သုခကမ္ဘာက ရှီဟောင် - Chapter - 1156 မုန်တိုင်းတစ်ခု အစပြုခြင်း
ဤ အတိဒုက္ခလှိုင်းမှာ အတော်လေးပင် ရိုက်ခတ်သွားလေ၏။
သို့သော်လည်း စွမ်းအားအကြီးဆုံး လျှပ်စီးအတိဒုက္ခမှာ မည်သူမဆို ဖြတ်သန်းနိုင်သည့်အရာတစ်ခု မဟုတ်ပေ။ လက်ရှိတွင် မည်သူမှ ရှီဟောင်၏စံချိန်ကို မချိုးနိုင်သေးပေ။ သာမန်လျှပ်စီးအတိဒုက္ခကို ဖြတ်သန်းသည့်သူများပင်လျှင် အားလုံးနီးပါး သေဆုံးသွားကြလေ၏။
“လူငယ်လေး .. ဒါက ဝိဉာဉ်လမ်းပြခြင်းကြာပန်းကို အဓိကပါဝင်ပစ္စည်းအနေနဲ့သုံးထားတဲ့ နတ်ဆေးလုံးပဲ .. ဒီထဲမှာ တစ်ခြားမြင့်မြတ်ဆေးပင်တွေ အများကြီးလည်းပါတယ် .. ဒါကို သေသေချာချာလုပ်ထားတာ” မနုဿလူမျိုးစုမှ ကောင်းကင်နတ်ဘုရားအိုကြီးသည် တောင်းပန်သည့်အပြုံးပြုံးပြကာ ရှီဟောင်အား ကျောက်စိမ်းပုလင်းလေးတစ်ခုကို ပေးလိုက်လေ၏။
ထိုပုလင်းထဲတွင် အဖိုးတန်ဆေးလုံးတစ်လုံးရှိနေပြီး ထိုဆေးလုံးကြောင့် ပုလင်းပင် တောက်ပနေလေပြီ။ ပုလင်းကို ဖွင့်လိုက်သည်နှင့် ဆေး၏မွှေးရနံ့မှာ ချက်ချင်း သင်းပျံ့လာသည်။
ရှီဟောင်သည် ထိုဆေးလုံးကို လက်မခံပဲ “ကျွန်တော်ကြားတာ စီနီယာ့ဂိုဏ်းက မာယွဲ့က အရင်တုန်းက ကျွန်တော့်ကို လှောင်ရယ်ပြီးတော့ ကျွန်တော့်ကိုလည်း အရမ်းမုန်းနေတယ်တဲ့ .. အရင်တစ်ခေါက်တုန်းက ကျွန်တော့်ကို သတ်ဖို့ကြိုးစားတာ သူများလား…”
မနုဿလူမျိုးစု၏ ကောင်းကင်နတ်ဘုရားအိုကြီး ရှက်မိသွားသည်။ သူဤနတ်ဆေးလုံးကို ယူလာရခြင်းမှာ သူတို့နှစ်ဦးကြားမှ တင်းမာမှုများကို ဖြေလျော့ရန်ပင်။ သို့သော်လည်း မာယွဲ့၏ အပြုအမူများမှာ စည်းကျော်သွားလေပြီ။
ယခင်တုန်းက လုပ်ကြံသတ်ဖြတ်မှုကို မရှင်းရသေးခင်မှာပင် သူသည် ရှီဟောင်ကို ဆန့်ကျင့်သည့်သူများနှင့် ပူးပေါင်းကာ ရှီဟောင်ကို စကားလုံးများဖြင့် ထိုးနှက်ခဲ့သသည်။
“လူငယ်လေး .. မာယွမ်က ဂျီးနီးယပ်စ်တစ်ယောက်ပါ … သူ့အသက်က တစ်ရာတောင် မရှိသေးပဲနဲ့ ကောင်းကင်နတ်ဘုရားဖြစ်လာတာဆိုတော့ သူက နည်းနည်းရိုင်းစိုင်းပြီးတော့ စိတ်ကြီးဝင်တတ်တယ် .. သူ မသင့်တော်တာတွေ လုပ်မိသွားရင်လည်း ခွင့်လွှတ်ပေးဖို့ ငါကပဲ တောင်းဆိုချင်ပါတယ်” ကောင်းကင်နတ်ဘုရားအိုကြီး ပြောလိုက်သည်။
“ဒီလိုစိတ်ကြီးဝင်မှုမျိုးကို ကျွန်တော်လက်မခံနိုင်ဘူး .. အချိန်တိုင်း ကျွန်တော့်အသက်အန္တရာယ်ရှိနေတာ .. အမှန်အတိုင်းပြောရရင် ကျွန်တော်သူ့ကို ကျွန်တော့်ရဲ့စိတ်ကြီးဝင်တဲ့ပုံစံကိုပြချင်သေးတယ်” ရှီဟောင် အေးစက်စွာပင် ပြန်ပြောလိုက်သည်။
မာယွဲ့ သူ့ကို ပထမဆုံးအကြိမ် တိုက်ခိုက်ခဲ့ခြင်းမှာ သူ့ထံမှာ ထာဝရတာအိုမျိုးစေ့ကိုလိုချင်သောကြောင့်ပင်။ သူသည် သူ့ကလန်မှ အကာအကွယ်ပေးမည်ဟု ကြေငြာထားသောလူကိုပင် သတ်ရန် ကြိုးစားခဲ့သည်။
သူ့ကို တိုက်ခိုက်ဖို့ကြိုးစားခဲ့သူမှာ မည်သူဖြစ်သလဲဟု ရှီဟောင်မေးခဲ့သော်လည်း သူတို့သည် သူ့အား လာမတောင်းပန်သည့်အပြင် တစ်စုံတစ်ယောက်မှ အတိဒုက္ခကို ဖြတ်သန်းနေကြောင်း သိလိုက်ရသည့်အချိန်တွင် သူ့အား ရှုံ့ချခဲ့ပြီး ရန်စကားများပင် ပြောခဲ့သေးသည်။
ဤကဲ့သို့သော မြေခွေးလိုလူမျိုးကို သူ၏ လျှပ်စီးအတိဒုက္ခရည်ကို မပေးနိုင်။ ကလန်တစ်ခုလုံးအပေါ်တွင်ပင် သူအမြင်ပြောင်းသွားလေပြီ။ သူသာ ထိုအရည်ကိုပေးလိုက်လျှင် သူတို့မာယွဲ့ကိုပြန်ပေးမည်ကို စိုးရိမ်မိသည့်အထိပင်။
“လူငယ်လေး .. ဒီလူအိုကြီးက မင်းအတွက် ပစ္စည်းကောင်းတစ်ခု ယူလာပေးခဲ့တယ်” ရှေးဟောင်းဖိန်းလူမျိုးစုမှ ကောင်းကင်နတ်ဘုရားအိုကြီး ရောက်လာပြီး ထာဝရခေတ်မှ ပစ္စည်းဖြစ်သည်ဟု နာမည်ကြီးသည့် ကြေးလှံတံတစ်ခုကို ကမ်းပေးလာလေသည်။
သူတို့သည် မနုဿလူမျိုးစုကဲ့သို့ပင် ပြုမူနေကြလေသည်။ အဘယ်ကြောင့်ဆိုသော် မိုလော့၏အပြုအမူများသည်လည်း မာယွဲ့နှင့် တစ်ထပ်တည်းနီးပါးပင်။
“စီနီယာတို့ကို ကျေးဇူးတင်ပါတယ် .. ကျွန်တော် ဒီပစ္စည်းတွေကို ယူထားလိုက်ပါ့မယ်” ရှီဟောင် ပြောလိုက်သည်။ သူသာ ဤပစ္စည်းများကို ငြင်းလိုက်ပါက လူမျိုးစုနှစ်ခု ကြောက်သွားလိမ့်မည်။ ထို့ကြောင့်ပင် သူသည် ဝမ်းမြောက်ဝမ်းသာစွာဖြင့်ပင် ထိုပစ္စည်းများကို လက်ခံလိုက်သည်။
သူသည် ထိုပစ္စည်းများကို ယူလိုက်သော်လည်း ဘာမှမပြောခဲ့ပေ။ လျှပ်စီးအတိဒုက္ခရည်ရှိခဲ့လျှင်ပင် မာယွဲ့ကို ပေးမည်မဟုတ်သလို မိုလော့၏ကျိန်စာကိုလည်း ဖြေပေးမည်မဟုတ်ပေ။
ရှီဟောင် ဘာဂတိမှ မပေးလိုက်သဖြင့် ကောင်းကင်နတ်ဘုရားအိုကြီးနှစ်ယောက်သည် စိတ်ပျက်စွာဖြင့်ပင် ပြန်သွားကြလေ၏။ သို့သော်လည်း သူတို့လက်ဆောင်ပစ္စည်းများကို ငြင်းလိုက်သည်ထက်တော့ ပိုကောင်းသေးသည်ပင်။
သူတို့နှစ်ဦးသည် သူတို့ကလန်သို့ ပြန်ရောက်သွားသည်နှင့် ဤ ကျိန်စာအရေးကို ချက်ချင်း အစည်းအဝေးကျင်းပလိုက်ရသည်။ မာယွဲ့နှင့် မိုလော့မှာ ကျိန်းသေပေါက် ကလန်အကြီးအကဲများထံမှ စစ်ဆေးမေးမြန်းခံရမည်သာ။
သို့သော်လည်း သူတို့သည် တက်သစ် ကောင်းကင်နတ်ဘုရားများဖြစ်ကြသောကြောင့် သူတို့ကို ဖိအားမပေးကြသည့်အပြင် ပြစ်တင်ဝေဖန်ခြင်းပင် မရှိပေ။
ထို့အပြင် သူတို့သည် ရှီဟောင်ကို သတ်ဖို့ကြိုးစားခဲ့သောကြောင့် အခြေအနေများမှာ နောက်ပြန်လှည့်၍မရတော့ပေ။ ထို့ကြောင့်ပင် သူတို့သည် ရှီဟောင်အား တောင်းပန်ချင်စိတ်ပင် မရှိတော့ပေ။
“ဘာဖြစ်လဲ .. သူ ကောင်းကင်အတိဒုက္ခကို နောက်တစ်ခေါက် ဖြတ်ပြီးတဲ့အချိန်မှ ထပ်ဆွေးနွေးကြတာပေါ့ .. ရှေးခေတ်ကတည်းက လူဘယ်နှယောက်များ အတိဒုက္ခကို ဖြတ်နိုင်ခဲ့လို့လဲ .. သူတစ်ခါတည်း သေပြီး မြေကြီးဖြစ်သွားတာလည်း ဖြစ်နိုင်တာပဲ” မာယွဲ့ ပြောလိုက်၏။
“မကောင်းတဲ့ကောင် .. မင်းဘာပြောနေတာလဲ .. အခု အားလုံးက သူအောင်မြင်ဖို့ ဆုတောင်းနေကြတာ မင်းက သူသေသွားပါစေလို့ ဆုတောင်းနေတုန်းလား” ကလန်မှ ကောင်းကင်နတ်ဘုရားအိုကြီးမှ ဆူပူလိုက်သည်။
ရှေးဟောင်းဖိန်းလူမျိုးစုတွင်လည်း ဤကဲ့သို့သော အခြေအနေမျိုးကြုံတွေ့နေရလေ၏။ မိုလော့၏ အမုန်းတရားများမှာ ပြင်းထန်နေဆဲပင်။
“သူအောင်မြင်သွားတော့လည်းကောင်းတာပေါ့ .. မဟုတ်ရင်လည်း ကျွန်တော်ကိုယ်တိုင် အဲဒီအရည်ကိုသွားယူမယ် .. အဲဒီကျိန်စာကို မရရအောင် ဖျောက်ပစ်မှာ”
“မင်း .. မင်းက အဲဒီအရည်ကို သွားယူချင်နေသေးတာလား” ကလန်မှ ကောင်းကင်နတ်ဘုရားအိုကြီး ဒေါသတကြီး ပြောလိုက်လေ၏။
“ကျွန်တော်က ကျွန်တော့်ကလန်အတွက် စဉ်းစားပေးတာပါ .. ကျွန်တော့်ရဲ့ ကျိန်စာကို ချေဖျက်ပြီးသွားရင် ကျန်တဲ့ လျှပ်စီးအတိဒုက္ခရည်ကို ကလန်သားတွေကို ပေးလိုက်မှာပဲလေ” မိုလော့ အေးစက်စွာပင်ပြောလိုက်၏။
အပြင်ဘက်လောကတွင် ကလန်မျိုးစုံသည် ဤအကြောင်းများကို ဆွေးနွေးနေကြပြီး အတိဒုက္ခကို ရင်ဆိုင်ကြသည့်သူများလည်း ဟိုဟိုဒီဒီပေါ်လာလေသည်။
မြို့ခံများပင်လျှင် သူတို့၏ ထူးချွန်သည့် ဂျီးနီးယပ်စ်အချို့ကို အတိဒုက္ခအား ရင်ဆိုင်ခိုင်းလေ၏။ ရှီဟောင်၏အောင်မြင်မှုမှာ သူတို့အတွက် တွန်းအားတစ်ခု ဖြစ်နေလေသည်။
သို့သော်လည်း ရလဒ်များမှာ အတော်လေး ဆိုးဝါးလွန်းလှသည်။ ဤနေ့ရက်များအတွင်းတွင် တစ်ယောက်ပြီးတစ်ယောက် ကျရှုံးသွားကာ မည်သူမှ အောင်မြင်အောင် မလုပ်နိုင်ခဲ့ကြပေ။
“ဟွမ်က တကယ်ကို အထင်ကြီးဖို့ကောင်းတာပဲ .. ဒီအချိန်အတောအတွင်းမှာ ကလန်အမျိုးမျိုးက စွမ်းအားအကြီးဆုံးသူရဲကောင်းတွေ တစ်ယောက်ပြီးတစ်ယောက် ကျရှုံးသွားနေကြတာ .. ဘယ်သူမှ ကြောက်စရာကောင်းတဲ့လျှပ်စီးကို မခုခံနိုင်ဘူး…”
ထိုသို့ သေဆုံးသည့်သူများလေလေ ရှီဟောင်သည် ပို၍ ထူးခြားလာလေလေပင်။
ဂုကျင်းယွမ်ကိုလည်း အားလုံး အသိအမှတ်ပြုကြသည်သာ။ အတိဒုက္ခကို ဖြတ်သန်းပြီး အသက်ရှင်ကျန်ခဲ့သည့်သူများထဲတွင် ဟွမ်ပြီးလျှင် သူသည် ဒုတိယမြောက်လူပင်။
ကျွမ်းကျင်သူများစွာသည် သူ့အား ဂိုဏ်းထဲသို့ ခေါ်သွင်းရန် ကြိုးစားနေကြလေ၏။ သူသည်လည်း တစ်နေ့တွင် စွမ်းအားအကြီးဆုံး ကောင်းကင်အတိဒုက္ခကို ရင်ဆိုင်နိုင်လိမ့်မည်ဟု ယုံကြည်နေကြသောကြောင့်ပင်။
“ချန်ကုန်းယန် .. ဒါက သည်းခံသင့်တဲ့ကိစ္စမဟုတ်ဘူး .. အရင်တုန်းက မင်းကို ရန်စခဲ့တဲ့သူက အခု အတိဒုက္ခကို အောင်အောင်မြင်မြင်ဖြတ်သန်းနိုင်သွားပြီ .. အဲဒီတော့ မင်းသူ့ကို အနိုင်မယူချင်ဘူးလား” ချောင်ယုရှန်း မေးလိုက်သည်။
ချန်ကုန်းယန်သည် ဘာမှမပြောပဲ တည်ငြိမ်နေဆဲပင်။
ရှီဟောင် စိတ်ထဲမှ ခေါင်းညိမ့်လိုက်၏။ ဤသရဖူ လေးခုဘုရင်သည် တကယ်ပင် ထူးခြားလှသည်။ သူ၏စိတ်ခံစားချက်များကို အလွန်ကောင်းမွန်စွာ ထိန်းချုပ်နိုင်ပြီး ရည်မှန်းချက်များလည်း ပြတ်သားလှသည်။ နောင်အနာဂတ်တွင် သူ့အောင်မြင်မှုများကို ခန့်မှန်း၍မရနိုင်လောက်အောင်ပင် ဖြစ်လိမ့်မည်။
“ငါလည်း အတိဒုက္ခကို ရင်ဆိုင်ကြည့်ချင်တယ်” ချောင်ယုရှန်း ပြောလိုက်သည်။ အဘယ်ကြောင့်ဆိုသော် သူလည်း ထာဝရစွမ်းအင်ကို အောင်မြင်စွာ ကျင့်ကြံနိုင်သွားလေပြီ။ သူထုတ်မပြောထားခြင်းသာ။
ဝုန်း..
ရုတ်တရက်ပင် ကြောက်စရာကောင်းသည့်စွမ်းအားတစ်ခု ထွက်ပေါ်လာကာ ထာဝရရှေးဟောင်းမြေရှိ ကမ္ဘာငယ်လေးများအားလုံးကို လှုပ်ခတ်သွားစေလေသည်။ စွမ်းအားကြီးလှသည့် စွမ်းအင်လှိုင်းကို အားလုံးခံစားမိလိုက်ကြသည်သာ။
တိမ်နယ်မြေ၏ ငြိမ်းချမ်းမှုမှာ ပျက်ပြားသွားလေပြီ။
လေဟာနယ်ထဲတွင် ရှေးဟောင်းနန်းတော်တစ်ခု ပေါ်လာပြီး ထိုနန်းတော်အနားတွင် အနက်ရောင်အက်ကွဲကြောင်းများ တစ်ခုပြီးတစ်ခု ပေါ်လာလေသည်။
ဤနန်းတော်ကြီးသည် မြင့်မားလှကာ အော်ရာမှာလည်း နန်းဆန်လှသည်။ သူသည်လေဟာနယ်ထဲတွင် တစ်ဖြည်းဖြည်း ရုပ်လုံးပေါ်လာလေသည်။
ရွှေရောင်အုပ်ချပ်များစွာ ရှေးဟောင်းကျမ်းစာများလည်းရှိနေပြီး တောက်ပသည့်အရောင်များလည်း ထွက်ပေါ်နေလေသည်။ မြူများလည်း ဆိုင်းနေသောကြောင့် သူသည် အခြားခေတ်တစ်ခေတ်မှ ဤနေရာသို့ရောက်လာသကဲ့သို့ပင်။
နန်းတော်ရှေ့တွင်ရှိနေသည့် ကျောက်လမ်းလည်း တာအိုအသက်ဓာတ်များ ထုတ်လွှတ်နေလေ၏။ ထိုနေရာကို မိုးထားသည့် ကြီးမားလှသည့်တိုင်လုံးများလည်းရှိနေလေသည်။
ရွှေရောင်တာအိုနန်းတော် — လမ်းညွှန်မှုရှေးဟောင်းနန်းတော် ပြန်ပေါ်လာပြီ…
“ဘုရားရေ .. အဲဒီနန်းတော်တကယ်ပေါ်လာပြီ .. ပုံရိပ်ယောင်တစ်ခုသက်သက်မဟုတ်တော့ဘူး .. ဒီလောကကြီးထဲကို တကယ်ရောက်လာပြီ”
ဤသတင်းသည် နေရာအနှံ့သို့ ပျံ့နှံ့သွားလေသည်။
ဤသည်မှာ ဘာကိုကိုယ်စားပြုနေသလဲဆိုသည်ကို အားလုံးသိကြသည်သာ။ မကြာခင် ထိုအကဲဖြတ်စင်မြင့်ကြီး ပေါ်လာတော့မည်။
ထိပ်ဆုံးသို့ရောက်ရန်အတွက် ဂျီးနီးယပ်စ်များ တစ်ယောက်နှင့်တစ်ယောက် ထိပ်တိုက်ရင်ဆိုင်ကြတော့မည်။ မည်သူက နံပတ်တစ်ဖြစ်မည်နည်း.. မည်သူက နောက်ဆုံးကံကောင်းခြင်းနယ်မြေထဲသို့ ဝင်နိုင်မည်နည်း… မည်သူက အဆင့်လွန်သက်ရှိဖြစ်မည်နည်း.. ဤအရာအားလုံးကို ထိုရှေးဟောင်းပြိုင်ကွင်းတွင် ဆုံးဖြတ်မည်ပင်။
ရှေးခေတ်အခါကတည်းက ထိုပြိုင်ကွင်းသည် လမ်းညွှန်မှုရှေးဟောင်းနန်းတော်နှင့်အတူ ပေါ်လာခြင်းပင်။
သေချာပါသည်။ လမ်းညွှန်မှုရှေးဟောင်းနန်းတော်ပေါ်လာပြီးသည့်နောက်တွင် ကြီးမားလသည့် ထူးဆန်းသည့်ကျောက်တုံးများဖြင့် ပြုလုပ်ထားသည့် ရှေးဟောင်းအဆောက်အဦးကြီးတစ်ခု ပေါ်လာလေ၏။
ဤသည်မှာ အလွန်ပင်ကြီးမားလှပြီး ကျွန်းတစ်ကျွန်းနှင့်ပင် တူနေလေသည်။
ထိုပြိုင်ကွင်းသည် မည်သည့်အရောင်အဆင်း၊ မည်သည့် ထာဝရတာအိုစွမ်းအင်မှ မရှိပဲ မှုန်မှိုင်းနေလေ၏။ ထိုကွင်း၏မျက်နှာပြင်ထက်တွင် သွေးရာများ၊ ပျက်စီးနေသည့်လက်နက်များ၊ တံဆိပ်များရှိနေလေသည်။
သို့သော်လည်း ထိုကွင်းကြီး ပေါ်လာသည်နှင့် ပြင်းထန်လှသည့် သက်ဖြတ်လိုသည့်အငွေ့အသက်စွမ်းအင်လှိုင်းကို အားလုံးခံစားလိုက်ရပြီး ဤနေရာသို့ရောက်နေသည့်သူများအားလုံး အလန့်တကြားဖြင့်အော်ဟစ်ကာ မြေပြင်ပေါ်သို့ ပုံကျသွားလေသည်။
ဤသည်မှာ ကြောက်စရာကောင်းလွန်းလှသည်။ ကြည့်ရသည်မှာ ရိုးရှင်းသည့်ပုံပေါ်သော်လည်း တစ်ချက်ကြည့်လိုက်ရုံဖြင့်ပင် လူတစ်ကိုယ်လုံးကို တုန်လှုပ်သွားစေနိုင်သည်။
ဤသည်မှာ အထူးချွန်ဆုံးဂျီးနီးယပ်စ်များအတွက် စစ်မြေပြင်ပင်။
ဤကွင်းပြင်တွင် လူဘယ်နှယောက် သေဆုံးခဲ့ပြီသလဲဆိုသည်မှာ ရေတွက်၍ပင် မရတော့ပေ။ ထို့အပြင် သေဆုံးခဲ့သည့်သူအားလုံးမှာလည်း ကလန်များမှာ စွမ်းအားအကြီးဆုံးသူများပင်။ မဟုတ်ပါက ဤနေရာကို ခြေချခွင့်ပင် ရရှိမည်မဟုတ်ပေ။
ရှေးဟောင်းလူထူးဆန်းများ သေဆုံးခဲ့သည့်နေရာမှာလည်း ဤနေရာမှာပင်။
အားလုံးမှာ နျင်ချွမ်းပထမဆုံးပေါ်လာသည့်အချိန်ကို မှတ်မိနေဆဲပင်။ သူသည် လူအုပ်ကြီးကို စီးမိုးကြည့်ပြီး လပေါင်းများစွာကြာအောင် တိုက်ခိုက်ခဲ့ကာ အားလုံးကို သတ်ပစ်ခဲ့ပြီး ဤစစ်မြေပြင်တွင် တစ်ယောက်တည်း မတ်တပ်ရပ် ကျန်ရစ်နေခဲ့သည်။
အခြားသူများမှာ သရဖူ ဆယ်ခုဘုရင် ပေါ်လာသည့်အချိန်ကို ပြန်အမှတ်ရမိသွားကြသည်။ သူသည် သရဖူရှစ်ခုဘုရင်နှင့် ပြင်းထန်စွာပင် တိုက်ခိုက်ခဲ့ကြလေ၏။
အချို့သူများမှာလည်း သရဖူလေးခုဘုရင် ချန်ကုန်းယန် ဤလောကကြီးကိုမြှားတစ်စင်းဖြင့် ချိတ်ပိတ်လိုက်ပြီး ဤပြိုင်ကွင်းကို အေးခဲသွားအောင် ပြုလုပ်လိုက်ကာ အရပ်မျက်နှာအသီးသီးမှ သူ၏ရန်သူများကို တစ်ပြိုင်နက်တည်း ပေါက်ကွဲသွားအောင်လုပ်လိုက်သည့်မြင်ကွင်းကို မြင်ယောင်မိသွားကြလေသည်။
မျိုးဆက်တိုင်းတွင် သူရဲကောင်းများ မြောက်များစွာ ပေါ်ထွက်လာခဲ့သည်သာ။
ယခုခေတ်ကတော့ မတူတော့ပေ။ သမိုင်းတစ်လျှောက်မှ ဘုရင်များအားလုံး အတူတကွရှိနေလေပြီ။
ယခင်ကကဲ့သို့ စွမ်းအားကြီးသေးလားဆိုသည်ကို အားလုံး စောင့်ကြည့်နေကြလေ၏။
“ထာဝရရှေးဟောင်းမြေထဲကို ရောက်လာတာ နှစ်ပေါင်းများစွာရှိနေပြီးတော့ ဘာမှမလှုပ်ရှားသေးတဲ့သူတွေလည်းရှိတယ် .. သူတို့လည်း တစ်ယောက်ပြီးတစ်ယောက် ပေါ်လာရင်ကောင်းမယ်”
“သူတို့တွေလည်း ပေါ်လာပြီးတော့ သူတို့ရဲ့ ပြိုင်ဘက်ကင်းတဲ့စွမ်းအားတွေကို ပြလိမ့်မယ်လို့ ငါထင်တယ်”
စီရင်စုသုံးထောင်မှ ဂျီးနီးယပ်စ်များသာမက မြို့ခံများပင်လျှင် အာရုံစိုက်ထားကြလေသည်။
“ဒီပြိုင်ကွင်းက အရမ်းရှင်းနေတယ်ဆိုတော့ ပြိုင်ကွင်းတစ်ခုလုံး ပေါ်လာပြီထင်တယ် .. တိုက်ပွဲကြီးက နောက်ရက် နည်းနည်းလောက်အတွင်းမှာ စတော့မယ်ဆိုတာ ငါကျိန်းသေပေါက် ပြောရဲတယ်..”
အားလုံး သက်ပြင်းချလိုက်၏။ ဤခေတ်၏ အဆုံးကို ရောက်လာသည်မှာ လျင်မြန်လွန်းလှသည်။ ဤထဲသို့ ဝင်လာသည်မှာ နှစ်ပေါင်းအနည်းငယ်သာ ရှိသေးသော်လည်း ထာဝရရှေးဟောင်းမြေ၏ နောက်ဆုံးစစ်မြေပြင်ပင် ပေါ်လာလေပြီ။
ဝုန်း..
ကြီးမားလှသည့် လျှပ်စီးအလင်းတန်းပေါ်လာသောကြောင့် အားလုံး ထိတ်လန့်ကြလေသည်။
“တစ်ယောက်ယောက်က အတိဒုက္ခကို ထပ်ပြီးတော့ ဖြတ်သန်းနေပြီ .. ဒီအော်ရာက တော်တော်လေးကို စွမ်းအားကြီးတာပဲ” အသိုက်နယ်မြေထဲတွင်ရှိနေသည့်သူများ ထိတ်လန့်သွားကြကာ သားရဲအသိုက်ရှိနေသည့်ဘက်သို့ ကြည့်လိုက်ကြလေသည်။
အတိဒုက္ခကိုရင်ဆိုင်နေသည့်သူမှာ ‘နှယ်နှင်ဒဏ်ခံရသည့် ထာဝရသက်ရှိ’ပင်။ သူ၏လျှပ်စီးများမှာ ဂုကျန်းယွမ်၏ အတိဒုက္ခတိမ်တိုက်များထက်ပင် ပို၍ ကြောက်စရာကောင်းလှသည်။
သားရဲအသိုက်အပေါ်ဘက်တွင် သွေးလများရှိနေသည်ကို မြင်နေကြရသည်။ ကြီးမားလှသည့် အနီရောင်နေလုံးကြီးများလည်း တောက်ပနေသောကြောင့် ဤမြင်ကွင်းမှာ ကြောက်စရာကောင်းလွန်းလှသည်။
အားလုံး ထိတ်လန့်သွားသော်လည်း မည်သူမှ အနားမကပ်ရဲကြပေ။ ထိုနေရာသည် စွမ်းအားကြီးသည့်ရှေးဟောင်းအစီအရင်များဖြင့် ကန့်သတ်ထားသည့်နေရာတစ်ခုပင်။
လျှပ်စီးပင်လယ်ထဲတွင် နောက်ကျောဘက်၌ ကောင်းကင်ပုံသင်္ကေတရှိသည့် အဖြူရောင်ဝတ်စုံနှင့်လူကို အားလုံးတွေ့လိုက်ရလေသည်။
“သရဖူခြောက်ခုဘုရင် .. နျင်ချွမ်း..” တစ်စုံတစ်ယောက်မှ တုန်လှုပ်စွာ အော်ဟစ်လိုက်သည်။
ဝုန်း..
အနက်ရောင်ပင်လယ်ပေါ်တွင်လည်း လျှပ်စီးများ ဖြာကျနေပြီး အတိဒုက္ခကို ရင်ဆိုင်နေသည့်သူရှိနေလေသည်။
“ဒါက ဘယ်သူမှမဝင်ရဲတဲ့ သေဆုံးခြင်းပင်လယ်ပဲ .. အခု တစ်ယောက်ယောက်က ကောင်းကင်အတိဒုက္ခကို ရင်ဆိုင်နေတယ် .. အဲဒီလူက ..သရဖူ ၁၀ခုဘုရင်..”
ထိုနေ့တွင် ကိစ္စကြီးများစွာ ဖြစ်ပျက်ခဲ့ပြီး ထာဝရရှေးဟောင်းမြေထဲတွင် မုန်တိုင်းကြီးတစ်ခု ဖြစ်ခဲ့လေသည်။