သုခကမ္ဘာက ရှီဟောင် - Chapter - 1163 အစုလိုက်အပြုံလိုက်သတ်ဖြတ်ခြင်း
ရွှီး..
ရှီဟောင် ထာဝရဓားကို ဆွဲထုတ်လိုက်သည်နှင့် ကောင်းကင်ထက်သို့ ဓားအလင်းတန်းတစ်ခု တက်သွားလေသည်။
ထို့နောက်တွင် ဖူးဟူသည့်အသံနှင့်အတူ ရွှေရောင်နတ်လူဝံကြီးနှစ်ပိုင်းပြတ်သွားပြီး သူ၏အလောင်းလည်း မြေပြင်ပေါ်သို့ ပြုတ်ကျလာသည်။
ဤသည်မှာ အားလုံးကို ထိတ်လန့်သွားစေလေ၏။ ဟွမ် စတိုက်လိုက်ပြီ..
ထိုလူဝံကြီးသည် သေဆုံးသွားသည့် ကောင်းကင်နတ်ဘုရား ၇ ယောက်ထဲမှ ရှေးဟောင်းလူဝံကြီး၏ မျိုးဆက်ပင်။ သို့သော်လည်း သူသည် လျင်မြန်စွာပင် အသတ်ခံလိုက်ရလေပြီ။
ဟွမ်သည် ဒဏ်ရာပြင်းထန်စွာ ရရှိထားပြီး သူ၏လက်ရှိအခြေအနေသည် အလွန်ဆိုးရွားနေသော်လည်း လူတစ်ယောက်ကို တစ်ချက်တည်းဖြင့် သတ်လိုက်လေပြီ။
ဒေါသထွက်ကာ ဆူညံနေသည့်သူများအားလုံးမှာ ချက်ချင်းပင် တိတ်ဆိတ်သွားလေ၏။
အားလုံး အေးခဲသွားလေ၏။ ရွှေရောင်နတ်လူဝံကြီးသည် နတ်ဘုရားအစစ်နယ်ပယ်သို့ ရောက်နေသည့်သူပင်။ သို့သော်လည်း သူသည်တစ်ချက်တည်းဖြင့် အသတ်ခံလိုက်ရလေပြီ။
ဟွမ်မှာ စွမ်းအားတွေ ဘယ်လောက်တောင် ကျန်သေးတာလဲ .. သူလုပ်မယ်လို့ ပြောပြီးတာနဲ့ ချက်ချင်းကို မကြောက်မရွံ့ လုပ်လိုက်တယ် …
ထို့နောက်တွင် ဤနေရာမှာ ချက်ချင်းပင် ဆူညံလာလေသည်။
“မင်းက လွန်လွန်ကျူးကျူးလုပ်ရဲတယ်ပေါ့ .. မင်းကို စိန်ခေါ်တဲ့သူတွေကို မသတ်ပဲနဲ့ ထာဝရရှေးဟောင်းမြေက ကောင်းကင်နတ်ဘုရားရဲ့ မျိုးဆက်ကို သတ်လိုက်တယ် ..”‘ တစ်စုံတစ်ယောက်မှ ကျယ်လောင်စွာ အော်ဟစ်လိုက်သည်။
“လူအုပ်ကြီးကို လှုံ့ဆော်တယ် .. ကျုပ်ကိုတိုက်တဲ့သူတွေကို ဆုကြေးငွေပေးတယ် .. ဒါတွေကို ကျုပ်မသိဘူးလို့ ထင်နေတာလား…” ရှီဟောင်အေးစက်စွာပင် ပြောလိုက်၏။
ရွှီး..
အခြားအလင်းတန်းတစ်ခု ကျရောက်လာပြီး ရှီဟောင်ကို ဆူဆဲနေခဲ့သည့် နောက်တစ်ယောက်လည်း ခေါင်းပြတ်သွားလေ၏။
အားလုံး စိတ်ထဲတွင် တုန်လှုပ်သွားကြရလေသည်။
“လွန်လွန်းသွားပြီဟွမ် .. မင်းက ဒီနေရာကို ဘယ်လိုနေရာမျိုးထင်နေတာလဲ”
“မင်းက ငါ့ရဲ့ ထာဝရရှေးဟောင်းမြေက မြို့ခံတွေကို သတ်ရဲတယ်ပေါ့ .. တာအိုသူငယ်ချင်းတို့ သူ့ကို ပေါင်းတိုက်ပြီးတော့ ဖမ်းကြရအောင်…”
“ဒီလူက လွန်လွန်းသွားပြီ .. သူ့ကို သတ်..”
ကောင်းကင်နတ်ဘုရား ၇ ယောက်၏မျိုးဆက်များမှာ တစ်ယောက်ပြီးတစ်ယောက် ဒေါသထွက်လာကြသည်။ သူတို့အနားတွင်ရှိနေသည့်လူများကို ဟွမ်အားသတ်ရန် ပြောလိုက်လေသည်။
တစ်ချိန်တည်းမှာပင် ဆုကြေးလက်ခံထားသည့်သူများကိုလည်း ဟွမ်အားသတ်ရန် အသံပို့လွှတ်လိုက်ကြလေသည်
“ကောင်းတယ် .. ဟွမ်က ဒီလိုမျိုးဖြစ်နေရမှာ .. မြို့ခံတွေက သူတို့ကိုယ်သူတို့ ဘာလို့ထင်နေတာလဲ .. သူတို့ကို တစ်ချက်တည်းနဲ့ သတ်ပစ်လိုက် .. သူတို့နဲ့ စကားပြောနေစရာအကြောင်းကို မရှိဘူး..”
“ဟုတ်တယ် .. ဒါက ငါ့ရဲ့ စီရင်စုသုံးထောင်ကလူတစ်ယောက် ပြုမူသင့်တဲ့ ပုံစံပဲ .. ဘာကို အဓိပ္ပာယ်မရှိတာလဲ .. သူတို့ကို သတ်ပြီးတော့ အဆုံးသတ်လိုက်..”
လူအချို့သည် သူတို့မူလခန္ဓာကိုယ်များကို မထုတ်ပြရဲပဲ အမှောင်ထဲမှ အော်ဟစ်နေလေသည်။
ဤလူများသည် လူထုကို ဒေါသထွက်အောင် ဆွနေပြီး မီးလောင်ရာ လေပင့်နေခြင်းပင်။ ရှီဟောင်ကို မြို့ခံများဝိုင်းသွားအောင် လုပ်လိုက်ခြင်းပင်။
“နတ်ဆိုးနဲ့ မကောင်းဆိုးဝါးတွေက အလင်းအောက်မှာနေဖို့ မသင့်တော်ဘူး .. မင်းတို့ဘယ်သူလဲဆိုတာ ငါမသိဘူးလို့ ထင်နေတာလား” ရှီဟောင်ချက်ချင်းပင် နှာခေါင်းရှုံ့လိုက်သည်။
ရှီဟောင်သည် လေထဲသို့ တက်သွားလိုက်ပြီး ဓားကို ဝေ့ရမ်းလိုက်သည်နှင့် ရောင်စုံအလင်းတန်းများစွာ ထွက်ပေါ်လာလေ၏။ ထို့နောက်တွင် တဖူးဖူးအသံများအောက်တွင် သနားစရာကောင်းသည့်အော်သံများထွက်ပေါ်လာလေသည်။
လူအုပ်ထဲတွင်ရှိနေသည့် လူများစွာတွင် အချို့သည် အသတ်ခံလိုက်ရကာ အချို့သည် ပြင်းထန်စွာ ဒဏ်ရာရရှိသွားလေ၏။ သူတို့သည် အပြင်ဘက်သို့ လွင့်ထွက်သွားကာ သူတို့ခန္ဓာကိုယ်တွင် သွေးများစီးကျနေလေသည်။
“ဟွမ် .. မင်းရူးသွားပြီလား .. ထာဝရရှေးဟောင်းမြေက မြို့ခံတွေကို တိုက်တာက ထားလိုက်ပါဦး .. အခုမင်းက စီရင်စုသုံးထောင်ကလာတဲ့သူတွေကိုတောင်မှ ရက်ရက်စက်စက်သတ်နေတယ်” တစ်စုံတစ်ယောက်မှ အော်ဟစ်လိုက်သည်။
“နတ်ဘုရားကျောင်းက လူယုတ်မာ .. မင်းက ငါ့ကို မင်းတို့လူလို့ပြောရဲသေးတယ်ပေါ့” ရှီဟောင် အေးစက်စွာ ရယ်မောလိုက်သည်။ သူ၏ဓားကို နောက်တစ်ကြိမ် လွှဲရမ်းလိုက်သည်နှင့် ဖူးဟူသည့်အသံနှင့်အတူ သူ့ကိုမေးခွန်းထုတ်သည့်သူ ခေါင်းပြတ်သွားလေသည်။
သွေးများလွင့်စင်ထွက်လာပြီး ကောင်းကင်ကြီးလည်း နီရဲသွားလေသည်။
အားလုံး ထိတ်လန့်သွားရလေ၏။ ဟွမ်သည် တုံ့ဆိုင်းမနေပဲ သတ်ဖြတ်နေလေပြီ။
ရှီဟောင်သည် ရပ်တန့်လိုက်ကာ ဓားကို မှီထားပြီး အသက်ကို ပြင်းပြင်းရှူနေရလေ၏။ သူသည် အမှန်တကယ်ပင် အားကုန်နေလေပြီ။ သူ၏သွေးစွမ်းအင်သာ အကောင်းဆုံးအခြေအနေတွင်ရှိနေပါက ဤလူများသည် ဒဏ်ရာရရုံသာဖြစ်မည်မဟုတ်ပဲ တစ်ခါတည်း သေသွားမည်ပင်။
“အားလုံးပဲ .. မင်းတို့ဘာတွေ တုံ့ဆိုင်းနေတာလဲ .. သူ့ကို သတ် .. ဒီလူက သေခါနီးနေပြီ .. ဘာအားမှ မကျန်တော့ဘူး .. အခုက သူ့ကိုရှင်းပစ်ဖို့ အချိန်ကောင်းပဲ”
လူအချို့မှ တုံ့ပြန်လာကာ လူအုပ်ကြီးကို အားပေလိုက်လေ၏။
တစ်ချိန်တည်းမှာပင် ကောင်းကင်နတ်ဘုရား ၇ ယောက်၏မျိုးဆက်များသည် ရှီဟောင်ကို ကျိန်ဆဲနေပြီး ကျွမ်းကျင်သူများကို ငှားရမ်းနေဆဲပင်။ ထို့နောက်တွင် သူတို့လည်း ရှေ့တက်လာကြလေ၏။
ထို့အပြင် လူအချို့သည် ရှီဟောင်အားနည်းနေသည်ကို အခွင့်ကောင်းယူကာ ထာဝရမျိုးစေ့ကို ရယူရန်အတွက် ချောင်းတိုက်လာကြလေသည်။
“လူငယ်လေးတွေ … မင်းတို့နောက်ပြန်မဆုတ်သေးဘူးလား..” လက်ရှစ်ဖက်ဝိဉာဉ်လူမျိုးစု ကျွမ်းကျင်သူမှ အော်ပြောလိုက်သည်။
“ဝိဉာဉ်လူမျိုးစု စီနီယာ .. စီနီယာက အရမ်းကြီးကို ဘက်လိုက်နေတာမဟုတ်ဘူးလား .. ကျွန်တော်တို့ လေးလေးစားစားနဲ့ စိန်ခေါ်တယ် .. ဟွမ်ကလည်း စိန်ခေါ်မှုကို လက်ခံပြီးတော့ ပြန်တိုက်နေပြီလေ .. စီနီယာကဘာလို့ ဝင်နှောက်ယှက်နေတာလဲ” ကောင်းကင်နတ်ဘုရား ၇ ယောက်၏ မျိုးဆက်များမှ အော်ပြောလိုက်သည်။
“လက်ရှစ်ဖက်ဝိဉာဉ်လူမျိုးစု .. ခင်ဗျားတို့တွေက ထာဝရရှေးဟောင်းမြေ လူမျိုးစုတွေရဲ့ သိက္ခာတွေကို ချနင်းပြီးတော့ အပြင်လူတွေကို အကာအကွယ်ပေးနေတာများလား ..” ငွေရောင်သွေးနတ်ဆိုးသစ်ပင်လူမျိုးစုမှ ယင်ခွန်မှ လောင်စာထပ်ထည့်လိုက်လေသည်။
အဘယ်ကြောင့်ဆိုသော် သူနှင့် ရှီဟောင်၏ဆက်ဆံရေး ပြီးပြတ်သွားပြီကို သူသိနေသောကြောင့်ပင်။ ရှီဟောင် အတိဒုက္ခကို ဖြတ်သန်းနိုင်လျှင်ပင် သူတို့အတွက် ဘာ လျှပ်စီးအတိဒုက္ခရည်မှာ ရှိတော့မည်မဟုတ်ပေ။
“ဟုတ်တယ် .. စီနီယာကဘာလို့ အပြင်လူအတွက် ပြောပေးနေတာလဲ .. ကျွန်တော်တို့ သူ့ကို လေးလေးစားစား စိန်ခေါ်နေတာပါ” တစ်စုံတစ်ယောက်မှ အော်ဟစ်လိုက်သည်။
မီးတိမ်လှိုဏ်ဂူ၊ ကောင်းကင်နိုင်ငံ၊ နတ်ဘုရားကျောင်းနှင့် နတ်ဆိုးနေကြာဥယျာဉ်မှ ကျန်သည့်သူများသည်လည်း အော်ဟစ်နေကြသောကြောင့် ဤနေရာမှာ ဆူညံနေလေသည်။
ထို့အပြင် အချို့သူများသည် ရှီဟောင်ထံသို့ တရှိန်ထိုးပြေးလာပြီး သတ်ဖြတ်လိုသည့်အငွေ့အသက်များကိုလည်း ထုတ်လွှတ်နေကြလေ၏။
“တာအိုသူငယ်ချင်း .. ဘာကအမှန် ဘာကအမှားလဲဆိုတာ မင်းသိသင့်တယ် .. ကိုယ်ပိုင်ခံစားချက်တွေကို ဦးစားမပေးပါနဲ့” အသက်ကြီးသည့် မြို့ခံများလည်း ပေါ်လာလေ၏။ ဤသည်မှာ ကောင်းကင်နတ်ဘုရား ၇ ယောက်၏မျိုးဆက်များနှင့် ငွေရောင်သွေးနတ်ဆိုးသစ်ပင်လူမျိုးစုမှ ဖိတ်ခေါ်လိုက်ခြင်းပင်။
“ငါ စိန်ခေါ်မှုကို လက်ခံတယ် .. မင်းတို့သေရမှာမကြောက်ရင် လာခဲ့ကြ” ရှီဟောင်ပြောလိုက်၏။
“လူငယ်လေး..” လက်ရှစ်ဖက်ဝိဉာဉ်လူမျိုးစုမှ ကျွမ်းကျင်သူ စိုးရိမ်လာခဲ့သည်။
တစ်ချိန်တည်းမှာပင် အချို့စွမ်းအားကြီးသည့်လူမျိုးစုများလည်း ကြည့်မနေနိုင်ကြတော့ပေ။ ရှီဟောင် အန္တရာယ်ဖြစ်သွားမည်ကို စိုးရိမ်နေကြလေသည်။ သူ့ကို ကာကွယ်ပေးလျှင် ကျိန်စာချေဖျက်နိုင်မည့် အခွင့်အရေးရှိသေးသည်။
“ကိစ္စမရှိဘူး .. ကျွန်တော် အဆင်ပြေတယ် .. သူတို့ကို ကျွန်တော့်ခန္ဓာကိုယ်ပြုပြင်ဖို့အတွက် သုံးလိုက်မယ် .. ဒါကအမှိုက်တွေကို သုံးလိုက်တယ်လို့လည်း ပြောလို့ရတယ်” ရှီဟောင်သည် ဘာမှစောင့်ထိန်းမနေပဲ ပြောလိုက်လေ၏။ ဤသည်မှာ လူများစွာကို ချက်ချင်းပင် ဒေါသထွက်သွားစေလေသည်။
ဒီစကားတွေက မလွန်လွန်းဘူးလား …
“စီနီယာတို့ .. ကျွန်တော် လူတွေအများကြီးကို သတ်တော့မယ် .. စီနီယာတို့ ဒါကို တာဝန်ယူပေးနိုင်မလား” ရှီဟောင်သည် လူအုပ်ထဲတွင်ရှိနေသည့် ထိုသူများကို ကြည့်လိုက်ကာ သတ်ဖြတ်လိုသည့်အငွေ့အသက်များ ထွက်ပေါ်လာလေသည်။
ထိုစကားကို ကြားလိုက်ရသည့်အချိန်တွင် လက်ရှစ်ဖက်ဝိဉာဉ်လူမျိုးစုမှ ကျွမ်းကျင်သူ အနည်းငယ် ထိတ်လန့်သွားရသည်။ “အသတ်ခံလိုက်ရတဲ့သူတွေက ကိစ္စမရှိဘူး .. ဒါပေမဲ့ လူငယ်လေး .. မင်းရဲ့ခန္ဓာကိုယ်…”
ကလန်၏ ရှေးဟောင်းဘိုးဘေး စိတ်ပြန်ကောင်းသွားပြီဖြစ်သောကြောင့် လက်ရှစ်ဖက်ဝိဉာဉ်လူမျိုးစုမှ မည်သည့်စွမ်းအားကြီးလူမျိုးစုကိုမှ မကြောက်တော့ပေ။ ထို့အပြင် ဟွမ်ကို ကာကွယ်ချင်နေသည့် လူမျိုးစုလည်း အများကြီးရှိနေသောကြောင့် သူတို့အခြားသူများကို ရန်စမိမည်ကိုလည်း မစိုးရိမ်ရတော့ပေ။
ကောင်းကင်နတ်ဘုရား ၇ ယောက်၏ မျိုးဆက်များမှာမူ သူတို့၏ ကောင်းကင်နတ်ဘုရားများပင် သေဆုံးသွားပြီဖြစ်သောကြောင့် သူတို့၏မျိုးဆက်များကို ကြောက်စရာမလိုတော့ပေ။
သူတို့အခု စိုးရိမ်နေရသည်မှာ ရှီဟောင်၏ခန္ဓာကိုယ်ပင်။ ဤသည်မှာ သူ၏ကျင့်ကြံခြင်းဖြစ်ပြီး စိုးရိမ်စရာမလိုကြောင်း ပြောနေသော်လည်း သူတို့စိုးရိမ်နေဆဲပင်။
“ကောင်းပြီ .. ဒီလိုဆိုမှတော့ ကျွန်တော်ဒွိဟဖြစ်မနေတော့ဘူး..” ထိုသို့ပြောပြီးသည့်နောက် ရှီဟောင်သည် ထာဝရဓားကိုကိုင်ကာ လမ်းလျှောက်လာလေ၏။
“အသေခံစစ်သားတွေက သူ့ကို သတ်ကြ .. သူဘယ်လောက်ကြာအောင် ဒီလိုမျိုး စိတ်ကြီးဝင်နေနိုင်မလဲဆိုတာ ကြည့်ကြတာပေါ့ .. သေတော့မှာကို ဒီလို လာလုပ်ရဲသေးတယ်ပေါ့ .. သူ့ကို ခွေးသေလိုမျိုးဖြစ်တဲ့အထိ ရိုက်ကြ .. ပြီးရင် သူ့ကို ဆွဲလာခဲ့ကြ” ယင်ခွန် အံကြိတ်ကာ စိတ်ထဲမှ အမိန့်ပေးလိုက်သည်။
ရွှီး..
ထိုအချိန်တွင် ရှီဟောင်သည် ဆူညံနေသည့်လူများကို ဖြတ်ကျော်ကာ ငွေရောင်သွေးနတ်ဆိုးလူမျိုးစုထံသို့ ဦးတည်သွားလိုက်လေ၏။
ဖူးဟူသည့်အသံနှင့်အတူ သွေးရောင်အလင်းများ ထွက်ပေါ်လာလေသည်။ ထိုအချိန်တွင် လူ ၈ ယောက်အသတ်ခံလိုက်ရလေပြီ။
ယင်ခွန်ပင်လျှင် ချက်ချင်းနောက်ဆုတ်လိုက်သောကြောင့်သာ။ မဟုတ်ပါက သူအခု သေသွားလောက်လေပြီ။
“ဟွမ် .. မင်းက ငါ့ကို တိုက်ခိုက်ရဲတယ်ပေါ့ .. မင်းက ငါ့ရဲ့ ငွေရောင်သွေးနတ်ဆိုးလူမျိုးစုကို စိန်ခေါ်လိုက်တာလား” သူထိတ်လန့်သွားရသည်။ သူတို့သည် အတော်လေး ဝေးကွာပြီး သူ့အသံလည်း သိပ်မကျယ်ပေ။ ဟွမ်က ဘယ်လိုလုပ် ကြားသွားတာလဲ…
“ငါ မင်းကို တိုက်တော့ရော ဘာဖြစ်လဲ .. ငါအရင်တုန်းက ဝိဉာဉ်ကျွန်းမှာလည်း မင်းကို မတိုက်ခဲ့ဘူးလား” ရှီဟောင် ဓားကို ထပ်မြှောက်ကာ ပြောလိုက်သည်။
အားလုံး အုတ်အော်သောင်းတင်းဖြစ်သွားလေ၏။ လူအများစုမှာ ဤအဖြစ်အပျက်ကို မသိကြသေးပေ။ ထို့ကြောင့် ဤအကြောင်းကို ကြားလိုက်ရသည့်အချိန်တွင် သူတို့အားလုံး ထိတ်လန့်သွားကြရသည်။ ငွေရောင်သွေးနတ်ဆိုးလူမျိုးစုသည် မြင့်မ့တ်သည့်လူမျိုးစုဖြစ်သည်ပင်။ မည်သူကများ သူတို့အား ရန်စရဲမည်နည်း..
“မင်း…” ယင်ခွန် ဒေါသထွက်ကာ အရှက်ရဿွားလေ၏။
“ပုန်းလျှိုးကွယ်လျှိုးနဲ့ ခင်ဗျားဘယ်မှာ ပုန်းနေတာလဲ .. ကျုပ်မသိဘူးလို့ ထင်နေတာလား .. တစ်ခြားသူတွေကို လာတိုက်ခိုင်းနေတာ .. ကြည့်ရတာ အရင်တစ်ခေါက်က ခင်ဗျားအသက်ကို လွှတ်ပေးလိုက်တာကို ခင်ဗျားနောင်တမရသေးဘူးထင်တယ် .. ဒီတစ်ခေါက်တော့ ကျုပ်ခင်ဗျားကို တစ်ခါတည်းနဲ့ ဖြတ်ချပစ်မယ်” ရှီဟောင်ပြောလိုက်သည်။
လက်ရှစ်ဖက်လူမျိုးစု၊ လှပခြင်းလူမျိုးစုနှင့် အခြားသူများလည်း ခါးသက်သက်ပင် ရယ်မောလိုက်ကြလေ၏။ ဟွမ်သည် တစ်ခြားသူများကို ရန်စသည့်နေရာ၌ တကယ်တော်လေသည်။ ရှီဟောင် သူတို့ခွင့်လွှတ်မှုကို တောင်းခံနေခြင်းမှာ ယင်ခွန်ကို သတ်ဖို့အတွက်လား..
“သူ့ကို သတ်ကြ .. ခွေးသေကောင်ဖြစ်အောင် ရိုက်ကြ” ယင်ခွန် ဒေါသတကြီးအော်ဟစ်လိုက်သည်။ ယခု သူ၏သိက္ခာများလည်း မရှိတော့သဖြင့် သူ၏အသေခံစစ်သားများကို တိုက်ခိုက်လိုက်တော့သည်။
ရွှီး..
ရုတ်တရက်ပင် ရှီဟောင်၏ ဓားရှည်ထွက်လာကာ သူ့အနားတွင်ရှိနေသည့်လူများကို တိုက်ခိုက်လိုက်လေ၏။ အော်ဟစ်သံများ ထွက်ပေါ်လာကာ ထိုလူအားလုံး မြေပြင်ပေါ်သို့ လဲကျသွားလေသည်။
“မင်းတို့အားလုံးက စီရင်စုသုံးထောင်က လူတွေ … ဆူဆူညံညံတွေ လုပ်ပြီးတော့ ချောင်းတောင် ချောင်းတိုက်လိုက်သေးတယ် .. မင်းတို့က ယင်ခွန်ထက်တောင် ပိုပြီးတော့ မုန်းစရာကောင်းသေးတယ်” ရှီဟောင်ပြောလိုက်သည်။
“သတ်…” လူများစွာ အော်ဟစ်လိုက်ကြသည်။
“လာခဲ့လေ .. အမှိုက်တွေ .. မင်းတို့ကို သုံးပြီးတော့ ငါ့ခန္ဓာကိုယ်ကို နားလည်အောင် လုပ်ရမယ်” ရှီဟောင်ပြောလိုက်၏။ သူသည် အစကတည်းက အားမရှိတော့ပဲ ယိမ်းထိုးနေလေပြီ။
သို့သော်လည်း ယခုအချိန်တွင် သူ၏အသွေးအသားများတောက်ပလာကာ နည်းနည်းကျန်နေသေးသည့် သွေးများလည်း တောက်ပလာလေသည်။
ဤသည်မှာ ကျန်ရှိနေသေးသည် အဆင့်လွန်သွေးစွမ်းအင်ပင်။
ဤသွေးစွမ်းအင်မှာ ကုန်ဆုံးနိုင်ရန် ခက်ခဲလှပြီး ဤတစ်ချိန်လုံး ပျောက်ပျက်မသွားခဲ့ပေ။ သူ၏ခန္ဓာကိုယ်အတွင်းပိုင်းတွင် သူသိမ်းဆည်းခဲ့ခြင်းပင်။
အဘယ်ကြောင့်ဆိုသော် ထိုသွေးများ လောင်ကျွမ်းသွားပါက အချိန်အတော်ကြာသည်အထိ ပြန်မပေါ်လာမည်ကို သူကြောက်နေသောကြောင့်ပင်။ သို့သော်လည်းယခုအချိန်တွင် အန္တရာယ်မျိုးစုံကို ရင်ဆိုင်နိုင်ရန်အတွက် သူခွန်အားလိုအပ်သည်။
သုံးရမလား မသုံးရဘူးလား .. သူအမြဲတမ်း တွေဝေနေခဲ့ခြင်းပင်။
ယခုတော့ သူဆုံးဖြတ်ချက်ချလိုက်ပြီ။ အဆင့်လွန်သွေးစွမ်းအင်အပါအဝင် သူ၏သွေးစွမ်းအင်အားလုံးကို သူလောင်ကျွမ်းစေလိုက်ပြီး မိုးမခနတ်ဘုရား၏ ပညာများကို နားလည်အောင် လုပ်လိုက်လေ၏။
ရေရှည်အတွက်တော့ ဤသည်မှာ အကောင်းဆုံး ဆုံးဖြတ်ချက်ပင်။
“အား…” လူများစွာသည် သနားစဖွယ်ပင် အော်ဟစ်နေကြလေ၏။
ရှီဟောင်၏ခန္ဓာကိုယ်သည် တောက်ပလာကာ မီးဖိုတစ်လုံးကဲ့သို့ပင် လောင်ကျွမ်းလာလေ၏။ သူ၏အဆင့်လွန်အရိုး ထွက်ပေါ်လာပြီး သူ၏ခန္ဓာကိုယ်မှ မီးတောက်များလည်း ထွက်ပေါ်လာလေ၏။
သူသည် ထိုလူများကို သူ၏အဆင့်လွန်သွေးများ ကုန်ဆုံးသွားစေရန်အတွက် တကယ်ကိုပင် အမှိုက်ကဲ့သို့ အသုံးပြုနေခြင်းပင်။
ရှီဟောင် ဓားကို ဝေ့ရမ်းလိုက်သည်နှင့် အသေခံစစ်သားဟုခေါ်သည့်သူ ရာပေါင်းများစွာမှာ မျက်စိတစ်မှိတ်အတွင်းမှာပင် သေဆုံးသွားလေ၏။ ခြေလှမ်းတစ်လှမ်းသည် ကျန်းတစ်ထောင်ရှိပြီး ထာဝရစွမ်းအင်သုံးကြောင်းလည်း သူ့ခန္ဓာကိုယ်တွင် ထွက်ပေါ်လာသည်။ သူသည် ချက်ချင်းပင် ယင်ခွန်ရှေ့သို့ ရောက်လာလေသည်။
“မင်း.. ငါ့ကိုသတ်လို့မရဘူး” ယင်ခွန် ကျယ်လောင်စွာ အော်ဟစ်လိုက်ပြီး သူ့မျက်နှာထက်တွင်လည်း အကြောက်တရားများ ပြည့်နှက်နေလေပြီ။ သူ၏ခွန်အားသည် ကောင်းလှသော်လည်း နောက်ဆုံးတိုက်ပွဲသည် သူ့သတ္တိကို ပျက်စီးစေခဲ့လေပြီ။ သူရှီဟောင်နှင့် ထိပ်တိုက်ရင်မဆိုင်ရဲတော့ပေ။ သူသည် ဆက်၍သာ နောက်ဆုတ်နေလေ၏။
“ခင်ဗျားကိုယ်ခင်ဗျား ဘယ်သူလို့ ထင်နေတာလဲ .. ကျုပ်ကဘာလို့ ခင်ဗျားကို သတ်လို့မရတာလဲ” ရှီဟောင် သူ၏ဓားကို လွှဲရမ်းလိုက်သည်။
ယင်ခွန် ဒေါသတကြီး အော်ဟစ်လိုက်ပြီး သူ၏အဖိုးတန်ပစ္စည်းအားလုံးကို အသက်သွင်းလိုက်သော်လည်း လုံးဝအသုံးမဝင်တော့ပေ။ ထိုဓားသည် သူ၏နဖူးရိုးကို ပွင့်ထွက်သွားစေပြီး သူ၏ခန္ဓာကိုယ်တစ်ခုလုံးလည်း ထိုနေရာတွင် ချက်ချင်းပင် ပေါက်ကွဲသွားလေသည်။
“မင်းတို့တွေရှိသေးတာပဲ .. ငါက မင်းတို့ရဲ့ ဘိုးဘေးတွေကိုတောင် ကောင်းကင်အတိဒုက္ခနဲ့ သတ်ခဲ့တာ .. ငါက ဘာလို့မင်းတို့ကို ကြောက်ရမှာလဲ..”
ရှီဟောင်သည် ကောင်းကင်နတ်ဘုရား ၇ ယောက်၏မျိုးဆက်များထံသို့ တရှိန်ထိုး ပြေးသွားလိုက်သည်။ သူသည် သိုးအုပ်ထဲရောက်နေသည့် ဝံပုလွေကဲ့သို့ပင် သူ့ရှေ့တွင်ရှိနေသည့်သူအားလုံးကို ရှင်းလင်းလိုက်လေ၏။ ပြန်လည်ဝင်စားခြင်းပညာများကိုပြသလိုက်ကာ အချိန်အပိုင်းအစများလည်း ရှိနေလေ၏။ နေရာတိုင်းတွင် သွေးများစီးဆင်းနေပြီး အရာအားလုံးလည်း ညှိုးရော်သွားကာ အရိုးဖြူများအဖြစ်သို့ ပြောင်းလဲသွားလေ၏။
ဤသည်မှာ တိုက်ခိုက်ခြင်းမဟုတ်ပဲ သတ်ဖြတ်ခြင်းပင်။
“မြန်မြန်ပြေး” အားလုံး ကြောက်ရွံ့သွားကြသည်။ သူတို့ကြားမှ ကွာခြားချက်မှာ ကြီးမားလှသည်။
“မင်းတို့ ဘယ်ပြေးကြတာလဲ .. နတ်ဘုရားကျောင်း၊ နတ်ဆိုးနေကြာဥယျာဉ်၊ မီးတိမ်လှိုဏ်ဂူ .. ငါအရင်က မင်းတို့ကို အသက်ရှင်ခွင့်ပေးခဲ့တယ် .. အဲဒါကို မင်းတို့ကဘာလို့ ငါ့ကိုလာနှောက်ယှက်နေသေးကြတာလဲ .. မင်းတို့အားလုံး သေလို့ရပြီ”
ရှီဟောင်သည် လေထဲသို့ ခုန်တက်လိုက်ကာ နေရာတိုင်းကို တိုက်ခိုက်လိုက်သည်။ ယခင်က ဆူဆူညံညံအော်ဟစ်နေခဲ့ကြသည့်သူအားလုံးမှာ ယခုအချိန်တွင် အသတ်ခံလိုက်ရလေပြီ။
သေတော့မည့်ဟွမ်က ဤမျှစွမ်းအားကြီးလိမ့်မည်ဟု သူတို့မထင်ထားခဲ့ပေ။
ရှီဟောင်သည် ထွက်ပြေးသွားသည့်သူများအားလုံးနောက်သို့ သွေးစွန်းနေသည့် ဓားတစ်ချောင်းကိုင်ကာ လိုက်ဖမ်းနေလေ၏။ ခဏကြာပြီးသည့်နောက်တွင် ဤနေရာ၌ အလောင်းတစ်ထောင် ပေါ်လာလေသည်။
ရှီဟောင်သည် ရပ်တန့်မသွားပဲ သူ့ကိုယ်သူ မောပန်းသွားအောင် လုပ်နေဆဲပင်။ သူ၏အဆင့်လွန်သွေးများလောင်ကျွမ်းနေပြီး သူ၏နတ်ခွန်အားများလည်း ထွက်ပေါ်လာနေသည်။
နောက်ပိုင်းမျိုးဆက်များသည် ဤတိုက်ပွဲအကြောင်း စဉ်းစားမိသည်နှင့် အေးခဲသွားကြမည်ပင်။ ဂျီးနီးယပ်စ်များ၊ ကျွမ်းကျင်သူများဟုခေါ်သည့်သူများမှာ ရှီဟောင်ရှေ့တွင် ကြက်ကလေး ငှက်ကလေးလိုပင် အသတ်ခံလိုက်ရလေ၏။
တိတ်တဆိတ်ရောက်လာသည့် ကောင်းကင်နတ်ဘုရားများရှိသော်လည်း လက်ရှစ်ဖက်ဝိဉာဉ်လူမျိုးစုနှင့် အခြားလူများစုများ တားဆီးလိုက်ကြလေသည်။
နောက်ဆုံးတွင် ဤနေရာသည် တိတ်ဆိတ်သွားကာ သတ်စရာလူလည်း မကျန်တော့ပေ။
ထိုအချိန်တွင် ရှီဟောင်၏ သွေးစွမ်းအင်လည်း ကုန်ဆုံးသွားပြီဖြစ်ပြီး သူသည် ထိုင်ချလိုက်ကာ တစ်လက်မမျှပင် မရွေ့တော့ပေ။
သူ့ဘေးပတ်လည်တွင် သွေးများစီးဆင်နေပြီး ကျွမ်းကျင်သူများ၏အရိုးများလည်းတစ်ခုပေါ်တစ်ခု ထပ်နေသည်။
ဤသည်မှာ ငရဲနှင့်ပင် တူနေသည်။ ထိုအရိုးပုံများအလယ်တွင် ကျွမ်းကျင်သူတစ်ယောက်ထိုင်နေပြီး တာအိုကို လေ့လာနေသည်။
ဝုန်း..
သူ၏ခန္ဓာကိုယ် နောက်တစ်ကြိမ် တုန်ခါသွားကာ နောက်ဆုံးကျန်သည့် အသက်ဓာတ်လည်း ပျောက်ကွယ်သွားလေ၏။ သူသည် သေသွားသကဲ့သို့ ဖြစ်သွားလေ၏။
လက်ရှစ်ဖက်ဝိဉာဉ်လူမျိုးစုမှာ ထိတ်လန့်သွားရသည်။
သို့သော်လည်း ခဏကြာပြီးသည့်နောက်တွင် ရှီဟောင့်ခန္ဓာကိုယ်၌ အသက်ဓာတ် ပြန်ပေါ်လာသည်။ ပထမဆုံး ပြောင်းလဲလာသည့်အရာမှာ သူ၏လက်မောင်းပင်။ မူလက ခြောက်ကပ်နေကာ အရောင်အဆင်းမရှိသည့် လက်မောင်းသည် ယခုအချိန်တွင် ရွှေရောင်အလင်းတန်းများ တောက်ပနေပြီး အသက်ဓာတ်များ ပြည့်ဝလာသည်။