သုခကမ္ဘာက ရှီဟောင် - Chapter - 1168 ပါရမီရှင်များ၏ တိုက်ပွဲ
ကျားနှင့်နဂါးများကြားမှ တိုက်ပွဲတစ်ခု…
ပြိုင်ကွင်းပေါ်တွင် လူငယ်ဘုရင်ပေါင်းများစွာ ပေါ်လာပြီး အားလုံးကို ထိတ်လန့်သွားစေခဲ့လေသည်။ ဤတိုက်ပွဲကြီးမှာ ပို၍ပင် ပြင်းထန်လာပြီး ကြည့်နေကြသည့်သူများကို သွေးဆူစေလေသည်။
ဤမျှအထိဖြစ်လာလိမ့်မည်ဟု မည်သူမှ မထင်ထားခဲ့ပေ။ ရှေးဟောင်းဘုရင်များ၊ လက်ရှိလောက၏ဘုရင်များ အားလုံး ပေါ်လာလေပြီ။
ဤလူများ၏ နတ်အာရုံများမှာ စူးရှလှသည်။ ဤပြိုင်ကွင်းသည် ယခင်ကနှင့်အတူပဲ လူပေါင်းများစွာကို ခွင့်ပြုသည်ကို ခံစားမိသောကြောင့် သဘာဝကံကောင်းမှုများကို ရယူရန်အတွက် စင်မြင့်ပေါ်သို့ တက်လာလေ၏။
ရွှမ်းရွှမ်း..
ဓားလွှဲသံများ ထွက်ပေါ်လာပြီး လေအေးများသည် အားလုံး၏ကျောရိုးထဲသို့ စိမ့်ဝင်လာလေ၏။ ဂုကျန်းယွမ်၏ဆံပင်များ ရှုပ်ပွနေပြီး တစ်ကိုယ်လုံးလည်း သွေးများ ဖုံးလွှမ်းနေလေပြီ။ သူသည် ရူးတော့မလိုပင်ဖြစ်နေလေပြီ။
သူသည် အလွန်အမင်းပင် ဒေါသထွက်နေလေ၏။ အဘယ်ကြောင့်ဆိုသော် စင်မြင့်ပေါ်သို့ ရောက်လာသည့်သူတိုင်းသည် သူတို့၏ခွန်အားများကို စမ်းသပ်ရန်အတွက် သူ့ကို အသုံးချနေကြသည်။ သူသည် ခွန်အားကို တိုင်းတာသည့်စံအတိုင်းအတာတစ်ခု ဖြစ်နေလေပြီ။
သူက ဘယ်လိုလုပ် ဒီလိုမျိုး ခွင့်ပြုပေးနေရမှာလဲ…
သူ .. ဂုကျန်းယွမ်က ထာဝရစွမ်းအင်ကို ကျင့်ကြံထားပြီး ကောင်းကင်အတိဒုက္ခကိုတောင်ဖြတ်ပြီးသွားတဲ့ ထူးချွန်တဲ့သူရဲကောင်းတစ်ယောက်ပဲ .. အခုတော့ သူက ဒီလိုမျိုး အထင်သေးခံနေရတယ်..
သူသည် ရှီဟောင်ကြောင့် ဒဏ်ရာရသွားပြီးနောက် နှစ်ထပ်မျက်လုံးကြောင့် သူ၏လက်မောင်းပေါက်ကွဲထွက်သွားသည်။ ထို့နောက်တွင် အခြားသူများထံမှလည်း ဆက်တိုက် တိုက်ခိုက်ခံနေရသည်။
ဤတိုက်ပွဲထဲသို့ အခြားသူများ ထပ်မံဝင်ရောက်လာပြီး အားလုံးမှာ ရှေးဟောင်းလူထူးဆန်းများပင်။
သူတို့ထဲမှ တစ်ယောက်သည် အမျိုးသမီးတစ်ယောက်ဖြစ်ပြီး သူသည် တစ်လက်မခန့်ရှိသည့် မီးတောင်လေးကို ကိုင်ထားလေ၏။ ထိုမီးတောင်ရှိချော်ရည်ထဲတွင် အခေါင်းလေးတစ်ခု ရှိနေလေ၏။
အခြားမိန်းကလေးတစ်ယောက်မှာ ရွှေရောင်ဆံပင်များကို ဖြန့်ကျဲချထားပြီး ရွှေရောင်အလင်းများကို ထုတ်လွှတ်နေလေ၏။ ကောင်းကင်ပညာများလည်း ထုတ်လွှတ်နေပြီး ဤနေရာတစ်ခုလုံးကို တုန်ခါစေလေသည်။
ဤပြိုင်ကွင်းသည် ပို၍ပင် ဖရိုဖရဲဖြစ်လာပြီး တိုက်ပွဲများမှာ ဆက်လက်ဖြစ်ပွားနေနဆဲပင်။
အဘယ်ကြောင့်ဆိုသော် သဘာဝကံကောင်းမှုမှာ မကြာခင်ထွက်ပေါ်လာတော့မည်ကို အားလုံးအာရုံခံစားမိသောကြောင့် သူတို့ယခု မတက်လာလျှင် သူတို့နောက်ထပ်အခွင့်အရေး ရှိတော့မည်မဟုတ်ပေ။ ထို့ကြောင့်ပင် သူတို့သည် ဤနေရာကြီး ဖရိုဖရဲဖြစ်သည်အထိ တိုက်ခိုက်နေရခြင်းပင်။
“အားလုံး ဒီနေရာကို တက်လာနိုင်တယ်လို့ ထင်နေတာလား .. မင်းတို့အားလုံး ငါ့ရဲ့လက်သီးချက်ကို အရင်ဆုံးမြည်းစမ်းရမယ်”
သရဖူ၁၀ခုဘုရင် မကျေမနပ်ဖြစ်သွားသည်။ သူသည် ရုတ်တရက်ပင် လှည့်လာပြီး နဂါးတံဆိပ်တစ်ခုကို ပြုလုပ်လိုက်ပြီး သူ၏လက်သီးလည်း တောက်ပလာလေ၏။ သူထုတ်လွှတ်လိုက်သည့်တံဆိပ်မှာ စွမ်းအားအကြီးဆုံးနဂါးလက်သီးပင်။ နဂါးအစစ်တစ်ကောင်သည် သူ၏အမြှီးကို လှုပ်ရမ်းပြီး အားလုံးထံသို့ ဦးတည်လာနေလေသည်။
သူသည် ယခုလေးတင်ရောက်လာသည့်သူများကို ရင်ဆိုင်လိုက်လေ၏။
ထိုသူများသည် ခုခံရုံမှလွဲ၍ ရွေးချယ်စရာမရှိတော့ပေ။ ဤနေရာတွင် နတ်အလင်းတန်းများ ထွက်ပေါ်လာပြီး သင်္ကေတများလည်း မီးတောင်တစ်လုံးကဲ့သို့ပင် ပေါက်ကွဲထွက်လာလေသည်။
ရှေးဟောင်းလူထူးဆန်းများအပါအဝင် အချို့သူများ သွေးအန်သွားလေ၏။ သရဖူ ၁၀ခုဘုရင်၏ခွန်အားကို တားဆီးနိုင်ရန် ခက်ခဲလှသည်။
“စင်ပေါ်ကို မြန်မြန်တက်လာပြီးတော့ လာမကူသေးဘူးလား” အချို့သူများသည် ဒဏ်ရာရသွားသော်လည်း ပြန်ဆုတ်မသွားပဲ တိတ်တဆိတ် အသံပို့လွှတ်လိုက်သည်။
ဝုန်း…
စင်မြင့်အောက်တွင် ဂိုဏ်းများစွာမှ ကျွမ်းကျင်သူများရှိနေပြီး သူတို့ကြားထဲတွင် မဟာမိတ်အဖွဲ့များ ရှိကြလေသည်။ ရှေးဟောင်းလူထူးဆန်းများ၏ အသံများကို ကြားလိုက်ရသည့်အချိန်တွင် သူတို့သည် အဖွဲ့ပေါင်းများစွာ ခွဲဖွဲ့လိုက်ပြီး စင်မြင့်ပေါ်သို့ အတူတကွ တက်သွားကြလေ၏။
ယခင်ကတည်းက ယခုအချိန်ထိ စင်မြင့်ပေါ်တွင် ဤသို့ဖရိုဖရဲမဖြစ်ဖူးပေ။ ယခုအချိန်တွင် စင်မြင့်ပေါ်၌ ကျင့်ကြံသူ ဘယ်နှယောက်ရှိမှန်းပင် မသိနိုင်တော့ပေ။
“သတ်…”
အားလုံးအထက်တွင်ရှိနေသည့်သူများလည်း ရှိနေသည်သာ။ ရှီဟောင်၊ နှယ်နှင်ဒဏ်ခံရသည့်ထာဝရသက်ရှိနှင့် သရဖူ ၁၀ခုဘုရင်တို့သည် သူတို့လမ်းကြောင်းတွင်ရှိနေသည့်လူအားလုံးကို ရှင်းလင်းပစ်ပြီး တိုက်ခိုက်နေဆဲပင်။
သူတို့နားသို့ ချဉ်းကပ်လာသည့်သူအားလုံးမှာ ပေါက်ကွဲသွားပြီး အသားပုံကြီး ဖြစ်သွားလေ၏။
ရုတ်တရက်ပင် အရိုးဓားမြောင်တစ်ခု လွင့်ထွက်လာပြီး ရှီဟောင်၏နောက်ကျောကို စိုက်သွားလေသည်။ ဤသည်မှာ ချောင်းတိုက်လိုက်သည့် ကောင်းကင်နတ်ဘုရားအဆင့်မှော်လက်နက်ပင်။
ရှီဟောင်ထံမှ အော်သံထွက်လာပြီး သူ့ပါးစပ်မှ မွေးရာပါဝိဉာဉ်စွမ်းအင်များ အန်ထွက်လာလေ၏။ ထိုစွမ်းအင်သည် ဖရိုဖရဲအလင်းတန်းနှင့်အတူ ထွက်ပေါ်လာကာ ဓားမြောင်ကို ဆွဲထုတ်လိုက်လေသည်။
ခပ်ဝေးဝေးတွင် ဆူးဆူးဝါးဝါးအော်သံများ ထွက်ပေါ်လာလေ၏။
“မင်းက ငါ့ကို ချောင်းတိုက်ရဲတယ်ပေါ့”
ရှီဟောင်လက်ညှိုးထိုးလိုက်သည်နှင့် ခွန်ပန်အမွေးအတောင်များ ထွက်ပေါ်လာလေသည်။ သူအရှေဘက်သို့ ပြေးသွားလိုက်သည်နှင့် ကောင်းကင်ထက်တွင် ရွှေရောင်အလင်းများ တောက်ပသွားလေသည်။
ဖူး..
နောက်ဆုံးတွင် ကျွမ်းကျင်သူတစ်ယောက် လဲကျသွားလေ၏။ ကောင်းကင်နတ်ဘုရားအဆင့်မှော်ပစ္စည်းသည် သူ၏ကိုယ်ပိုင်ဝိဉာဉ်ရှိနေသောကြောင့် သူ့ဘာသာသူ ပျံသန်းသွားလေသည်။
“ဟွမ်က စွမ်းအားကြီးလွန်းတယ် .. သူက ငါတို့ရှင်းပစ်ရမယ့်ရန်သူပဲ” စင်ပေါ်သို့ တက်လာပြီးသည့်နောက်တွင် တစ်စုံတစ်ယောက်မှ ဂုကျန်းယွမ်ကို ကူညီလာပြီး သူ့အား လျှို့ဝှက်စွာပင် အသံပို့လွှတ်လိုက်လေ၏။
“ခင်ဗျား မသေသေးဘူးပေါ့” ဂုကျန်းယွမ် ထိတ်လန့်သွားရသည်။
ဤသည်မှာ မီးတိမ်လှိုဏ်ဂူမှ ရှေးဟောင်းလူထူးဆန်းပင်။ ယခင်က သူရူးသွားပြီး တရားထိုင်ရင်းသေသွားသည်ဟု ကောလဟာလများကြားဖူးကြသည်။ သူအသက်ရှင်လိမ့်မည်ဟု မည်သူမှ မထင်ထားခဲ့ပေ။ သူသည် ထာဝရရှေးဟောင်းမြေသို့ ဝင်လာခဲ့ပြီး ဂုကျန်းယွမ်ဘေးတွင်ပင် ရပ်နေလေပြီ။
“ဟွမ်ကို သတ်ဖို့ နျင်ချွမ်းကို ကူညီလိုက်ရအောင် .. အပြစ်သားသွေးမျိုးဆက်ကို ရှင်းလင်းပစ်ရမယ်” မီးတိမ်လှိုဏ်ဂူမှ လူငယ်ဘုရင်မှ အေးစက်စွာ ပြောလိုက်သည်။
ယခုလေးတင်ဖြစ်ပျက်ခဲ့သည့် ကောင်းကင်ရတနာအဆင့်မှော်လက်နက်ဖြင့် တိုက်ခိုက်ခြင်းမှာလည်း သူ၏လှုံ့ဆော်မှုကြောင့်ပင်။
ဤသည်မှာ လူများခန့်မှန်းထားသလိုပင်။ အချို့ဂိုဏ်းများသည် မြို့ခံများနှင့်အတူ ပူးပေါင်းကာ ထာဝရရှေးဟောင်းမြေတွင် ကောင်းကင်နတ်ဘုရားအဆင့်မှော်လက်နက်များ ပြုလုပ်ထားခြင်းပင်။
ဂုကျန်းယွမ် မျက်မှောင်ကြုတ်လိုက်၏။ သူဟွမ်ကို သတ်ချင်သော်လည်း အခြားသူများနှင့်ပူးပေါင်းခြင်းမှာ သူ့ပုံစံမဟုတ်ပေ။
“အခုအချိန်မှာ တစ်ယောက်ကိုတစ်ယောက် မယုံမကြည်ဖြစ်နေလို့ ဘာထူးမှာလဲ .. နျင်ချွမ်က ဟွမ်ကိုသတ်နိုင်အောင်လို့ငါကူညီပေးမယ် .. အဲဒါဆိုရင် သရဖူ ၁၀ခုဘုရင်နဲ့ နှယ်နှင်ဒဏ်ခံရတဲ့ထာဝရသက်ရှိတို့ တစ်ယောက်ကိုတစ်ယောက် သတ်နေတာကို ငါတို့ဘေးကနေ ထိုင်ကြည့်နေရုံပဲ .. အချိန်ကျလာရင် ငါတို့အုပ်စုက အနိုင်ရပြီးတော့ သဘာဝကံကောင်းမှုကြီးကို ယူနိုင်လိမ့်မယ်” မီးတိမ်လှိုဏ်ဂူမှ ရှေးဟောင်းလူထူးဆန်း တီးတိုးပြောလိုက်သည်။
“ငါတို့ စလှုပ်ရှားကြတော့မလား” ထိုအချိန်တွင် တစ်စုံတစ်ယောက် ချဉ်းကပ်လာပြီး သူတို့နှစ်ယောက်ထံသို့ အသံပို့လွတ်လာလေ၏။
ဂုကျန်းယွမ် ထိတ်လန့်သွားရ၏။ တစ်ခြားလူတွေလည်း ရှိသေးတာလား .. ဤလူသည်လည်း ရှေးဟောင်းလူထူးဆန်းတစ်ယောက်ပင်။
“ငါ တာအိုသူငယ်ချင်းနှစ်ယောက်ကို ဆက်သွယ်ထားတယ် .. အချိန်ကျလာတာနဲ့ သူတို့တွေက ကောင်းကင်နတ်ဘုရားအဆင့်မှော်ပစ္စည်းတွေကို သုံးပြီးတော့ နျင်ချွမ်းကို ကူညီလိမ့်မယ်” မီးတိမ်လှိုဏ်ဂူမှ ကျင့်ကြံသူ ပြောလိုက်သည်။
“တာအိုသူငယ်ချင်းနျင်ချွမ်က ဒါကို မကြိုက်လောက်ဘူး” ဂုကျန်းယွမ် တုံ့ဆိုင်းနေမိသည်။
နျင်ချွမ်းသည် သူတို့မျိုးဆက်မဟုတ်သော်လည်း သူသည် သူတို့ဂိုဏ်း၏ ရှေးဟောင်းစာအုပ်များနှင့် မှတ်တမ်းများကို ဖတ်ဖူးသောကြောင့် သူတာဝန်ယူနေရခြင်းပင်။
တစ်ခါတစ်ရံတွင် နျင်ချွမ်းသည် သူတို့ဂိုဏ်းကို ကိုယ်စားပြုလေသည်။
“လှုပ်ရှားမယ်” မီးတိမ်လှိုဏ်ဂူမှ ကျွမ်းကျင်သူ ပြောလိုက်သည်။ အစက ရှီဟောင်တစ်ခုခုဖြစ်နေပြီး သေချာပေါက်သေတော့မည်ဟု သူတို့ထင်နေကြခြင်းပင်။ သူသည် ယခုကဲ့သို့ ရွှေရောင်ခန္ဓာကိုယ်ဖြစ်လာလိမ့်မည်ဟု မထင်ထားခဲ့ပေ။
“ကောင်းပြီလေ…”
နောက်ဆုံးတွင် ဂုကျင်းယွမ် ခေါင်းညိမ့်လိုက်၏။ သူ၏နတ်ဓားဖြင့် သူတရှိန်ထိုးပြေးသွားလိုက်လေ၏။
သူတို့လေးယောက် လူစုကွဲသွားပြီး သူတို့ဘေးနားမှလူသတ်ဖြတ်လိုက်လေသည်။
ဝုန်း..
ရုတ်တရက်ပင် ကောင်းကင်နတ်ဘုရားအဆင့်စေတီတစ်ဆူ ရှီဟောင်၏ဦးခေါင်းထက်တွင် ထွက်ပေါ်လာပြီး သူ့အားဝန်းရံဖိနှိပ်လာလေ၏။
ရှီဟောင် ဆံပင်မွေးများပင် ထောင်ထသွားရသည်။ သူဘေးဘက်သို့ ရှောင်တိမ်းလိုက်သည့်အချိန်တွင် ကောင်းကင်နတ်ဘုရားအဆင့်လှံတံတစ်ခု ဖောက်ထွက်လာလေ၏။ ခရမ်းရောင်အလင်းတန်းများတောက်ပလာကာ သူ၏အော်ရာမှာ နှိုင်းယှဉ်၍မရနိုင်လောက်အောင်ပင်။
သူထိုလှံတံကို နောက်တစ်ကြိမ် ရှောင်ရှားလိုက်သည်။ ကြီးမားလှကာ ကြည်လင်တောက်ပနေသည့် ပင့်ကူအိမ်ကြီးတစ်ခု ရွေ့လျားလာကာ သူ့အားချည်နှောင်ရန် ကြိုးစားနေလေသည်။
ထို့အပြင် ဂုကျန်းယွမ်လည်း လှုပ်ရှားလာလေ၏။ နတ်ဓားတစ်ချောင်း ကောင်းကင်ကိုဖြတ်ကာ သူ့ထံသို့ ရောက်ရှိလာသည်။
ဤအရာအားလုံးမှာ တစ်ခဏအတွင်း ဖြစ်ပျက်သွားခြင်းပင်။ ကျွမ်းကျင်သူလေးယောက်အပြင် နျင်ချွမ်းလည်း သူ့ကိုဝန်းရံကာ တိုက်ခိုက်လာလေသည်။
ရှီဟောင်ကို တိုက်ခိုက်နေသည့် လက်နက်များမှာ ကောင်းကင်နတ်ဘုရားလက်နက်များပင်။
သို့သော်လည်း ထိုအချိန်တွင် အားလုံး၏အမူအရာ ပြောင်းလဲသွားလေ၏။ အဘယ်ကြောင့်ဆိုသော် ကောင်းကင်နတ်ဘုရားမှော်စွမ်းအားတစ်ခု ဤနေရာသို့ ပျံ့နှံ့လာပြီး ဘေးပတ်လည်တွင်ရှိနေသည့် ကျွမ်းကျင်သူအားလုံး ထိုနေရာတွင်ပင် ပေါက်ကွဲသွားလေ၏။
ရှေးဟောင်းဘုရင်များမှ လွှဲ၍ ကျန်သည့်ကျင့်ကြံသူများမှာ ပြန်ဆုတ်နိုင်ရန် ခက်ခဲနေပြီး အားလုံးမှာ အသံပင်မထွက်လိုက်ရပဲ ဆိုးရွားစွာ သေဆုံးသွားကြလေသည်။
“သေချင်နေတာလား..”
သို့သော်လည်း ယခုတစ်ကြိမ်တွင် ရှီဟောင်သည် ထိုမှော်စွမ်းအားကို ရှောင်တိမ်းခြင်းမရှိပဲ ရန်သူလေးယောက်ဖြင့်သာ မျက်နှာချင်းဆိုင် ရပ်နေလေသည်။
သူ၏လက်ထဲတွင် ဖြူဖွေးနေသည့် အရိုးအပိုင်းအစတစ်ခုရှိနေသည်။ ထိုအရိုးအပိုင်းအစသည် သိပ်မကြီးသော်လည်း နူးညံ့တောက်ပနေလေ၏။ သူသည် ထိုအရိုးကို အသုံးပြုကာ ကောင်းကင်နတ်ဘုရားအဆင့် မှော်လက်နက်များကို ရင်ဆိုင်နေခြင်းပင်။
ဝုန်း..
သက်ရှိမျိုးစုံ၏ လေဟာနယ်ပုံရိပ်ထွက်ပေါ်လာကာ ကောင်းကင်နတ်ဘုရားအဆင့်မှော် လက်နက်များ၏ ခွန်အားကို ခုခံကာ ထိုလက်နက်များကို ရပ်တန့်စေလိုက်လေသည်။
ဤသည်မှာ ဝိဉာဉ်တစ်သောင်းသင်္ကေတပင်။
“ဒါက ဘာကြီးလဲ” မီးတိမ်လှိုဏ်ဂူမှ အမွေဆက်ခံသူ ကျယ်လောင်စွာ အော်ဟစ်လိုက်သည်။ သူ၏လက်ထဲတွင်ရှိနေသည့် ကောင်းကင်နတ်ဘုရားအဆင့်လှံတံမှာ မလှုပ်ရှားနိုင်တော့ပဲ ထိုလှံတံ၏ မှော်စွမ်းအားများလည်း ပျောက်ပျယ်သွားလေပြီ။
ကံကောင်းသည်မှာ ထိုအရိုးဖြူလေးသည် မည်သည့်နတ်ခွန်အားကိုမှ မထုတ်နိုင်ပဲ သူ့အားကာကွယ်ခြင်းတစ်ခုတည်းသာ လုပ်ဆောင်နေနိုင်ခြင်းပင်။
“သတ်…”
ရှီဟောင် ဟစ်ကြွေးလိုက်သည်။ ဤလူများမှာ ရှေးဟောင်းလူထူးဆန်းများဖြစ်သည်ကို သူတွေ့လိုက်ရသည်။ ဤလူများသည် တကယ်ပင် ပူးပေါင်းလိုက်ပြီး သူ့အားလုပ်ကြံချင်နေကြသည်။
သူ၏အနောက်ဘက်တွင် ခွန်ပန်အတောင်ပံ ထွက်ပေါ်လာပြီး အရှေ့ဘက်တွင် စွမ်းအားအကြီးဆုံး လျှပ်စီးများ ထွက်ပေါ်လာလေ၏။ သူ၏လက်ထဲတွင်လည်း ပြန်လည်ဝင်စားခြင်းသင်္ကေတဖြင့်ပြုလုပ်ထားသည့် ဓားတစ်လက်ရှိနေလေသည်။
သူသည် နျင်ချွမ်းနှင့်ထိပ်တိုက်ရင်ဆိုင်ပြီးနောက် ဂုကျန်းယမ်ကို သတ်ရန် သူ့ဘက်သို့ လှည့်လိုက်သည်။
ဂုကျန်းယွမ် ထိတ်လန့်တကြား ဖြစ်သွားရသည်။ ဤကဲ့သို့သော စွမ်းအားကို ထိပ်တိုက်ရင်ဆိုင်ရန်မှာ မဖြစ်နိုင်ပေ။ ထိုလူ သူ့အနားသို့ တရှိန်ထိုး ပြေးလာသည်နှင့် သူသည် အသက်ရှူကြပ်လာကာ ဝေါ့ခနဲ သွေးအန်သွားလေ၏။
သူသည် ချက်ချင်းပင် နောက်ပြန်ဆုတ်သွားလိုက်ရလေသည်။
အား..
မီးတိမ်လှိုဏ်ဂူမှ ဘုရင်သည်ကျယ်လောင်စွာပင် အော်ဟစ်လိုက်လေ၏။ အဘယ်ကြောင့်ဆိုသော် ရှီဟောင်မှ သူ့အား ပစ်မှတ်ထားလာသောကြောင့်ပင်။ ထိုဓားလွှဲရမ်းလိုက်သည်နှင့် ပြန်လည်ဝင်စားခြင်းသင်္ကေတများ ထွက်ပေါ်လာပြီး အချိန်များ ပျောက်ကွယ်သွားလေသည်။
“သတ်…” သူကျယ်လောင်စွာ အော်ဟစ်လိုက်ပြီး သူ၏စွမ်းအားအကြီးဆုံးပညာများအပြင် အဖိုးတန်ပညာများကိုလည်း ထုတ်သုံးလိုက်သည်။ သို့သော်လည်း ဤသည်မှာ ရှီဟောင်အား မရပ်တန့်နိုင်ပေ။
ရှီဟောင် သူ့မျက်နှာရှေ့သို့ ရောက်လာသည့်အချိန်တွင် သူသည် လျှို့ဝှက်နည်းလမ်းပေါင်းများစွာ အသုံးပြုပြီးသွားပြီဖြစ်သော်လည်း အချက်ပေါင်းများစွာ ခုခံပြီးသည့်နောက်တွင် သူ့ခေါင်းပြတ်သွားလေ၏။
သူ၏မူလဝိဉာဉ်ပျံပြေးသွားချင်သော်လည်း ထိုအချိန်တွင် အချိန်အပိုင်းအစများကြောင့် ပြာမှုန့်ဖြစ်သွားလေ၏။
ဝုန်း…
နျင်ချွမ်းအနောက်ဘက်မှ လှုပ်ရှားလိုက်သော်လည်း ရှီဟောင်၏ခွန်ပန်အတောင်ပံများ လှုပ်ရှားလာကာ သူ့အား တားဆီးလိုက်သည်။
ထို့အပြင် ရှီဟောင်သည် အရှေ့သို့ တရှိန်ထိုးပြေးသွားလိုက်ပြီး ဝိဉာဉ်တစ်သောင်းသင်္ကေတကို အသုံးပြုကာ ကောင်းကင်နတ်ဘုရားစေတီအား ရပ်တန့်စေလေသည်။ သူ၏လက်သီးချက်ကျရောက်လာပြီး ထိုဘုရင်ကို သွေးမြူဖြစ်သွားအောင် လုပ်လိုက်လေသည်။
ထို့နောက်တွင် သူသည် လျှပ်စီးဧကရာဇ်၏ သင်္ကေတများကို ထုတ်လွှတ်လိုက်သည်နှင့် အခြား ရှေးဟောင်းလူထူးဆန်းတစ်ယောက် ပေါက်ကွဲသွားကာ ထိုသူမှာ မီးသွေးတုံးဖြစ်သွားလေ၏။
“ထာဝရစွမ်းအင်တစ်ကြောင်းကိုတောင် ရအောင်မကျင့်ကြံနိုင်သေးပဲနဲ့ မင်းက ငါ့ကို လာသတ်ဖို့ ကြိုးစားရဲသေးတယ်” ရှီဟောင်အေးစက်စွာပင် ပြောလိုက်သည်။
ဝုန်း…
ရှီဟောင် ဂုကျန်းယွမ်ထံသို့ ဦးတည်သွားသည်နှင့် ချန်ကုန်းယွမ်လှုပ်ရှားလိုက်သည်။ သူသည် မြှားတစ်စင်းပစ်လွှတ်လိုက်ပြီး ဂုကျန်းယွမ် သွေးအန်သွားအောင် လုပ်လိုက်သည်။ ထိုမြှားသည် သူ၏ပုခုံးကို ဖောက်ဝင်သွားပြီး ထိုပုခုံးနေရာတစ်ဝိုက်မှာ ပေါက်ကွဲသွားလေ၏။
ဂုကျန်းယွမ် အပြင်ဘက်သို့ လွင့်ထွက်သွားပြီး စင်မြင့်ပေါ်မှ ပြုတ်ကျသွားလေသည်။
“အဆုံးသတ်ဖို့ အချိန်ရောက်ပြီ.. မင်းတို့အားလုံး ဖယ်ကြ” တစ်စုံတစ်ယောက်မှ အော်ဟစ်လိုက်သည်။ ဤသည်မှာ အဆင့်နိမ့်နယ်မြေမှလာသည့် ထူးဆန်းသည့်မီးတောက်နှင့်လူပင်။ သူ၏လက်ထဲတွင်လည်း ပြန်လည်ဝင်စားခြင်းစက်ဝန်းရှိနေလေသည်။
အစပိုင်းတွင် ထိုစက်ဝန်းသည် မည်သည့်စွမ်းအားမှမပြသော်လည်း သူ၏လက်ကောက်ဝတ်မှ သွေးထွက်လာသည်နှင့် ထိုရှေးဟောင်းစက်ဝန်းကြီးသည် တစ်ဖြည်းဖြည်းပင် အသက်ဝင်လာပြီး ဖရိုဖရဲစွမ်းအင်များ ထုတ်လွှတ်လာကာ သူ၏အစွမ်းများ ပြလာလေသည်။
ဤပစ္စည်းကို ထာဝရရှေးဟောင်းမြေထဲသို့ ယူလာ၍ရသောကြောင့် ဤပစ္စည်းမှာ ထူးဆန်းလှသည်။
ထိုအချိန်တွင် သူသည် ဤပြန်လည်ဝင်စားခြင်းစက်ဝန်း၏ ထောင့်လေးကို အသက်သွင်းလိုက်ကာ အားလုံးကို ဖိနှိပ်လိုက်၏။ သူသည်စင်မြင့်ပေါ်တွင်ရှိနေသည့်သူအားလုံးကို ပေါက်ကွဲသွားအောင် လုပ်လိုက်ပြီး နောက်ဆုံးအနိုင်ရရှိသူ ဖြစ်ချင်နေခြင်းပင်။
“အဖိုးတန်ပစ္စည်းပိုင်ဆိုင်ထားတဲ့သူက ထာဝရရှေးဟောင်းမြေမှာ ဗိုလ်ဆွဲတာပဲ” အချို့လူများမှာ ချက်ချင်းပင် ဖြူဖျော့သွားလေ၏။
“ဒါတစ်ခုတည်းနဲ့ အားလုံးကို ဖိနှိပ်နိုင်မယ်လို့ ထင်နေတာလား .. မလုံလောက်သေးဘူး” သရဖူ ၁၀ခုဘုရင် အော်ဟစ်လိုက်သည်။ ထိုအချိန်တွင် သူ၏လက်ထဲ၌ သစ်ပင်လေးတစ်ပင်ပေါ်လာလေ၏။ ထိုသစ်ပင်လေးသည် တစ်ပေခန့်သာရှိသည်။ သူထိုသစ်ပင်၏ ပင်စည်ကိုကိုင်ပြီး လွှဲရမ်းလိုက်သည်နှင့် ထူးခြားသည့်အလင်းတန်းပေါင်းများစွာ ထွက်ပေါ်လာကာ ထိုဖရိုဖရဲစွမ်းအင်များအားလုံးကို ရှင်းလင်းပစ်ပြီး ထိုလူကို ဖိနှိပ်နေလေ၏။
အားလုံး အသက်ရှူသံများပင် အေးခဲသွားလေ၏။ ဒါက .. လောကသစ်ပင်ဖြစ်မယ်ထင်တယ်..
နှယ်နှင်ဒဏ်ခံရသည့်ထာဝရသက်ရှိမှာမူ တည်ငြိမ်နေဆဲပင်။ သူ၏လက်ထဲတွင် ဦးချိုတစ်ခု ပေါ်လာသည်။ ထိုဦးချိုသည် ရိုးရှင်းသော်လည်း သူထိုဦးချိုကို လွှဲရမ်းလိုက်သည်နှင့် ကောင်းကင်နှင့်မြေကြီး ကွဲထွက်သွားပြီး တစ္ဆေသရဲနှင့် နတ်ဘုရားဟစ်ကြွေးသံများပင် ထွက်ပေါ်လာလေ၏။
“ဘုရားရေ .. အဲဒါက ဦးချိုပုရွက်ဆိတ်ရဲ့ တစ်ခုတည်းသော ဦးချိုမဟုတ်ဘူးလား .. ပြိုင်ဘက်ကင်းတဲ့ သားရဲရဲ့ ပြိုင်ဘက်ကင်းတဲ့ဦးချိုပဲ” အားလုံး ဆွံ့အသွားရသည်။
ထူးဆန်းသည့်မီးတောက်နှင့် လူ၏ အမူအရာပြောင်းလဲသွားသည်။ သူ၏တိုက်ခိုက်မှု လုံးဝရှုံးနိမ့်သွားပြီဖြစ်သည်။
ဝုန်း..
ထိုအချိန်တွင် ကမ္ဘာမြေကြီး တုန်ခါလာလေ၏။ ထိုကြီးမားလှသည့် လေဟာနယ်အက်ကွဲကြောင်းကြီးသည် ရုတ်တရက်ပင် တခွပ်ခွပ်အသံများ ထွက်ပေါ်လာပြီး အက်ကွဲကြောင်းလည်း ကြီးလာလေ၏။ ထိုနေရာသည် ပေါက်ကွဲတော့မလိုပင်။ ဤသည်မှာ ဤစင်မြင့်၏ တည်ငြိမ်မှုကိုလည်း ထိခိုက်လေသည်။
“ဘာ .. အပြင်ဘက်ကလူတွေ ဝင်လာချင်နေတာလား” အားလုံး ထိတ်လန့်တကြားဖြစ်သွားရသည်။
ခွပ်..
အက်ကွဲကြောင်းသည် ပို၍ပင် ပျံ့လာပြီး ပြိုင်ကွင်းရှေ့မှ ဖြတ်ပြေးသွားသောကြောင့် ပြင်းထန်သည့်ပွတ်တိုက်မှုကြီး ဖြစ်သွားသည်။
ဝုန်းဟူသည့်အသံ ထွက်ပေါ်လာပြီးသည့်နောက်တွင် ပြိုင်ကွင်းကြီးသည် ဂိတ်တံခါးတစ်ခုအဖြစ် ပြောင်းလဲသွားပြီး ရွှေ့ပြောင်းခြင်းအစီအရင်တစ်ခု စတင်ဖြစ်ပေါ်လာလေသည်။ အလင်းတန်းတစ်ခု ရှီဟောင်ထံသို့ ဦးတည်လာပြီး သူ့အားခေါ်သွားတော့မည်။
“သူ့ကို ရွေးချယ်လိုက်ပြီ” အားလုံး အံကြိတ်၍ ပြောလိုက်သည်။
အပြင်ဘက်မှ ဖိအားများရှိလာသောကြောင့် ပြိုင်ကွင်းသည် မတည်ငြိမ်တော့ပဲ သူ၏ရွေးချယ်မှုများကို စတင်လိုက်တော့လေသည်။
ရှီဟောင်သည် ယခင်က ပွဲ ၈၀၀ နိုင်ထားသောကြောင့် သူ့ကို ရွေးချယ်သွားခြင်းပင်။
“ဒီကိုပြန်လာခဲ့..” သရဖူ ၁၀ခုဘုရင်သည် အော်ဟစ်လိုက်ကာ သူ့လက်ထဲတွင်ရှိနေသည့် သစ်ပင်လေးကို လွှဲရမ်းလိုက်ကာ သဘာဝဥပဒေသ တစ်သောင်းကို ပြုလုပ်ပြီး ရှီဟောင်အား တားဆီးလိုက်သည်။
တစ်ချိန်တည်းမှာပင် နှယ်နှင်ဒဏ်ခံရသည့် ထာဝရသက်ရှိလည်း ရှီဟောင်ကို ဖိနှိပ်ရန်အတွက် သူ၏ကောင်းကင်ပုရွက်ဆိတ်၏ ဦးချိုကို အသုံးပြုလိုက်သည်။
“သတ်…” နျင်ချွမ်းလည်း လှုပ်ရှားလာလေသည်။
သူတို့ပင်မဟုတ်။ အခြားသူများလည်း ရှီဟောင်အား တားဆီးရန် ကြိုးစားလာကြလေသည်
ထိုအချိန်တွင် ရှီဟောင်သည် လျှပ်စီးဧကရာဇ်နှင့် သက်ဆိုင်နေသည့် စုတ်ပြတ်သည့်ချပ်ဝတ်တန်ဆာကို ထုတ်ဝတ်လိုက်တော့သည်။ ထိုအပြင် သူ၏ညာလက်ထဲတွင် ဝိဉာဉ်တစ်သောင်းသင်္ကေတအရိုးကို ကိုင်ထားပြီး ဘယ်လက်ထဲတွင် တစ်ပေရှည်သည့်အကြေးခွံကို ကိုင်ထားလေ၏။
ထိုအကြေးခွံသည် နဂါးစွမ်းအင်များကို ထုတ်လွှတ်နေလေ၏။ ဤကြေးခွံသည် အနက်ရောင်ရှေးဟောင်းသင်္ဘောမှ သူရလာခဲ့ခြင်းပင်။
“ငါ့ကို တားတဲ့သူတွေအကုန်လုံးသေရမယ်” ရှီဟောင် ဟစ်ကြွေးလိုက်သည်။