သုခကမ္ဘာက ရှီဟောင် - Chapter - 1075 အပြစ်သားစကားလုံး၏ အကူအညီ
ဘုရင်ကြီးသည် ချောက်ကမ်းပါးကြီးကို ကာကွယ်ပေးပြီး ဤနေရာတွင် တစ်ယောက်တည်း သေဆုံးသွားခဲ့ရသည်။
ရှီဟောင်သည် သူ့ကိုယ်သူ တည်ငြိမ်သွားအောင် လုပ်နိုင်ရန် ခက်ခဲနေသည်။ ဤကြီးမားလှသည့် သူရဲကောင်းပုံရိပ်ကို တွေ့လိုက်ရသည့်အချိန်တွင် သူနာကျင်ရသည်။ သူ၏ခန္ဓာကိုယ်တွင် ဒဏ်ရာများဖုံးလွှမ်းနေပြီး ဖရိုဖရဲစွမ်းအင်ရှိနေသည့် အဆင့်လွန်ရတနာများလည်း သူ၏ခန္ဓာကိုယ်အနှံ့ ထိုးဖောက်နေသည်။ သွေးများပင် မခြောက်သေးပေ။
သူသည် ဤသူရဲကောင်းအား လေးစားစွာပင် ဦးညွှတ်လိုက်သည်။
“စီနီယာ ဂရုစိုက်ပါ..”
ရှီဟောင် ဤဘုရင်အတွက် ဝမ်းနည်းမိသည်။ သူသည် နယ်ခြားစပ်ကို ကာကွယ်စောင့်ရှောက်ခဲ့ပြီး သူ၏အသက်ကိုပင် စွန့်လွတ်ကာ လောကကြီးကို ကာကွယ်ပေးခဲ့သည်။ သို့သော်လည်း သူ၏မျိုးဆက်များမှာ ‘အပြစ်သားသွေး’ များပါနေသကဲ့သို့ ဆက်ဆံခံရပြီး အပြစ်သားသွေးမျိုးဆက်ဟုလည်း ခေါ်ခံနေရသည်။
“ငါ့မှာလည်း ‘အပြစ်သားရဲ့သွေး’ တွေ ရှိနေတယ် ဟား ဟား…” ရှီဟောင် ကျယ်လောင်စွာပင် ရယ်မောလိုက်သည်။ သူသည် ဝမ်းနည်းသလို ဒေါသလည်း ထွက်လာရသည်။ ဤဘုရင်ကြီးမှာ သူ၏ဘိုးဘေးဖြစ်နိုင်သည်။
“ငါဒီကနေ ထွက်သွားနိုင်ရင် တစ်နေ့တော့ နယ်ခြားစပ်ဆီကို သွားလည်ပြီး တိုက်ပွဲထဲဝင်ပါမှာ” ရှီဟောင် ကျိန်ဆိုလိုက်သည်။
သူ နတ်တာအို၏ ထိပ်ဆုံး၌ရောက်သည့်တစ်နေ့တွင် သူသည် နယ်ခြားစပ်တွင်ရှိနေသည့် ရန်သူအားလုံးကို ဖိနှိပ်ပစ်မည်။
ထိုနေရာတွင် မသေဆုံးနိုင်သည့်အရာများ၊ ပြိုင်ဘက်ကင်းသည့်ပုဂ္ဂိုလ်များရှိနေလျှင်ပင် သူ ထိုနေရာသို့ရောက်အောင်သွားမည်။
သူ၏မျက်ခုံးကြားတွင်ရှိနေသည့် သင်္ကေတတောက်ပလာပြီး မြင့်မြတ်အလင်းတန်းသည် ကောင်းကင်ထက်သို့ တရှိန်ထိုး ထွက်သွားပြီး အမှောင်ထုကို ဖယ်ရှားပစ်လိုက်သည်။
ချောက်ကမ်းပါးထဲတွင်ရှိနေသည့် အေးစက်နေသည့်ဘုရင်အလောင်းလည်း တုံ့ပြန်မှုရှိလာခဲ့သည်။ သူ၏နဖူးလည်းတောက်ပလာကာ အမှောင်ထုကို ဖယ်ရှားလိုက်သည်။
ရှီဟောင်၏ခန္ဓာကိုယ် တုန်ယင်လာသည်။ သူ၏နဖူးပေါ်တွင်ရှိနေသည့် သင်္ကေတမှာ ထိုဘုရင်ကြီး၏ သင်္ကေတကို တုံ့ပြန်လာကာ သူတို့သည် သွေးမျိုးဆက်တူသည့်သူအချင်းချင်းတွေ့ရှိပြီး မခွဲနိုင်မခွာနိုင် ဖြစ်နေသကဲ့သို့ပင်။
ရွှီး..
ရုတ်တရက်ပင် ကြီးမားလှသည့်အလောင်းမှ အလင်းတန်းတစ်ခု ထွက်ပေါ်လာလေ၏။ ဤသည်မှာ အပြစ်သား စကားလုံးပင်။ ထိုစကားလုံးသည် ရှီဟောင်၏ အပြစ်သားစကားလုံးထဲသို့ ဝင်ရောက်သွားလေသည်။
ရှီဟောင်၏နဖူးရိုးမှာ အလွန်ပင် ပူလောင်လာလေသည်။ ထို့နောက်တွင် သူ၏မျက်ခုံးကြားမှာ ပို၍ပင် တောက်ပလာပြီး အလင်းတန်းမှာ ကောင်းကင်နှင့် ကမ္ဘာမြေကြီးကိုပင် ထွန်းလင်းတောက်ပစေခဲ့သည်။
အပြစ်သားစကားလုံးမှာ သတ္တု သို့မဟုတ် ငွေရောင်စုတ်ချက်များကဲ့သို့ပင် ကြည်လင်နေလေသည်။ ဤသည်မှာ ရှီဟောင်၏သွေးများကို ပင်လယ်တစ်စင်းကဲ့သို့ ကြွတက်လာစေ၏။
ထိုအချိန်တွင် သူ၏ခန္ဓာကိုယ် နွေးထွေးသွားရသည်။ ဤအန္တရာယ်များသည့်နေရာတွင် သူသည် မီးခိုးရောင်နှင့် အနက်ရောင်မြူများကို တွေ့ရသည့်အချိန်တွင် အေးစက်မှုကို မခံစားရတော့သကဲ့သို့ ကြောက်လည်းမကြောက်တော့ပေ။
အရာအားလုံး တည်ငြိမ်သွားသည့်အချိန်တွင် ထိုအလောင်းသည် နောက်တစ်ကြိမ်တည်ငြိမ်သွားကာ မလှုပ်ရှားတော့ပေ။
သူ၏နဖူးထက်ရှိ သင်္ကေတတွင် ရှုပ်ထွေးသည့်အခြားသင်္ကေတများ ထပ်ပေါင်းထည့်လိုက်သည်ကို သူခံစား၍ရသည်။ သို့သော်လည်း ဤသင်္ကေတကို မည်ကဲ့သို့အသက်သွင်းရမည်ကို သူမသိပေ။
“ဒီစာလုံးက တကယ်ပဲ အပြစ်သားကို ကိုယ်စားပြုတာလား” သူ၏မျက်လုံးတွင် ဒေါသတရားများ ပြည့်နှက်လာသည်။ ဤသည်မှာ မြင့်မြတ်မှုနှင့် ခမ်းနားမှုကို ကိုယ်စားပြုသည်ကို သူသိသည်။ အပြစ်သားကို ကိုယ်စားပြုသည်ဟုပြောခြင်းမှာ အဆင့်မြင့်နယ်မြေမှ ဖန်တီးထားသည့်ယုံတမ်းတစ်ခုပင်။
နောင်ကျလျှင် သူ မီးတိမ်လှိုဏ်ဂူ၊ တစ္ဆေတာအိုဂိတ်နှင့် အခြားရှေးဟောင်းဂိုဏ်းများကိုလည်း သွားလည်ဦးမည်။
ထိုအပြစ်သားသွေးမှ တိမ်များကိုပြန့်ကျဲစေလိုက်သည့်အချိန်တွင် သူတို့ပို၍စွမ်းအားကြီးလာသည်ကို ယဇ်ပုလ္လင်ထက်တွင် သူမြင်လိုက်ရသည်။ သို့သော်လည်း ဤသည်ကို မည်ကဲ့သို့အသုံးပြုရမည်ကို သူမသိပေ။ ဘုရင်၏ခန္ဓာကိုယ်တွင် အချို့တုံ့ပြန်မှုရှိလာပြီး အလင်းတန်းတစ်ခု ထုတ်လွှတ်ခဲ့သော်လည်း ဤစွမ်းအင်ကို မည်ကဲ့သို့အသုံးပြုရမည်ကို သူမသိပေ။
“ကြည့်ရတာ ငါနယ်ခြားစပ်ကို ရောက်မှပဲ သိမယ်ထင်တယ်..” ထိုနေရာတွင် အဆုံးမရှိသည့် တိုက်ပွဲများဖြစ်ပေါ်နေသော်လည်း သူသည် ထိုကဲ့သို့သောတိုက်ပွဲများတွင် တကယ်ပါဝင်ချင်မိသည်။
သူဤချောက်ကမ်းပါးကို ရောက်လာသည့်အချိန်တွင် ရှီဟောင် ကိစ္စအတော်များများကို နားလည်သွားရသည်။ အဆင့်မြင့်နယ်မြေမှာ အေးချမ်းနေသည်ဟု ထင်ရသော်လည်း တကယ်တမ်းတော့ ထိုသို့မဟုတ်ပေ။
“ထူးဆန်းတဲ့အဖြစ်အပျက်တွေအားလုံးက ဒီချောက်ကမ်းပါးကနေ အစပြုလာတာလား” ရှီဟောင် သူ့ကိုယ်သူ စဉ်းစားလိုက်သည်။
ရုတ်တရက်ပင် ရှေးဟောင်းမီးအိမ်များ တစ်ခုပြီးတစ်ခုပေါ်လာလေ၏။ တစ်ချိန်တည်းမှာပင် ချောက်ကမ်းပါးထဲမှ မိုးခြိမ်းသံများ ထွက်ပေါ်လာပြီး အဆီးအတားကို တိုက်ခိုက်နေလေသည်။
မီးခိုးရောင်နှင့် အနက်ရောင်မြူများသည် အဆီးအတားထဲမှ စိမ့်ထွက်လာလေ၏။
“ဒီအဆီးအတားက သိပ်မခံတော့ဘူး” ရှီဟောင်၏အမူအရာ ပြောင်းလဲသွားရသည်။ သူသည် အလွန့်အလွန်ပင် ဆိုးရွားလှသည့်အရာတစ်ခုကို တွေ့လိုက်ရသည်။
ဘုရင်ကြီးသည် ထိုနေရာတွင် ထိုင်နေဆဲဖြစ်ပြီး သူ၏ကြီးမားလှသည့်ခန္ဓာကိုယ်တစ်ဝက်မှာ မင်ကဲ့သို့ပင် မဲမှောင်နေသည်။
အနက်ရောင်မြူခိုးများသည် သူ၏ခန္ဓာကိုယ်တစ်ခုလုံးကို ဝါးမြိုလိုသော်လည်း နဖူးနားသို့ရောက်သည်နှင့် အလင်းတန်းတစ်ခု ထွက်ပေါ်လာကာ မြူများကို ရှင်းလင်းပစ်လိုက်သည်။ ဘုရင်ကြီးမှာ သေဆုံးသွားပြီဖြစ်သော်လည်း သူ၏အပြစ်သားစကားလုံးမှာ တောက်ပနေဆဲပင်။
“မကောင်းတော့ဘူး .. ဒီအဆီးအတားက တစ်နေ့ကျရင် ပျက်စီးသွားတော့မှာ .. ဒီအဆီးအတားပျက်စီးသွားတာနဲ့ ထူးဆန်းတဲ့အဖြစ်အပျက်တွေက လောကကြီးကို ဝါးမြိုသွားမှာ .. အဲဒါက သေချာပေါက် ကပ်ဆိုးကြီးဖြစ်လာမှာပဲ” ရှီဟောင်သက်ပြင်းချကာ ပြောလိုက်သည်။
သို့သော်လည်း ယခုအချိန်တွင် သူထိုကိစ္စကို စိတ်မပူအားတော့ပေ။
ခပ်ဝေးဝေးတွင် သရဲမြူးသံများ ထွက်ပေါ်နေပြီး တောင်များမှလည်း မည်းနက်နေသည့် မြူများကို ထုတ်လွှတ်နေသည်။
တောင်တစ်လုံးစီတိုင်းတွင် ကြီးမားလှသည့် မီးအိမ်တစ်လုံးစီရှိနေပြီး ထိုမီးအိမ်များမှာ သွေးကဲ့သို့ပင် နီရဲနေသည်။
အာဝူး…
ဤသည်မှာ မြေအောက်လောကတံခါးပွင့်လာပြီး ရက်စက်သည့်ဝိဉာဉ်များ ဟစ်ကြွေးနေကြသကဲ့သို့ပင်။ တောင်များကြားတွင် အနက်ရောင်ပုံရိပ်များ ထောင်ပေါင်းများစွာ ထွက်ပေါ်လာလေသည်။
ဤမြင်ကွင်းမှာ ကြောက်စရာကောင်းလွန်းလှသည်။ ဤအနက်ရောင်ပုံရိပ်များကို သရဲဟုခေါ်၍မရပေ။ ရှေးဟောင်းအလောင်းများသာ။ သူတို့သည် တောင်များထဲမှ ခုန်ထွက်လာပြီး သူ့ထံသို့ ဦးတည်လာနေသည်။
ရှီဟောင်သည် မျက်စိတစ်ဆုံး ဤအနက်ရောင်ပုံရိပ်များကို မြင်နေရသည်။ သူတို့အားလုံးသည် ရှေးဟောင်းမျိုးဆက်မှ အလောင်းများပင်ဖြစ်ပြီး အားလုံးမှာ စွမ်းအားကြီးသည့်သူများပင်။ ယခုအချိန်တွင် သူ့ထံသို့ ဦးတည်လာနေကြလေပြီ။
ရှီဟောင်သက်ပြင်းချလိုက်၏။ ယခုအချိန်တွင်တော့ သူအဆုံးသတ်သွားလောက်လေပြီ။ ရန်သူများစွာရှိနေပြီး ဘယ်တစ်ယောက်ကမှ သူ့ထက်အားမနည်းပေ။ သူ့ထံတွင် ထာဝရစွမ်းအင်တစ်ကြောင်းရှိနေလျှင်ပင် မလုံလောက်တော့ပေ။
“အမ်.. မဟုတ်သေးဘူး .. အားလုံးက စွမ်းအားကြီးတဲ့ ရှေးဟောင်းအလောင်းတွေမဟုတ်ဘူး … တစ်ချို့အလောင်းတွေက ပုပ်သိုးနေပြီ”
ရှီဟောင်သူ၏ကောင်းကင်မျက်လုံးကို ဖွင့်လိုက်သည်။ ဘုရင်၏နဖူးထက်မှ အလင်းတန်း သူ့ထံသို့ဝင်လာသည်နှင့် သူသည် အရိုးစာသားများနှင့် အခြားပညာများကို အသုံးပြုနိုင်သည်ကို သူတွေ့လိုက်ရသည်။
“သတ်…”
မည်သို့ပင်ဖြစ်စေ ရှီဟောင်သည် သေမည့်အချိန်ကို ထိုင်စောင့်နေမည်မဟုတ်ပေ။ သူသေရမည်ဆိုလျှင်ပင် တိုက်ပွဲထဲ၌သာ တိုက်ခိုက်ပြီး သေဆုံးမည်။
သူ၏လက်နှစ်ဘက်လုံးတွင် ရဲဒင်းကို ကိုင်ထားလိုက်သည်။ ဤရဲဒင်းနှစ်ခုလုံးမှာ ထာဝရနန်းတော်သခင်လေးထံမှ ရရှိထားသည့် လေဟာနယ်သားရဲအရိုးဖြင့် ပြုလုပ်ထားသည့် လက်နက်များပင်။ သူသည် အရှေ့ဘက်သို့ တရှိန်ထိုးသွားလိုက်ပြီး ဤရှေးဟောင်းအလောင်းများကိုရင်ဆိုင်လိုက်သည်။
သူ၏နှာခေါင်းတွင် အပုပ်နံ့များလှိုင်ထလာသည်။ ဤအလောင်းများမှာ နှစ်ပေါင်းမည်မျှပင် ရှိနေပြီဖြစ်မှန်း မည်သူမှမသိနိုင်ပေ။ သူတို့၏ခန္ဓာကိုယ်မှာ ပုပ်သိုးဆွေးမြည့်နေလေပြီ။ သို့သော်လည်း သဘာဝဥပဒေသအချို့၏ ထိန်းချုပ်မှုကြောင့် ခန္ဓာကိုယ်ကြီး ရှိနေနိုင်ခြင်းပင်။
ယခုအချိန်တွင် သူတို့သည် အသားပုံများအဖြစ်သို့ ပြောင်းလဲသွားလေပြီ။
အချို့ရှေးဟောင်းအလောင်းများမှာ ထူးခြားနေသည်ကို သူသတိထားမိသည်။ သူတို့သည် အနက်ရောင်မြူများ ဝန်းရံနေပြီး အသက်ဓာတ်လည်းရှိနေသည်။ သူတို့သည် အနောက်ဘက်မှ တစ်ဖြည်းဖြည်းချင်း လျှောက်လာကြသည်။
ထို့အပြင် သူနှင့် စွမ်းအားချင်းတူသည့် လူတစ်စုလည်း ရှိနေသည်။
“ထူးဆန်းတဲ့အဖြစ်အပျက်တွေ ထပ်လာပြန်ပြီ”
တစ်ဒါဇင်ကျော်ခန့်ရှိသည့် လူငယ်အုပ်စုကို သူတွေ့လိုက်ရသည်။ သူတို့သည် ထိုနေရာတွင် ဂုဏ်ယူစွာ ရပ်နေကြပြီး သူ့အားသေမတတ် စိုက်ကြည့်နေကြလေသည်။
“အမ်.. သူတို့အားလုံးက ဒီခေတ်ကလူတွေပဲ .. တစ်ချို့လူတွေက ရှေးဟောင်းခေတ်က .. တစ်ချို့လူတွေက လွန်ခဲ့တဲ့ နှစ်တစ်ထောင်လောက်ကလူတွေပဲ” ရှီဟောင် ထိတ်လန့်သွားရသည်။
သူတို့အားလုံး၏ ကြောက်စရာကောင်းသည့်အော်ရာများသည် ကောင်းကင်ထက်သို့ပင် လွင့်ပျံ့နေသည်။ သူတို့ဤကဲ့သို့အုပ်စုဖွဲ့ကာ လျှောက်လာသည့်အချိန်တွင် ဤမြင်ကွင်းမှာ အလွန်ကြောက်စရာကောင်းလှသည်။ သူတို့အားလုံးသည် ပြိုင်ဘက်ကင်းသည့်တာအိုများရှိနေသည့် အဆင့်လွန်လူငယ်များပင်။
ရှီဟောင်၏ အသက်ရှူသံများပင် အေးခဲသွားရသည်။ သူတို့အားလုံးသည် ထူးခြားသည့်အဖြစ်အပျက်များကို ကြုံတွေ့ခဲ့ရသည့် ထူးချွန်သည့် သူရဲကောင်းများလား… သူတို့၏အဖိုးတန်ပညာများ လုယူခံရယုံတင်သာမက သူတို့၏ခန္ဓာကိုယ်သည်လည်း ဤနေရာသို့ ဆွဲခေါ်ခံခဲ့ရခြင်းလား..
ဤသည်သာ အမှန်ဆိုလျှင် ဤသည်မှာ ကြောက်စရာကောင်းသည့်အရာပင်။
သူတို့၏အနောက်ဘက်သို့ ကြည့်လိုက်သည့်အချိန်တွင် သူစိတ်ပျက်သွားရသည်။ တောင်များကြားတွင် ပို၍ကြောက်စရာကောင်းသည့်အော်ရာများရှိနေသည့် လူလတ်ပိုင်းအရွယ်လူအနည်းငယ်ကို တွေ့လိုက်ရသည်။ သူတို့အားလုံးသည် ကိုယ့်ကိုကိုယ် ပြိုင်ဘက်ကင်းသည်ဟု ခံယူထားသည့်သူများပင်။
ကျင့်ကြံဆင့်ပိုမြင့်သည့်သူများလည်း ပါရှိသေးသည်။ သူတို့သည် သူတို့ခေတ်အခါတွင် ထူးချွန်သည့်ဂုဏ်သတင်းများ ရှိခဲ့သည့်သူများပင်။
သူတို့အားလုံး လာတိုက်မည်ဆိုလျှင် သူဘယ်လို ပြန်တိုက်ရတော့မည်နည်း… သူသေချာပေါက် အသတ်ခံရမည်ပင်။
“စစ်ဆေးခြင်း .. သတ်ဖြတ်ခြင်း .. ခိုးယူခြင်းပညာ .. ရက်စက်တဲ့ကပ်ဆိုးတွေ” ချောက်ကမ်းပါးထဲတွင် လှိုင်းများ ရှိနေဆဲပင်။ ထိုအလောင်းသည် ဤကဲ့သို့သော မြင်ကွင်းကို တုံ့ပြန်နေခြင်းပင်။
ဟစ်ကြွေးသံထွက်လာပြီးနောက် အဆုံးမရှိသည့် ရှေးဟောင်းအလောင်းများ ရပ်တန့်သွားကာ မတိုက်ခိုက်ကြတော့ပေ။ အနီရောင်မီးအိမ်တစ်ရာကျော် ထွက်ပေါ်လာပြီး ဤနေရာကို ထွန်းလင်းစေလိုက်လေသည်။
ဒါဇင်ပေါင်းများစွာသော လူငယ်ကျွမ်းကျင်သူများ အရှေ့ဘက်သို့ လျှောက်လာနေကြသည်။ သူတို့အားလုံးသည် နတ်မီးတောက်နယ်ပယ်၏ အမြင့်ဆုံးအဆင့်သို့ ရောက်ရှိနေသည့်သူများပင်။
“သတ်..”
ဤသည်မှာ ရက်စက်သည့် တိုက်ပွဲကြီးပင်။ သူစွမ်းအားကြီးသည့် ရန်သူများကို ရင်ဆိုင်ရတော့မည်။
အထူးသဖြင့် သူ၏ထာဝရစွမ်းအင်ကို သူလွတ်လွတ်လပ်လပ်သုံး၍မရသေးပေ။ ရှီဟောင် ဤစွမ်းအင်ကို မသုံးသေးရန် ဆုံးဖြတ်ထားသည်။ သူသည်ရဲဒင်းနှစ်ခုကို လွှဲရမ်းကာ တိုက်ခိုက်လိုက်သည်။
ခဏကြာပြီးသည့်နောက်တွင် သူသည်လူနှစ်ယောက်ကို သတ်ပြီးသွားပြီဖြစ်သကဲ့သို့ သူလည်း ဒဏ်ရာရထားလေပြီ။ သူ၏ခန္ဓာကိုယ်မှ သွေးများစီးကျလာသည်။ ကြောက်စရာအကောင်းဆုံးရိုက်ချက်မှာ သူ၏နှလုံးကို ချိန်ရွယ်ထားခြင်းပင်။
“မိုက်လိုက်တာ” ရှီဟောင် ထိတ်လန့်သွားရသည်။
ထိုလူ၏စွမ်းအားမှာ သူ့ထက်မသေးလှပေ။ ဤသက်ရှိကို သေချာကြည့်လိုက်သည့်အချိန်တွင် ဤသည်မှာ လူသားခန္ဓာကိုယ်နှင့် ပုရွက်ဆိတ်ခေါင်းရှိနေသည့် သက်ရှိပင်။
“ဒါက လွန်ခဲ့တဲ့နှစ်နှစ်သောင်းတုန်းက နာမည်ကြီးခဲ့တဲ့ ရွှေရောင်ပုရွက်ဆိတ်လား” ရှီဟောင် တုန်လှုပ်သွားရသည်။
သို့သော် မည်သို့ပင်ဖြစ်စေ သူဤနေရာတွင် ရပ်တန့်နေမည်မဟုတ်ပေ။ သူသေလျှင်ပင် တိုက်ပွဲထဲ၌သာ သေမည်။
ဖူး..
စွမ်းအားကြီးသည့် အခြားအဆင့်လွန်လူငယ်နောက်တစ်ယောက်ကို သူထပ်သတ်လိုက်သည်။
တစ်ချိန်တည်းမှာပင် အရိုးစာသားများ တောက်ပလာကာ အဖိုးတန်ပညာများဖြင့် တိုက်ခိုက်လာကြသည်။ သူနောက်ထပ်ကျွမ်းကျင်သူတစ်ယောက်ကို ဖောက်ခွဲပစ်လိုက်သည်။
ထို့အပြင် သူတိုက်ခိုက်လိုက်သည်နှင့် သူ၏ခန္ဓာကိုယ်ထဲရှိ မီးတောက်လည်း ထွက်ပေါ်လာကာ လေဟာနယ်ထဲတွင်ရှိနေသည့် သွေးရောင်ရှေးဟောင်းမီးအိမ်များအားလုံးကို ဖျက်ဆီးပစ်လိုက်သည်။
ချွမ်..
မီးခိုးရောင်သာမန်ဓားတစ်ချောင်း ထွက်ပေါ်လာကာ ချက်ချင်းပင် တောက်ပသည့်အလင်းတန်းများကို ထုတ်လွှတ်လိုက်လေ၏။ ထိုအလင်းတန်းများသည် ရှီဟောင်၏ကောင်းကင်မျက်လုံးကိုပင် နာကျင်သွားစေသည်။ သူ၏လက်များကို လှုပ်ရှားလိုက်သည်နှင့် ရဲဒင်းနှစ်ခုလုံး နှစ်ပိုင်းပြတ်သွားကာ ဓားအလင်းတန်းတစ်ခု သူ၏ခန္ဓာကိုယ်ထဲသို့ ဝင်ရောက်သွားသည်။
ဤသည်မှာ လျင်မြန်လွန်းလှသည်။ ဤဓားသည် အလွန်ပင် ထက်ရှလှပြီး အလွန်လည်း လျင်မြန်လှသည်။
ရှီဟောင်လျင်မြန်စွာ နောက်ဆုတ်လိုက်သော်လည်း သူ၏လည်ပင်ကို ရှသွားသေးသည်။ သွေးထွက်လာကာ သူ၏လည်ပင်းလည်း ပြတ်တော့မလိုပင်။ ဤသည်မှာ အန္တရာယ်များလွန်းလှသည်။
ဤသည်မှာ လူသားပုံစံသက်ရှိပင်။ သူ၏မျက်ခုံးမွေးများမှာ နားထင်စပ်ထိပင် ကျနေသည်။ သူ၏မျက်လုံးများလည်း အေးစက်လှသည်။ သူ၏လက်ထဲတွင် မီးခိုးရောင်ဓားတစ်လက်ရှိနေသည်။
ဤလူကို ရှီဟောင်သိသည်။ သူသည် ရှေးခေတ်တွင် နာမည်ကြီးခဲ့သည့်သူပင်။
ထိုဓားမှာလည်း ထူးခြားလှသည်။ ထိုဓားကို ထုတ်မသုံးလျှင် သိပ်ပြီးအာရုံမဆွဲဆောင်နိုင်သော်လည်း ထိုဓားကို သုံးလိုက်သည်နှင့် ထိုဓားမှထုတ်လွှတ်သည့်အလင်းတန်းသည် နေမင်းကြီးထက် အဆပေါင်းများစွာပို၍တောက်ပလေသည်။
ထို့အပြင် ဤသည်မှာဓားအကြမ်းထည်သာဖြစ်ပြီး အချောမသတ်ရသေးပေ။
“လေဟာနယ်ရဲဒင်းလိုမျိုး နတ်ရတနာတောင်မှ ပျက်စီးသွားပြီ .. ဒီဓားက တကယ်ထူးခြားတာပဲ” ရှီဟောင် ပြောလိုက်သည်။ ဤသည်မှာ ထာဝရရွှေပင်ဖြစ်လိမ့်မည်။
ဤသည်မှာ ဓားအကြမ်းထည်သာဖြစ်သော်လည်း စွမ်းအားကြီးလွန်းလှသည်။
ရွှီး..
ရှီဟောင်လှုပ်ရှားလိုက်သည်။ သူ၏အရှိန်မှာ လျှပ်စီးကဲ့သို့ပင် လျင်မြန်လှသည်။
ဒုန်း..
သူထိုဓားကို အဖိုးတန်ပညာများဖြင့် တိုက်ခိုက်လိုက်သည်။
သွေးများလွင့်စင်ထွက်လာသည်။ ရှီဟောင်အနားတွင် လူငယ်ကျွမ်းကျင်သူများစွာ ဝန်းရံနေပြီး သူတို့အတူတကွ တိုက်ခိုက်လိုက်သည့်အချိန်တွင် ရှီဟောင်၏ခန္ဓာကိုယ်၌ ဒဏ်ရာများစွာ ထပ်ပေါင်းသွားလေသည်။
ထိုဓားကိုင်ထားသည့်လူငယ်လေးမှာ ပို၍ပင် ကြောက်စရာကောင်းသည်။ သူ၏ဓားသည် ရှီဟောင်၏အဓိကနေရာများကိုသာ ဦးတည်နေလေသည်။
ရှီဟောင်လည်း တန်ပြန်တိုက်ခိုက်လိုက်သည်။ သူ၏လက်ဝါးသည် ထိုလူငယ်လေး၏ခန္ဓာကိုယ်ပေါ်သို့ ကျရောက်သွားကာ သူ့အားအနောက်ဘက်သို့ လွင့်ထွက်သွားစေလိုက်သည်။ ထိုလူငယ်လေးလည်း သွေးအန်သွားလေသည်။
“စွမ်းအားကြီးလိုက်တာ .. သူကဘာသက်ရှိလဲ” ရှီဟောင်၏အမူအရာများ လေးနက်သွားသည်။
ထိုဓားကိုင်ထားသည့်သူနှင့် ရွှေရောင်ပုရွက်ဆိတ်အပြင် အလွန်ကြောက်စရာကောင်းသည့်အခြားသူများလည်း ရှိနေသေးသည်။ သူအနည်းငယ်ကို သတ်ပြီးသွားပြီဖြစ်သော်လည်း အခြေအနေမှာ ပို၍ပင် အန္တရာယ်များလာသည်။
ခဏအကြာတွင် ရှီဟောင် ပြင်းထန်စွာ ဒဏ်ရာရရှိသွားသည်။ သူ၏ကောင်းကင်လမ်းကြောင်းကို ထုတ်လိုက်သော်လည်း သူတို့၏တိုက်ခိုက်မှုမှာ ကောင်းကင်လမ်းကြောင်းကိုပင် ထိုးဖောက်လာလေသည်။
ဒုန်း..
သတ္တုသံများအောက်တွင် ရှီဟောင်ထိုဓားကို အဝေးသို့ ပစ်ထုတ်လိုက်သည်။ သို့သော်လည်း ထိုဓားမှာ သူ၏ရင်ဘတ်ကို ထိသွားသေးသည်။
ဖုန်း..
သူသည် ထိုဓားကိုင်ထားသည့်သက်ရှိ လွင့်ထွက်သွားအောင်လုပ်လိုက်ပြီး ဓားကို လုယူလိုက်သည်။
ရှီဟောင်သည် ထိုဓားကို လွှဲရမ်းလိုက်သည့်အပြင် သူ၏အဖိုးတန်ပညာများကိုလည်း ထပ်ပေါင်းထည့်လိုက်ပြီး သူ၏အနားတွင်ရှိနေသည့် လူနှစ်ယောက်၏ခေါင်းကို ဖယ်ရှားပစ်လိုက်သည်။
သို့သော် ထိုအချိန်တွင် ထူးဆန်းသည့်အရာများ ဖြစ်လာသည်။ ချောက်ကမ်းပါးမှ တဝူးဝူးအသံများထွက်ပေါ်လာပြီး သူ့အပေါ်ကျရောက်လာသည့် ထူးဆန်းသည့်စွမ်းအားတစ်ခု ထွက်ပေါ်လာသည်။
တစ်ချိန်တည်းမှာပင် ထိုဘုရင်ကြီး၏အလောင်းတောက်ပလာကာ အလွန်ပင်နူးညံ့လှသည့် စွမ်းအားတစ်ခုထွက်ပေါ်လာပြီး ရှီဟောင်အား ဝန်းရံလာလေသည်။