သုခကမ္ဘာက ရှီဟောင် - Chapter - 1189 အတိဒုက္ခ အဆုံးသတ်ခြင်း
ကောင်းကင်နတ်ဘုရားငါးယောက် ရောက်လာလေပြီ။ သူတို့ အရှိန်မှာ လျင်မြန်လွန်းလှပေသည်။
လျှပ်စီးမှ ဖြစ်ပေါ်လာသည့် သက်ရှိများသည် သူတို့ခန္ဓာကိုယ်ကို ရိုက်ချလာလေ၏။ သူတို့အားလုံးထံမှ ညည်းတွားသံများ ထွက်ပေါ်လာကာ သူတို့ခန္ဓာကိုယ်တွင် မည်းတူးနေသည့်အကြောင်းရာများ ထွက်ပေါ်လာပြီး သူတို့လည်း နောက်ဆုတ်သွားရသည်။
သူတို့သည် ထိုလျှပ်စီးကို မခုခံခဲ့ပေ။ အဘယ်ကြောင့်ဆိုသော် ထိုလျှပ်စီးကို ခုခံလိုက်သည်နှင့် ကောင်းကင်အတိဒုက္ခကို နှောက်ယှက်သလိုဖြစ်သွားပြီး သူတို့သည် အဆုံးသတ်ကောင်းလိမ့်မည်မဟုတ်ပေ။
လျှပ်စီးအတိဒုက္ခကို ဝင်ရောက်နှောက်ယှက်သည့်မည်သူမဆို ကောင်းကင်အပြစ်ပေးမှုကို လက်ခံရမည်ပင်။
သူတို့က ဘာလို့ ဒီလိုမျိုးလုပ်ရမှာလဲ .. သူတို့သည် ရိုက်ချက်များကို သည်းခံကာ ရှီဟောင်ထံသို့ပင် တရှိန်ထိုးပြေးသွားလိုက်သည်။
အဘယ်ကြောင့်ဆိုသော် ကိုးလွှာမြောက်လျှပ်စီးအတိဒုက္ခမှာ အနည်းငယ်ထူးဆန်းသည်ကို သူတို့သတိပြုမိပြီးသားပင်။ ရှီဟောင်၏ကျင့်ကြံဆင့်ကျသွားသည်နှင့်အတူ လျှပ်စီးများလည်း အတော်လေး အားပျော့နေလေပြီ။
ဤသည်မှာ ဟွမ်ကို သတ်ရန်အတွက် အချိန်ကောင်းပင်။
သူတို့သည် လျှပ်စီးကို တောင့်ခံကာ နတ်မီးတောက်နယ်ပယ်တွင်ရောက်နေသည့် ရှီဟောင်ကို တိုက်ခိုက်လာကြလေသည်။
သူတို့သည် အပြင်ဘက်မှ ကောင်းကင်နတ်ဘုရားများဖြစ်သောကြောင့် ကျိန်စာကို ကြောက်စရာမလိုပေ။
ဝိဉာဉ်လူမျိုးစုမှ လူများလည်း ရောက်လာကြသော်လည်း ကျိန်စာစွမ်းအင်များမှာ သိပ်သည်းလှသောကြောင့် ကောင်းကင်နတ်ဘုရားအိုကြီးသာ အထဲဝင်နိုင်လေသည်။
သူတို့ဂိုဏ်းခေါင်းဆောင်၏ မှော်ခွန်းအားမှာ စွမ်းအားကြီးလှသော်လည်း သူအပြင်ဘက်တွင်သာ နေခဲ့ရသည်။
ရွှီး..
ရှီဟောင်သည် လျှပ်စီးများမှဖြစ်လာသည့် သက်ရှိများနှင့် နောက်မှလိုက်နေသည့် သူများကို ရှောင်ရှားရန်အတွက် လျှပ်စီးတန်းအဖြစ်ပြောင်းလဲလိုက်ပြီး လျှပ်စီးများထံသို့ ဦးတည်သွားလိုက်သည်။
ကံကောင်းစွာဖြင့်ပင် လျှပ်စီးဖြင့်ဖန်တီးထားသည့် သက်ရှိများ၏ အရှိန်လည်းလျော့ကျသွားလေပြီ။
ဝုန်း..
ထိုသို့ဆိုသော်လည်း လျှပ်စီးများ ထွက်ပေါ်လာပြီး ရှီဟောင်အနားတွင် အပင်ပေါင်းစုံ အမြစ်တွယ်လာလေ၏။ ထိုအပင်များသည် သူ့ခန္ဓာကိုယ်ကို ဖောက်ထွက်သွားပြီး သူ့အရိုးများကျိုးသည်အထိ သူ့ခန္ဓာကိုယ်အခြေအနေ ဆိုးရွားသွားရသည်။
သူ၏တာအိုလည်း အားနည်းလာကာ မှော်စွမ်းအားလည်း ကျလာသည်။
ကောင်းကင်အတိဒုက္ခလည်း အားနည်းလာပြီဖြစ်သော်လည်း သူ၏နတ်မီးတောက်နယ်ပယ်ကျင့်ကြံဆင့်ထက်တော့ မြင့်နေသေးသည်သာ။ သာမန်အပင်သက်ရှိတစ်ကောင်ကပင်လျှင် သူ့ကို သတ်နိုင်လေပြီ။
“အခြေအနေသိပ်မကောင်းဘူး .. သူ့ကို မြန်မြန်သတ်..”
ကောင်းကင်နတ်ဘုရားငါးယောက်၏ အမူအရာ ပြောင်းလဲသွားသည်။ အဘယ်ကြောင့်ဆိုသော် သူတို့သည် လျှပ်စီးများကို မခုခံပဲ သူတို့ခန္ဓာကိုယ်ပေါ်သို့ ကျရောက်နေစေသော်လည်း ဤသည်မှာ မလုံလောက်သေးပေ။
သူတို့သာ ဤအတိုင်းဆက်သွားနေလျှင် သူတို့ကိုယ်တိုင် အတိဒုက္ခထဲတွင် ဝင်ပါနေသည်နှင့် တူသွားလိမ့်မည်။
ထိုအချိန်ကျလျှင် သူတို့သည် ကောင်းကင်နတ်ဘုရားအဆင့် အတိဒုက္ခကို ရင်ဆိုင်ရလိမ့်မည်။ ဤသည်မှာ သူတို့သေချာပေါက် သေသွားလိမ့်မည်ဟု ဆိုလိုခြင်းပင်။
သူတို့သည် ဟွမ်မဟုတ်သောကြောင့် ကောင်းကင်နတ်ဘုရားအဆင့်အတိဒုက္ခကို ဖြတ်ကျော်နိုင်စရာအကြောင်းမရှိပေ။
ဝုန်း..
ကောင်းကင်နတ်ဘုရားတစ်ယောက် လှုပ်ရှားလိုက်သည်။ သဘာဝဥပဒေသများသည် ပင့်ကူအိမ်တစ်ခုကဲ့သို့ ဖြစ်သွားလေသည်။
ရှီဟောင် ရင်တုန်သွားရ၏။ သူ၏အရှိန်မှာ အလွန်လျင်မြန်သော်လည်း ထိခိုက်သွားဆဲပင်။ သူသွေးအန်သွားကာ လွင့်ထွက်သွားလေ၏။
“မြန်မြန် … သူထပ်မတောင့်ခံနိုင်တော့ဘူး”
အခြားလူတစ်ယောက် ထပ်အော်လိုက်သည်။ သူ၏လက်ထဲတွင်ရှိနေသည့် ကောင်းကင်နတ်ဘုရားအဆင့်ဓား တောက်ပလာကာ လေဟာနယ်ကို ထိုးခွဲလိုက်ပြီး အရှေ့သို့ တရှိန်ထိုး ပြေးသွားလိုက်သည်။
ထိုဓားမှ ပြိုင်ဘက်ကင်းသည့်ဓားအလင်းသည် ကောင်းကင်နှင့်ကမ္ဘာမြေကြီးကို ထိုးဖောက်ကာ ရှီဟောင်၏ခန္ဓာကိုယ်ပေါ်သို့ ကျရောက်သွားလေသည်။
ထိုတိုက်ခိုက်မှုကို ရှောင်ရှားရန်အတွက် ရှီဟောင် တတ်နိုင်သမျှ ကြိုးစားလိုက်သော်လည်း စွမ်းအားကြီးသည့် သတ်ဖြတ်ခြင်းစွမ်းအင်များမှာ သူ့ထံသို့ ရောက်လာဆဲပင်။ သူခန္ဓာကိုယ်သည် နှစ်ပိုင်းကွဲလုနီးပါး ဖြစ်သွားရသည်။
ကောင်းကင်ကြီးပင် သွေးနီရောင်လွှမ်းသွားလေပြီ။
ခပ်ဝေးဝေးတွင် ကြောက်လန့်တကြား အော်ဟစ်သံများ ထွက်ပေါ်လာသည်။ ယွမ်ရှီးသည် ပါးစပ်ကိုလက်ဖြင့်ကာထားပြီး ယွဲ့ချန်၏ မျက်ခုံးကြားတွင် တောက်ပလာလေသည်။ ချောင်ယုရှန်းသည် လက်သီးများကို ဆုတ်ထားပြီး ချန်ကုန်းယန်၏ မျက်လုံးများ မှေးကျဉ်းသွားရသည်။
“ဟွမ်က ပြိုလဲတော့မှာလား..”
“ဟား ဟား .. သူလွတ်နိုင်မှာမဟုတ်ဘူး” သူ၏ကံဆိုးခြင်းကို ရယ်မောနေကြသည့်သူများလည်း ရှိသည်သာ။ ယခုအခြေအနေ ပြောင်းလဲသွားအောင် သူဘာလုပ်နိုင်မှာလဲ..
“နှမြောစရာပဲ .. ဒါက စိတ်ကြီးဝင်တဲ့သူတွေရဲ့ အဆုံးသတ်ပဲ .. သူက အတိဒုက္ခကို ဖြတ်ကျော်တာတောင်မှ စွမ်းအားအကြီးဆုံး ကောင်းကင်အတိဒုက္ခကို ဖြတ်သန်းတာကို .. သူ့ကိုယ်သူ ဘာလို့ထင်နေတာလဲ .. ထာဝရစစ်နတ်ဘုရားလို့ထင်နေတာလား” အချို့သူများမှာ ပွင့်ပွင့်လင်းလင်းပင် လှောင်ရယ်နေကြလေ၏။
“ထွက်သွားစမ်း…” လက်ရှစ်ဖက်ဝိဉာဉ်လူမျိုးစုမှ ကောင်းကင်နတ်ဘုရားအိုကြီး အော်ဟစ်လိုက်၏။ သူတိုက်ခိုက်နေပြီဖြစ်သော်လည်း သူကဘယ်လိုလုပ် လူငါးယောက်ကို တစ်ခါတည်း တိုက်နိုင်မည်နည်း.. သူတို့အားလုံးမှာ ကောင်းကင်နတ်ဘုရားများဖြစ်ကြသောကြောင့် သူလုပ်နိုင်တာ သိပ်မရှိပေ။
“ရှေးဟောင်းရတနာ အသက်သွင်းမယ်..”
တစ်စုံတစ်ယောက်မှ တီးတိုးပြောလိုက်သည်။ သူတို့ဟွမ်ကို အသေခံမည်မဟုတ်ပေ။ တစ်ချိန်တည်းမှာပင် လက်ရှစ်ဖက်ဝိဉာဉ်လူမျိုးစုမှ ဖိတ်ခေါ်ထားသည့်သူများလည်း ဤအခြေအနေကို ချေဖျက်ရန်အတွက် အစီအရင်များကို ချလိုက်ကြသည်။
ဖူး..
သို့သော်လည်း အတောင်ပံတစ်ခတ်စာအတွင်းမှာပင် ထိုကောင်းကင်နတ်ဘုရားငါးယောက်သည် ရှီဟောင်အား ရူးရူးမူးမူးပင် တိုက်ခိုက်နေကြလေ၏။ သူတို့၏ တိုက်ခိုက်မှုများမှာ ပစ်မှတ်ကို မထိသော်လည်း တိုက်ခိုက်မှုအစွန်အဖျားများမှာ ရှီဟောင်အား ထိခိုက်နေစေဆဲပင်။
ယခုတစ်ကြိမ်တွင် ရှီဟောင်၏ခန္ဓာကိုယ်၌ ဒဏ်ရာများ ပြည့်နှက်နေလေပြီ။
သူသည် အံကြိတ်လိုက်ကာ ဘာမှမပြောပဲ ဆက်ပြေးနေလိုက်သည်။
“မကောင်းတော့ဘူး”
ကောင်းကင်နတ်ဘုရားငါးယောက်ထဲမှ တစ်ယောက်၏ အမူအရာမှာ ဖြူဖျော့သွားရသည်။ သူတို့သည် လျှပ်စီးကို မခုခံသော်လည်း ဤကဲ့သို့ လျှပ်စီးထဲတွင် ပြေးနေသောကြောင့် သူတို့ကို အတိဒုက္ခဖြတ်သန်းနေသည့်သူဟု မှတ်ယူသွားကာ သူ့ထံသို့ လျှပ်စီးတန်းတစ်ခု ကျရောက်လာလေသည်။
သူတို့လျင်မြန်စွာ နောက်ဆုတ်လိုက်ကြသော်လည်း တစ်ယောက်မှာ မလွတ်လိုက်ပေ။ ယခုအချိန်တွင် သူသည် ရှီဟောင်အား အများဆုံး တိုက်ခိုက်သည့်သူပင်။
ထိုအချိန်တွင် ကောင်းကင်နတ်ဘုရားအဆင့် ကောင်းကင်အတိဒုက္ခကျရောက်လာလေ၏။ ဝုန်းဟူသည့်အသံနှင့်အတူ ဤနေရာတစ်ခုလုံးကို လျှပ်စီးများဖုံးလွှမ်းသွားလေ၏။ ထိုလူသည် ကျယ်လောင်စွာ အော်ဟစ်လိုက်ပြီးနောက် ချက်ချင်းပင် ပေါက်ကွဲသွားလေ၏။
ခပ်ဝေးဝေးတွင်ရှိနေသည့် သူအားလုံး တိတ်ဆိတ်သွားပြီး သူတို့ခန္ဓာကိုယ်များလည်း အေးခဲသွားရသည်။
ထိုအချိန်တွင် ရှီဟောင် ထူးဆန်းသည့်ခံစားချက်တစ်ခုကို ခံစားလိုက်ရသည်။ သူ၏မှော်စွမ်းအားများ ပြန်တက်လာပြီး သူ၏ခွန်အားများလည်း ပြန်ကောင်းလာလေပြီ။
ရှီဟောင်သည် ကျယ်လောင်စွာပင် ဟစ်ကြွေးလိုက်သည်။ သူ၏ခန္ဓာကိုယ်မှ ဒဏ်ရာများကို ကုသလိုက်ကာ သွေးစွမ်းအင်များလည်း ထွက်ပေါ်လာလေသည်။ ထို့နောက်တွင် သူသည် ကိုယ်ပွားသုံးခုပြုလုပ်ကာ သူနှင့်အတူ တိုက်ခိုက်စေလိုက်သည်။
“မကောင်းတော့ဘူး”
ထိုကောင်းကင်နတ်ဘုရားလေးယောက်သည် ချွေးစေပြန်လာပြီး လျင်မြန်စွာပင် ထွက်ပြေးသွားကြလေသည်။
ဟွမ်ပြန်ကောင်းလာပြီဖြစ်ပြီး မြင့်မြတ်သည့်စတေးခြင်းနယ်ပယ်ထဲသို့ ပြန်ရောက်သွားလေပြီ။ သူသည် ယခုအချိန်တွင် ကောင်းကင်နတ်ဘုရားများနှင့် ယှဉ်နိုင်လေပြီ။
ထာဝရနန်းတော်နှင့် မြေအောက်လောကကလန်မှ ကောင်းကင်နတ်ဘုရားများကို ဟွမ်သတ်ခဲ့ခြင်းဖြစ်သောကြောင့် ဤလေးယောက်က ဘယ်လိုလုပ် မကြောက်ပဲနေမည်နည်း..
သူတို့သည် အစက ရှီဟောင်အားနည်းသွားသည်ကို အခွင့်ကောင်းယူလိုခြင်းဖြစ်သော်လည်း သူက ဤမျှမြန်မြန်ပြန်ကောင်းလာမည်ဟု သူတို့မထင်ထားခဲ့ပေ။
ရှီဟောင်၏ခန္ဓာကိုယ်အစစ်နှင့် ကိုယ်ပွားသုံးခုသည် အလင်းတန်းလေးခုအဖြစ်ပြောင်းလဲသွားကာ ထိုလူများနောက် လိုက်သွားလိုက်သည်။
“မင်းတို့တစ်ယောက်မှ ထွက်သွားလို့မရဘူး”
ရှီဟောင်သည် လက်ရှစ်ဖက်ဝိဉာဉ်လူမျိုးစုနှင့် အခြားသူများကို ဘေးဖယ်နေရန် အသံပို့လွှတ်လိုက်သည်။
ဝုန်း..
သူ၏ခန္ဓာကိုယ်အစစ်မှ လက်သီးတစ်ချက်ထိုးလိုက်သည်နှင့် ကောင်းကင်နှင့် ကမ္ဘာမြေကြီးပင် အရောင်မှုန်မှိုင်းသွားလေ၏။ ထိုလက်သီးချက်တွင် ပြန်လည်ဝင်စားခြင်း၊ ခွန်ပန်နှင့် အခြားပညာများကို ပေါင်းစပ်ထားသည်သာ။
ထိုကောင်းကင်နတ်ဘုရား ကျယ်လောင်စွာ အော်ဟစ်လိုက်သည်။ သူသည် သူ့ကိုယ်သူ ကာကွယ်နိုင်ရန် အကောင်းဆုံးကြိုးစားခဲ့သော်လည်း သူ၏ခန္ဓာကိုယ်တွင် အက်ကွဲကြောင်းများ ထွက်ပေါ်လာပြီး သူလည်းလျင်မြန်စွာပင် အသက်ကြီးလာလေသည်။
ဖုန်း..
ထို့နောက်တွင် ရှီဟောင်နောက်ထပ်လက်သီးတစ်လုံး ပစ်သွင်းလိုက်သည်နှင့် ထိုလူသည် ချက်ချင်းပင် ပေါက်ကွဲသွားလေသည်။
“သတ်…”
အခြားတစ်ဖက်တွင်ရှိနေသည့် ရှီဟောင်၏ကိုယ်ပွားသည် ထာဝရဓားကိုကိုင်ကာ လျှပ်စီးဧကရာဇ်၏ လျို့ဝှက်ပညာကို ဓားသွားထဲသို့ ထည့်သွင်းလိုက်ပြီး ကောင်းကင်နတ်ဘုရားနှင့် ပြင်းထန်စွာ တိုက်ခိုက်နေလေသည်။
နောက်ဆုံးတွင် ဖူးဟူသည့်အသံနှင့်အတူ ထိုကောင်းကင်နတ်ဘုရား၏ခေါင်းပြတ်သွားပြီး သွေးများလည်း လေထဲတွင် ပေပေါင်းများစွာ လွင့်စင်သွားလေသည်။
ထို့နောက်တွင် ကောင်းကင်အတိဒုက္ခကျရောက်လာပြီး ထိုအလောင်းကို အပိုင်းပိုင်းဖြစ်အောင် လုပ်လိုက်လေသည်။
“ခင်ဗျားတို့ ဘယ်သူမှ ထွက်သွားလို့မရဘူး”
အခြားကောင်းကင်နတ်ဘုရားနှစ်ယောက်သည်လည်း ရှီဟောင်နှင့် အပြင်းအထန် တိုက်ခိုက်နေလေသည်။
ဖူး..
ရှီဟောင်သည် ကောင်းကင်လမ်းကြောင်းကို အသက်သွင်းလိုက်ကာ ရောက်လာသည့်အရာအားလုံးကို တားဆီးလိုက်သည်။ ထို့နောက်တွင် သူ၏ခန္ဓာကိုယ်မှ မိုးမခကိုင်းများတစ်ခုပြီးတစ်ခု ထွက်လာကာ နတ်ချိန်းကြိုးများကဲ့သို့ပင် ကောင်းကင်နတ်ဘုရားတစ်ယောက်၏ ခန္ဓာကိုယ်ကို ဖောက်သွားလေ၏။
ထိုလူသည် ကြိုးစားရုန်းကန်သော်လည်း အရာမထင်ပေ။
ထိုနေရာတွင်သာ သေဆုံးသွားလေ၏။
နောက်ဆုံးတစ်ယောက်သာ ကျန်တော့သည်။ ရှီဟောင်သည် သူ၏ကိုယ်ပွားများနှင့် ပြန်ပေါင်းလိုက်သည့်အချိန်တွင် သူသည် ကိုးခုမြောက်ကောင်းကင်ပညာကို အသုံးပြုလိုက်သည်။
ဝုန်း..
ဤစစ်ဆေးခြင်းကို ဖြတ်သန်းပြီးသည့်နောက်တွင် သူကောင်းကင်ဘုံသို့ တက်နိုင်လေပြီ။
ရှီဟောင် သွေးအန်သွားရလေ၏။ သူသည် ထိုနေရာတွင် ထိုင်ချလိုက်ကာ သူ၏အခြေအနေကို အကောင်းမွန်ဆုံးဖြစ်အောင် လုပ်လိုက်သည်။ သူ၏အရေပြားထက်တွင်လည်း တောက်ပသည့်အရောင်များ ထွက်ပေါ်လာလေ၏။
နောက်ဆုံးတွင်တော့ သူထလာကာ ကောင်းကင်ထက်သို့ တက်သွားလိုက်သည်။ ကိုးလွှာမြောက် ကောင်းကင်ဘုံ၏အပေါ်ဘက်တွင် အခြားနယ်မြေတစ်ခု ရှိနေသေးသည်။
၁၀လွှာမြောက် နောက်ဆုံး ကောင်းကင်အတိဒုက္ခရှိနေလေသည်။
သို့သော်လည်း ဤနေရာမှာ ထူးခြားလှသည်။ ရှေးဟောင်းသစ်ပင်များ မိုးထိုးနေပြီး မရေမတွက်နိုင်သည့် မြို့ပေါင်းများစွာမှ နာရီစင်များကိုလည်း မြင်နေရသည်။ ထာဝရဂူများမှာလည်း ကောင်းကင်ထက်တွင် မိုးထိုးနေလေသည်။ ပျံသန်းနေသည့်ငှက်များနှင့် လမ်းလျှောက်နေသည့်သားရဲများလည်းရှိသည်။ ဖီးနှစ်အစစ်များနှင့် နဂါးများပင် ရှိနေလေသည်။
ဤနေရာတွင် လှည့်ပတ်သွားလာနေကြသည့် သက်ရှိများမှာ စွမ်းအားကြီးကြသည့်အကောင်များပင်။ ဤအကောင်များသည် အန္တရာယ်များသော်လည်း ရှီဟောင်အား မတိုက်ခိုက်လာပေ။
ဤအကောင်များသာ တိုက်ခိုက်လာပါက သူအသက်ရှင်လျက်ထွက်နိုင်ရန် ခက်ခဲလိမ့်မည်ပင်။
ဤနေရာတွင် ခမ်းနားလှကာ တောက်ပသည့်အလင်းများထုတ်လွှတ်နေသည့် ရှေးဟောင်းစင်္ကြံတစ်ခုလည်း ရှိနေလေ၏။
ထာဝရသတ်ဖြတ်ခြင်းစင်မြင့်..
ထိုစင်မြင့်မှ ကြောက်စရာကောင်းလှသည့် သတ်ဖြတ်လိုသည့်စွမ်းအင်များ ထွက်ပေါ်နေလေသည်။ ရှီဟောင်ကဲ့သို့ စွမ်းအားကြီးသည့်သူပင်လျှင် ထိုစင်မြင့်ထက်သို့ တက်ရဲမည်မဟုတ်ပေ။ ထိုအနားကပ်လိုက်ရုံဖြင့်ပင် သူ၏ခန္ဓာကိုယ် ပျက်စီးသွားတော့မည်ဟု သူခံစားနေရသည်။
ရှီဟောင် ဤနေရာကို လှည့်ပတ်ကြည့်လိုက်၏။ သူအန္တရာယ်ကြုံတွေ့ခဲ့ရသော်လည်း သူဖြေရှင်းနိုင်သည့်ပမာဏပင်။
အရှေ့တွင် ရောင်စုံအလင်းတန်းများ ထုတ်လွှတ်ပြီး ရောင်စုံမြူများ ရစ်ဆိုင်းနေသည့် ရှေးဟောင်းရေကန်တစ်ခု ရှိနေလေ၏။ ဖရိုဖရဲစွမ်းအင်များလည်း ဝေ့ဝဲနေပြီး ကျိန်စာစွမ်းအင်အားလုံးကို ပျက်ပြယ်နေစေလေသည်။
ထာဝရရေကန်..
ဒဏ္ဍာရီအရဆိုလျှင် ဤသည်မှာ လျှပ်စီးအတိဒုက္ခထဲတွင်ရှိသည့် ပြိုင်ဘက်ကင်းသည့် အဖိုးတန်ရေကန်ပင်။
ရှီဟောင်ဤရေကန်ကိုတွေ့ရသည်မှာ သုံးကြိမ်မြောက်ပင်။ ဤရေကန်မှာ သိပ်မကြီးပေ။
သူအောင်မြင်သွားလေပြီ။
သူပါးစပ်အပြည့်တစ်ငုံသောက်လိုက်သည်။ ဤသည်မှာ အလွန်မွှေးကြိုင်လှပြီး ချိုမြိန်မှုမှာ သူ၏လည်ချောင်ကိုပင် စိုစွတ်သွားစေခဲ့သည်။ သူ၏ကိုယ်တွင်းဒဏ်ရာများနှင့် ပင်ပန်းနွမ်းနွယ်မှုများမှာ ခြေရာလက်ရာမကျန်အောင်ပင် ပျောက်ကွယ်သွားလေပြီ။
သူခပ်ဝေးဝေးသို့ ကြည့်လိုက်သည့်အချိန်တွင် မြို့ခံများအားလုံးမှာ နီရဲနေသည့်မျက်လုံးများဖြင့် သူ့အားစိုက်ကြည့်နေသည်ကို တွေ့လိုက်ရသည်။
အခြားကောင်းကင်နတ်ဘုရားများမပြောနှင့် လက်ရှစ်ဖက်ဝိဉာဉ်လူမျိုးစုမှ ဘိုးဘေး၏ မျက်လုံးများပင်လျှင် နေကဲ့သို့ တောက်ပနေလေပြီ။
ဤသည်မှာ သူတို့၏ အသက်ကယ်နတ်ဆေးရည်ပင်။
အခြားကလန်မှ ကောင်းကင်နတ်ဘုရားများမှာမူ ငြိမ်ငြိမ်မနေနိုင်ကြတော့ပေ။ သူတို့သည် ချက်ချင်းပင် ရှီဟောင်အား ကောင်းမွန်သည့်သဘောထားများ ပြသလာကြလေ၏။
ထိုအထဲတွင် မနုဿလူမျိုးစုမှ မာယွမ်နှင့် ဖိန်းလူမျိုးစုမှ မိုလော့၏ အမူအရာများလည်း ပြောင်းလဲသွားကြသည်။ သူတို့သည် အလွန်ပင် နောင်တရနေကြပြီး ဤသည်ကို လက်မခံနိုင်ဖြစ်နေကြလေသည်။