သုခကမ္ဘာက ရှီဟောင် - Chapter - 1188 ၈လွှာနှင့် ၉ လွှာမြောက်ကောင်းကင်ဘုံ
၈လွှာမြောက်တွင် တောင်တစ်လုံးကို ဖောက်ထွင်းသွားလာနေသည့် အလင်းတန်းတစ်ခုကို သူတွေ့လိုက်ရသည်။ ထို့နောက်တွင် အလွန်ကြီးမားသည့်မြို့တစ်မြို့ကိုလည်းတွေ့လိုက်ရသည်။ မြို့တံခါးများမှာ တင်းကြပ်စွာ ပိတ်ထားလေ၏။
သူ့အနားတွင် တောင်များ မြင့်လိုက်နိမ့်လိုက်ရှိနေပြီး ရှေးသစ်ပင်များလည်း မိုးထိုးနေသည်။ အရာအားလုံးမှာ လျှပ်စီးဖြင့် ပြုလုပ်ထားခြင်းပင်။
တောင်ကြောမှာ အလွန်ပင်တိတ်ဆတ်လှပြီး တောကြီးမှလည်း အသံတစ်သံမှ ထွက်မလာပေ။
ရှီဟောင် တောထဲသို့ လျှောက်သွားလိုက်ကာ ထိုထူးဆန်းကာ ကြီးမားလှသည့်မြို့ထံသို့ ဦးတည်သွားလိုက်သည်။ ဤမြို့ကြီးသည် ၈လွှာမြောက်ကောင်းကင်ဘုံကို ဖိနှိပ်ထားပြီး ဤနေရာကို ဖြတ်သွားပြီးမှသာ ကောင်းကင်နောက်တစ်လွှာကို မြင်ရခြင်းပင်။
ရှီဟောင် ထိုကြီးမားလှသည့်ဂိတ်တံခါးနားသို့ ရောက်လာလေပြီ။ ဤဂိတ်တံခါးကို မြင်လိုက်ရသည့်အချိန်တွင် အလွန်ရှေးကျသည့်ခံစားချက်တစ်ချို့ကို ခံစားလိုက်ရသည်။ မြို့ရိုးများမှာ အိုဟောင်းပြီး အရောင်အဆင်းကင်းမဲ့နေကာ ဓားရာများ၊ အပေါက်များ ပြည့်နေလေသည်။
သူတစ်ခဏမျှ စဉ်းစားကြည့်လိုက်သည်။ ဒီလိုမျိုးမြို့က အပြင်မှာ တကယ်ရှိတာလား..
ဤလျှပ်စီးအတိဒုက္ခထဲတွင်ရှိနေသည့်အရာများမှာ အပြင်လောကတွင်လည်း ရှိနေသည်ဟု သူခံစားနေရသည်။ ထို့ကြောင့်သာ တံဆိပ်တစ်ခု ကျန်ရစ်ခဲ့ပြီး ဤကဲ့သို့သော မြင်ကွင်းမျိုး ထွက်ပေါ်လာခြင်းပင်။
ရုတ်တရက်ပင် အော်သံတစ်ခု ထွက်ပေါ်လာပြီး မြို့ထဲမှ အဖြူရောင်အလင်းတန်းတစ်ခု ထွက်ပေါ်လာလေ၏။ ထို့နောက်တွင် ပစ္စည်းကြီးတစ်ခု ထွက်ပေါ်လာလေသည်။
ဤသည်မှာ မြို့တစ်မြို့အရွယ်အစားရှိသည့် အရိုးခေါင်းကြီးပင်။ အရိုးခေါင်းကြီးသည် ဖွေးဆွတ်နေပြီး ရှီဟောင်ထံသို့ ဦးတည်လာနေလေ၏။
ဤကဲ့သို့သောကြီးမားလှသည့်မြို့မှ ဤကဲ့သိုသော အရိုးခေါင်းကြီး ထွက်လာလိမ့်မည်ဟု သူမထင်ထားခဲ့ပေ။
ဖုန်း..
ရှီဟောင် ထိုအရိုးခေါင်းကို လက်ဝါးဖြင့် ရိုက်ချလိုက်သည်။ ဤသည်မှာ ထာဝရရွှေကို ရိုက်ချလိုက်သကဲ့သို့ပင် တချွမ်ချွမ်အသံများ ထွက်ပေါ်လာပြီး မီးပွားများ ထွက်ပေါ်လာလေသည်။
သူ၏လက်ရှိခွန်အားဖြင့်ပင် ဤအရိုးခေါင်း ပျက်စီးသွားအောင် မလုပ်နိုင်ခဲ့ပေ။
အရိုးခေါင်းသည် ချက်ချင်းပင် တောက်ပလာကာ မျက်လုံးခွံထဲမှ စူးရှလှသည့်အလင်းတန်းများ ထွက်ပေါ်လာလေသည်။ ထို့အပြင် သူ၏အောက်မေးရိုးပွင့်သွားကာ သွားဖြူဖြူများဖြင့် ရှီဟောင်အား လိုက်ကိုက်နေလေသည်။
ဒါက ဘာကြီးလဦ..
ရှီဟောင်သည် အရိုးခေါင်းမှ အလင်းတန်းကို ခုခံနေရသောကြောင့် သူ၏ဒွါရ ၇ ပေါက်မှ ရောင်စုံအလင်းများ ထွက်ပေါ်လာပြီး ရှီဟောင်အား လွှမ်းခြုံသွားလေသည်။ ဤနေရာတစ်ခုလုံး လင်းထိန်းနေပြီး သူ့ဘေးပတ်လည်ကိုပင် မကြည့်နိုင်တော့ပေ။
ထိုအချိန်တွင် သက်တောင့်သက်သာမဖြစ်သည့် ခံစားချက်တစ်ခုကို ရှီဟောင်ခံစားလိုက်ရသည်။ သူသည် ရွှံ့ထဲတွင် နစ်နေသလို၊ ပင့်ကူအိမ်တွင် ကပ်ညှိနေသလို ခံစားနေရသည်။
အရိုးခေါင်းမှ အလင်းတန်းများ ထွက်ပေါ်လာနေဆဲပင်။
နောက်ဆုံးတွင် ထိုအရိုးခေါင်းသည် ရှီဟောင်အား ဝါးမြိုသွားလေပြီ။ သူ၏အောက်မေးရိုးပိတ်သွားပြီး သူ၏ပါးစပ်ထဲတွင် ရှီဟောင်အား ငုံထားလေသည်။
ထို့နောက်တွင် သူသည် မီးဖိုကဲ့သို့ဖြစ်လာပြီး မီးတောက်များထွက်ပေါ်လာလေသည်။ ထိုအရိုးခေါင်းသည် လျှပ်စီးများကိုလည်း စုတ်ယူလိုက်ပြီး အထဲဘက်တွင်ရှိနေသည့် ရှီဟောင်ကို ပြုပြင်လိုက်လေ၏။
အရိုးမီးဖို … ဤသည်မှာ အလွန်ကြောက်စရာကောင်းလှသည့် အဖိုးတန်ပစ္စည်းတစ်ခုပင်။
ဝုန်း..
ထို့နောက်တွင် ကောင်းကင်ထက်တွင်ရှိနေသည့် လျှပ်စီးအလင်းတန်းများအားလုံးသည် အရိုးမီးဖိုထံသို့ တရှိန်ထိုးပြေးဝင်သွားကာ ကောင်းကင်ထက်မှ ပျောက်ကွယ်သွားလေသည်။
“၈လွှာက လျှပ်စီးအတိဒုက္ခရဲ့လျှပ်စီးတွေအကုန်လုံး စုသွားပြီ ..”
အားလုံး ဆွံ့အသွားရသည်။
တစ်ချိန်တည်းမှာပင် ရှေးဟောင်းမြို့ကြီးသည် မီးဖိုတစ်ခုကဲ့သို့ဖြစ်လာပြီး ဦးခေါင်းခွံကြီးကို ကူညီပေးနေလေသည်။ သူသည် ကောင်းကင်၏စွမ်းအားကို စုတ်ယူကာ ပို၍ပင် ထူးဆန်းပြီး ကြောက်စရာကောင်းလာလေသည်။
ကြီးမားလှသည့်ဦးခေါင်းခွံကြီးသည့် မြို့ကြီးပေါ်တွင်ရှိနေပြီး တချွမ်းချွမ်းအသံများလည်း ထွက်ပေါ်နေလေသည်။ ဤသည်မှာ ရှီဟောင် အထဲဘက်မှ ဦးခေါင်းခွံအား ထုရိုက်နေခြင်းပင်။
“ဒါက ဘယ်လိုစွမ်းအားမျိုးလဲ..”
သာမန်လူများမပြောနှင့် ကောင်းကင်နတ်ဘုရားများပင် တုန်လှုပ်သွားရသည်။ ထိုနေရာတွင် သူတို့သာဆိုပါက သေချာပေါက် သေသွားတော့မည်ကို သူတို့သိသည်။
ဤသည်မှာ လျှပ်စီးကြောင်းတစ်ခု နှစ်ခုမဟုတ်ပေ။ ကောင်းကင်တစ်ခွင်တွင်ရှိနေသည့် နတ်အလင်းများကို စုစည်းထားခြင်းပင်။ လျှပ်စစ်အလင်းတန်းများမှာ စုစည်းသွားကာ တစ်နေရာတည်းသို့ သွားနေခြင်းပင်။
ဤသည်မှာ အသက်လုနေရသည့် စစ်ဆေးခြင်းပင်။ ရှီဟောင်ပင်လျှင် သူဤကဲ့သို့ ခုခံနေရသည့်အခြေအနေဖြစ်လာလိမ့်မည်ဟု မထင်ထားခဲ့ပေ။
အရိုးခေါင်းအတွင်းတွင် လျှပ်စီးများနှင့် မိုးခြိမ်းသံများ ထွက်ပေါ်နေပြီး သိပ်သည်းလှသည့် လျှပ်စီးများသည် အရည်အဖြစ်သို့ ပြောင်းလဲသွားကာ ရှီဟောင်အား လွှမ်းခြုံလိုက်လေသည်။
ယခုအချိန်တွင် ရှီဟောင် အန္တရာယ်များနေလေပြီ။ လျှပ်စီးအလင်းတန်းအားလုံး သိပ်သည်းသွားသောကြောင့် သူ၏ခန္ဓာကိုယ်စုတ်ပြတ်နေပြီး အရိုးများလည်းကျိုးကာ တစ်ကိုယ်လုံးလည်း မည်းတူးနေလေပြီ။ သူသည် အချက်ခံနေရသကဲ့သို့ပင်။
ရှီဟောင်၏မျက်ခုံးကြား အက်ကွဲလာပြီး သွေးများလွင့်စင်ထွက်လာကာ သူ၏မူလဝိဉာဉ်လည်း ပေါက်ကွဲမတတ်ဖြစ်နေလေပြီ။
သူ၏မူလဝိဉာဉ်သည် လျှပ်စီးထဲသို့ ဝင်မသွားပဲ တောင့်ခံနေသည်။
နတ်ဘုရင် အတိဒုက္ခမှာ ငရဲနှင့်တူသည့် နှိပ်စက်မှုကြီးပင်။ လူတစ်ယောက်ကို ရှင်လျက်သေစေနိုင်သည်။
ရှီဟောင်သည် အချိန်မရွေး ငြိမ်းသတ်သွားနိုင်သည့် လေပြင်းထဲမှ ဖယောင်းတိုင်မီးတောက်လေးနှင့် တူနေလေပြီ။
“ကုသမယ်…”
ရှီဟောင် ကျယ်လောင်စွာပင် အော်ဟစ်လိုက်သည်။ သူသည် မူလမှတ်တမ်းကို အသက်သွင်းလိုက်ပြီး မိုးမခနတ်ဘုရား၏ပညာနှင့်တူ သူ၏ဒဏ်ရာရနေသည့်ခန္ဓာကိုယ်နှင့် မူလဝိဉာဉ်နှစ်ခုလုံးကိုကုသလိုက်သည်။
သူ၏ခွန်အားမှာ စွမ်းအားကြီးလှပြီး သူ၏အရိုးစာသားများလည်း နက်နဲလှသည်ကို ဝန်ခံရလိမ့်မည်ပင်။ သူ၏ခန္ဓာကိုယ်နှင့် မူလဝိဉာဉ်သည် လုံးဝပင် ပြန်ကောင်းသွားလေ၏။
သို့သော် ခဏကြာပြီးသည့်နောက်တွင် သူ၏ခန္ဓာကိုယ်ကို လျှပ်စီးတစ်ခု နောက်တစ်ကြိမ် ရိုက်ခတ်လာကာ သူ့တစ်ကိုယ်လုံးကို မည်းတူးသွားစေပြီး အပိုင်းများစွာဖြစ်အောင် လုပ်လိုက်လေသည်။ သူ၏မူလဝိဉာဉ်လည်း ထိုကဲ့သို့ပင်။ အရောင်ပင်မှိန်သွားလေပြီ။
ရှီဟောင်သည် အရှုံးကို ဝန်မခံချင်သောကြောင့် ထိုနေရာတွင်သာ ဆက်နေနေလိုက်ပြီး သူ၏ခန္ဓာကိုယ်ကို နောက်တစ်ကြိမ် ပြန်ပေါင်းစပ်လိုက်သည်။
သို့သော်လည်း ခဏကြာပြီးသည့်နောက်တွင် သူ၏ခန္ဓာကိုယ်နှင့် မူလဝိဉာဉ်သည် နောက်တစ်ကြိမ် အပိုင်းပိုင်းဖြစ်သွားလေသည်။
ရှီဟောင်သည် ထိုကဲ့သို့ အကြိမ်ကြိမ်ပင် ဖြစ်နေလေသည်။
သို့သော်လည်း တိုက်ခိုက်မှုတိုင်းတွင် သူ၏ခန္ဓာကိုယ်အရောင်မှိန်သွားသော်လည်း ဖော်ပြ၍မရနိုင်သည့်အော်ရာတစ်မျိုး ရှိလာသည်ကို အားလုံး တွေ့နိုင်သည်သာ။
သူ၏မူလဝိဉာဉ်လည်း ထိုကဲ့သို့ပင်။ ဤသည်မှာ လေ့ကျင့်ပေးနေခြင်းပင်။ သူသည် ဤနေရာတွင် သေဆုံးသွားနိုင်သော်လည်း သူသာ အောင်မြင်စွာ ကျော်ဖြတ်နိုင်ပါက သူသည် နောက်တစ်ဆင့်သို့ ရောက်သွားမည်သာ။
ရှီဟောင် အံကြိတ်ကာ ကောင်းကင်အတိဒုက္ခကို ခုခံလိုက်သည်။ သူသည် တိုက်ခိုက်မှုများကို သည်းခံရုံသာမက သူ၏ခန္ဓာကိုယ် ပြန်ပေါင်းသွားသည့်အချိန်တိုင်းတွင် အရိုးခေါင်းနံရံကို တိုက်ခိုက်နေသည်သာ။
သူ၏အဖိုးတန်ပညာအားလုံးကို အသုံးပြုကာ သူ၏ခွန်အားကို စုစည်းလိုက်ပြီး အရိုးခေါင်းနံရံကို ပေါက်ကွဲသွားအောင် လုပ်လိုက်သည်။
ဤကဲ့သို့ ခုခံနေရသည်မှာ သူ့ပုံစံမဟုတ်ပေ။ စတင်တိုက်ခိုက်ပြီး တရှိန်ထိုးအဆင့်တက်သွားခြင်းသာ သူ့ပုံစံဖြစ်သည်။
ရှီဟောင် ဘယ်တုန်းကမှ ဤကဲ့သို့အခြေအနေမဆိုးဖူးပေ။ သူ၏ခန္ဓာကိုယ် ဘယ်နှကြိမ်တောင် ပြိုကွဲသွားပြီလဲ သူမသိပေ။ သို့သော်လည်း တစ်နေရာတည်းကို သူဆက်တိုက်နေဆဲပင်။
အသက်ရှင်နိုင်ချေ ၁၀ ရာခိုင်မှုန်းမှ ၀ ရာခိုင်နှုန်းသို့ ရောက်လာလေပြီ။ သူခြေကုန်လက်ပန်းကျနေလေပြီ။
ဝုန်း..
၁၀ကြိမ်မြောက် သူ၏အဖိုးတန်ပညာများကို စုပေါင်းလိုက်သည့်အချိန်တွင် အက်ကွဲကြောင်းတစ်ခု ပေါ်လာလေသည်။
ထို့နောက်တွင် ခွပ်ဟူသည့်အသံနှင့်အတူ ဦးခေါင်းရိုးကြီး ပွင့်သွားပြီးနောက် ဤနေရာကြီး ပေါက်ကွဲသွားကာ အဆုံးမရှိသည့်လျှပ်စီးများလည်း ထွက်ပေါ်လာလေ၏။
ရှီဟောင်လည်း လွင့်ထွက်သွားလေသည်။
လူများစွာမှ ကြောက်လန့်တကြားပင် ထခုန်မိသွားကြလေသည်။ သူတို့သည် အမြင့်ဆုံးတွင်ရပ်လိုက်ပြီး အရှေ့ဘက်သို့သာ ကြည့်နေကြလေ၏။
“ဟွမ် သေသွားပြီလား..”
“ခန္ဓာကိုယ်က ကိုးပိုင်းကွဲသွားပြီး မူလဝိဉာဉ်လည်း ပျံ့ကြဲသွားပြီ .. ဟွမ်က ပျက်စီးတော့မယ်”
အားလုံး ထိတ်လန့်သွားရသည်။
စွမ်းအားအကြီးဆုံး ကောင်းကင်အတိဒုက္ခဖြစ်ထိုက်ပါပေသည်။ ဟွမ်ကဲ့သို့သော ထာဝရစွမ်းအင်သုံးကြောင်းရှိသည့်သူပင်လျှင် အားလုံးရှေ့တွင် သေတော့မည်။
“ဟက်…”
ကောင်းကင်နတ်ဘုရားတစ်ယောက်သည် စိတ်ထဲမှ ခနဲ့လိုက်ပြီးနောက် လျှို့ဝှက်ရတနာတစ်ခုကို ထုတ်လိုက်ကာ လျှပ်စီးအတိဒုက္ခကို တိုက်ခိုက်လိုက်သည်။
ဝုန်း..
ရှီဟောင်၏ ခန္ဓာကိုယ်အစိတ်အပိုင်းကိုးခုနှင့် မူလဝိဉာဉ်သည် တရှိန်ထိုးပင် စုစည်းသွားပြီး ထိုတိုက်ခိုက်မှုကို ရှောင်ရှားလိုက်သည်။ ထိုလျှို့ဝှက်ရတနာသည် လျှပ်စီးထဲတွင် တောက်ပသွားပြီး သူ့ခန္ဓာကိုယ်ကို ပွတ်တိုက်သွားလေသည်။
နောက်ဆုံးတွင် ထိုလျှို့ဝှက်ရတနာပေါက်ကွဲသွားပြီး ထိုကောင်းကင်နတ်ဘုရားကို သတ်ရန်အတွက် လျှပ်စီးအလင်းတန်းတစ်ခု ကျရောက်လာလေ၏။
သို့သော်လည်း ဤလူလည်း အတော်လေး အထင်ကြီးစရာကောင်းလှသည်။ သူ့ထံတွင် သူ့နေရာကို အစားဝင်ပေးမည့် အသက်အစားထိုးသင်္ကေတရှိနေလေသည်။
ဤသည်မှာ ဂိုဏ်းကြီးများပင်လျှင် တွေ့နိုင်ရန် ရှားပါးလှသည့်အရာတစ်ခုပင်။
ဝင်ရောက်နှောက်ယှက်နေသည့် အပြင်ဘက်မှ ကျွမ်းကျင်သူများ ရှိနေလေပြီ။
ဝုန်း..
သွေးစွမ်းအင်များ ထွက်ပေါ်လာပြီး ရှီဟောင်၏ခန္ဓာကိုယ်အစိတ်အပိုင်းများမှာ ပြန်ဆက်သွားကာ သူ၏မူလဝိဉာဉ်လည်း သူ့နေရာသူ ပြန်ရောက်သွားလေပြီ။ သူ့တစ်ကိုယ်လုံး မည်းတူးနေပြီး သူ၏အခြေအနေမှာ အလွန်ပင် ကျိုးပဲ့ပျက်စီးလွယ်နေလေပြီ။
ရှီဟောင်သည် သူ့ကို တိုက်ခိုက်လိုက်သည့်နေရာမှာ ကောင်းကင်နတ်ဘုရားအား အေးစက်စွာပင် စိုက်ကြည့်လိုက်၏။ သို့သော်လည်း သူ့နောက်သို့ လိုက်မသွားခဲ့ပေ။ ယခုအချိန်သည် သူ၏စွမ်းအားများကို ပြသရမည့်အချိန်မဟုတ်ပေ။ သူပြန်ကောင်းလာအောင် လုပ်ဖို့လိုနေသည်။
ဤနေရာမှာ တိတ်ဆိတ်သွားပြီး မည်သူမှ မတိုက်ခိုက်တော့ပေ။ လက်ရှစ်ဖက်ဝိဉာဉ်လူမျိုးစုသည် ချွေးစေးများပင် ပြန်လာလေသည်။ သူတို့လူမျိုးစုတစ်ခုလုံး လှုပ်ရှားလာကာ ဤနေရာတစ်ခုလုံးကို ကာကွယ်လိုက်သည်။
အချိန်မည်မျှကြာသွားမှန်းမသိရသည့်အချိန်မှသာလျှင် ရှီဟောင်၏ မည်းတူးနေသည့်အရေပြား ကွာကျသွားပြီး ကျောက်စိမ်းကဲ့သို့သော ခန္ဓာကိုယ် ပြန်ပေါ်လာလေသည်။ သူ၏မျက်ခုံးကြားလည်း တောက်ပလာလေသည်။
သို့သော်လည်း သူလက်လွတ်စပယ်မလုပ်သေးပေ။ ထိုတိုက်ခိုက်သူကို ရှာမနေပဲ ကိုးလွှာသို့သာ တက်သွားလိုက်သည်။ သူသာ ဤစစ်ဆေးမှုကို အောင်မြင်သွားသည်နှင့် အားလုံး ပြီးဆုံးသွားလိမ့်မည်။
အဘယ်ကြောင့်ဆိုသော် သူ၏အတွေ့အကြုံအရ ကိုးလွှာအထက်တွင် ၁၀ လွှာရှိခဲ့မည်ဆိုလျှင်ပင် ဤသည်မှာ သူ့ကိုသတ်တော့မည်မဟုတ်ပေ။
အရေးအကြီးဆုံးမှာ ကိုးလွှာမြောက်ပင်။
ရှီဟောင်ကို ထိတ်လန့်သွားစေသည်မှာ သူကိုးလွှာသို့ တက်သွားလိုက်သည်နှင့် အန္တရာယ်များကာ ကြမ်းတမ်းလှသည့် သက်ရှိများ၊ အပင်များသည် သူ့ထံသို့ တရှိန်ထိုးပင် ပြေးလာပြီး သူ့အားတိုက်ခိုက်ကြလေသည်။
သို့သော် ၈ လွှာနှင့်ယှဉ်လျှင် ဤသည်မှာ အလွန်အားနည်းနေသေးသည်သာ။
သူသည် ဤအရာများကို အလွယ်တကူပင် ရင်ဆိုင်လိုက်နိုင်လေသည်။
ဤသည်မှာ အခြားသူများကိုလည်း ထိတ်လန့်သွားစေလေ၏။ ဘာဖြစ်နေတာလဲ..
ဒါက အရမ်းလွယ်လွန်းနေတယ်လေ မဟုတ်ဘူးလား .. ကောင်းကင်ဘုံတောင်မှ နည်းလမ်းတွေ မရှိတော့ဘူးလား..
သို့သော် ရှီဟောင်၏ အမူအရာမှာ ချက်ချင်းပင် ပျက်ယွင်းသွားပြီး သူ၏မျက်နှာလည်း အနည်းငယ် ဖြူဖျော့သွားသည်။ မည်သည့်နေရာတွင် ပြဿနာရှိနေသလဲဆိုသည်ကို သူသိသွားလေပြီ။
အဘယ်ကြောင့်ဆိုသော် သူ၏ခွန်အားများ ရုတ်တရက် ကျဆင်းလာသည်ကို သူသိလိုက်ရသည်။ ကောင်းကင်နတ်ဘုရားအဆင့်မှ နတ်ဘုရားအစစ်၊ ထိုမှတစ်ဆင့် နတ်မီးတောက်နယ်ပယ်သို့ ရောက်သွားလေပြီ။ ဤသည်မှာ ဆိုးရွားလွန်းလှသည်။
ဤကဲ့သို့သောနေရာ၊ ဤကဲ့သို့သော စစ်ဆေးမှုတွင် ဤသည်မှာ သေချာပေါက် သေဆုံးနိုင်သည့်ကိစ္စပင်။
ကံကောင်းသည်မှာ ထိုသက်ရှိများမှလွှဲလျှင် အခြားလျှပ်စီးများမှာ အတော်လေး တည်ငြိမ်နေပြီး သူ့အား မတိုက်ခိုက်လာပေ။
ပြေး..
ရှီဟောင် ဤရွေးချယ်မှုသာ ရှိတော့သည်။ သူဤသက်ရှိများအနားသို့ကပ်သွား၍မရပေ။ မဟုတ်ပါက ဤသည်မှာ ကိုယ့်သေတွင်းကိုယ်တူးပြီးသား ဖြစ်သွားလိမ့်မည်။
သူသည် နတ်ဘုရင်အတိဒုက္ခ၏ ထူးဆန်းမှုကို နဖူးတွေ့ဒူးတွေ့ တွေ့လိုက်ရလေပြီ။ နတ်မီးတောက်နယ်ပယ်ကျင့်ကြံသူများကို ဤစွမ်းအားကြီးသည့်သက်ရှိများ၏ တိုက်ခိုက်မှုများကို ရင်ဆိုင်ခိုင်းနေခြင်းမှာ အသက်မရှင်နိုင်အောင် လုပ်နေခြင်းပင်။
“ဟမ် .. ဘာဖြစ်နေတာလဲ” တစ်စုံတစ်ယောက်မှ ထိတ်လန့်တကြား အော်ဟစ်လိုက်သည်။
“မြင့်မြတ်တဲ့စတေးခြင်းက ထူးဆန်းတဲ့ ကျင့်ကြံဆင့်တစ်ခုပဲ ..လူတစ်ယောက်ရဲ့ ကျင့်ကြံဆင့်က တက်လိုက်ကျလိုက်ဖြစ်နေမှာ .. အခု သူအောက်ဆုံးထိကျနေပြီ .. သူအဆုံးသတ်တော့မယ်” တစ်စုံတစ်ယောက်မှ စိတ်လှုပ်ရှားစွာပင် ပြောလိုက်လေ၏။
ဤနေရာမှာ ချက်ချင်းပင် ဆူညံသံများ ပြည့်နှက်သွားလေ၏။
ဤသည်မှာ ကောင်းကင်အတိဒုက္ခကြောင့်ဖြစ်လာသည်ဆိုသည်ကို ရှီဟောင်သာ သိသည်။ အမှန်တကယ်တွင် သူ့ထံ၌ အချိန်သုံးရက်ကျန်သေးသည်။
ဤကြောက်စရာကောင်းသည့် လျှပ်စီးအတိဒုက္ခသည် ဤကဲ့သို့ သူ၏တာအိုနှင့် ကျင့်ကြံဆင့်ကို လျော့ချနိုင်သေးသည်ပင်။
“ဟားဟား .. ဒီကောင်းကင်အတိဒုက္ခရဲ့ စွမ်းအားက အဲဒီလောက်လည်းမဟုတ်ပါဘူး … ငါတို့တောင် ဖြတ်သန်းနိုင်တယ် .. သွားကြစို့ .. ဟွမ်ကို သွားကူလိုက်ကြစို့” အချို့လူများသည် တိတ်တဆိတ်ပင် အသံပို့လွှတ်လိုက်ပြီး ခနဲ့လိုက်ကြလေသည်။
ရွှီး..
ထိုအချိန်တွင် ပုံရိပ်ငါးခု တစ်ချိန်တည်းပေါ်လာကာ ရှီဟောင်ကို သတ်ရန် လျှပ်စီးထဲသို့ ဦးတည်သွားလိုက်ကြလေသည်။
အပြင်ဘက်မှ ကောင်းကင်နတ်ဘုရားများပင်။ ရှီဟောင် သူတို့အားလိုက်သတ်နေသည်ကို တွေ့လိုက်ရသည့်အချိန်တွင် သူတို့သည် ကြောက်လန့်တကြားဖြင့် ပုန်းခဲ့ကြခြင်းပင်။ ယခုမှသာ ရှီဟောင်ကို သတ်ရန်အတွက် သူတို့ထွက်လာခြင်းပင်။
“မင်းတို့အားလုံး လုပ်ရဲတယ်ပေါ့” လက်ရှစ်ဖက်ဝိဉာဉ်လူမျိုးစုမှလူများ ဒေါသတကြီးအော်ဟစ်လိုက်ပြီး လှုပ်ရှားလိုက်လေ၏။
“အားလုံးပဲ အခွင့်ကောင်းယူပြီး တိုက်ခိုက်ကြ” မြို့ခံများမှာ စွမ်းအားကြီးသည့်သူများသည် လက်ရှစ်ဖက်ဝိဉာဉ်လူမျိုးစုကို တားဆီးလိုက်ကြလေသည်။ သူတို့သည် ဝိဉာဉ်လူမျိုးစု၏ဘိုးဘေးထံသို့ ဦးတည်သွားလိုက်ကြလေ၏။
ရှီဟောင် ဒုက္ခတွေ့နေလေပြီ။
ထိုအချိန်တွင် ယွမ်ရှီး၏အမူအရာ ပြောင်းလဲသွားကာ ယွဲ့ချန်၏မျက်လုံးများလည်း ပြူးကျယ်သွားရသည်။ သူတို့အားလုံး အရှေ့ဘက်ကို စိုက်ကြည့်နေကြလေ၏။