သုခကမ္ဘာက ရှီဟောင် - Chapter - 1078 မြူများနှင့် ဖရိုဖရဲကိစ္စရပ်များ
“လေးလိုက်တာ”
ယုန်ဖြူလေးသည် ဓားကိုကောက်ကိုင်လိုက်သော်လည်း ရလဒ်အနေဖြင့် သူမလက်ကောက်ဝတ်လည်သွားကာ ဓားလည်း အောက်သို့ပြုတ်ကျသွားလေ၏။
ထိုဓားမှာ သိပ်မရှည်သော်လည်း ဂျင်ပေါင်းတစ်သိန်းလေးလံသည်။
ဓားမှာ မှုန်မှိုင်းသည့်မီးခိုးရောင်ဖြစ်ပြီး သေချာမကြည့်လျှင် သစ်သားဓားနှင့်ပင် တူနေသည်။ ထိုဓားပေါ်တွင်ရှိနေသည့် ဒီဇိုင်းပုံစံများမှာလည်း လူသားပုံစံသက်ရှိများပင်။ ထိုလူသားပုံစံသက်ရှိများအနားတွင် မြူခိုးပုံစံလိုင်းများ ရှိနေသည်။
“အဆင့်တက်တဲ့မြင်ကွင်းလား…”
ကြည့်လိုက်မည်ဆိုလျှင် ဤသည်မှာ သာမန်အတိုင်းသာဖြစ်ပြီး ထိုပုံစံများမှာ ဘာမှအံ့ဩစရာမရှိတော့ပေ။ သို့သော် ယုန်ဖြူလေးမှ ထိုဓားကို အသာလေးလွှဲရမ်းလိုက်သည့်အချိန်တွင် ထိုဓားမှာ တောက်ပလာကာ အလွန်ပင် ထူးခြားလာသည်။ ဤဓားကို စိုက်ကြည့်လိုက်လျှင် နာကျင်မှုကိုပင် ခံစားရလိမ့်မည်ပင်။
ဓားပေါ်တွင်ရှိနေသည့် လူသားပုံရိပ်မှာ အသက်ဝင်လာသလိုပင်။ မြူနှင့်တူသည့်ပုံစံများမှာ ထာဝရစွမ်းအင်ကဲ့သို့ ဖြူစင်သန့်ရှင်းနေလေ၏။
အခြားသူများမှာ အံ့အားတကြီးပင် သက်ပြင်းချလိုက်ကြသည်။ ထာဝရတည်ရှိနေသည့်ထာဝရဓားဖြစ်ထိုက်ပါပေသည်။ ဤသည်ကို သေချာပြုပြင်လိုက်ပါက အဆင့်လွန်ရတနာဖြစ်လာမည်သာ။
“တူးလာကတည်း ဒီလိုပုံစံမျိုးရလာတယ်လို့ အားလုံးပြောနေကြပေမယ့် တစ်ခြားလျှို့ဝှက်ချက်တွေလည်းရှိနေသေးတယ်လို့ ပြောကြတယ်” ချောင်ယုရှန်း ပြောလိုက်သည်။
လောကကြီးမှ ဤကဲ့သို့သော ပစ္စည်းမျိုးဖန်တီးနိုင်လိမ့်မည်ဟု လူအများစုမှ မယုံကြည်ကြပေ။
သူတို့အားလုံးသည် ထိုဓားကို ကိုင်ကြည့်လိုက်ကြပြီး လက်မလွတ်နိုင်အောင် ဖြစ်နေကြလေသည်။
“နင်တကယ်ပဲ ဘာတွေ ကြုံတွေ့လာရတာလဲ” ချင်းရိ မေးလိုက်သည်။
“ဟုတ်တယ် .. ထူးဆန်းမှုရဲ့ အရင်းအမြစ်ကို တွေ့လိုက်ရတာတောင်မှ နင်အသက်ရှင်လျက် ပြန်လာနိုင်သေးတယ်” ယုန်ဖြူလေးမှ ရေရွတ်လိုက်သည်။
“ကလေးတွေက ဒီလိုကိစ္စကို စိတ်ဝင်စားစရာမလိုဘူး” ရှီဟောင် သူမခေါင်းကိုပုတ်ကာ ပြောလိုက်သည်။
ရှီဟောင်သည် သူတို့အား အနက်ရောင်ရှေးဟောင်းသင်္ဘောကြီးအကြောင်းနှင့် ထူးဆန်းမှုများကို ပြောပြလိုက်သည်။ သူပြောသည်နှင့် ကြားလိုက်ရသည်နှင့် သူတို့အားလုံး ဆွံ့အသွားရသည်။ ဦးခေါင်းများ၊ ထာဝရသွေးများဖြင့် ပြည့်နေသည့် ကျောက်အိုးကြီး .. ချောက်ကမ်းပါးအောက်က အဆီးအတား…
သူတို့ကိုယ်တိုင် ကြုံတွေ့ခဲ့ရခြင်း မဟုတ်လျှင်ပင် ရှီဟောင်ပြောပြသည်ကို နားထောင်ပြီး သူတို့အားလုံး ကျောချမ်းသွားရသည်။ အချိန်တိုတွင်း ကိစ္စများစွာ ဖြစ်ပျက်ခဲ့ခြင်းပင်။
နတ်ဘုရားပစ်ချက်ကျောက်တုံးလေးပင်လျှင် ကြက်သီးထသွားသည်ဟု ခံစားလိုက်ရလေသည်။ ရှေးဟောင်းသင်္ဘောကြီးမှာ ထူးဆန်းကာ ကြောက်စရာကောင်းလှသည်။ ထိုသင်္ဘောထံမှ အသက်ရှင်လျက် ပြန်လာနိုင်ခြင်းမှာ လွယ်ကူသည့်ကိစ္စတစ်ခုမဟုတ်ပေ။
သူတို့သည် ဤအကြောင်းအရာကို အချိန်အတော်ကြာသည်အထိ ဆွေးနွေးကြသော်လည်း သူတို့ လေ့လာဆန်းစစ်နိုင်မည့်နည်းလမ်းမရှိပေ။ သူတို့ဘာနှင့် ရင်ဆိုင်နေရသည်ကိုပင် သူတို့မသိပေ။
“အဲဒီထူးဆန်းတဲ့အရာက စွမ်းအားအကြီးဆုံးပုံရိပ်တွေကို ဘာတွေသိပ်မလုပ်နိုင်ဘူးထင်တယ် .. ပြီးတော့ သူက ပိတ်သိမ်းခံထားရပြီပဲကို” ချင်းရိ ပြောလိုက်သည်။
နယ်ခြားစပ်မှ ဘုရင်ကြီးပြန်လာသည်မှာ လတ်တလောခေတ်တွင်သာ ဖြစ်လိမ့်မည်ဟု သူမခန့်မှန်းလိုက်ခြင်းပင်။ ထိုဘုရင်ကြီးထွက်လာပြီးနောက် ထိုထူးဆန်းသည့်အရာနောက်ကို တစ်ခဏခန့်သာလိုက်ပြီးနောက် သူ့အား ဖမ်းဆီးလိုက်ခြင်းပင်။
သို့သော်လည်း ဤသည်မှာ သူမခန့်မှန်းချက်သာဖြစ်ပြီး သက်သေပြစရာမရှိပေ။
“နယ်ခြားစပ်က ဘယ်နေရာမှာ ရှိတာလဲ .. အဲဒါက ဘယ်လိုနေရာမျိုးလဲ …” ယုန်ဖြူလေးမှ ရေရွတ်လိုက်သည်။ သူမသည် ထိုရှေးဟောင်းနေရာကို အတော်လေးပင် စိတ်ဝင်စားနေလေ၏။
“အဲဒါက စွန့်ပစ်နယ်မြေရဲ့ အတွင်းပိုင်းမှာ ရှိလောက်တယ် .. သမိုင်းဝင်ကာလမဟာမိတ်ဆိုတာလည်း အဲဒီမှာ ရှိနေလောက်တယ်” ချောင်ယုရှန်း ပြောလိုက်သည်။
နယ်ခြားစပ်မှာ အဘယ်ကြောင့် ဤလောကကြီးနှင့် သီးသန့်ကွဲထွက်နေသည်ကိုသာ သူနားမလည်ခြင်းပင်။
ဤသည်မှာ အဆင့်မြင့်နယ်မြေနှင့် လုံးဝမသက်ဆိုင်ပဲ သီးသန့်ကမ္ဘာတစ်ခုအဖြစ် တည်ရှိနေခြင်းများလား..
ရှီဟောင် သက်ပြင်းချလိုက်သည်။ နယ်ခြားစပ်မှာ အလွန်ပင် ခါးသီးသည့်နေရာဖြစ်သော်လည်း ယခုအချိန်တွင် ပို၍ပင် အန္တရာယ်များနေလေပြီ။ ယဇ်ပုလ္လင်ထက်မှတစ်ဆင့် ဘုရင်တစ်ယောက် ကျဆုံးသွားသည်ကို သူတွေ့ခဲ့ရသည်။ ဘုရင်တစ်ယောက်သည်လည်း အဆင့်မြင့်နယ်မြေသို့ ပြန်လာကာ ချောက်ကမ်းပါးအတွင်းရှိ အဆီးအတားအတွက် အသက်ပေးခဲ့လေပြီ။
“ကျန်တဲ့ငါးယောက်က အသက်ရှင်သေးရဲ့လား” ရှီဟောင် တီးတိုးပြောလိုက်သည်။
အချိန်ကြာလာသည်နှင့် ကျန်ရှိနေသည့်ဘုရင်များလည်း သေဆုံးသွားကြမည်သာ။ ထိုသို့ဆိုလျှင် အကျိုးဆက်များမှာ မတွေးချင်လောက်အောင်ပင် ဆိုးရွားသွားလိမ့်မည်။
နယ်ခြားစပ်သာ ထိုးဖောက်ခံလိုက်ရသည်နှင့် စီရင်စုသုံးထောင်လုံးတွင် မီးတောက်များ ဝါးမြိုသွားပြီး တိုက်ပွဲကြီးများလည်း အဆုံးမသတ်နိုင်အောင် ဖြစ်လာမည်ပင်။
ဒုက္ခများမည့်အချိန်များရောက်လာတော့မည်ဟု သူခံစားနေရသည်။
“ဒီခေတ်ကြီးက သေချာပေါက်ကို အရမ်းဖရိုဖရဲဖြစ်သွားဦးမှာပဲ” ချင်းရိ သက်ပြင်းချကာ ပြောလိုက်သည်။ အခြေအနေများမှာ အလွန်ပြင်းထန်နေသည်ကို သူမသိသည်။
“မီးတိမ်လှိုဏ်ဂူ၊ တစ္ဆေတာအိုဂိတ်…” ရှီဟောင် အံကြိတ်လိုက်သည်။ သူအတော်လေး ဒေါသထွက်နေရသည်။ အမှန်တရားကို ဖုံးကွယ်ရန်အတွက်နှင့် သူတို့သည် နယ်ခြားစပ်မှသူရဲကောင်း၏ မျိုးဆက်များကို ဤသို့ဆက်ဆံခဲ့ကြသည်။
ဤသည်မှာ အဆင့်မြင့်နယ်မြေတစ်ခုလုံး၏ အင်အားကို ထိခိုက်စေသည့် အတွင်းပိုင်းပဋိပက္ခများပင်။ သူတို့ထံတွင် မည်ကဲ့သို့သော ပန်းတိုင်များရှိနေသနည်း.. လောကကြီးကို မီးတောက်များဝါးမြိုသွားပါက သူတို့ပင်လျှင် သူတို့ကိုယ်သူတို့ မကာကွယ်နိုင်တော့မည်ကို သူတို့မကြောက်ခြင်းလား..
သူတို့လုပ်နေသည့် ကိစ္စအားလုံးမှာ အဆင့်မြင့်နယ်မြေအတွက် မကောင်းသည့်အရာများပင်။
“အခြေအနေတွေက အရမ်းရှုပ်ထွေးနေပြီ .. ဒီကိစ္စမှာ မသေမျိုးတွေ၊ ဧကရာဇ်တွေနဲ့ ထာဝရလူသားတွေတောင် ပါနေတယ်လို့ လူအိုကြီးရေရွတ်နေတာကို ငါကြားဖူးတယ် .. သူတို့တွေက အဖွဲ့တွေကွဲနေကြတာ” ချောင်ယုရှန်း ပြောလိုက်သည်။
သူပြောသည့် လူအိုကြီးဆိုသည်မှာ သူ၏ထူးဆန်းသည့်ဆရာပင် ဖြစ်သည်။
“မင်းဒီအကြောင်းကို အသေးစိတ်ပြောပြလို့ရမလား” ရှီဟောင်မေးလိုက်သည်။ သူပို၍အသေးစိတ်အချက်အလက်များကို သိချင်သေးသည်။
ဖက်တီးလေး ခေါင်းခါလိုက်သည်။ သူ၏ဆရာ အရက်မူးပြီး ရေရွတ်သည့်စာသားအနည်းငယ်ကိုသာ သူကြားခဲ့ရခြင်းပင်။ သူဘယ်လောက်မေးမေး ထိုလူအိုကြီးမှ မပြောပြသောကြောင့် ထိုစကားများမှာ ဘာကိုဆိုလိုမှန်း သူတကယ်မသိပေ။
“နောက်ဆုံးကောက်ချက်ချရရင်တော့ ကိစ္စတွေက အရမ်းကို ရှုပ်ထွေးနေပြီ .. နယ်ခြားစပ်ထိုးဖောက်ခံရတဲ့အချိန်ကျရင် အကျိုးဆက်တွေက ငါတို့လောကကြီးပဲ စိုးရိမ်ရမယ့်အရာမဟုတ်တော့ဘူး .. အကျိုးဆက်က မယုံကြည်နိုင်လောက်အောင်ကို ပျံ့သွားမှာပဲ”
အကြောင်းပြချက်အမျိုးမျိုးကြောင့် လူမျိုးစုတူချင်းပင်လျှင် သတ်ဖြတ်မှုများဖြစ်လာလိမ့်မည်။ အဘယ်ကြောင့်ဆိုသော် သူတို့ယုံကြည်အားကိုးမည့် ‘သက်ရှိ’များမတူညီနိုင်သောကြောင့် သူတို့အဖွဲ့ကွဲသွားကြမည်သာ။
“ငါခေါင်းကိုက်လာသလိုပဲ .. ဘာလို့အဲဒီလောက်တောင် ရှုပ်ထွေးနေတာလဲ” ယုန်ဖြူလေးမှ ပြောလိုက်သည်။
“နောင်ကျရင် စွမ်းအားကြီးတဲ့သူတွေကပဲ ကိုယ့်နေရာကိုကိုယ် ကာကွယ်နိုင်လိမ့်မယ် .. အရာအားလုံးကို မီးတောက်တွေက ဝါးမြိုပြီးတော့ တိုက်ပွဲကြီးတွေက ကောင်းကင်ကိုတောင် လှုပ်ခတ်စေလိမ့်မယ် .. ဒီလောကကြီးက ငြိမ်းချမ်းတော့မှာ မဟုတ်ဘူး” ချောင်ယုရှန်း ပြောလိုက်သည်။
ထိုအချိန်ရောက်လာလျှင် မည်ကဲ့သို့သော ဥပဒေသများရှိလာမည်ကို မသိနိုင်ပေ။
“ဒါက ထာဝရရှေးဟောင်းခေတ်က ဖြစ်လာတဲ့ စစ်ပွဲနေမှာ .. ဒီခေတ်မှာ ပိုဆိုးတော့မှာ .. ဒီကောင်းကင်နဲ့ ကမ္ဘာလောကကြီးတောင် အဆုံးသတ်သွားမလား မသိဘူး” နတ်ဘုရားပစ်ချက်ကျောက်တုံးလေး ပြောလိုက်သည်။
“အဲဒီလောက်ကြီးမားတဲ့ စစ်ပွဲကြီးတကယ်ဖြစ်လာမယ်ဆိုရင် စီရင်စုသုံးထောင်လည်း သတိမထားမိမှာမဟုတ်ဘူး .. ငါတို့ ဝင်တိုက်ခွင့်ရပါ့မလား ဆိုတာပဲ သိချင်တာ” ချောင်ယုရှန်း ပြောလိုက်သည်။
“ငါသွားမှာ” ရှီဟောင် ပြောလိုက်၏။
ချောင်ယုရှန်းသည် သူ့အား တစ်ချက်ကြည့်လိုက်ကာ “အာကာသကလန်ရဲ့ တာအိုကာကွယ်သူ .. အဲဒီလူက မင်းရဲ့အတိတ်ကို ကြည့်နိုင်ဖို့အတွက် နည်းလမ်းပေါင်းစုံ ကြိုးစားနေတာတဲ့ … ဒါပေမဲ့နောက်ဆုံးတော့ သူပဲသွေးအန်သွားတာ .. မင်းက ဒီသမိုင်းကြောင်းမှာ မပါဘူးလား”
“မင်းက အာကာသကလန်ရဲ့ကိစ္စတွေကို ဘယ်လိုသိနေတာလဲ” ရှီဟောင် ထိတ်လန့်သွားရသည်။
“ငါ့ရဲ့ဆရာ ပြောပြတာ” ဖက်တီးလေး ပြောလိုက်သည်။
“အဲဒီလူအိုကြီးက အခုထိ ငါ့ကို အကောက်ကြံချင်နေတုန်းပဲ .. ငါဒီရှေးဟောင်းမြေက ထွက်သွားတာနဲ့ ကောင်းကင်ဘုံမြို့ကို သွားပြီးတော့ သူတို့အားလုံး တစ္ဆေသရဲလိုအော်ဟစ်နေရတဲ့အထိကို သတ်ပစ်ဦးမယ်” ရှီဟောင်ပြောလိုက်သည်။ အာကာသကလန်မှ သူတို့၏ကျေးဇူးရှင်ကို ကျေးဇူးဆပ်လိုက်ပုံကို သူအခုထိ ရွံရှာနေတုန်းပင်။
“ဒီသမိုင်းကြောင်းမှာ မပါဘူး .. မင်းက အဆင့်မြင့်နယ်မြေကနေ ထွက်သွားပြီးတော့ အဲဒီစစ်ပွဲတွေမှာ တကယ်ဝင်ပါမှာလို့တော့ မပြောနဲ့နော်” ယုန်ဖြူလေး ပြောလိုက်သည်။
“အဲဒီစာသားကို အဲဒီလိုမျိုး အဓိပ္ပာယ်ပြန်လို့မရသေးဘူး .. ငါ့ဆရာတောင်မှ ဘာကိုဆိုလိုချင်တာလဲဆိုတာကို မသိသေးဘူး” ချောင်ယုရှန်း ပြောလိုက်သည်။
“ဘယ်လိုတောင် အဓိပ္ပာယ်မရှိတဲ့ အကြားအမြင်တွေလဲ .. အနာဂတ်ဆိုတာက မသေချာမှုတွေနဲ့ ပြည့်နေတာ .. ဘာဖြစ်လာမလဲဆိုတာကို ဘယ်သူက သိနိုင်မှာလဲ .. အားလုံးပြောင်းလဲသွားနိုင်တယ်” ရှီဟောင် ခေါင်းခါကာ ပြောလိုက်သည်။
“နင့်ဆရာက ဘာပြောသေးလဲ” ချင်းရိ ပြောလိုက်သည်။
“အနာဂတ်က အရမ်း ကြောက်စရာကောင်းတယ် .. အတိတ်နဲ့အနာဂတ်နဲ့ မသက်ဆိုင်တဲ့သူတစ်ယောက် ဒီစီရင်စုသုံးထောင်ကို ရောက်လာလိမ့်မယ် .. ပြီးရင် အဲဒီလူက အစားကောင်းကောင်းစားနိုင်တဲ့သူကို အကူအညီတောင်းလိမ့်မယ်တဲ့” ဖက်တီးလေးမှ ပြောလိုက်သည်။
“ငါက အစားကောင်းကောင်းစားနိုင်တဲ့သူပဲ .. အဲဒီလူက ငါ့ကို အကူအညီတောင်းမှာများလား .. ဒါပေမဲ့ ငါက ဒီသမိုင်းကြောင်းနဲ့ မသက်ဆိုင်တဲ့သူလို့ မင်းပြောခဲ့တယ်မလား .. ဒါက ရှေ့နောက်မညီတော့ဘူးလေ” ရှီဟောင် အရေထူစွာ ပြောလိုက်သည်။ သူ့ကိုယ်သူ ထိုပြိုင်ဘက်ကင်းသည့်သူဟု သတ်မှတ်လိုက်ခြင်းပင်။
“ဒါလည်း နင့်ဆရာ ပြောလိုက်တာလို့ မပြောနဲ့နော်..” ယုန်ဖြူလေးမှ စိတ်ပျက်စွာ ပြောလိုက်သည်။
“မင်းဆရာက နတ်ဆရာလား .. ဒါမှမဟုတ် ရူးနေတာလား .. တစ်နေ့လုံးဒီလိုမျိုး ကိစ္စတွေပဲ တွေးနေတာလား .. ပြီးတော့ သူပြောတာတွေအကုန်လုံးက အဓိပ္ပာယ်မရှိတာတွေပဲ မဟုတ်ဘူးလား” နတ်ဘုရားပစ်ချက်ကျောက်တုံးလေး ပြောလိုက်သည်။
“မင်းဘယ်လိုလုပ်သိတာလဲ .. ငါ့ဆရာက ဒီနှစ်တွေက ပိုပိုပြီးတော့ ရူးလာတာ .. ငါတောင်သူနဲ့ မနေရဲတော့တဲ့အထိပဲ .. တစ်ခေါက်ကဆို သူကငါ့ကို ရောင်းစားတော့မလို့ပဲ … သူပြောတာ ဒါက ငါ့ရဲ့ကံကြမ္မာပဲတဲ့” ဖက်တီးလေးမှာ အလွန်ပင် စိတ်ပျက်နေလေသည်။
ထိုစကားကို ကြားလိုက်ရသည့်အချိန်တွင် သူတို့အားလုံး ဆွံ့အသွားရသည်။ ဤသည်မှာ ဘယ်လိုဆရာများဖြစ်သနည်း.. ဤလူအိုကြီး၏ စကားများကို သူတို့သံသယဝင်လာသည်။ ကြည့်ရသည်မှာ သူ၏စိတ်မှာ ပုံမှန်မဟုတ်သည့်ပုံပင်။
“စိတ်ပျက်စရာအကောင်းဆုံးက .. သူက ပြောသေးတယ် .. သူငါ့ကို မရောင်းစားရင်တောင်မှ တစ်နေ့ကျရင် အစားကောင်းကောင်းစားနိုင်တဲ့လူတစ်ယောက်ပေါ်လာပြီးတော့ ငါ့ကို အနှေးနဲ့အမြန် ရောင်းစားလိမ့်မယ်တဲ့ .. ငါအဲဒီလူဆီ ဘယ်တော့မှ ပြန်မသွားတော့ဘူး .. သူ့ဘာသာသူ ရူးနေပါစေတော့” ဖက်တီးလေးမှာ အလွန်ပင် ဒေါသထွက်နေလေ၏။
ဤလူများအားလုံး ဆွံ့အသွားကြကာ ဖက်တီးလေး၏ ထူးဆန်းသည့်ဆရာအတွက် တစ်ခဏမျှငြိမ်သက်ပေးလိုက်ကြသည်။ သူသာ သတိမထားမိလျှင် သူရောင်းစားခံနေရလောက်လေပြီ။
“အဲဒီတော့ နင့်ရဲ့အဆုံးသတ်က အရမ်းကို ဆိုးရွားမှာလို့ ပြောချင်တာမလား .. အဲဒါဆိုရင် နင့်ကို ကူညီတဲ့အနေနဲ့ ငါနင့်ကိုအခု ရောင်းစားလိုက်ရင်ရော” ယုန်ဖြူလေးမှ ပြောလိုက်သည်။
“မင်းအဲဒီမှာ စမှားသွားတာပဲ .. ငါ့ဆရာပြောတာ ငါက အရမ်းကံကောင်းတယ်တဲ့ .. ငါနှိုးလာတဲ့အချိန်ကျရင် မြေအောက်ကနေ ပြန်ထွက်လာပြီးတော့ တစ်နေ့ကျရင်တော့ ပြန်လည်ပေါင်းစည်းသွားမှာပဲ .. ငါက မသေနိုင်ဘူး” ဖက်တီးလေး ဂုဏ်ယူစွာပင် ပြောလိုက်လေသည်။
ဤကဲ့သို့သော လုံးဝအဓိပ္ပာယ်မရှိသည့်အရာအတွက် အခြားသူများမှာ သူနှင့် ပြိုင်မပြောကြတော့ပေ။
“ဒီတစ်ခေါက် ငါ သီးသန့်ကျင့်ကြံတာ အချိန်ဘယ်လောက် ကုန်သွားလဲ” ရှီဟောင်မေးလိုက်သည်။ သူကျင့်ကြံလိုက်သည်နှင့် သူသည် အရာအားလုံးကို မေ့လျော့သွားသည်သာ။
“နှစ်ဝက်” ချင်းရိ ပြောလိုက်သည်။
“အဲဒီလောက်ပဲ ရှိတာလား.. ငါက အနည်းဆုံး ၂ နှစ်လောက် ကြာမယ်လို့ ထင်နေတာ” ရှီဟောင် ထိတ်လန့်သွားရသည်။
ပထမတစ်ကြိမ် သီးသန့်ကျင့်ကြံသည့်အချိန်တွင် တစ်နှစ်ခွဲ ကြာမြင့်ခဲ့ပြီး ယခုနောက်တစ်နှစ် ကုန်သွားလေပြီ။ သူရှေးဟောင်းမြေထဲသို့ ဝင်လာသည်မှာ နှစ်နှစ်ပင် ရှိတော့မည်။
ယခု သူသည် ၁၉ နှစ်ကျော်ပြီး အသက် ၂၀ ပင် ပြည့်တော့မည်။
“ငါတို့လည်း အဆင့်တက်နိုင်မယ့် နည်းလမ်းကို စဉ်းစားရတော့မယ်” ယုန်ဖြူလေး သူမကိုယ်သူမ အားပေးလိုက်သည်။ သို့သော်လည်း ဤအဆင့်မှာ အလွန်ပင် ခက်ခဲသည်ကို သူမသိသည်။ ဤသည်မှာ ကောင်းကင်ပါရမီရှိသူတိုင်း လုပ်နိုင်သည့်အရာမဟုတ်ပေ။
သို့သော်လည်း ဤနှစ်ဝက်အတွင်းတွင် သူတို့အသိဉာဏ်များ တိုးလာခဲ့သည်။ ရှီဟောင် ထာဝရနန်းတော်သခင်လေးထံမှ ယူခဲ့သည့်အရိုးစာအုပ်အားလုံးကို သူတို့ဖတ်ခဲ့ကြသည်။ ထိုစာအုပ်များမှာ သူတို့အရှေ့မှလူများ၏ အသိအမြင်များကို ရေးထားသည့် စာအုပ်များပင်။
“မင်းအခု ဘာလုပ်မှာလဲ” ချင်းရိ ရှီဟောင်အား မေးလိုက်သည်။
“ငါ ဒုတိယမြောက် ထာဝရစွမ်းအင်ကြောင်းကို ကျင့်ကြံချင်တယ်” ရှီဟောင် ပြောလိုက်သည်။
ဤလူများအားလုံး အေးခဲသွားကြသည်။ ဤကောင်သည် ယခုလေးတင်မှ ထိုအဆင့်သို့ရောက်ရှိသွားခြင်းဖြစ်ပြီး ယခုတော့ ကောင်းကင်ကို ထပ်ပြီးတော့ ဆန့်ကျင်ချင်နေပြီလား.. သူတို့ဘာပြောရမလဲဆိုတာပင် မသိတော့ပေ။
“မင်းရဲ့လမ်းကြောင်းကို မင်းသေချာနားလည်ရဲ့လား” ချောင်ယုရှန်း မေးလိုက်သည်။ ရှီဟောင်သည် ယခုလေးတင်မှ လမ်းကြောင်းတစ်ခုကို အောင်မြင်ခြင်းဖြစ်ပြီး ယခုတော့သူက အခြားလမ်းကြောင်းတစ်ခုကို လျှောက်ချင်နေလေပြီလား.. ဤသည်မှာ ပြောင်းလဲမှုကြီး ဖြစ်သွားလိမ့်မည်။ ဤသည်မှာ သူ၏တာအိုအုတ်မြစ်ကို မတည်မငြိမ်ဖြစ်စေပြီး ကြောက်စရာကောင်းလောက်သည့် ပြဿနာများ ဖြစ်လာစေနိုင်လိမ့်မည်ပင်။
“ငါ့ရဲ့လမ်းကြောင်းကို ငါသေချာသိပါတယ် .. ပြီးတော့ ငါအစောကြီးကတည်းက ပြင်ဆင်မှု လုပ်ထားပြီးသား” ရှီဟောင် ခေါင်းညိမ့်လိုက်သည်။
“ဒီကိစ္စကို အလောတကြီးမလုပ်ပဲနဲ့ နင့်ရဲ့ခန္ဓာကိုယ်ကို တည်ငြိမ်အောင် အရင်လုပ်လိုက်တာက ပိုကောင်းလိမ့်မယ်ထင်တယ် .. အပြင်ဘက်ကို တစ်ချက်လောက် လှည့်ပတ်ကြည့်လိုက်ရင်လည်း မဆိုးဘူးလို့ငါထင်တယ်” သူရူးသွားမည်ဆိုးသောကြောင့် ချင်းရိ ပြောလိုက်သည်။
“အဲဒါလည်း ကောင်းပါတယ်” ရှီဟောင် ခေါင်းညိမ့်လိုက်သည်။ ထာဝရရှေးဟောင်းမြေထဲသို့ ဝင်ရောက်ပြီးသည့်နောက်တွင် သူ့အားရှင်းပစ်ချင်နေသည့်သူများ ရှိနေသည်သာ။ ထို့ကြောင့် သူ၏ရန်သူများကို သူသွားရှင်းပစ်ရမည်။
“ငါမင်းတို့ကို နေရာကောင်းတစ်ခု ခေါ်သွားပေးမယ် .. ထာဝရရှေးဟောင်းမြေပွင့်လာတဲ့အချိန်တိုင်း စွမ်းအားအကြီးဆုံး ထူးခြားပါရမီရှိတဲ့သူနဲ့ ရှေးဟောင်းလူထူးဆန်းတွေအကုန်လုံး အဲဒီနေရာကို သွားပြီးတော့ အခွင့်အရေးတွေ သွားရှာကြတယ်” ချောင်ယုရှန်း ပြောလိုက်သည်။
“အဲဒီလို နေရာမျိုး ရှိသေးတာလား” အားလုံး ထိတ်လန့်သွားကြသည်။
“ငါ့ဆရာပြောတာတော့ နျင်ချွမ်းက အသက်ရှိနေတဲ့ လက်မောင်းရိုးနဲ့ သရဖူ ၁၀ခုဘုရင်က ထာဝရတာအိုချုံပုတ်ကို ရခဲ့တာတဲ့”
“ဘာ..” ထိုစကားကို ကြားလိုက်ရသည့်အချိန်တွင် ဤလူများအားလုံး ထိတ်လန့်သွားကြသည်။