သုခကမ္ဘာက ရှီဟောင် - Chapter - 1186 အားလုံး၏ စိတ်အခြေအနေ
ထာဝရနန်းတော်သည် မည်မျှပင် စွမ်းအားကြီးသည့် ဂိုဏ်းဖြစ်သနည်း .. သူတို့ထံတွင် တပည့်များစွာ မရှိသော်လည်း သူတို့၏စွမ်းအားမှာ အဆင့်မြင့်နယ်မြေတစ်ခုလုံးကို တုန်လှုပ်စေနိုင်သည်။ မည်သူကများ သူတို့အား ရန်စရဲခဲ့သနည်း..
အထူးသဖြင့် ရှေးခေတ်ကတည်းက ရှိနေခဲ့သည့် ကြောက်စရာကောင်းသည့်သက်ရှိမှာ ယခုထိတိုင်ရှိနေဆဲပင်။
ထိုသူမှာ အဆင့်လွန်ခန်းမမှ ပြိုင်ဘက်ကင်းသည့် ဂိုဏ်းခေါင်းဆောင်ကိုပင် စိန်ခေါ်ရဲသည့်ူပင်။ ထို့ကြောင့် အခြားဂိုဏ်းခေါင်းဆောင်များပင်လျှင် သူ့အား လေးလေးစားစားဆက်ဆံရသည်ပင်။
သို့သော်လည်း ယခုအချိန်တွင် သူ့ရှေ့၌ ထာဝရနန်းတော်ကို စိန်ခေါ်သည့်သူ ပေါ်လာလေပြီ။
ဤသည်မှာ မည်မျှပင် ရဲတင်းသည့်အပြုအမူ ဖြစ်သနည်း..
ဤသည်မှာ ထိတ်လန့်စရာကောင်းလွန်းလှပြီး ဂိုဏ်းအားလုံးမှာ အုတ်အော်သောင်းတင်းဖြစ်လာလေ၏။
လေဟာနယ်ထဲတွင်ရှိနေသည့် ကြေးနန်းတော်ထံမှ အံ့အားသင့်စရာကောင်းသည့်အားတစ်ခု ထွက်ပေါ်လာပြီး စွန့်ပစ်နယ်မြေ နေရာအားလုံးကို ပျံ့နှံ့သွားလေသည်။
ထိုလူသည် ဘာမှမပြောသော်လည်း အားလုံး ကြောက်လန့်နေကြရသည်။ သူအသက်ရှူလိုက်သည်နှင့် တောင်များနှင့်မြစ်များ တက်လိုက်ကျလိုက်ဖြစ်နေပြီး သူအသက်ရှူသံများမှာလည်း ပင်လယ်တစ်စင်းကဲ့သို့ပင် ပြင်းထန်လှသည်။
အားလုံး ကြောက်ရွံ့သွားရသည်။
ထိုလူ ဤနေရာတွင်ရှိနေသည်။ ယခင်နှစ်အနည်းငယ်က ဤလူသည် အမြဲတမ်းအိပ်နေခဲ့ခြင်းပင်။ ထာဝရနန်းတော်မှ အခြားဂိုဏ်းခေါင်းဆောင်တစ်ယောက်မှ ဘေးနားတွင် ရပ်စောင့်နေပြီး သူ့နေရာရှိ အရာအားလုံးကို ထိန်းချုပ်နေခြင်းပင်။
သို့သော်လည်း ယခုတော့ ဤလူနိုးလာလေပြီ။
“ကြောက်စရာကောင်းလိုက်တာ .. အဆင့်မြင့်နယ်မြေမှာ မုန်တိုင်းကြီး တိုက်လာတော့မယ်” တစ်စုံတစ်ယောက်မှ ပြောလိုက်သည်။
ယခု ဤလူနိုးလာပြီဖြစ်သောကြောင့် သေချာပေါက် ရိုက်ခတ်မှုများ ရှိလာတော့မည်သာ။ သူဒေါသထွက်လာသည်နှင့် ကြောက်စရာကောင်းသည့်အရာများ ဖြစ်လာမည်သာ။
“လူတစ်ပိုင်း၊ ငှက်တစ်ပိုင်း၊ သားရဲတစ်ပိုင်း .. ငါဒါကို စားလို့မရတော့ဘူး .. မြေအောက်ကလန်လိုပဲ ဘာမှအသုံးမဝင်တဲ့လူမျိုးစု”
နယ်ခြားနံရံ၏ အခြားတစ်ဖက်မှ အသံတစ်သံ ထွက်ပေါ်လာလေသည်။ ထို့နောက်တွင် ထာဝရနန်းတော်၏ ကောင်းကင်နတ်ဘုရားအလောင်းအား ပစ်ထုတ်လိုက်လေ၏။
အပြင်းအထန်ဆွေးနွေးနေကြသည့်သူများအားလုံး ရပ်တန့်သွားကာ အမူအရာမပျက်သွားသည့်သူ မရှိပေ။
ဤနတ်ဆိုးလေးမှာ ရဲတင်းလွန်းလှသည်။ ထာဝရနန်းတော်၏ ကောင်းကင်နတ်ဘုရားကို သူဘာထင်နေသနည်း.. တကယ်ကို သားကောင်တစ်ကောင်ဟုသာ သတ်မှတ်ထားသလား ..
ထို့အပြင် သူသည် မြေအောက်လောကကလန်ကိုပင် ပြောသေးသည်။ ထိုကလန်သားများသည် မျက်နှာပျက်ယွင်းသွားကာ ဝင်ပေါက်ကိုသာ ဒေါသတကြီး စိုက်ကြည့်နေကြလေ၏။
ဤကဲ့သို့သော လူမျိုးတစ်ခါမှ ပေါ်မလာဖူးပေ။ ကောင်းကင်နတ်ဘုရားကို သတ်ပြီးတာတောင်မှ အပြင်ဘက်က ဂိုဏ်းကလူတွေကို ရန်စရဲသေးတယ် ..
“ဒါက သေချာပေါက် ဟွမ်ပဲ” တစ်စုံတစ်ယောက်မှ ခန့်မှန်းလိုက်သည်။
“သူပဲ ..သေချာတယ် .. ဒီလူက သေသင့်တယ် .. ညီအစ်ကိုတို့ ငါတို့ပေါင်းပြီးတော့ ဒီမိစ္ဆာကောင်ကို ရှင်းလိုက်ရအောင်” အာကာသကလန်မှလူများသည် မီးထဲသို့ လောင်စာထပ်ထည့်လိုက်လေသည်။
အဘယ်ကြောင့်ဆိုသော် သူတို့ကြောက်နေကြသောကြောင့်ပင်။ ဟွမ်၏ တိုးတက်နှုန်းမှာ မြန်ဆန်လွန်းလှသည်။ ဤအတိုင်းသာ ဆက်သွားလျှ၍် နောင်နှစ်အနည်းငယ်အတွင်းတွင် ရှီဟောင် သူတို့ဂိုဏ်းသို့ ရောက်လာနိုင်သည်။
ယခုအချိန်တွင် အာကာသကလန်မှ အရေးပါသည့်ပုဂ္ဂိုလ်များမှာ နောင်တရနေကြလေပြီ။ သူတို့ဘာလို့ ဒီလိုနတ်ဆိုးဘုရင်ကို ရန်စခဲ့တာလဲ .. သူတို့သည် ထိုအချိန်တုန်းက သားရဲ ၁၀မျိုးပညာနှင့် အခြားအရာများကို လောဘတက်မိသွားသောကြောင့် သူတို့ကလန်၏ ပုလဲလုံးလေးကို စောင့်ရှောက်ပေးခဲ့သည့်သူအား ဒဏ်ရာရစေခဲ့ပြီး သူတို့ကြားတွင် ရန်ငြိုးတစ်ခုကို ချည်နှောင်ခဲ့သည်။
မီးတိမ်လှိုဏ်ဂူ၊ တစ္ဆေတာအိုမီးတောက်၊ လော့ဖူတောင်ကြားနှင့် အခြားဂိုဏ်းများမှာ ပို၍ပင် ကြောက်ရွံ့နေကြလေသည်။ ဤအပြစ်သားသွေးမျိုးဆက်ကို ဖိနှိပ်ရမည်။ မဟုတ်ပါက ဤဂိုဏ်းများ ဒုက္ခရောက်သွားနိုင်သည်။
ဤကဲ့သို့သော အပြစ်သားသွေးမျိုးဆက်ကို သူတို့တစ်ခါမှ မတွေ့ဖူးသေးပေ။ သူသည် အသက်နှစ်ဆယ်သာ ရှိသေးသော်လည်း ကောင်းကင်နတ်ဘုရားများကို သတ်ဖြတ်နေနိုင်လေပြီ။
ဤလူသာ ကြီးလာပါက သီးခြားနယ်စပ်တွင် ရှိနေသည့်သူများထက်ပင် ကြောက်စရာကောင်းလာလိမ့်မည်။
မြေအောက်ကလန်၊ နတ်ဆိုးနေကြာဥယျာဉ်၊ နတ်ဘုရားကျောင်းနှင့် အခြားဂိုဏ်းများမှာမူ ပြောစရာပင် မလိုတော့ပေ။ သူတို့ကြားတွင် အမုန်းတရားများက ခိုင်မြဲနေလေပြီ။
သွေးအေးရက်စက်ပြီး သံမဏိထက်ပင် အေးစက်မာကျောသည့်နှလုံးသားရှိသည့် ကောင်းကင်နိုင်ငံမှ အရှင်ပင်လျှင် တုန်လှုပ်လာလေပြီ။ သူသည် သွေးများယိုစီးကျနေသည့် စစ်ရထားလုံးပေါ်တွင် ထိုင်နေပြီး သူ၏လက်ထဲတွင် ဓားတစ်ချောင်းကို ကိုင်ထားလေ၏။ သူ၏မျက်လုံးများမှာ စူးရှလှပြီး ထာဝရရှေးဟောင်းမြေကို ဖောက်ထွက်ကာ ထိုလူကို ကြည့်နေသကဲ့သို့ပင်။
ရှီဟောင်၏ လုပ်ဆောင်မှုမှာ ဂိုဏ်းခေါင်းဆောင်များအားလုံးကို စိုးရိမ်မှု ဖြစ်သွားစေလေသည်။
အဘယ်ကြောင့်ဆိုသော် ဤအတိုင်းသာ ဆက်သွားလျှင် ဤလူငယ်လေးသည် ကောင်းကင်နတ်ဘုရားများ၏ ပြိုင်ဘက်ဖြစ်ရုံသာမက သူတို့ကိုပင် စိန်ခေါ်လာနိုင်သည်။
“သူမနာခံရင် သူ့ကို သတ်ပစ်လိုက်” ကောင်းကင်နိုင်ငံမှ အရှင်ပြောလိုက်သည်။
“ငါ့တို့မြေအောက်လောကရဲ့ ဆုံးရှုံးမှုတွေလည်း မနည်းဘူး .. ငါတို့ ထာဝရဝိဉာဉ်သုံးကြောင်း ရှိတဲ့အလောင်းကိုလိုတယ် .. သူ့ကို မြေမြှုပ်ပြီးတော့ နှစ်တွေ ထောင်ပေါင်းများစွာ ကြာလာရင် သူက ပြိုင်ဘက်ကင်းတဲ့အလောင်းတစ်ခု ဖြစ်ရင်ဖြစ်လာနိုင်တယ် ပြောလို့မရဘူးလေ” မြေအောက်လောကမှ ပြောလိုက်သည်။
“သွားသေလိုက်တော့” ကြေးနန်းတော်ထဲမှ နံပါတ်နှစ်ပုဂ္ဂိုလ်သည် ဤစကားသာ ပြောလိုက်သည်။ သူ့ထံမှ သတ်ဖြတ်လိုသည့်အငွေ့အသက်များ ထွက်ပေါ်လာပြီး တောင်များပင် ပြိုကျသွားလေ၏။
ဂိုဏ်းပေါင်းစုံသည် သူတို့နေရာကို ကြေငြာလာကြသည်။
“ဟေး အပြင်ဘက်က ကလေးတွေ … မင်းတို့မကျေနပ်ကြသေးဘူးလား .. မင်းတို့အားလုံး ဒီကိုလာခဲ့လိုက်ကြ .. ငါမင်းတို့ကို ထာဝရရှေးဟောင်းမြေကို အလကားလိုက်ပို့ပေးမယ်” နယ်ခြားနံရံ၏ အခြားတစ်ဖက်မှ ဟွမ်၏အသံ ထွက်ပေါ်လာသည်။
အပြင်ဘက်တွင်ရှိနေသည့် ကျင့်ကြံသူများအားလုံး အံကြိတ်လိုက်ကြသည်။ ဤဂိုဏ်းများနှင့် ဆက်စပ်နေသူများမှာ ဒေါသထွက်လွန်းသောကြောင့် နှာခေါင်းမှ အငွေ့ပင် ထွက်လာတော့မည်။ ဤနေရာတွင်ရှိနေသည့်သူများထဲတွင် သူ့ထက်အသက်မကြီးသည့်သူ မည်သူရှိသနည်း.. ဤသည်ကို သူက သူ၏အသက်နှင့်အတွေ့အကြုံကို ဂုဏ်ယူနေသေးသည်။
ဤသည်မှာ ရန်စခြင်းပင်။
“ပျင်းစရာကောင်းလိုက်တာ .. ငါ ထာဝရရှေးဟောင်းမြေကို သွားရှင်းလိုက်ဦးမယ်နော် .. ဘိုင်..” ထိုသို့ပြောပြီးသည့်နောက် သူ၏ကိုယ်ပွားများကို ခေါ်ကာ သူထွက်သွားလိုက်လေသည်။ အဘယ်ကြောင့်ဆိုသော် အချိန်စေ့သည်နှင့် သူ၏တိုက်ခိုက်နိုင်စွမ်း လျော့ကျသွားလိမ့်မည်။ သူ၏ကိုယ်ပွားများကို ချန်ထားခဲ့လျှင် သူ့အတွက် ပြဿနာဖြစ်လာနိုင်သည်။
…
ချင်းရီသည် နှင်းတောင်ထိပ်တစ်ခုထက်တွင် ရပ်နေလေ၏။ သူမသည် ကျဆင်းနေသည့် နှင်းပွင့်များကို ကြည့်နေပြီး ဘာတွေးနေလဲတော့မသိပေ။
သတင်းများကို ကြားလိုက်ရသည့်အချိန်တွင် ယွဲ့ချန်သည် ချက်ချင်းပင် အတွေးများသွားရသည်။ ယခုအချိန်တွင် သူမသည် သူ၏ဦးလေးနှင့်အတူ မတ်တပ်ရပ်နေခြင်းပင်။ သေမျိုးများထက် မြင့်မြတ်သည့် နတ်သမီးသည် ယခုအချိန်တွင် အနည်းငယ် စိတ်လှုပ်ရှားနေပြီး တည်ငြိမ်နိုင်ရန် ခက်ခဲနေလေသည်။
“သူနဲ့ သမီးကြားမှာ ဘာဖြစ်ရမှာလဲ” ယွဲ့ချန် ခေါင်းပင်မမော့ပဲ ပြောလိုက်သည်။
“ကလေး..” နတ်နန်းဂိုဏ်းမှ ကောင်းကင်နတ်ဘုရားသည် ကျင့်ကြံဆင့်မြင့်သော်လည်း လူငယ်များနှင့် ပေါင်းသင်းဆက်ဆံသည့်စွမ်းရည်မှာ ထိုမျှကောင်းမနေပေ။ သူပြောလိုက်သည့်စကားတစ်ခွန်းပင်လျှင် သူ၏တူမကို စွေ့စွေ့ခုန်သွားစေလေသည်။
“ဦးလေး ဘာတွေပြောနေတာလဲ” ယွဲ့ချန်သည် ရှက်လည်းရှက်သလို ဒေါသလည်း ထွက်ရသည်။
“တကယ်တော့ ဒီလူငယ်လေးက မဆိုးပါဘူး .. အလားအလာကောင်းတယ် .. သူနဲ့ယှဉ်နိုင်တဲ့သူ သိပ်မရှိဘူး .. မင်းသာ ငါ့ဂိုဏ်းက မြင့်မြတ်တဲ့အမျိုးသမီးသာမဟုတ်ရင် ငါတို့ဒီကိစ္စကို ဆွေးနွေးလို့ရနိုင်တယ်”
“ဦးလေး .. ဦးလေး ရူးသွားပြီလား” ယွဲ့ချန်၏ မျက်နှာတစ်ခုလုံး နီရဲနေလေပြီ။
“ဘာကိုရူးရမှာလဲ .. ငါတောင်မှ အဲ့ကောင်ရိုက်တာခံလိုက်ရလို့ သေလောက်အောင် ဒေါသထွက်နေတာ .. ဂိုဏ်းခေါင်းဆောင်တောင်မှ ငါ့ကို ဒီလိုမျိုး မဆက်ဆံဖူးဘူး” နတ်နန်းဂိုဏ်းမှ ကောင်းကင်နတ်ဘုရား ဒေါသတကြီး ပြောလိုက်သည်။
အခြားနေရာတွင်ရှိနေသည့် ခရမ်းရောင်ဝတ်စုံနှင့်မိန်းကလေးလည်း ဖြေးညှင်းစွာပင် သက်ပြင်းချလိုက်သည်။ သူမသည်လည်း အပြင်ဘက်မှ ဟွမ်နှင့်ပတ်သက်သည့် ကောလဟာလများကို ကြားရသည်သာ။
ထိုသူမှာ ကောင်းကင်နတ်ဘုရား ဘယ်နှယောက်ကို သတ်ပြီးသွားပြီလဲဆိုတာကိုတောင် မသိနိုင်တော့ပေ။ ထိုလူများထဲတွင် သူမဂိုဏ်းမှ လူများလည်းပါသေးသည်ပင်။
ယွမ်ရှီးသည် အပျက်အစီးများကို ကြည့်လိုက်ကာ သက်ပြင်းချလိုက်သည်။ “ရှင်တစ်နေ့ကျရင်တော့ ထွန်းပေါက်လာမယ်ဆိုတာ ကျွန်မသိပါတယ် .. ဒါပေမဲ့ ဒီလောက်ထိ ဖြစ်လိမ့်မယ်လို့တော့ မထင်ထားခဲ့ဘူး .. ရှင်က ကောင်းကင်ဘုံကိုးခုကိုတောင်မှ ရောက်သွားပြီ .. ကလန်က အကြီးအကဲတွေလည်း နောင်တရနေလောက်ပြီလို့ ကျွန်မထင်တယ် .. ဒါပေမဲ့ ရှင့်ရဲ့အခြေအနေကလည်း တစ်ဖြည်းဖြည်းနဲ့ ပိုပြီးတော့ အန္တရာယ်များလာပြီ”
သူမ၏ခံစားချက်များ ရှုပ်ထွေးနေလေသည်။ ထို့နောက်တွင် သူမသည် ချက်ချင်းပင် အတွေးထဲ မျောသွားလေ၏။
“ဒီလူက တကယ်ကို အရမ်းအထင်ကြီးဖို့ကောင်းတယ် .. ငါအရင်ခေတ်တုန်းက တွေ့ဖူးခဲ့တဲ့လူတွေထက်ကို စွမ်းအားကြီးတယ်” ခရမ်းရောင်ကျောက်တုံးကြီးပေါ်တွင် ထိုင်နေသည့်လူငယ်တစ်ယောက်သည် မိုးကုပ်စက်ဝန်းတွင်ရှိနေသည့် အနီရောင်တိမ်တိုက်များကို ကြည့်ပြီး ပြောလိုက်သ်။
“ကျောက်တုံးသုံးတုံးစီနီယာ .. စီနီယာရဲ့ ကြောက်စရာကောင်းတဲ့ခွန်အားနဲ့ဆိုရင် သူ့ကို စိန်ခေါ်နိုင်လောက်လား” ယွမ်ရှီး မေးလိုက်သည်။
“စိန်မခေါ်ချင်တော့ပါဘူး” ဤလူငယ်လေးခေါင်းခါကာ ဆက်ပြောလိုက်သည်။ “ငါက အချိန်အတော်အကြာကြီး အိပ်ပျော်ခဲ့တာ .. ငါ့ရဲ့ စိတ်အသက်က မင်းတို့နဲ့ သိပ်မကွာပါဘူး .. အဲဒီတော့ ငါ့ကို စီနီယာလို့ခေါ်စရာမလိုပါဘူး”
အခြားသူများသာ ဤနေရာတွင်ရှိနေလျှင် သူတို့သေချာပေါက် ထိတ်လန့်သွားကြမည်ပင်။ ဤလူသည် အချိန်မြစ်ထဲတွင် ပျောက်ကွယ်သွားခဲ့သည့် ကျောက်တုံးသုံးခုကောင်းကင်ဘုရင်ပင်။
သမိုင်းမတင်မီခေတ်တွင် အာကာသကလန်သည် ပြိုင်ဘက်ကင်းသည့်အာကာသလန်ကသားခြောက်ယောက်ကြောင့် နာမည်ကြီးလာခဲ့သည်။ ထိုသူများကြောင့်လည်း ဧကရာဇ်ကလန် ဖြစ်ခဲ့ရခြင်းပင်။
ဤလူများသည် ကောင်းကင်ပြုပြင်းခြင်းကျောက်တုံးများကို ရရှိခဲ့ခြင်းပင်။
နောက်ပိုင်းမျိုးဆက်များတွင် တစ်ယောက်တည်းဖြင့် ကောင်းကင်ပြုပြင်ခြင်းကျောက်တုံး သုံးတုံးရခဲ့သည့် တပည့်တစ်ယောက်ရှိခဲ့ဖူးသည်။ သူ့ကို ကျောက်တုံးသုံးတုံးကောင်းကင်ဘုရင်ဟု ခေါ်ကြလေသည်။
ဤလူသည် အလွန်သန်မာပြီး အာကာသကလန်၏ အကြီးအကဲ ပြန်ဝင်စားသည်ဟုပင် ပြောကြသည်။ သို့သော်လည်း နောက်ပိုင်းတွင် သူသည် ထူးဆန်းစွာပင် ပျောက်ကွယ်သွားခဲ့သည်။
“ဝါးဟားဟား .. ဟွမ်က ခွန်အားကြီးလာပြီ .. နောက်ကျရင် သူက ထာဝရရှေးဟောင်းမြေကို လျှောက်သွားပြီ… ကောင်းကင်အောက်မှာ လွတ်လွတ်လပ်လပ်သွားနိုင်ပြီ .. ငါလည်း ဂိုဏ်းတွေက ဆေးခင်းကြီးတွေထဲကို သွားလို့ရလောက်လား .. ငါ မုန်လာဥ တစ်ဥ နှစ်ဥလောက်ကို တူးပြီးတော့ ကိုက်ဝါးပစ်မယ် .. မဟုတ်ဘူး ငါပြောတာ မြင့်မြတ်ဆေးပင်ကို ပြောတာ .. အတွေးနဲ့တောင် ကောင်းလိုက်တာ” ယုန်ဖြူလေး ကျယ်လောင်စွာပင် ရယ်မောလိုက်သည်။
ချောင်ယုရှန်းနှင့် ရွှယ်လင်းတို့ နှစ်ယောက်လုံး ဆွံ့အသွားရသည်။
ထိုနေ့တွင် ဂိုဏ်းများစွာ၏ တုံ့ပြန်မှုများမှာ မတူညီကြပေ။
ထာဝရရှေးဟောင်းမြေထဲသို့ ဝင်လာသည့် ကောင်းကင်နတ်ဘုရားအချို့သည် ပြေးစရာမြေမရှိသည်အထိ အလိုက်ခံလိုက်ရပြီး အသတ်ခံလိုက်ရလေသည်။
အခြားသူများမှာမူ အစရှာမရအောင် ပျောက်သွားသောကြောင့်သာ ရှီဟောင် ရပ်တန့်လိုက်ခြင်းပင်။
ရှီဟောင်သည် ချက်ချင်းပင် ဝိဉာဉ်ကျွန်းသို့ သွားလိုက်ပြီး ဝိဉာဉ်ကလန်၏ ကောင်းကင်နတ်ဘုရားအိုကြီးနှင့် သွားဆွေးနွေးလိုက်သည်။ ဝိဉာဉ်ဘိုးဘေးထံမှလည်း လမ်းညွှန်မှုများ တောင်းခံလိုက်သည်။ အတိဒုက္ခကို နောက်တစ်ကြိမ်ဖြတ်သန်းရန်အတွက် သူပြင်ဆင်တော့မည်။
သူအာရုံစိုက်ရမည့်ကိစ္စများအကြောင်းကို သူမေးဖို့လိုသည်။ ပြီးလျှင် သူတို့၏ ကာကွယ်မှုကိုလည်း တောင်းခံရမည်။
သူသိပ်မကြောက်သော်လည်း ကာကွယ်မှုတစ်ချို့ရှိနေခြင်းမှာ အတိဒုက္ခကို တစ်ယောက်တည်း ရင်ဆိုင်သည်ထက်တော့ ပိုကောင်းသည်သာ။
လက်ရှစ်ဖက်ဝိဉာဉ်မျိုးနွယ်စုမှာ သေချာပေါက်ပင် အလွန်စိတ်လှုပ်ရှားသွားကြသည်သာ။ အားလုံးမှာ ဤအချိန်ကို စောင့်နေကြခြင်းပင်။
အဘယ်ကြောင့်ဆိုသော် ဤသည်မှာ သူတို့အသက်များနှင့် သက်ဆိုင်နေသောကြောင့်ပင်။
ယခု ရှီဟောင်သည် သူအတိဒုက္ခကို ရင်ဆိုင်တော့မည့်အချိန်တွင် သူတို့ကို လာရှာသောကြောင့် ဤသည်မှာ ရှီဟောင်သည် သူတို့အား ရင်းနှီးသည့်သူများဟု သတ်မှတ်လိုက်ခြင်းဖြစ်သည်ဟု ဆိုလိုခြင်းပင်။
ဤသည်မှာ ကောင်းကင်နတ်ဘုရားအိုကြီးနှင့် ဘိုးဘေးအား ဝမ်းသာအားရနေကြလေ၏။ ယခင်က အပြင်ဘက်လောကမှလူများကို ခုခံခဲ့သည်မှာ အလဟဿမဖြစ်တော့ပေ။ ဤလူငယ်လေးသည် သူတို့ဂိုဏ်းပေါ်တွင် အမြင်ကောင်းများရှိနေသည်။
လက်ရှစ်ဖက်ဝိဉာဉ်လူမျိုးစုသည် လက်လွတ်စပယ်မလုပ်ရဲပဲ ရှီဟောင်ကို ကာကွယ်ရန်အတွက် အခြားလူမျိုးစုများကို တိတ်တဆိတ် ဆက်သွယ်လိုက်သည်။
ဤလူငယ်လေးသည် စွမ်းအားအကြီးဆုံး ကောင်းကင်အတိဒုက္ခကို ရင်ဆိုင်ရမည်ဖြစ်သောကြောင့် သူတို့အလွန်စိုးရိမ်နေကြလေသည်။ ထူးဆန်းသည့်လျှပ်စီးတွင် ဘာဖြစ်လာနိုင်သလဲ မည်သူမျှမသိပေ။ သူအသက်ရှင်လျက် ဖြတ်သန်းနိုင်ပါ့မလားဆိုသည်ကိုလည်း သူတို့မသေချာပေ။