သုခကမ္ဘာက ရှီဟောင် - Chapter - 1191 အားလုံးပါဝင်လာခြင်း
လက်ရှစ်ဖက်ဝိဉာဉ်လူမျိုးစု၏ ဂိုဏ်းခေါင်းဆောင်တစ်ယောက်တည်းဖြင့် မလုံလောက်ဘူးဟု ရှီဟောင်ခံစားရသည်။ ဤငွေရောင်သွေးနတ်ဆိုးသစ်ပင်ဘိုးဘေးကို သတ်ချင်လျှင် လူများများပိုလိုအပ်သည်။
ဝိဉာဉ်လူမျိုးစုမှ ဂိုဏ်းခေါင်းဆောင်သည် ချက်ချင်းပင် မတ်တပ်ရပ်လာလေ၏။ ရှီဟောင်သည် သူတို့ကို မမျှမတဆက်ဆံမည်မဟုတ်မှန်း သူသိသော်လည်း သူလုပ်ပြရဦးမည်ပင်။
အခြားပုံရိပ်တစ်ခုလည်း ချက်ချင်းပင် ငွေရောင်သွေးနတ်ဆိုးသစ်ပင်ဘိုးဘေးထံသို့ တရှိန်ထိုးပြေးသွားလေသည်။
ထာဝရရှေးဟောင်းမြေမှာ ကျိန်စာသင့်နေပြီး ဤကျိန်စာမှာလည်း သူတို့ကို အတော်လေး ဒုက္ခပေးနေသည်ပင်။ ပုံမှန်အားဖြင့်ဆိုလျှင် ဂိုဏ်းခေါင်းဆောင်အဆင့်သက်ရှိများမှာ အလွန်နည်းပြီး အများစုမှာ သူတို့လူမျိုးစုမှ ထွက်ခွာ၍မရပေ။ သူတို့သည် အမြဲတမ်းလိုလိုအိပ်နေကြသည်သာ။
သို့သော် ယနေ့မှာ ထူးခြားသည့်နေ့ပင်။ ဂိုဏ်းအားလုံးမှာ ရှီဟောင် အတိဒုက္ခကို ဖြတ်ကျော်နိုင်မလား မဖြတ်ကျော်နိုင်ဘူးလားဆိုသည်ကို အာရုံစိုက်နေကြသောကြောင့် ဂိုဏ်းခေါင်းဆောင်များကိုယ်တိုင် ရောက်လာကြခြင်းပင်။ ယခု သူတို့တိုက်ခိုက်ကြတော့မည်။
“တာအိုသူငယ်ချင်း .. မင်းတို့အားလုံး ဘာလုပ်နေကြတာလဲ .. မင်းတို့တွေက အပြင်ကလူတစ်ယောက် ငါတို့တွေကြားထဲ သွေးခွဲတာကို ခံမလို့လား .. အဲဒီလျှပ်စီးအတိဒုက္ခရည်က သေချာပေါက်ငါတို့ဟာပဲ .. အဲဒီတော့ ငါတို့ကဘာလို့ ငါ့တို့ဆက်ဆံရေးတွေကို ပျက်စီးအောင်လုပ်နေမှာလဲ” ငွေရောင်သွေးနတ်ဆိုးသစ်ပင်ဘိုးဘေး ပြောလိုက်သည်။
“ငါတို့လူမျိုးစုတွေက အစကတည်းက ရန်ငြိုးတွေ ရှိနေကြတာ .. အဲဒီတော့ အဲဒီရန်ငြိုးတွေကို ဒီမှာရှင်းမယ်” ဝိဉာဉ်ကလန်မှ ဘိုးဘေးပြောလိုက်သည်။
“အားလုံးပဲ ကျုပ်က ဒီတစ်ကြိမ်ပဲ အတိဒုက္ခကို ရင်ဆိုင်မှာမဟုတ်ဘူး .. နောက်ကျရင် စွမ်းအားကြီးတဲ့ လျှပ်စီးအတိဒုက္ခတွေကို ဖြတ်ကျော်ဦးမှာ .. ခင်ဗျားတို့ရဲ့ကလန်သားအားလုံးကိုလည်း ကုပေးမယ်လို့ ကျုပ်ကတိပေးတယ်” ရှီဟောင်ကြေငြာလိုက်သည်။
ဝုန်း..
ဂိုဏ်းခေါင်းဆောင်များမှာ ချက်ချင်းပင် လှုပ်ရှားလာကြလေ၏။
“မင်းတို့တွေ..” ငွေရောင်သွေးနတ်ဆိုးသစ်ပင်ဘိုးဘေးမှာ ဒေါသထွက်သွားရသော်လည်း အခြေအနေများမှာ သူ၏ထိန်းချုပ်မှုအောက်တွင် မရှိတော့ပေ။ သူဤနေရာတွင် ဆက်နေ၍မရတော့သဖြင့် လှည့်ထွက်သွားရန် ပြင်လိုက်သည်။
ဂိုဏ်းခေါင်းဆောင်များကြားမှ တိုက်ပွဲမှာ သေချာပေါက် ကြောက်စရာကောင်းမည်ပင်။ ပုံရိပ်သုံးခုသည် ဤနေရာမှ ပျောက်ကွယ်သွားလေ၏။
ဝုန်း..
ကောင်းကင်အတိဒုက္ခကျရောက်လာပြီး လျှပ်စီးများလည်း အဆက်မပြတ် ကျရောက်လာလေသည်။
၁၀လွှာမှ လျှပ်စီးအတိဒုက္ခသည် ကိုးလွှာထက်ပို၍ ကြောက်စရာကောင်းလှသည်။ သို့သော်လည်း ရှီဟောင်သည် နဂါးအစစ်နှင့် ကောင်းကင်ဖီးနှစ်များကို ရစ်စလိုက်ခြင်းမဟုတ်ပဲ အားနည်းသည့် လျှပ်စီးသက်ရှိများကိုသာ ရန်စလိုက်ခြင်းပင်။
ဤသည်မှာ ကပ်ဘေးကြီးတစ်ခုကဲ့သို့ပင်။ တောင်ကြီးတစ်ခုလုံး လျှပ်စီးအလင်းရောင်များ တောက်ပနေပြီး ကြီးမားလှသည့် ရှေးသစ်ပင်များအားလုံး အမြစ်မှကျွတ်ထွက်သွားလေသည်။
ရှီဟောင်သည် လျှပ်စီးကိုခုခံနေသလို သူ၏မျက်ခုံးကြားလည်း တောက်ပလာပြီး သူ၏နတ်အာရုံများကို အပြည့်အဝ အသုံးချလိုက်သည်။
ကောင်းကင်နတ်ဘုရားနှစ်ယောက်ကို သူဖမ်းချုပ်လိုက်၏။ သူတို့နှစ်ဦးလုံးသည် ငွေရောင်သစ်ပင်ကြီးအဖြစ်သို့ ပြောင်းလဲကာ ခပ်ဝေးဝေးသို့ ထွက်ပြေးနေလေပြီ။
ရှီဟောင်၏နှုတ်ခမ်းထက်တွင် အေးစက်သည့်အပြုံးတစ်ခု ထွက်ပေါ်လာပြီး ထိုနှစ်ယောက်နောက်ကို အလွန်လျင်မြန်သည့်အရှိန်ဖြင့် လိုက်ဖမ်းလိုက်သည်။ သူသည် အပြစ်မရှိသည့်သူကို မသတ်ချင်သော်လည်း ဤငွေရောင်သွေးနတ်ဆိုးသစ်ပင်လူမျိုးစုက သူ့ကို တစ်ကြိမ်ပြီးတစ်ကြိမ် ပစ်မှတ်ထားလာခဲ့သည်။
သူသည် လူအိုများနှင့်လူငယ်များကို မသတ်ပဲ ကလန်၏ အဓိကတိုက်ခိုက်သည့်သူများကိုသာ သတ်ခြင်းပင်။
ဤကောင်းကင်နတ်ဘုရားနှစ်ယောက်မှာ သေချာပေါက် သူ့ပစ်မှတ်ပင်။ သူသည် လျှပ်စီးအတိဒုက္ခနှင့်အတူ ထိုလူများနောက်သို့ လိုက်သွားလိုက်သည်။
ဝုန်း..
ရှီဟောင်မလှုပ်ရှားရသေးခင်မှာပင် ဤကောင်းကင်နတ်ဘုရား၏ခန္ဓာကိုယ် ပေါက်ကွဲသွားကာ သူ၏ဝိဉာဉ်လည်းရှင်းလင်းခံလိုက်ရသည်။
ရွှီး..
ထာဝရဓားသည် အခြားတစ်နေရာသို့ ထွက်ပြေးသွားသည့် ကောင်းကင်နတ်ဘုရားတစ်ယောက်နောက်သို့ လိုက်သွားလေသည်။
ဤလူသည် မိုးထိရှည်သည့် သစ်ပင်အဖြစ်ပြောင်းလဲလိုက်ပြီး ဤဓားကို ချိတ်ပိတ်ကာ ယူသွားချင်နေလေသည်။
ဖုန်း..
ဓားသွားထဲမှ လျှပ်စီးအလင်းတန်းများ ထွက်လာလေ၏။ ဤသည်မှာ ရှီဟောင် ဤဓားထဲသို့ ထည့်ထားသည့် စွမ်းအားကြီးသောလျှပ်စီးတာအိုများပင်။ လျှပ်စီးများထွက်လာသည်နှင့် ကောင်းကင်ကြီးမှာ ချက်ချင်းပင် လျှပ်စီးများ ပြည့်လျှံသွားလေသည်။
“မကောင်းတော့ဘူး” ထိုကောင်းကင်နတ်ဘုရားသည် ကျယ်လောင်စွာပင် အော်ဟစ်လိုက်ကာ ထွက်ပြေးသွားလေ၏။ သို့သော်လည်း သူနောက်ကျသွားလေပြီ။
ရှီဟောင်သည် အခြားလူတစ်ယောက်ကို ရှင်းပြီးသွားပြီဖြစ်သောကြောင့် ဤဘက်သို့ လာနေလေပြီ။ သူ၏လက်ကို မြှောက်လိုက်သည်နှင့် ကြီးမားလှသည့် လျှပ်စီးတာအိုအလင်းဓားဖြစ်ပေါ်လာပြီး အညှာအတာမဲ့စွာဖြင့်ပင် တိုက်ခိုက်လာလေသည်။
ဝုန်း..
တောင်ကြောကြီးကို ဖြတ်သွားပြီး ထိုတောင်ကြောမှာ ချက်ချင်းပင် ပြာမှုန့်များဖြစ်သွားလေသည်။
ထိုလူသည် သွေးအန်သွားလေ၏။ သူထွက်ပြေးချင်သော်လည်း ရှီဟောင်၏ခန္ဓာကိုယ်အစစ် ရောက်လာလေပြီ။ ဤသည်မှာ လျှပ်စီးအတိဒုက္ခလည်း ရောက်လာပြီဟု ဆိုလိုခြင်းပင်။
ဖူး..
ရှီဟောင်သည် လက်သီးတစ်ချက်တည်းဖြင့် သူ့ကို လျှပ်စီးပင်လယ်ထဲသို့ လွင့်ထွက်သွားအောင် လုပ်လိုက်သည်။ ထိုသူသည် ချက်ချင်းပင် မီးသွေးခဲအလောင်းအဖြစ် ပြောင်းလဲသွားပြီး အသက်ဆုံးရှုံးသွားလေ၏။
ရှီဟောင်ပြန်ရောက်လာသည့်အချိန်တွင် ငွေရောင်သွေးနတ်ဆိုးသစ်ပင်လူမျိုးစုအားလုံးမှာ ထွက်ပြေးသွားလေပြီ။ သူသည် ဤနေရာရှိလူများကို သတ်ဖြတ်လိုခြင်းမဟုတ်ပဲ ဤနေရာရှိ တောင်များကိုသာ ပြာမှုန့်များဖြစ်သွားအောင် လုပ်လိုခြင်းပင်။
လူမျိုးစုတစ်ခု၏ ရှေးဟောင်းနယ်မြေမှာ လုံးဝပျောက်ကွယ်သွားလေပြီ။
အားလုံးဆွံ့အသွားရလေ၏။ ပြိုင်ဘက်ကင်းသည့် မြင့်မြတ်နယ်မြေဟု လူသိများသည့် ငွေရောင်သွေးနတ်ဆိုးသစ်ပင်လူမျိုးစု၏မြေမှာ ဤကဲ့သို့ပင် ပျက်စီးသွားလေပြီ။
ရှီဟောင်သည် အလွန်ပင် တည်ငြိမ်နေလေ၏။ သူသည် ကျောက်စိမ်းပုလင်းတစ်လုံးကို ထုတ်လိုက်ပြီး လျှပ်စီးအတိဒုက္ခရည်ကို စတင်ထည့်လိုက်လေသည်။ အဘယ်ကြောင့်ဆိုသော် သူအချိန်ထပ်မဖြုန်းချင်တော့ပေ။ အရာအားလုံးကို အဆုံးသတ်လိုက်တော့မည်။
ခဏကြာပြီးသည့်နောက်တွင် လက်ရှစ်ဖက်ဝိဉာဉ်လူမျိုးစု၏ ဘိုးဘေးနှင့် အခြားဂိုဏ်းခေါင်းဆောင်တစ်ယောက်တို့ ပြန်ရောက်လာကြပြီး သူတို့ခန္ဓာကိုယ်တွင် သွေးများစွန်းထင်းနေလေသည်။
သူတို့ရှင်းပြီးသွားပြီလား .. ဤသည်မှာ အားလုံးသိချင်နေသည့်အရာပင်။ ဤနှစ်ယောက်သည် ငွေရောင်သွေးနတ်ဆိုးသစ်ပင်လူမျိုးစုနောက်သို့ လိုက်သွားသည်ကို အားလုံးသိနေကြသည်သာ။
“သူက တော်တော်လေး ဉာဏ်များတယ် .. ထွက်ပြေးသွားတာလည်း မြန်လွန်းတယ် .. ဒါပေမဲ့ သူဒဏ်ရာ ပြင်းပြင်းထန်ထန်ရသွားတယ် .. သူအသက်ရှင်နိုင်မယ့်အခွင့်အရေး သိပ်မရှိဘူး .. အနည်းဆုံးတော့ သူတစ်နှစ်၊ နှစ်နှစ်လောက်တော့ တိုက်ခိုက်နိုင်မှာမဟုတ်ဘူး” ဝိဉာဉ်လူမျိုးစုဘိုးဘေးမှ နောင်တရစွာ ပြောလိုက်သည်။
သို့သော် သေချာစဉ်းစားကြည့်မည်ဆိုလျှင် ဤသည်မှာ လုံလောက်သည်ပင်။ မည်သို့ပင်ဖြစ်စေ ဤသည်မှာ အလွန်စွမ်းအားကြီးသည့် ဂိုဏ်းခေါင်းဆောင်တစ်ယောက်ဖြစ်သောကြောင့် သူ့ကိုဘယ်လိုလုပ် လွယ်လွယ်ကူကူသတ်နိုင်မည်နည်း..
သူ၏ကျိန်စာကြောင့်သာမဟုတ်လျှင် ငွေရောင်သွေးနတ်ဆိုးသစ်ပင်လူမျိုးစုဘိုးဘေးမှာ သေနိုင်မည်မဟုတ်ပေ။ သို့သော်လည်း သူတို့ဒဏ်ရာပြင်းထန်စွာ ရရှိသွားသည်နှင့် ကျိန်စာများသည် သူတို့ခန္ဓာကိုယ်ကို တိုက်စားသွားနိုင်လေသည်။
ဝိဉာဉ်လူမျိုးစုဘိုးဘေးနှင့် အခြားဂိုဏ်းခေါင်းဆောင်ကိုယ်ပေါ်တွင် ရှိနေသည့်သွေးများမှာ သူတို့သွေးများမဟုတ်ပေ။ ငွေရောင်သွေးနတ်ဆိုးသစ်ပင်လူမျိုးစုဘိုးဘေး၏ သွေးများပင်။
ထို့ကြောင့်ပင် ရှီဟောင့်အနားတွင်ရှိနေသည့် လျှပ်စီးအလင်းတန်းပျောက်ကွယ်သွားပြီး ၁၀လွှာမြောက်ကောင်းကင်ဘုံတစ်ခုလုံးလည်း ပျောက်ကွယ်သွားလေသည်။
ထိုအချိန်တွင် သူ့ပတ်ပတ်လည်၌ အစီအရင်အဆောင်များ ထွက်ပေါ်လာလေသည်။
ဤသည်မှာ ဝိဉာဉ်လူမျိုးစုနှင့် အခြားကလန်အနည်းငယ်တို့ လုပ်ထားသည့် ရှီဟောင်အား ကာကွယ်ပေးမည့်အစီအရင်ပင်။
ယခုအချိန်တွင် ဂိုဏ်းခေါင်းဆောင်နှစ်ယောက် လျှောက်လာကြကာ သူတို့မျက်နှာထက်တွင် အပြုံးများ ရှိနေလေသည်။
ဂိုဏ်းတိုင်းတွင် ဂိုဏ်းခေါင်းဆောင်အဆင့်မရှိသည့်အပြင် ဤအဆင့်၌ တိုက်ခိုက်နိုင်သည့်သူများမှာ ပို၍ပင် နည်းပါးလေသည်။ ဤကဲ့သို့သောလူနှစ်ယောက်မှ ဤနေရာတွင်ရပ်နေသောကြောင့် ဤသည်မှာ ထိပ်တန်းအစောင့်အကြပ်ဟုပင် ပြော၍ရသည်။
“လူငယ်လေးက ကောင်းကင်ကို တွန်းလှန်နိုင်တဲ့ သူရဲကောင်းပဲ .. နတ်ဘုရင်အတိဒုက္ခကိုတောင် ဖြတ်ကျော်နိုင်တယ်” ဝိဉာဉ်လူမျိုးစုမှ ချီးကျူးလိုက်သည်။
“တကယ်ကို အရည်အချင်းရှိတဲ့သူပဲ .. လူငယ်လေး လက်ထပ်ပြီးပြီလား… ကျုပ်မှာ အရမ်းကိုလှပတဲ့ မျိုးဆက်တစ်ယောက်ရှိတယ် ..” အခြားဂိုဏ်းခေါင်းဆောင်တစ်ယောက်သည် ဒဲ့တိုးပင် ပြောလာလေသည်။
သူတို့နှစ်ဦး၏လေးစားခြင်းမှာ ရိုးသားပြီး တစ်ချိန်တည်းမှာပင် သူတို့သည် ဤလူငယ်လေးကို သူတို့ဂိုဏ်းထဲသို့ ဆွဲသွင်းချင်ကြသည်။ အဘယ်ကြောင့်ဆိုသော် သူတို့ကလန်သားများမှာ များပြားလှသောကြောင့် အတိဒုက္ခရည် တစ်စက်နှစ်စက်မှာ မလုံလောက်နိုင်ပေ။
ဤသည်မှာ သူတို့ကလန်၏ ကံတရားကို ပြောင်းလဲပစ်နိုင်သောကြောင့် သူတို့နှစ်ဦးလုံးသည် ရှီဟောင်နှင့် ကောင်းမွန်သည့်ဆက်ဆံရေးရှိလိုခြင်းပင်။
“စီနီယာတို့ ယဉ်ကျေးနေဖို့ မလိုပါဘူး .. ကျိန်စာတွေကို ပယ်ဖျက်လိုက်ပါဦး..”
ရှီဟောင်သည် တစ်လက်မထက်ပင်သေးသည့် ခွက်သေးသေးလေးတစ်လုံးကို ထုတ်ယူလိုက်သည်။
“ဒီစီနီယာက..” ရှီဟောင်သည် ဝိဉာဉ်လူမျိုးစုဘိုးဘေးကို သိသော်လည်း အခြားတစ်ယောက်ကို မသိပေ။
“သူက လှပခြင်းကလန်ရဲ့ ကလန်ခေါင်းဆောင်ဟောင်း” ဝိဉာဉ်လူမျိုးစုဘိုးဘေးသည် ကျောက်စိမ်းခွက်ကို လက်ခံယူလိုက်ပြီး ငါးရောင်စပ်အရည်ကို တစ်လုပ်တည်းဖြင့် သောက်လိုက်လေသည်။ သူသည်ချက်ချင်းပင် ထိုင်လိုက်ကာ ထူးဆန်းသည့်ပညာကို အသက်သွင်းလိုက်လေသည်။
လှပခြင်းကလန်မှ ကျွမ်းကျင်သူသည် ထိုနေရာတွင်သာ ရပ်နေပြီး အပြင်မှလူများ တိတ်တဆိတ်တိုက်ခိုက်ခြင်းမှာ ကာကွယ်ရန်အတွက် ရပ်စောင့်ပေးနေလေသည်။
ဝိဉာဉ်လူမျိုးစုဘိုးဘေးသည် ရှီဟောင် ယခင်ကပေးခဲ့သည့် လျှပ်စီးအတိဒုက္ခရည်အနည်းငယ်ကို သောက်ထားပြီးသားပင်။
ယခု ငါးရောင်စပ်လျှပ်စီးအတိဒုက္ခရည်မှာ ယခင်ကထက် ပိုကောင်းပြီး ဆေးစွမ်းများလည်း ပိုကောင်းသည်သာ။ ထို့ကြောင့် ခွက်သေးသေးလေးဖြင့်ပင်လျှင် အလွန်အသုံးဝင်လေပြီ။
ထိုအချိန်တွင် သူ၏ခန္ဓာကိုယ်မှ အနက်ရောင်မြူခိုးများ ထုတ်လွှတ်လာပြီး အနက်ရောင်မီးတောက်များအဖြစ် ပြောင်းလဲသွားလေသည်။
ဝုန်း..
ဝိဉာဉ်လူမျိုးစုဘိုးဘေးသည် မျက်လုံးများဖွင့်လာကာ လေထဲသို့ ခုန်တက်သွားလိုက်လေ၏။ သူသည် အလွန်ပင်စိတ်လှုပ်ရှားနေသောကြောင့် မထိန်းချုပ်နိုင်စွာပင် တောင်တန်းများပြိုကျသွားသည်အထိ အော်ဟစ်လိုက်လေ၏။
သူ့ကို နှစ်ပေါင်းများစွာလှောင်ပိတ်ထားသည့် ကျိန်စာရှင်းလင်းသွားလေပြီ။
“သူငယ်ချင်း .. ငါ့ကိုလည်း ကာကွယ်ပေးဦး .. ငါလည်း သောက်ဦးမယ်” လှပခြင်းကလန်မှ ဂိုဏ်းခေါင်းဆောင်၏အသံမှာ အနည်းငယ်တုန်ယင်နေလေသည်။ တစ်စုံတစ်ယောက်အောင်မြင်သွားသည်ကို မြင်လိုက်ရသည့်အချိန်တွင် သူ့စိတ်ထဲ၌ လှိုင်းထလာလေ၏။
ခဏကြာပြီးသည့်နောက်တွင် နောက်ထပ်အော်ဟစ်သံတစ်သံ ထွက်ပေါ်လာလေ၏။
ရွှီး..
ထိုအချိန်တွင် အစီအရင်အဆောင်များအားလုံးကို ပြန်သိမ်းလိုက်ကြလေသည်။ ဤဂိုဏ်းခေါင်းဆောင်များမှာ ထိုအရာများကို မလိုအပ်ကြတော့ပေ။
သူတို့ကျိန်စာများကို ဖယ်ရှားပြီးသွားပြီဖြစ်သောကြောင့် သူတို့သည် ယခင်ကထက် များစွာ စွမ်းအားကြီးနေလေပြီ။
“တာအိုသူငယ်ချင်းတို့ ဘေးဖယ်ပေးကြပါဦး” ရှီဟောင်ပြောလိုက်သည်။ ထို့နောက်တွင် သူသည် ယခင်က သူ့ကို ကာကွယ်ပေးခဲ့သည့် ဂိုဏ်းခေါင်းဆောင်များထံသို့သွားကာ လျှပ်စီးအတိဒုက္ခရည်များကို လက်ဆောင်ပေးလိုက်သည်။
ဂိုဏ်းခေါင်းဆောင်နှစ်ယောက်သည် သူတို့ဂိုဏ်းထဲမှ အဓိကလူများကို လက်ညှိုးထိုး၍ ထွက်လာခိုင်းလိုက်သည်။ သူတို့ကို အရင်ဆုံး ကျိန်စာချေဖျက်ခိုင်းရမည်ပင်။
ခဏကြာပြီးသည့်နောက်တွင် ဤနေရာ၌ နတ်အလင်းများ ဖုံးလွှမ်းသွားလေသည်။
ဤသည်မှာ အဖြစ်အပျက်ကြီးတစ်ခုပင်။
နှစ်ပေါင်းမည်မျှကြာသွားပါစေ ဤလူငယ်လေးသည် မြို့ခံများကို သူတို့၏ကျိန်စာများကို ချေဖျက်ရန်အတွက် လျှပ်စီးအတိဒုက္ခရည်ပေးခဲ့သည်ကို မည်သူမှ မေ့နိုင်မည်မဟုတ်ပေ။ လူများစွာသည် ဝမ်းသာသောကြောင့် မျက်ရည်များပင် ကျနေလေပြီ။
သူတို့သည် ပုံမှန်အတိုင်းပြန်ဖြစ်ပြီး အပြင်လူများကဲ့သို့ လွတ်လွတ်လပ်လပ်သွားလာနိုင်မည့်နေ့ရက်ကို အမြဲတမ်း စောင့်မျှော်နေခဲ့ကြခြင်းပင်။
ဤနေ့မှာ သမိုင်းတွင်မည့်နေပင်။
“အားလုံးပဲ ငါတို့အခု ပျော်လို့မဖြစ်သေးဘူး .. ထာဝရရှေးဟောင်းမြေမှာ အက်ကွဲကြောင်းတွေရှိနေတုန်းပဲ … အပြင်လောကက စွမ်းအားကြီးတဲ့ ကျွမ်းကျင်သူတွေ ဝင်လာနိုင်တယ် .. ငါတို့စွမ်းအားအကြီးဆုံးလူတွေကို ဦးစားပေးရမယ်” ဝိဉာဉ်လူမျိုးစုဘိုးဘေးမှ ပြောလိုက်သည်။
သူတို့ကလန်မှ ခွင့်ပြုချက်ရသည်နှင့် ကောင်းကင်နတ်ဘုရားအနည်းငယ် ချက်ချင်း ပေါ်လာလေသည်။ သူတို့အားလုံးသည် လေဟာနယ်ထဲတွင် ထိုင်နေကြပြီး ခဏကြာပြီးသည့်နောက်တွင် သူတို့ကျိန်စာ ချေဖျက်ပြီးသွားလေပြီ။
ရောက်လာကြသည့် မြို့ခံများစွာမှာ အကျိုးကျေးဇူးများ ရသွားကြသည်သာ။ ဤသည်မှာ ရှီဟောင်နှင့်ရင်းနှီးပြီး သူနှင့် ပြဿနာမရှိဖူးသည့်သူများသာ။
အချို့ကလန်များမှာမူ မျက်လုံးများ နီရဲနေကြသော်လည်း သူတို့သည် ငေးကြည့်ရုံသာ တတ်နိုင်လေ၏။
ဤလူမျိုးစုများမှာ ယခင်က ရှီဟောင်တိုက်ခိုက်ဖူးသည့်လူမျိုးစုများ သို့မဟုတ် သူ့ကို သဘောမကျခဲ့သည့်လူမျိုးစုများပင်။
ခဏကြာပြီးသည့်နောက်တွင် ဤနေရာမှာ လှုပ်ရှားသက်ဝင်လာလေသည်။
ရှီဟောင်သည် လူအုပ်အလယ်တွင်ရှိနေပြီး ကောင်းကင်နတ်ဘုရားတစ်စုမှ သူ့အား ဝန်းရံထားလေသည်။
ရှီဟောင်သည် သေချာပေါက်ပင် ထိုလူများထံမှ ကျေးဇူးတင်ခြင်းနှင့် ထောက်ပံ့မှုများ ရရှိသွားသည်သာ။
“မကောင်းတော့ဘူး” ရှီဟောင်အား ရန်လိုနေသည့်လူအချို့မှာ ကြောက်ရွံ့လာကြသည်။
အဘယ်ကြောင့်ဆိုသော် ရှီဟောင်အနားတွင် လူတစ်ဖြည်းဖြည်းများလာသောကြောင့်ပင်။
နောက်ဆုံးတွင် အခြားဂိုဏ်းခေါင်းဆောင်နှစ်ယောက်ကိုလည်း ကယ်တင်လိုက်နိုင်လေပြီ။
ဂိုဏ်းခေါင်းဆောင်လေးယောက် ထိုနေရာတွင် ရပ်နေသောကြောင့် အားလုံး အံ့အားတကြီး သက်ပြင်းချနေကြရသည်။
“လူငယ်လေး … ငါတို့ မနုဿကလန်နဲ့ ရှေးဟောင်းဖိန်းကလန်ကလည်း လူငယ်လေးကို ကာကွယ်ဖို့ အမြဲတမ်း တက်တက်ကြွကြွပါဝင်ခဲ့တယ် .. ငါတို့ရဲ့ ကျိန်စာစွမ်းအားကို ဖြေပေးဖို့ မင်းကိုပဲ အကူအညီတောင်းရတော့မှာပဲ”
ကလန်နှစ်ခုမှာ ငြိမ်ငြိမ်မထိုင်နိုင်ကြတော့ပေ။
“ကျွန်တော်အရင်က ပြောပြီးသားပဲ .. မနုဿကလန်က မာယွမ်နဲ့ ရှေးဟောင်းဖိန်းလူမျိုးစုက မိုလော့က ကျွန်တော့်ကို သတ်ဖို့ကြိုးစားဖူးတယ် .. သူတို့တွေ မသေရင် ကျွန်တော် လျှပ်စီးအတိဒုက္ခရည်ကို မပေးနိုင်ဘူး” ရှီဟောင် တည်ငြိမ်စွာပင် ပြောလိုက်သည်။
“မင်း .. မင်းက တမင်သက်သက် ထာဝရရှေးဟောင်းမြေကို အနိုင်ကျင့်နေတာလား .. အားလုံးက မင်းရဲ့အမိန့်ကို နာခံလိမ့်မယ်လို့ ထင်နေတာလား” မာယွမ်အသံပို့လွှတ်လိုက်သည်။
“အပြင်လူတစ်ယောက်ကများ ဘာအရည်အချင်းတွေရှိလို့ ဒီလိုမျိုးလာပြီးတော့ ရမ်းရမ်းကားကားလုပ်နေတာလဲ .. လျှပ်စီးအတိဒုက္ခရည်ဆိုတာက ထာဝရရှေးဟောင်းမြေက လူတိုင်းလိုအပ်နေတဲ့ဟာ .. ဒီလိုမျိုးလုပ်တာက ငါတို့ကို ဖိအားပေးနေတာပဲ” မိုလော့လည်း အသံပို့လွှတ်လိုက်လေသည်။
ယခုတစ်ခေါက်တွင် ရှီဟောင်ဘာစကားမှ ပြောစရာမလိုသလို ဂိုဏ်းခေါင်းဆောင်လေးယောက်လည်း ဘာမှမပြောလိုက်ရပေ။ ကောင်းကင်နတ်ဘုရားအချို့သည် သတ်ဖြတ်လိုစိတ်အပြည့်ဖြင့်ပင် တရှိန်ထိုး ပြေးသွားလိုက်ကြလေ၏။
ထိုလူနှစ်ယောက်သည် ချက်ချင်းပင် အမူအရာပျက်ယွင်းသွားကာ အသက်လုပြေးသွားကြလေသည်။
ခပ်ဝေးဝေးတွင်ရှိနေသည့် စီရင်စုသုံးထောင်မှ ကျင့်ကြံသူများအားလုံး ဆွံ့အသွားရသည်။ ဟွမ်က ဒီလိုပုံစံနဲ့ပဲ အင်အားတွေအများကြီး စုသွားတာလား..
ရှီဟောင်နှင့်ပနံသင့်သည် သူများပင်လျှင် ထိတ်လန့်သွားကြလေ၏။
ဤစွမ်းအားမှာ ကြီးထွားလာနေဆဲပင်။
သူလူအများကြီးကို ကယ်တင်နိုင်ခြင်းမှာ ယခုတစ်ခေါက် လျှပ်စီးအတိဒုက္ခရည်သည် ယခင်တစ်ခေါက်ကထက် ပို၍စွမ်းအားကြီးသောကြောင့်ပင်။
“လူငယ်လေး .. ဒီလိုမျိုးမလုပ်ပါနဲ့ ..ဒါက ဖြုန်းတီးရာ ကျလွန်းတယ်” ဝိဉာဉ်လူမျိုးစုမှ ကောင်းကင်နတ်ဘုရားပြောလိုက်သည်။ သူသည် ကောင်းကင်နတ်ဘုရားအနည်းငယ်ကိုပိုကယ်တင်ပြီး အင်အားကြီးအောင် လုပ်လိုခြင်းပင်။ သို့မှသာ အပြင်လောကမှလူများနှင့် ပြဿနာဖြစ်လာလျှင် သူတို့ကလန်သားများကို ကာကွယ်နိုင်လိမ့်မည်ပင်။
“ဝိဉာဉ်ကလန်၊ လှပခြင်းကလန်နဲ့ တစ်ခြားကလန်တွေက အရင်တုန်းက ကျွန်တော့်ကို ရိုးရိုးသားသားနဲ့ ကာကွယ်ပေးခဲ့ကြတယ် .. ဒီအဖိုးတန်ဆေးရည်ကို အားလုံးကို မျှဝေပေးရမှာပါ” ရှီဟောင်ပြောလိုက်၏။
ဤသည်မှာ သူလုပ်ရမည့်ကိစ္စပင်။ ဤကလန်များမှာ သူ့ကိုကာကွယ်ရန် အလွန်အားထုတ်ထားကြသောကြောင့် သူတို့ကို အထူးဂရုစိုက်ရမည်သာ။
ဤသို့ပြုလုပ်ခြင်းအားဖြင့် နောင်တွင် လျှပ်စီးအတိဒုက္ခရည်ကို ရရှိနိုင်မည့်မျှော်လင့်ချက်ဖြင့် လူများ သူ့ဘက်သို့ ပိုရောက်လာကြမည်ပင်။
ဤသည်မှာ အုတ်အော်သောင်းတင်းဖြစ်သွားသည်သာ။ လူများစွာသည် တရှိန်ထိုးပင် ရောက်ရှိလာကြလေသည်။
“ဒီလိုမျိုးပူးပေါင်းမှု၊ ဒီလိုမျိုး ခွန်အားကြီး .. ဒါက သေချာပေါက်ကို စီရင်စုသုံးထောင်မှာ မုန်တိုင်းကြီးတစ်ခု ဖြစ်လာဦးမှာပဲ” တစ်စုံတစ်ယောက်မှ သက်ပြင်းချကာ ပြောလိုက်သည်။