက်ကျောက်တုံးလေးမှာ စကားများပင် ထစ်နေလေပြီ။
တတိယပုံရိပ်၏ခန္ဓာကိုယ်တွင် ကောင်းကင်အတိဒုက္ခအလင်းများ ရစ်သိုင်းနေလေသည်။
စတုတ္ထပုံရိပ်လည်း လမ်းလျှောက်ထွက်လာလေပြီ။ သူ့ကိုကြည့်ရသည်မှာ အနည်းငယ် ထူးဆန်းနေလေသည်။ သူသည် အသက်ကြီးလိုက် ကလေးဖြစ်သွားလိုက် ဖြစ်နေသည်။
“မကောင်းတော့ဘူး”
ဤလေးယောက်ကို တွေ့လိုက်ရသည့်အချိန်တွင် သူတို့အားလုံး ထိတ်လန့်သွားရသည်။ အဘယ်ကြောင့်ဆိုသော် သူတို့အားလုံးသည် အလွန်စွမ်းအားကြီးသည့် သူများပင်။
ထပ်ရှိသေးတာလား ..
“မဆိုးပါဘူး .. ဒီတစ်ခေါက် အားလုံးကို ရှင်းပစ်ရတာပေါ့ .. ထူးဆန်းတဲ့အဖြစ်အပျက်တွေ ထပ်ရှိသေးလားဆိုတာကို ငါသိချင်သေးတယ် .. ရှိခဲ့ရင်လည်း ငါအားလုံးကို ရှင်းပစ်မယ်” ရှီဟောင်ပြောလိုက်သည်။ သူ၏အသံမှာ ကောင်းကင်ထက်တွင် မြည်ဟီးနေလေသည်။
ယခုအချိန်တွင် အပြာရောင်ကျောက်လမ်းသုံးထောင်လုံးပင် ယိမ်းခါပြီး တုံ့ပြန်နေလေသည်။