သုခကမ္ဘာက ရှီဟောင် - Chapter - 1159 ဆက်တိုက်အောင်မြင်မှုများ
ရှီဟောင်ရောက်လာပြီ .. သူရောက်လာသည်နှင့် နေရာပေါင်းစုံမှ မျက်လုံးများသူ့ထံသို့ ရောက်ရှိလာလေသည်။
သူ့ကို ကလန်အနည်းငယ်မှာ ကောင်းကင်နတ်ဘုရားများမှ ဖိတ်ခေါ်ပြီးသည့်နောက်တွင် သူ့ကို ထပ်မတွေ့ရတော့ပဲ သူ့ဂုဏ်သတင်းများသာ ကြားခဲ့ရသည်။
“အဲဒီတော့ သူကဟွမ်လား .. သူက ကြည့်ကောင်းတဲ့လူငယ်လေးတစ်ယောက်ဖြစ်ပြီးတော့ ဘာလို့ ဒီလောက်အောင်မြင်မှုတွေ ရနေတာလဲ .. သူက စွမ်းအားအကြီးဆုံးကောင်းကင်အတိဒုက္ခကို ဖြတ်သန်းပြီးတော့ သမိုင်းမှာလည်း သူ့နာမည်ကို ရေးထိုးလိုက်ပြီ…”
လူများစွာသည် သူ့အကြောင်းများကိုသာ ဆွေးနွေးနေကြလေ၏။
“တကယ်ကို လူငယ်တွေကြားက သူရဲကောင်းပဲ .. သူက ငါထင်ထားတာထက်တောင် ပိုငယ်သေးတာပဲ .. သူဘယ်လိုလုပ် ဒီလိုဖြစ်အောင်ထိ ကျင့်ကြံနိုင်တာလဲ .. သူက ရှေးဟောင်းလူထူးဆန်းတွေလိုမျိုး တစ်ချိန်လုံးကျင့်ကြံနေတာလည်းမဟုတ်ပဲနဲ့ ခေတ်တစ်ခေတ်အတွင်းမှာကို ဒီလိုမျိုးထိ တိုးတက်သွားတာ”
တစ်စုံတစ်ယောက်မှ လေးစားစွာ ပြောလိုက်သည်။ ရန်သူများပင်လျှင် ဤလူများကို အသိအမှတ်ပြုရမည်သာ။ ရှီဟောင်သည် မြင်တွေ့နိုင်ရန် ရှားပါးသည့်သူပင်။
“သမိုင်းတစ်လျှောက်မှာ သူ့လိုမျိုးလူမျိုး မပေါ်လာဖူးတာမဟုတ်ဘူး .. ဒါပေမဲ့ အများစုက ငယ်ငယ်ရွယ်ရွယ်နဲ့သေသွားကြတာ … နျင်ချွမ်းနဲ့ သရဖူ ၁၀ ခုဘုရင်တို့လောက်ပဲ ကျန်တော့တာ .. ဒါပေမဲ့ သူတို့တွေလည်း ကျရှုံးသွားပြီထင်တယ်”
အားလုံး သက်ပြင်းချလိုက်၏။ ဟွမ်သည် အသတ်မခံရသရွေ့ သူ၏အနာဂတ်မှာ မှန်းဆ၍မရနိုင်လောက်ပင် အောင်မြင်မှုများဖြင့် ပြည့်နှက်နေလိမ့်မည်။
“ဝိုး .. ဟွမ်ရဲ့ ကျင့်ကြံဆင့်တာ အထင်ကြီးစရာကောင်းတယ်လို့အားလုံး ပြောနေကြတာ .. တကယ်တမ်းတော့ သူက ချောလည်းချောတာပဲ” မိန်းမပျိုလေးများစွာသည် ဟွမ်အား ကြည့်နေကြခြင်းသာ။
“အားရား .. သူအခုလေးတင် ငါ့ကို ကြည့်လိုက်တယ် ခစ် ခစ်..”
“နင့်မျက်လုံးတွေက မကောင်းတော့ဘူးထင်တယ် .. သူက ပြိုင်ကွင်းကို ကြည့်နေတာ .. နင့်ကို သတိထားမိမှာတောင် မဟုတ်ဘူး .. မင်းက နဂါးမိန်းမပျိုတို့၊ စုန်းမတို့မဟုတ်ရင် သူ့အာရုံကို ဆွဲဆောင်မယ့်ကိစ္စကို မေ့ထားလိုက်တော့”
မိန်းမငယ်လေးများသည် သူတို့အချင်းချင်း နောက်ပြောင်နေကြကာ ရယ်မောနေကြလေ၏။
ရှီဟောင်ကို ရန်လိုနေသည့်သူများလည်း မနည်းပေ။ သို့သော် သူတို့ထုတ်မပြရဲပေ။ အဘယ်ကြောင့်ဆိုသော် ဟွမ်၏အောင်မြင်မှုများမှာ ကြောက်စရာကောင်းလွန်းလှသည်။
ရှီဟောင်သည် အရှေ့ဘက်ကိုသာ စိုက်ကြည့်နေပြီး တည်ငြိမ်နိုင်ရန် ခက်ခဲနေလေ၏။ ယခင်တစ်ခေါက် ထာဝရရှေးဟောင်းမြေပွင့်သည်နှင့်ယှဉ်လျှင် ယခုတစ်ခေါက်မှာ စောလွန်းလှသည်။
ထိုကြီးမားလှသည့်ပြိုင်ကွင်းတွင် အချိန်၏တိုက်စားမှုများ ရှိနေသော်လည်း လေထဲတွင် မိုးထိုးနေဆဲဖြစ်ပြီး မပျက်စီးသေးပေ။ ဤသည်မှာ အဆင့်လွန်လူငယ်များ အားပြိုင်သည့် စင်မြင့်ပင်။
ရှီဟောင်သည် ပြိုင်ကွင်းထဲသို့ ချက်ချင်းဝင်မသွားပဲ ထိုကွင်းကိုသာ ကြည့်နေလေ၏။
“နှမြောစရာပဲ .. ငါတို့ ထာဝရရှေးဟောင်းမြေ မြို့ခံတွေ အဲဒီစင်ပေါ်ကို တက်လို့မရတော့ဘူး .. မဟုတ်ရင် ငါတို့လည်း ဝင်တိုက်လို့ရတယ်” အချို့မြို့ခံများ နောင်တကြီးစွာ ပြောလိုက်သည်။
“ဘယ်သူ ငါနဲ့တိုက်ရဲသလဲ” စင်မြင့်ပေါ်တွင်ရှိနေသည့် ခေါင်းသုံးလုံးအမဲလိုက်ခွေးမှ ဟစ်ကြွေးလိုက်သည်။ ရှီဟောင်ရောက်လာသည်ကို သူသတိမထားမိသေးပေ။
လူအချို့သည် ရှီဟောင်အားလှည့်ကြည့်လာကြလေ၏။ သို့သော်လည်း ရှီဟောင်သည် အလွန်တည်ငြိမ်နေကာ မည်သို့မှမတုံ့ပြန်သည်ကို သူတို့တွေ့လိုက်ရသည်။
“ဟမ် .. မင်းတို့အားလုံး သတိထားမိလား .. ရှီဟောင်ရဲ့ အသားရောင်က သိပ်မဟုတ်သေးဘူး .. အရောင်အဆင်းတွေ ပျောက်နေတယ်” တစ်စုံတစ်ယောက်မှ ထိတ်လန့်တကြား ပြောလိုက်သည်။ သူတို့သည် အစောကတည်းက ဤသည်ကို သတိထားမိသော်လည်း သူတို့သိပ်မတွေးခဲ့ပေ။
“မင်းပြောတာမှန်တယ် .. သူဒဏ်ရာရထားတာလား .. ဘယ်လိုဖြစ်သွားတာလဲ” အားလုံး သူ့ကို စိတ်ဝင်တစား ကြည့်လာကြလေ၏။ သူ့ကို ဘယ်သူက ဒဏ်ရာရအောင် လုပ်လိုက်တာလဲ..
ဤနေရာသည် အနည်းငယ် ဆူညံလာကာ အချို့ကျွမ်းကျင်သူများ၏ မျက်လုံးများ တောက်ပလာလေ၏။ ဒါက အခွင့်အရေးတစ်ခု ဖြစ်နိုင်တယ် .. ဟွမ်သာ တစ်ခုခုဖြစ်နေရင် သူစင်ပေါ်ကို တက်နိုင်မှာမဟုတ်တော့ဘူး .. အဲဒါဆိုရင်တော့ ပြီးပြည့်စုံသွားပြီ…
အားလုံး သူ့အားကြည့်နေကြသော်လည်း အချိန်အတော်ကြာသည်အထိ ရှီဟောင် မတ်တပ်မရပ်သေးပေ။
ဤသည်မှာ လူများ၏စိတ်ကို ပို၍လှုပ်ခတ်စေသည်။ ဟွမ်က တစ်ခုခုဖြစ်နေသည်ဟု ပို၍ထင်စေလေသည်။ မဟုတ်ပါက သူ၏လက်ရှိခွန်အားနှင့်ဆိုလျှင် သူချက်ချင်း စင်ပေါ်သို့ တက်သွားလောက်လေပြီ။
“ဘယ်သူမှ ငါနဲ့မတိုက်ကြဘူးလား” စင်မြင့်ပေါ်တွင်ရှိနေသည့် ခေါင်းသုံးလုံးအမဲလိုက်ခွေးမှာ အတော်လေး ထိတ်လန့်နေလေပြီ။ မည်သူမှ တက်မလာသောကြောင့် သူအနည်းငယ် မူးနောက်လာရ၏။ သို့သော်လည်း တစ်ခဏကြာပြီးသည့်နောက် သူခေါင်းပြန်ကြည်လာသည့်အချိန်တွင် အားလုံးကို အံ့အားသင့်စေသည့်သူမှာ သူမဟုတ်မှန်း သူသိလိုက်ရသည်။
“ဟွမ် ..မင်း..” နောက်ဆုံးတော့ သူဟွမ်ကို တွေ့သွားလေပြီ။
ရှီဟောင် သူ့အားပြုံးပြလိုက်သော်လည်း စင်မြင့်ပေါ်သို့ တက်မသွားပေ။ ဤသည်မှာ သူ့ကို အနည်းငယ် စိတ်သက်သာရာရစေသည်။
“ငါမင်းကို အဖော်ပြုပေးမယ်” တစ်စုံတစ်ယောက် စင်မြင့်ပေါ်သို့ တက်လာသည်။ ဤသည်မှာ ရက်ခ်ရှာဝိဉာဉ်လူမျိုးစုမှ ရွှေရောင်အတောင်ပံရှိသည့် ရက်ခ်ရှာပင်။ သူ့တစ်ကိုယ်လုံးရွှေရောင်တောက်ပနေကာ သူ၏လက်ထဲတွင် လှံတိုကို ကိုင်ထားလေ၏။
“ကောင်းတယ် .. တက်လာတဲ့သူက သခင်လေးဟွမ်မဟုတ်သရွေ့ ငါမင်းကို အဖော်ပြုပေးနေမယ်” ခေါင်းသုံးလုံးအမဲလိုက်ခွေးမှ ပြောလိုက်သည်။
အားလုံး စိတ်ထဲမှ ကျိန်ဆဲလိုက်၏။ ဒီကောင်က ဖိနပ်လိုက်လျှက်တဲ့ ခွေးကောင်ပဲ .. ရှီဟောင်ကိုတောင် ချီးကျူးနေသေးတယ်…
“မင်းလိုမျိုး ခွေးမကောင်းဆိုးဝါး ဆင်းသွားလိုက်တော့” ရွှေရောင်အတောင်ပံနှင့် ရက်ခ်ရှာမှ အော်ဟစ်လိုက်သည်။ သူ၏လက်ထဲတွင်ရှိနေသည့် လှံတိုကို ပစ်လွှတ်လိုက်သည်နှင့် လေဟာနယ်ထဲတွင် မိုးခြိမ်သံများ ထွက်ပေါ်လာလေ၏။
ဤသည်မှာ နတ်ဘုရားအစစ်တစ်ယောက်ဖြစ်ပြီး သူ၏စွမ်းအားလည်း ထူးခြားလှသည်။ လူများစွာမှာ အသက်ရှူသံများပင် အေးခဲသွားလေ၏။
ခေါင်းသုံးလုံးနှင့်အမဲလိုက်ခွေး ဟစ်ကြွေးလိုက်ကာ သူ၏ဘယ်ဘက်ခေါင်းမှ အနက်ရောင်မီးတောက်များထွက်ပေါ်လာလေ၏။ ဤသည်မှာ နတ်ဘုရားများကိုပင် လောင်ကျွမ်းစေနိုင်သည့် ငရဲမီးပင်။ သူ၏ညာဘက်ခေါင်းမှမူ ရွှေရောင်အရည်များ ထွက်လာလေ၏။ ဤသည်မှာ နတ်ဆိုးများနှင့် နတ်ဘုရားများကိုပင် အရည်ပျော်ကျသွားအောင် လုပ်နိုင်သည့် အဝါရောင်စမ်းချောင်းမှ ရေများပင်။
မီးနှင့်ရေ ရောသွားကာ ထိုရွှေရောင်လှံတိုကို တစ်ပြိုင်တည်း တိုက်ခိုက်ကာ ခုခံကြလေ၏။
ဝုန်း..
ရွှေရောင်အတောင်ပံရက်ခ်ရှာမှ ဟစ်ကြွေးလိုက်ကာ သူ၏ဘယ်လက်ထဲတွင် လှံတိုကို ကိုင်ထားပြီး ညာဘက်လက်တွင် ကြီးမားလှသည့် လှံကိုကိုင်ထားကာ သူ၏ခန္ဓာကိုယ်ရှေ့တွင် ကာထားလေ၏။ ထိုလှံကြီးမှ တောက်ပသည့်သင်္ကေတများ ထွက်ပေါ်လာကာ ရေနှင့်မီးကို ကာထားလေသည်။
“သတ်…”
သူ၏လက်ထဲတွင်ရှိနေသည့် လှံတံတိုလေးသည် အခိုးအငွေ့တန်းတစ်ခုကဲ့သို့ပင် ခေါင်းသုံးလုံးအမဲလိုက်ခွေး၏ မျက်ခုံးကြားသို့ ဦးတည်သွားလေသည်။
ဒုန်း..
ခေါင်းသုံးလုံးအမဲလိုက်ခွေးသည် သူ၏လက်သည်းများဖြင့် ထိုလှံတိုကို ရိုက်ထုတ်လိုက်သည်နှင့် မီးပွားများထွက်ပေါ်လာလေ၏။ တစ်ချိန်တည်းမှာပင် သူ၏အလယ်ခေါင်းမှ သွေးရောင်လျှပ်စီးတန်းတစ်ခု ထွက်ပေါ်လာကာ လှံတံနှင့်အတူ ရွှေရောင်အတောင်ပံရက်ခ်ရှာထံသို့ တရှိန်ထိုးဦးတည်သွားလေသည်။
“တိုက်မယ်” ရက်ခ်ရှာဟစ်ကြွေးလိုက်သည်နှင့် ရွှေရောင်သင်္ကေတများသည် စမ်းချောင်းတစ်ခုကဲ့သို့ပင် ထွက်ပေါ်လာပြီး ထိုသွေးရောင်လျှပ်စီးကို ခုခံလိုက်လေသည်။
ထိုကဲ့သို့ပင် သူတို့သည် ပြင်းထန်လှသည့် တိုက်ပွဲကြီးကို တိုက်ခိုက်ခဲ့ကြလေသည်။ သို့သော်လည်း သူတို့မည်မျှပင် စွမ်းအားကြီးနေပါစေ ပြိုင်ကွင်းမှာ ပျက်စီးမသွားပဲ အရာမယွင်းရှိနေဆဲပင်။
အချက်ရေ တစ်ရာကျော်တိုက်ခိုက်ပြီးသည့်နောက်တွင် ခေါင်းသုံးလုံးအမဲလိုက်ခွေး၏ ခေါင်းသုံးလုံးလုံး တစ်ပြိုင်နက်တည်းတောက်ပလာကာ သူတို့မျက်ခုံးကြားမှ အက်ကွဲလာကာ တတိယမြောက်ဒေါင်လိုက်မျက်လုံးများ ပေါ်လာလေ၏။ ထိုမျက်လုံးများမှ ကြောက်စရာကောင်းလောက်သည့် သင်္ကေတအလင်းထွက်ပေါ်လာကာ ရွှေရောင်အတောင်ပံရက်ခ်ရှ၏ခန္ဓာကိုယ်ကို ထိုးဖောက်သွားလေ၏။
ဖုန်း..
ရွှေရောင်အတောင်ပံရှက်ခ်ရှသည် လျင်မြန်စွာပင် ထွက်ပြေးလိုက်သောကြောင့် သူသေဘေးမှ လွတ်မြောက်သွားကာ ပြိုင်ကွင်းပေါ်မှ အောင်မြင်စွာ ခုန်ချသွားလိုက်နိုင်လေသည်။
အားလုံး မသက်သာပဲ သက်ပြင်းချလိုက်ကြရ၏။ ခေါင်းသုံးလုံးအမဲလိုက်ခွေးမှာ အတော်လေးပင် အထင်ကြီးစရာကောင်းလွန်းလှသည်။ သူသည် တကယ်ပင် လူမျိုးစုတစ်စု၏ ရှားပါးသည့်ကျွမ်းကျင်သူပင်။
“ဒီနိုင်ပွဲကို ကျွန်တော် ကိုးကွယ်တဲ့ ဟွမ်ကိုပေးပါတယ်” ခေါင်းသုံးလုံးအမဲလိုက်ခွေးမှာ အရေထူလွန်းလှသည်။
ရှီဟောင်သည် ဆွံ့အသွားသော်လည်း ရယ်မောလိုက်လေ၏။
အခြားသူများမှာမူ ထိုအမဲလိုက်ခွေးကို ကျိန်ဆဲနေကြလေ၏။ ဤအရည်ထူသည့်ကောင်က ဤကဲ့သို့သော စကားမျိုးကိုပင် အရှက်မရှိ ပြောရဲသေးသည်။
“ငါ မင်းကို စိန်ခေါ်မယ်” သွေးရောင်ရှေးဟောင်းသစ်ပင်တစ်ပင် သူ၏အကိုင်းအခက်များကို ဆန့်တန်းကာ ပြိုင်ကွင်းပေါ်သို့ ရောက်လာလေ၏။
ဤသည်မှာ သွေးရှေးဟောင်းသစ်ပင်ပင်။ သူ၏အကိုင်းအခက်များမှာ နဂါးများကဲ့သို့ပင် ဝေ့ဝဲနေကြပြီး သစ်ကိုင်းနှင့်သစ်ရွက်များမှာ နီရဲနေလေ၏။ သူထုတ်လွှတ်သည့်သင်္ကေတများမှာ ကောင်းကင်ကြီးတစ်ခုလုံးကိုပင် ဖုံးလွှမ်းသွားလေပြီ။
“ဝုတ် ဝုတ် ဝုတ်…” ခေါင်းသုံးလုံးအမဲလိုက်ခွေးသည် တရှိန်ထိုးပင် ဟောင်နေလေ၏။ သူ၏ခန္ဓာကိုယ်တစ်ခုလုံး တောက်ပလာကာ မြေအောက်လောကမီးတောက်များ တောက်လောင်လာလေ၏။ သူသည် တိုက်ပွဲကို ပြင်းထန်စွာပင် တိုက်ခိုက်နေလေ၏။ နောက်ဆုံးတွင် ဤရှေးဟောင်းသစ်ပင်မှာ တဟုန်းဟုန်းတောက်လောင်သွားလေသည်။
သူနောက်တစ်ခေါက် နိုင်သွားပြန်လေပြီ။
သူနောက်တစ်ခေါက် နိုင်သွားလေပြီ။
ထိုကဲ့သို့ပင် သူသည် ဆက်တိုက်ပင် ၂၉ပွဲ နိုင်သွားလေပြီ။ ဤသည်မှာ လူတစ်စုကို ထိတ်လန့်သွားစေသည်။ ဒီကောင်က ဒီလောက်တောင် အထင်ကြီးဖို့ကောင်းတာလား..
“ပွဲသုံးဆယ်နိုင်ပြီးရင် နိုင်ပွဲအားလုံးကို လေးစားရတဲ့သခင်လေးဟွမ်ကို ပေးပါတယ်” သူပြောလိုက်သည်။
“မင်းမှာ အဲဒီလိုအခွင့်အရေးမရှိတော့ဘူး” ဖီရှူး ပြိုင်ကွင်းထဲသို့ ခုန်ဝင်လိုက်သည်။ သူ၏ခန္ဓာကိုယ်သည် တောင်ကြီးတစ်လုံးကဲ့သို့ပင် ကြီးမားလှကာ သွေးစွမ်းအင်များလည်း ကောင်းကင်ထက်သို့ပင် တရှိန်ထိုးတက်သွားသည်။
ခေါင်းသုံးလုံးအမဲလိုက်ခွေး ဤပွဲကိုရှုံးသွားပြီး သေမလိုပင် ဖြစ်သွားခဲ့သည်။ သူသည် ပြိုင်ကွင်းမှ လျင်မြန်စွာ ခုန်ဆင်းလိုက်ပြီး သူ၏နိုင်ပွဲများလည်း ဆုံးရှုံးသွားလေပြီ။
ထိုအချိန်တွင် တစ်နေရာမှ သတင်းများရောက်လာသည်။ အပြင်လူများသည် လေဟာနယ်အက်ကွဲကြောင်းကို ပြင်းထန်စွာပင် တိုက်ခိုက်နေကြသည်။
ရှီဟောင် သက်ပြင်းချလိုက်၏။ သူစင်မြင့်ပေါ်တက်ပြီးတော့ ရန်သူတွေကို မြန်မြန်ရှင်းရတော့မယ်…
“အား.. သခင်လေးဟွမ် ငါ့အတွက် ထွက်လာပြီ .. ကျွန်တော် ပြိုင်ဘက်ကင်းတဲ့ အဆင့်လွန်လူငယ်လေးကို အရိုအသေပေးပါတယ်” ခေါင်းသုံးလုံးအမဲလိုက်ခွေးသည် မသတီစရာကောင်းသည့်ချီးမြှောက်မှုများကို ဆက်လက်ပြုလုပ်နေဆဲပင်။
ရှီဟောင် ပြိုင်ကွင်းထဲသို့ ဝင်ရောက်လိုက်သည်နှင့် အုတ်အော်သောင်းတင်းဖြစ်သွားလေ၏။
ဖီရှူး၏မျက်လုံးများသည် အရောင်တောက်ပနေလေ၏။ သူသည်နောက်ဆုတ်မသွားပဲ အရှေ့သို့ တရှိန်ထိုးပြေးထွက်လာသည်။ သူ၏ပါးစပ်ကိုဟလိုက်သည်နှင့် ထူးခြားလှသည့် အလင်းတန်းတစ်ခု ထွက်ပေါ်လာလေ၏။ ဤသည်မှာ လျှို့ဝှက်ရတနာတစ်ခုပင်။
ခွပ်..
အားလုံး၏အကြည့်အောက်မှာပင် ရှီဟောင်သည် လက်တစ်ဖက်တည်းဖြင့် ထိုရတနာကို ဆုတ်ကိုင်လိုက်ပြီး အနည်းငယ်လှုပ်ခါလိုက်သည်နှင့် ထိုရတနာပစ္စည်း ပျက်စီးသွားလေ၏။ ထို့နောက်တွင် သူလက်ညှိုးထိုးလိုက်သည်နှင့် ရွှေရောင်သင်္ကေတများမှ ဖြစ်ပေါ်လာသည့် မိုးမခသစ်ရွက်တစ်ရွက် ထွက်ပေါ်လာလေသည်။
ဖူး..
ထိုသစ်ရွက်သည် ဖီရှူး၏နှလုံးကို ဖောက်ထွက်သွားသောကြောင့် သူကျယ်လောင်စွာပင် အော်ဟစ်ကာ အသနားခံလိုက်သည်။
ရှီဟောင်သည် လက်ကိုဝေ့ရမ်းလိုက်ကာ သူ့ကို ပြိုင်ကွင်းထဲမှ လွင့်ထွက်သွားအောင် လုပ်လိုက်လေ၏။
ဤရိုက်ချက်တစ်ခုတည်းကပင်လျှင် အားလုံးကို ထိတ်လန့်သွားစေနိုင်လေသည်။ ဖီရှူးကဲ့သို့သော ရှေးဟောင်းသားရဲကို လက်တစ်ဖက်မြှောက်ကာဖိနှိပ်လိုက်ခြင်းပင်။
“ဟမ် .. တစ်ခုခုတော့မှားနေပြီ .. သူကဘာလို့ ပြိုင်ကွင်းမှာ ထိုင်နေတာလဲ..”
“သူ့မျက်နှာကို ကြည့်လိုက် စာရွက်လိုဖြူဖျော့နေတယ် .. အရောင်သိပ်မကောင်းဘူး”
ရှီဟောင်နည်းနည်းအခြေအနေဆိုးနေသည်ကို တွေ့လိုက်ရသောကြောင့် အားလုံးဆွံ့အသွားရသည်။ ရှီဟောင်၏ခန္ဓာကိုယ်တစ်ခုလုံး တုန်ယင်နေကာ သူ၏နှုတ်ခမ်းထောင့်မှ သွေးများပင် စီးကျလာလေပြီ။
ဝုန်း…
“ဒါကအခွင့်အရေးပဲ”
ဤသည်မှာ လူများစွာကို စိတ်လှုပ်ရှားသွားစေသည်။
“သခင်လေးဟွမ် … ကျွန်တော့်ကို လမ်းပြပေးပါဦး..” ခရမ်းရောင်ငန်းတစ်ကောင်သည် အတောင်ပံများကို ဖြန့်ကျက်ကာ ပြိုင်ကွင်းပေါ်သို့ ရောက်လာလေ၏။ ထို့နောက်တွင် သူသည် လူသားပုံစံသို့ ပြန်ပြောင်းသွားကာ ရှီဟောင်ကို စိန်ခေါ်လိုက်လေသည်။
“ရတယ်လေ .. လာခဲ့” ရှီဟောင်ပြောလိုက်၏။ သူ၏နှုတ်ခမ်းထောင့်မှ သွေးကို သုတ်လိုက်ကာ ထိုနတ်ငှက်ကို ကြည့်လိုက်သည်။
“ကောင်းတယ် .. ကျွန်တော် လှုပ်ရှားတော့မယ်” ခရမ်းရောင်ငန်း အော်ဟစ်လိုက်ကာ သူ၏ပါးစပ်မှ ခရမ်းရောင်နတ်ဓားတစ်ချောင်း ထွက်ပေါ်လာလေ၏။ ဤသည်မှာ ငှက်နှုတ်သီးမှ ပြုလုပ်ထားသည့် လက်နက်ပင်။ ထို့အပြင် သူ၏နတ်အတောင်ပံများလည်း ပေါ်လာကာ ရှီဟောင်ကို ရိုက်ခတ်လာလေသည်။
ရှီဟောင်သည် ထိုနေရာတွင်သာ မလှုပ်မယှက်နိုင်နေပြီး အိမ်တစ်လုံးလောက်ကြီးသည့် လက်တစ်ဖက်သာထွက်လာကာ ထိုအရာများကို ရိုက်ချလိုက်လေ၏။
ဖုန်းဟူသည့်အသံနှင့်အတူ ငှက်နှုတ်သီးနတ်ဓားဖြစ်စေ ခရမ်းရောင်ငန်းဖြစ်စေ သူတို့သည် မိုးကြိုးပစ်ခံလိုက်ရသကဲ့သို့ပင် ချက်ချင်း သွေးများအန်ထွက်လာလေ၏။
“ကျွန်တော့်ကို ခွင့်လွှတ်ပေးဖို့ သခင်လေးဟွမ်ကို တောင်းဆိုပါတယ် .. ကျွန်တော် အရှုံးကို ဝန်ခံပါတယ်” ခရမ်းရောင်ငန်းကျယ်လောင်စွာအော်ဟစ်လိုက်ကာ ချက်ချင်း နောက်ဆုတ်သွားလေသည်။
ရှီဟောင်သည် ထပ်မတိုက်တော့ပဲ သူ့အား သွားခွင့်ပေးလိုက်သည်။ ထိုအချိန်တွင် သူ၏ခန္ဓာကိုယ်လည်း ယိမ်းယိုင်လာသည့်အပြင် ရွှေရောင်မီးတောက်များလည်း သူ၏ခန္ဓာကိုယ်ကိုဝန်းရံလာပြီး ပြင်းထန်စွာပင် တောက်လောင်နေလေ၏။ ဤသည်မှာ သူ့သွေးစွမ်းအင်များပင်။
“ဟမ် .. ဘာဖြစ်နေတာလဲ .. သူက သူ့ရဲ့အသက်စွမ်းအင်ကို လောင်ကျွမ်းအောင် လုပ်နေတာလား … သူ့ရဲ့ဒဏ်ရာတွေက ဒီလောက်တောင် ဆိုးရွားနေလို့လား…”
“သူ့ခန္ဓာကိုယ်မှာ အရမ်းဆိုးရွားတဲ့ပြဿနာရှိနေလို့ သူက တတ်နိုင်သမျှ မြန်မြန်အနိုင်ယူပြီးတော့ သဘာဝကံကောင်းမှုကြီးကို လိုချင်နေတာ .. ငါတို့သာ အချိန်ဆွဲထားရင် သူအဲဒီပြိုင်ကွင်းပေါ်မှာပဲ လဲကျသွားလိမ့်မယ်”
လူများစွာသည် အတော်လေးပင် ပျော်ရွှင်သွားကြလေ၏။ ဤထက်ကောင်းသည်သတင်းမရှိတော့။
မည်သူမှ စင်မြင့်ပေါ်သို တက်မသွားပဲ သူတောင့်မခံနိုင်တော့သည့်အချိန်ကို စောင့်နေကြလေသည်။
သို့သော် အချိန်တစ်ခု ကြာပြီးသွားသည့်နောက်တွင် ပြိုင်ကွင်းပေါ်၌ သင်္ကေတများ ထွက်ပေါ်လာလေ၏။
“ဘာ .. သူ့ကို တစ်ပွဲအနိုင်ပေးလိုက်တာလား..” ဤသင်္ကေတများ၏အဓိပ္ပာယ်ကို အားလုံးနားလည်ကြသည်။
မည်သူမှ စင်ပေါ်သို့တက်မသွားသောကြောင့် အချိန်တစ်ခုကြာသွားသည်နှင့် သူ့အား အလိုအလျောက် နိုင်ပွဲတစ်ပွဲ ပေးလိုက်ခြင်းပင်။
ဤသည်မှာ သူတို့လိုချင်သည့်အရာမဟုတ်ပေ။ အထူးသဖြင့် ရှီဟောင်ကို မုန်းသည့်လူများပင်။ မည်သူမှ သူ့အား ဤကဲ့သို့ လွယ်လွယ်ကူကူအနိုင်မပေးချင်ပေ။
“ကိစ္စမရှိဘူး … လူနည်းနည်းလောက်ရှာပြီးတော့ သူ့ကိုတိုက်ခိုင်းလိုက် .. သူတို့တွေ မတောင့်ခံနိုင်တော့တဲ့အချိန်ကျရင် သူတို့ကို အရှုံးပေးခိုင်းလိုက် .. ဘာပဲဖြစ်ဖြစ် သူလည်း အရမ်းကြီးလုပ်နေတာမှမဟုတ်တာ” ကျွမ်းကျင်သူအချို့ ဆွေးနွေးလိုက်ကြသည်။
နောက်ထပ် ပွဲစဉ်ပေါင်းတစ်ဒါဇင်ခန့်တွင် မည်သူမှ ရှီဟောင်ကို ဘာမှမလုပ်နိုင်သော်လည်း သူ၏ခန္ဓာကိုယ်အခြေအနေမှာ ပို၍ပင် ဆိုးရွားလာသည်။ သူသည် အဆင့်တက်ရန် ကြိုးစားနေသောကြောင့် သူ့ခန္ဓာကိုယ်၏ အခြေခံစွမ်းအင်များကို သူလောင်ကျွမ်းအောင် လုပ်နေရခြင်းပင်။
သို့သော်လည်း ခဏကြာသည့်နောက်တွင် ရှီဟောင်မျက်မှောင်ကြုတ်လိုက်ကာ အေးစက်သည့်အငွေ့အသက်များ ထုတ်လွှတ်လိုက်သည်။ ၁၈ ပွဲမြောက်တွင် သူသည် လက်မြှောက်လိုက်ကာ ရွှေရောင်မိုးမခသစ်ရွက်တစ်ရွက်ကို ပစ်လွှတ်လိုက်လေ၏။ ထိုသစ်ရွက်သည် ပြိုင်ဘက်၏ မျက်ခုံးကြားကို ထိုးဖောက်သွားကာ ထိုလူ၏အလောင်းမြေပြင်ပေါ်သို့ပြုတ်ကျသွားလေ၏။
“အသတ်ခံလိုက်ရပြီ .. ကျွမ်းကျင်သူတစ်ယောက် သေသွားပြီ” အားလုံး ထိတ်လန့်တကြား အော်ဟစ်လိုက်၏။
ခါးသီးသည့်တိုက်ပွဲများ စတင်လာတော့မည်မှာ သေချာသည်။ စင်မြင့်ပေါ်သို့ မတက်မှီစဉ်းစားရတော့မည်။
ထိုအချိန်တွင် သူ၏ခန္ဓာကိုယ်အနားတွင် လောင်ကျွမ်းနေသည့် သွေးစွမ်းအင်များမှာ ပို၍ပင် အရှိန်ပြင်းထန်လာလေသည်။ သူ၏ခန္ဓာကိုယ်သည်လည်း အရိုးပေါ်အရည်တင် ဖြစ်လာလေပြီ။
“သူတကယ် ဆက်မတောင့်ခံနိုင်လောက်တော့ဘူး”
ဤသည်မှာ အားလုံး ကောက်ချက်ချလိုက်ခြင်းပင်။
အသတ်ခံရမည်စိုးသောကြောင့် မည်သူမှ စင်မြင့်ထက်သို့ အလျင်စလို မတက်ရဲကြတော့ပေ။
“မကောင်းသေးဘူး .. သူ့ရဲ့သွေးစွမ်းအင်တွေ ကုန်သွားပြီး သူ့ဒဏ်ရာတွေ ပိုဆိုးလာအောင်လို့ တစ်ယောက်ယောက်တော့ တက်သွားရမယ် .. သူ အပွဲတစ်ရာလုံး နိုင်သွားအောင် လုပ်လို့မရဘူး .. အခု သူ့ကို သတ်ဖို့အခွင့်အရေးရှိတယ်” တစ်စုံတစ်ယောက်မှ ပြောလိုက်သည်။
သို့သော်လည်း မည်သူက စွန့်စားရဲမည်နည်း..
“မဲနှိုက်ကြစို့ .. မဲကျတဲ့လူ သွားရမယ်…”
ရှီဟောင်ကို မုန်းတီးသည့်သူများအားလုံး စုစည်းလိုက်ကြလေ၏။
အားလုံးမှာ သူတို့ကိုယ်သူတို့ ကာကွယ်မည့်နည်းလမ်းများရှိကြသည်သာ။ ထို့ကြောင့် အရေးကြီးသည့်အချိန်တွင် သူတို့လွတ်မြောက်အောင် လုပ်နိုင်လိမ့်မည်ဟု သူတို့ကိုယ်သူတို့ ယုံကြည်နေကြလေသည်။
ထိုကဲ့သို့ပင် တစ်ယောက်ပြီးတစ်ယောက်တက်သွားကြကာ ရှီဟောင်၏ခန္ဓာကိုယ်မှာ ပို၍ပင် ခြောက်ကပ်လာလေသည်။ သူ၏တိုက်ခိုက်မှုများပင် အားမပါတော့ပေ။ သူသည် ၅၄ ပွဲနိုင်သွားပြီဖြစ်ပြီး ထိုထဲတွင် တစ်ဝက်ခန့်ကိုသာ သူသတ်လိုက်ပြီး ကျန်သည့်သူများမှာ စင်မြင့်ပေါ်မှ ခုန်ချသွားခြင်းပင်။
“အားလုံးပဲ ငါတို့ အခွင့်အရေးလာပြီ…”
ဟွမ်၏ခန္ဓာကိုယ် ဒဏ်ရာရနေတုန်း သူတို့တိုက်ခိုက်ရမည်ပင်။ မဟုတ်ပါက သူတို့ထံတွင် မည်သည့်အခွင့်အရေးမှ ရှိတော့မည်မဟုတ်ပေ။
၇၀, ၈၀, …
ရှီဟောင်သည် ပြိုလဲလုနီးပါးဖြစ်နေသော်လည်း ၈၅ ပွဲထိဆက်တိုက်နိုင်နေတုန်းပင်။
“အားလုံးပဲ ငါတို့ ကျွမ်းကျင်သူတစ်ယောက်ကို ဖိတ်ခေါ်ခဲ့တယ် .. သူက ဟွမ်ရဲ့အရှိန်ကိုမကြောက်ဘူး .. အနည်းဆုံးတော့ သူခုန်ဆင်းနိုင်တယ် .. အားလုံးပဲ .. သူသုံးဖို့အတွက် မင်းတို့ရဲ့ စွမ်းအားအကြီးဆုံး လျှို့ဝှက်ရတနာကို သူ့ကိုပေးလိုက်ကြ”
ရှီဟောင်၏သွေးစွမ်းအင်များမှာ လောင်ကျွမ်းနေဆဲပင်။
၈၆ ပွဲမြောက်တွင် သူရင်းနှီးနေသည့်လူတစ်ယောက်ကို တွေ့လိုက်ရသည် .. လျှပ်စီးသားတော်…
မူလကောင်းကင်လျှို့ဝှက်နယ်မြေတွင် သူ ဤလူအား တစ်ကြိမ်သတ်ခဲ့သော်လည်း ထိုကမ္ဘာငယ်လေးထဲတွင် ထူးခြားသည့်ပါရမီရှင်များတွင် အသက်ကယ်သင်္ကေတများရှိနေသောကြောင့် သူပြန်ရှင်နိုင်ခဲ့သည်။
“ဟွမ် .. ငါတို့နောက်တစ်ခေါက် ထပ်တွေ့ကြပြီ .. ဒါပေမဲ့ မင်းရဲ့အခြေအနေက သိပ်မကောင်းသလိုပဲ” လျှပ်စီးသားတော်အေးစက်စွာ ပြောလိုက်သည်။
“အင်း … ငါတို့ထပ်တွေ့ပြန်ပြီ… မင်းဆီမှာ သားရဲသွားအသက်ကယ်သင်္ကေတရှိသေးလား” ရှီဟောင်မေးလိုက်၏။
“ဒီတစ်ခေါက်တော့ မင်းကိုယ်မင်း စိတ်ပူသင့်တယ်” လျှပ်စီးသားတော်ပြောလိုက်သည်။ သူသည် မည်သည့်လှည့်ကွက်ကိုမှမသုံးပေ။ သူအပေါ်တက်လာသည်နှင့် သူ၏သရဖူတောက်ပလာကာ ထူးဆန်းသည့်သင်္ကေတတစ်ခုဖြစ်လာပြီး ကောင်းကင်ကိုဖုံးလွှမ်းသွားသည့်လျှပ်စီးများ ထွက်ပေါ်လာပြီး ရှီဟောင်ထံသို့ ရောက်ရှိလာလေသည်။
“ငါ လျှပ်စီးအတိဒုက္ခကို ဖြတ်ပြီးသွားတာကို မင်းမသိဘူးလား .. ငါမကြောက်ဆုံးက လျှပ်စီးပဲ” ရှီဟောင်အေးစက်စွာ ပြောလိုက်သည်။
လျှပ်စီးသားတော်ဘာမှမပြောပေ။ သူ၏လက်ကိုမြှောက်လိုက်သည်နှင့် လျှို့ဝှက်ရတနာ ၁၀ခုကျော် ထွက်လာကာ ချက်ချင်းပင် ပေါက်ကွဲသွားလေ၏။ ထိုရတနာများ၏ စွမ်းအားများမှာ သူ့ကိုခြိမ်းခြောက်နိုင်လေသည်။
ရွှီး..
ရှီဟောင်သည် ထိုင်မနေနိုင်တော့ပဲ စွမ်းအားကြီးသည့်နည်းလမ်းများကို အသုံးပြုကာ သူ့ကိုယ်သူ ကာကွယ်လိုက်ရသည်။
ဤသည်မှာ ရှီဟောင်ပထမဆုံးအကြိမ် ရှောင်လိုက်ခြင်းဖြစ်သောကြောင့် အားလုံး အံ့အားသင့်သွားရလေသည်။
“ဟွမ် .. မင်းသွားသေလို့ရပြီ…” လျှပ်စီးသားတော်ဟစ်ကြွေးလိုက်ကာ အခြား လျှို့ဝှက်ရတနာ တစ်ဒါဇင်ကျော်ကို ထုတ်လာလေသည်။ ထိုရတနာများသည် ရှီဟောင်အနားတွင် တစ်ခုပြီးတစ်ခု ပေါက်ကွဲသွားလေသည်။
ဤကဲ့သို့ အကြိမ်ပေါင်းများစွာ ဖြစ်လာပြီးသည့်နောက်တွင် အားလုံး ဆွံ့အသွားရသည်။ လျှပ်စီးသားတော်သည် လျှို့ဝှက်ရတနာများစွာကို ဖျက်ဆီးလိုက်ပြီဖြစ်သော်လည်း ထိတ်လန့်စရာကောင်းသည်မှာ ရှီဟောင်သည် အကောင်းအတိုင်းရှိနေဆဲဖြစ်ပြီး ပေါက်ကွဲသွားသည့် အဖိုးတန်ပစ္စည်းတစ်ခုမှ သူ့အား မထိခိုက်နိုင်ပေ။
လျှပ်စီးသားတော်မှာ သူ၏စိတ်ထဲတွင် တုန်လှုပ်သွားရသည်။ သူသည် စွမ်းအားကြီးသည့် ထူးခြားပါရမီရှိသူဖြစ်သော်လည်း ယနေ့တွင် သူ့သတ္တိများပျောက်ဆုံးသွားလေပြီ။ မူလကောင်းကင်လျှို့ဝှက်နယ်မြေမှာထက်ပင် ပို၍ ရှုံးနိမ့်တော့မည်ဟု ခံစားနေရသည်။
သူသည် ဟွမ်၏ပြိုင်ဘက်မဟုတ်သည်ကို သိလိုက်ရသောကြောင့် ချက်ချင်းပြေးထွက်သွားလိုက်လေ၏။
“ငါတို့ဒီမှာပဲ စာရင်းရှင်းကြရင်ရော..” ရှီဟောင်ပြောလိုက်သည်။
သူ၏လက်မောင်း တောက်ပလာကာ ထို့နောက်တွင် နတ်ချိန်းကြိုးတစ်ခုကဲ့သို့ပင် ရွှေရောင်မိုးမခသစ်ကိုင်းတစ်ခု ထွက်လာလေ၏။ ထိုသစ်ကိုင်းသည် လျှပ်စီးထက်ပင် လျင်မြန်သည့်အရှိန်နှုန်းဖြင့်သွားနေသည့် လျှပ်စီးသားတော်ကို ဖမ်းလိုက်လေ၏။
“မဟုတ်ဘူး…”
လျှပ်စီးသားတော်သည် ကျယ်လောင်စွာပင် အော်ဟစ်လိုက်ကာ ရုန်းကန်လိုက်သည်။
ဖူး..
ရွှေရောင်ချိန်းကြိုးများသည် သူ၏ခန္ဓာကိုယ်ကို ဖောက်ထွက်သွားကာ သူ၏မူလဝိဉာဉ်ကိုလည်း တိုက်စားသွားပြီး သူ့အသက်ကို နှုတ်ယူသွားလေသည်။
အားလုံး ထိတ်လန့်သွားရလေ၏။ လျှပ်စီးသားတော်က ဒီလောက်လွယ်လွယ်လေးနဲ့ သေသွားတာလား ..
၉၁, ၉၂, …
ရှီဟောင် ဆက်တိုက်ပင် အနိုင်ရရှိနေလေသည်။
အားလုံးဆွံ့အနေလေသည်။ သူရဲ့ခန္ဓာကိုယ်မှာ ပြဿနာတွေရှိနေတာတောင်မှ ဘယ်သူမှ သူ့ရဲ့အောင်မြင်မှုကို မတားဆီးနိုင်ဘူးလား..