သုခကမ္ဘာက ရှီဟောင် - Chapter - 1192 လှိုင်းကြီးများ
ဤတစ်ကြိမ်လျှပ်စီးအတိဒုက္ခမှာ ရှေးဟောင်းမြို့ခံများအားလုံးကို တုန်လှုပ်သွားစေလေ၏။
မည်သူက စိတ်နောက်နောက်ဖြင့် နေချင်မည်နည်း.. မည်သူက သေမင်း၏အရိပ်အောက်တွင် အသက်ရှင်ချင်မည်နည်း.. အားလုံးမှာ လွတ်လွတ်လပ်လပ်နှင့် အလင်းရောင်အောက်တွင် ရှင်သန်ချင်သည်သာ။
ယခုဤကဲ့သို့သော အခွင့်အရေးမှာ အားလုံးရှေ့တွင်ရှိနေလေပြီ။
ရှီဟောင်သည် အားလုံး၏အာရုံစိုက်ရာဖြစ်လာလေ၏။
သို့သော် ကလန်တိုင်းမှာ သူ့အား ရိုးရိုးသားသားဆက်ဆံနေခြင်းမဟုတ်ပေ။ အချို့ကလန်များမှာ လျှပ်စီးအတိဒုက္ခရည်အတွက် ဟန်ဆောင်နေကြခြင်းပင်။
အချို့ကလန်များမှာ စိတ်ထဲမှ အကောက်ကြံနေကြသည်ပင်။ ထာဝရရှေးဟောင်းမြေသာ ပွင့်သွားပြီး အပြင်ဘက်လောကနှင့် ချိတ်ဆက်သွားကာ အပြင်ဘက်မှ ဂိုဏ်းများဝင်လာသည်နှင့် သေချာပေါက် ပြဿနာများဖြစ်လာမည်ပင်။
ရှီဟောင်နှင့် အပြင်ဘက်လောကရှိဂိုဏ်းအချို့ ဆက်ဆံရေးမကောင်းသည်ကို သူတို့သိပြီးသားပင်။ တစ်ဖက်ဖက်မှ မသေမချင်း ပြီးပြတ်မည်မဟုတ်သည့် ဆက်ဆံရေးမျိုးပင်။
ထို့ကြောင့်ပင် အချို့ ကောင်းကင်နတ်ဘုရားများမှာ အရေးကြီးသည့်အချိန်ကျလျှင် မည်သို့ပြုမူမည်ကို မသိနိုင်ပေ။
အချို့ကလန်များမှာ ရှီဟောင်အား အမှန်တကယ်ကို လေးစားခြင်းပင်။ သူတို့ကလန်သားများကို ကယ်တင်ချင်သေးသောကြောင့် ရှီဟောင်၏ အနာဂတ်အတွက် ဆုတောင်းပေးနေကြပြီး သူအသက်ဆက်ရှင်ရန်လည်း မျှော်လင့်နေကြသည်သာ။
ဤသည်မှာ အလောင်းအစားတစ်မျိုးပင်။
အပြင်ဘက်မှ ဂိုဏ်းခေါင်းဆောင်များဝင်လာသည်နှင့် သေချာပေါက် တိုက်ပွဲများဖြစ်လာမည်သာ။ သူတို့သာ ရှီဟောင်ကို ကာကွယ်နိုင်ပါက အကျိုးကျေးဇူးများစွာ ရရှိနိုင်သည်ပင်။
လျှပ်စီးအတိဒုက္ခရည်ကို ထည့်မစဉ်းစားပင်လျှင် ရှီဟောင်သည် ကလန်များ၏ ကာကွယ်မှုများနှင့် ထိုက်တန်သည့်သူပင်။ သူ့ထံတွင် ထာဝရစွမ်းအင်သုံးကြောင်းရှိနေသောကြောင့် သူသာ ဂိုဏ်းခေါင်းဆောင်အဆင့်ဖြစ်လာလျှင် မည်သူက သူ၏ပြိုင်ဘက်ဖြစ်လာမည်နည်း..
သူတို့ကိုယ်ကျိုးအတွက် သူ့အားလာရှာသူများကို ရှီဟောင်သိသည်သာ။ သူ့နားတွင်ဝန်းရံနေသည့်သူများစွာရှိနေသော်လည်း အများစုမှာ စိတ်ရင်းဖြင့်မဟုတ်ပေ။
ရှီဟောင်၏နှုတ်ခမ်းထောင့်တွင် အေးစက်သည့်အပြုံးတစ်ခု ဖြစ်ပေါ်လာပြီး “မာယွဲ့နဲ့ မိုလော့ခေါင်းယူလာပေးနိုင်တဲ့သူကို ကျန်နေတဲ့ လျှပ်စီးအတိဒုက္ခရည်အကုန်လုံးကို ပေးမယ်”
သူနည်းနည်းလေး သုံးပြီးသွားသော်လည်း သူ့ထံတွင် အနည်းငယ်ကျန်နေသေးသည်။ ဝိဉာဉ်လူမျိုးစုနှင့် လှပခြင်းမျိုးနွယ်စုကို ပေးသည့်အပြင် သူတို့ခေါ်လာသည့်လူများကိုလည်း သူပေးပြီးသွားလေပြီ။
ကျန်သည့်သူများမှာ လျှပ်စီးအတိဒုက္ခရည်ကို လိုချင်ပါက သူတို့၏ရိုးသားမှုကို သက်သေပြရန်လိုအပ်သည်ပင်။
ထိုကောင်းကင်နတ်ဘုရားနှစ်ယောက်နောက်သို့ လိုက်သွားသည့်သူများရှိသော်လည်း အများစုများ ပြန်လာလေပြီ။ သူတို့သည် တကယ်တိုက်ခိုက်ခဲ့ခြင်းမဟုတ်ပဲ ဟန်ပြသာ လိုက်ခဲ့ကြခြင်းပင်။
သူတို့နောက်တကယ်လိုက်သည့်သူများကိုလည်း ရှီဟောင် မှတ်မိသည်။
ယခု သူဤကဲ့သို့ ဈေးခေါ်လိုက်သည့်အချိန်တွင် အချို့သူများမှာ တုံ့ဆိုင်းနေသော်လည်း အချို့မှာ တုံ့ဆိုင်းမနေပဲ ချက်ချင်းပင် ပြေးသွားလေသည်။
မနုဿကလန်နှင့် ရှေးဟောင်းဖိန်းကလန်တို့၏ အမူအရာများ ပျက်ယွင်းသွားရကာ တည်ငြိမ်နိုင်ရန် ခက်ခဲသွားကြလေသည်။
ဤနှစ်ယောက်မှာ သူတို့ကလန်၏ ကောင်းကင်နတ်ဘုရားနှစ်ယောက်ဖြစ်သောကြောင့် ဤလူများအား မသေစေချင်ကြပေ။
အချို့လူများသည်လည်း ဤနှစ်ယောက်ကို ကျိန်ဆဲနေကြသည်။ မာယွဲ့နှင့် မိုလော့၏ ရှီဟောင်အား လောဘတကြီးတိုက်ခိုက်မှုကြောင့်သာမဟုတ်ပါက သူတို့ ဤကဲ့သို့အဆုံးသတ်မည်မဟုတ်ပေ။
ထို့နောက်တွင် ရှီဟောင် ဝိဉာဉ်ကျွန်းသို့ ပြန်သွားလိုက်သည်။
“တာအိုညီအစ်ကိုတို့ မင်းတို့အားလုံး ဒီလိုမျိုး အရှုံးပေးလိုက်ကြတော့မှာလား .. ဒါက ထာဝရရှေးဟောင်းမြေရဲ့မြို့ခံတွေကို ကျူးကျော်လာတဲ့ အပြင်လူတစ်ယောက် သပ်သပ်ပဲ .. သူက လျှပ်စီးအတိဒုက္ခရည်ကိုအားကိုးပြီးတော့ ငါတို့ကို အမိန့်တွေလာပေးနေတာ .. ငါတို့က ဘာလို့ သူ့အမိန့်တွေကို နားထောင်ရမှာလဲ”
ထိုနေ့တွင် အချို့လူများသည် ကလန်များသို့ သွားရောက်ကာ ရှီဟောင်ကို ရင်ဆိုင်ရန် မဲဆွယ်စည်းရုံးကြလေ၏။
ဤလူများမှာ ရှီဟောင်ကို ရန်လိုနေသည့်သူများပင်။ ထို့ကြောင့်ပင် သူတို့သည် ဟွမ်ကိုမုန်းတီးလာစေရန်အတွက် အားလုံးလုပ်နေကြခြင်းပင်။
မာယွဲ့နှင့် မိုလော့သည်လည်း အချို့ရှေးဟောင်းမြေများသို့ တိတ်တဆိတ်သွားပြီး ဂိုဏ်းခေါင်းဆောင်များလှုပ်ရှားလာစေရန် လှုံ့ဆော်လိုက်လေ၏။
“ဟွမ်မှာ သခင်လေးတို့ကို ကယ်နိုင်တဲ့ လျှပ်စီးအတိဒုက္ခရည်ရှိသေးတယ် .. သူ့ကို ဖမ်းထားနိုင်ရင် အားလုံးကို ရလိုက်တာနဲ့အတူတူပဲ .. သခင်လေးတို့ဂိုဏ်းက နောက်တစ်ခေါက် ကြီးပွားလာမှာ”
သူတို့သည် ကျိန်စာကို ချေဖျက်နိုင်ကြောင်း တိုက်ရိုက်ပင် ပြောလိုက်လေသည်။
“ဒါပေမဲ့ ဟွမ်က လှပခြင်းလူမျိုးစုနဲ့ လက်ရှစ်ဖက်ဝိဉာဉ်လူမျိုးစုနဲ့ အရမ်းရင်းနှီးတယ်လေ .. သူတို့တွေကို ထွက်သွားအောင် လုပ်နိုင်မှာမဟုတ်ဘူး .. ဟွမ်ကို အတင်းဝင်ဖမ်းမှပဲရလိမ့်မယ်”
မာယွဲ့နှင့်မိုလော့သွားသည့်နေရာများမှာ လက်ရှစ်ဖက်ဝိဉာဉ်လူမျိုးစုနှင့် လှပခြင်းလူမျိုးစုတို့ကို ရန်လိုနေကြသည့်နေရာများပင်။
ထာဝရရှေးဟောင်းမြေတွင် မုန်တိုင်းတစ်ခု တိုက်ခတ်နေလေပြီ။ ဤသည်မှာ ဂိုဏ်းခေါင်းဆောင်အချို့ကိုပင် နိုးထလာစေလေ၏။
ကလန်များမှာ တောင်လိုပုံနေသော်လည်း ဂိုဏ်းခေါင်းဆောင်များမှာ သိပ်မများပေ။ သေလျှင်သေ မသေလျှင်လည်း စိတ်နောက်နေကြသည်သာ။ အနည်းငယ်သာ ပေါ်လာနိုင်လေ၏။
ထိုသတင်းကို ကြားလိုက်ရသည့်အချိန်တွင် ရှီဟောင်၏မျက်လုံးများ အေးခဲသွားလေ၏။ ဤနှစ်ယောက်မှာ သေသင့်သည့်သူဖြစ်သော်လည်း မီးထဲကို လောင်စာလာထည့်နေသေးသည်။
ထိုနေ့တွင် ဝိဉာဉ်လူမျိုးစုမှ ဘိုးဘေးကိုယ်တိုင် လှုပ်ရှားလိုက်လေသည်။ ထိုနှစ်ယောက်မှာ ကောင်းကင်နတ်ဘုရားများသာဖြစ်သောကြောင့် သူ့မျက်လုံးထဲ ဘောင်ဝင်မနေပေ။
သတ်ဖြတ်လိုသည့်အငွေ့အသက်များမှာ ထာဝရရှေးဟောင်းမြေတစ်ခုလုံးကို ပျံ့နှံ့သွားလေ၏။
အချို့သူများမှာ ဂိုဏ်းခေါင်းဆောင်များ ကျတ်တီးနယ်မြေတစ်ခုတွင် တိုက်ခိုက်နေကြသည်ကို တွေ့လိုက်ကြရလေသည်။
ဝိဉာဉ်လူမျိုးစုမှ ဘိုဘေးကို ခုခံနိုင်သည့်အချို့လူများရှိနေလေ၏။ ဤသည်မှာ မည်သူမှမထင်ထားသည့်ကိစ္စတစ်ခုပင်။
သို့သော် ကျိန်စာစွမ်းအားများ ပျက်ပြယ်သွားပြီးသည့်နောက်တွင် ဝိဉာဉ်လူမျိုးစုဘိုးဘေး၏စွမ်းအားမှာ ပို၍ပင် ကြောက်စရာကောင်းလာလေပြီ။ သူ၏ပြိုင်ဘက်ကို လွယ်လွယ်ဖြင့်ပင် အနိုင်ယူနိုင်သွားလေသည်။
သို့သော်လည်း ထိုဂိုဏ်းခေါင်းဆောင်သည် သူ၏ကိုယ်ပွားကိုသာ စေလွှတ်လိုက်ခြင်းဖြစ်ပြီး သူ၏ခန္ဓာကိုယ်အစစ်မှာမူ ရှီဟောင်ကို တိတ်တဆိတ်သတ်ဖြတ်ရန်အတွက် ဝိဉာဉ်ကျွန်းသို့ ဦးတည်သွားနေလေပြီ။
သို့သော်လည်း သူ၏တွက်ချက်မှုများ မှားယွင်းသွားလေပြီ။ ထိုနေရာကို လှပခြင်းကလန်မှ ဂိုဏ်းခေါင်းဆောင် စောင့်ရှောက်နေပြီး ပျောက်သွားသည်မှာ အတော်ကြာနေပြီဖြစ်သည့် ဂိုဏ်းခေါင်းဆောင်နှစ်ယောက်လည်း ထိုနေရာတွင် ဧည့်သည့်အနေဖြင့် ရှိနေလေသည်။
ရှီဟောင် ဂိုဏ်းခေါင်းဆောင် လေးယောက်ကိုကယ်လိုက်မှန်း အားလုံးသိထားသည်ပင်။ သုံးယောက်မှာ ဤနေရာသို့ ရောက်နေလေသည်။
ဝုန်း..
ပြင်းထန်သည့်တိုက်ပွဲတစ်ခု ဖြစ်ပွားလာလေသည်။ ထိုလူသည် လက်မောင်းတစ်ဖက်ကို ဆုံးရှုံးပြီးသည့်နောက်တွင် ပြင်းထန်သည့်ဒဏ်ရာများဖြင့် ထွက်ပြေးသွားလေ၏။
ဝိဉာဉ်ဘိုးဘေးသည် ထိုလူ၏ ကိုယ်ပွားကို ရှင်းပြီးသွားသည့်အချိန်တွင် မိုလော့နှင့် မာယွဲ့၏ သဲလွန်စများကို တွေ့လိုက်ရသည်။ သူသည် အလွန်ဝေးသည့်နေရာမှပင်လျှင် ထိုနှစ်ယောက်၏ခန္ဓာကိုယ်များကို ပေါက်ကွဲမတတ်ဖြစ်သွားအောင် ပြုလုပ်လိုက်လေ၏။
သို့သော်လည်း သူသည် ထိုနှစ်ယောက်ကို အသေမသတ်ပဲ ထိုနှစ်ယောက်နောက်သို့ တစ်ချိန်လုံးလိုက်နေသည့်သူများထံသို့ လွှဲပေးလိုက်လေ၏။
ထိုသူများမှာ အလွန်ပင် ကျေးဇူးတင်နေကြလေ၏။ ဤခေါင်းနှစ်လုံးနှင့်ဆိုလျှင် သူတို့ လျှပ်စီးအတိဒုက္ခရည်များကို ရနိုင်လေပြီ။
“မင်းတို့ဒီလိုမျိုးလုပ်လို့မရဘူး .. ငါတို့အားလုံးက ထာဝရရှေးဟောင်းမြေက မြို့ခံတွေလေ … မင်းတို့ဘာလို့ ဒီလိုမျိုး လုပ်ရက်ကြတာလဲ” သူတို့နှစ်ဦးသည် ထိတ်လန့်တကြားပင် အော်ဟစ်လိုက်ကြလေသည်။
သို့သော် ထိုကောင်းကင်နတ်ဘုရားများ၏ အမူအရာများမှာ အေးခဲနေလေ၏။ ဤနှစ်ယောက်သည် လောဘကြီးစွာဖြင့် ရှီဟောင်အားတိုက်ခိုက်ခဲ့သည်ကို သူတို့သိပြီးသားပင်။ သူတို့သည် သနားညှာတာခြင်းကင်းမဲ့စွာဖြင့်ပင် ထိုနှစ်ယောက်ကို သတ်ပစ်လိုက်လေသည်။
ထိုခေါင်းနှစ်လုံးကို ဝိဉာဉ်ကျွန်းသို့ယူလာပြီး ရှီဟောင်အား ပြသသည့်အချိန်တွင် ရှီဟောင်သည် သူ့ဂတိအတိုင်း လျှပ်စီးအတိဒုက္ခရည်ကို ထုတ်ပေးလိုက်လေ၏။
ဤသည်မှာ အားလုံးကို စိတ်လှုပ်ရှားသွားစေနိုင်လေသည်။
အထူးသဖြင့် စီရင်စုသုံးထောင်မှ ကျင့်ကြံသူများမျာ ချွေးစေးများပင် ထွက်လာကြလေ၏။ ဤသည်မှာ ကောင်းကင်နတ်ဘုရားများပင်။ သို့သော်လည်း ရှီဟောင်ကိုယ်တိုင် တိုက်စရာမလိုပဲနှင့်ပင် သူ့ရှေ့သို့ သူတို့၏ခေါင်းများ ရောက်လာလေပြီ။
အခု မည်သူက ဟွမ်အား ဆန့်ကျင်ရဲတော့မည်နည်း .. သူ့အား မကျေမနပ်ဖြစ်အောင် လုပ်လိုက်မိသည်နှင့် သူ့အတွက် တိုက်ခိုက်ပေးမည့်သူများ အများကြီးပင်။
ထိုနေ့တွင် ဂုကျန်းယွမ်သည် ထာဝရရှေးဟောင်းမြေမှ လျင်မြန်စွာပင် ထွက်ခွာသွားလေသည်။
လျှပ်စီးအတိဒုက္ခကို ဖြတ်ကျော်နိုင်သည့် စွမ်းအားကြီးသည့်လူတစ်ယောက်သည် ဘာစကားမှမပြောပဲ ထွက်သွားသောကြောင့် ဤသည်မှာ လူများကို ပို၍ပင် ဆွံ့အသွားစေလေသည်။
“ဝင်ပေါက်ကို ပိတ်လိုက် .. ခြောက်နှစ်သားလေးကို ထွက်မသွားစေနဲ့” ရှီဟောင်ပြောလိုက်သည်။
ဤစကားများထွက်လာသည့်အချိန်တွင်လည်း အုတ်အော်သောင်းတင်းဖြစ်သွားလေ၏။ ရှီဟောင်သည် နျင်ချွမ်းနှင့် တိုက်ခိုက်တော့မည်ဟု ကြေငြာလိုက်ခြင်းပင်။
ထိုစကားကို ကြားလိုက်သည်နှင့် အချို့ကောင်းကင်နတ်ဘုရားများသည် နျင်ချွမ်းရှိနေသည့်နေရာကို ချက်ချင်းရှာဖွေလိုက်ကြလေသည်။
ရှီဟောင်ထံမှ လျှပ်စီးအတိဒုက္ခရည်ကိုလိုချင်လျှင် သူတို့၏ရိုးသားမှုကို ပြသရမည်ကို အားလုံးသိသည်ပင်။ သူတို့နျင်ချွမ်းကို မသတ်နိုင်လျှင်ပင် သူရှိနေသည့်နေရာကို ဟွမ်အား ပြောပြလိုက်ရုံသာ။
အချို့သူများမှာမူ ရှီဟောင်ဘက်တွင်ရှိနေပြီဖြစ်သောကြောင့် သူတို့သည် နျင်ချွမ်းအား ဒီတိုင်းပင် သတ်ပစ်လိုက်ချင်နေကြလေသည်။ နျင်ချွမ်းအား နေရာတိုင်းတွင် လိုက်ရှာနေကြလေ၏။
ဝုန်း..
ညနက်တွင် တစ်စုံတစ်ယောက်မှ ဝိဉာဉ်ကျွန်းစုကို တိုက်ခိုက်လာပြီး ရှီဟောင်၏သီးသန့်ကျင့်ကြံနေသည့်နေရာကို ချိုးဖောက်ဝင်ရောက်လုနီးပါးပင်။ ကံကောင်းစွာဖြင့်ပင် ဤနေရာကို စောင့်ရှောက်နေသည့် ဂိုဏ်းခေါင်းဆောင်များရှိနေသောကြောင့် ထိုတိုက်ခိုက်မှုကို တားဆီးလိုက်နိုင်လေသည်။
ရှီဟောင် မျက်မှောင်ကြုတ်လိုက်၏။
စီရင်စုသုံးထောင်မှ ကျင့်ကြံသူများအမြင်တွင် သူသည် ကောင်းကင်နတ်ဘုရားများကို အမိန့်ပေးနိုင်သည့် စွမ်းအားရှင်တစ်ယောက်ဖြစ်နေသော်လည်း သူသည် မီးဖိုပေါ်၌ကင်ခံနေရသည့်သူတစ်ယောက်မှန်း သူသိသည်။
ထာဝရရှေးဟောင်းမြေပွင့်သွားပြီး အပြင်ဘက်မှလူများ ဝင်လာသည်နှင့် သူအန္တရာယ်များမည်ပင်။
ထို့အပြင် ဤရှေးဟောင်းမြေထဲတွင်ပင် သူ့ကို မုန်းတီးသည့်အခြားသူများရှိနေသေးသည်ပင်။ ဥပမာအားဖြင့် ယခုလေးတင် တိတ်တဆိတ်တိုက်ခိုက်လိုက်သည့်သူပင်။ သူသည် ဝိဉာဉ်ကလန်နှင့် ရန်ငြိုးများရှိနေသောကြောင့် သူ့ကိုလည်း ဖိအားပေးလာမည်ပင်။
ဤအတိုင်းသာ ဆက်သွားနေပါက နည်းနည်းလေး သတိလက်လွတ်ဖြစ်သွားသည်နှင့် သူအသက်အန္တရာယ်ရှိနိုင်သည်။
သတင်းကောင်းများလည်း ရှိနေသည်သာ။ နောက်တစ်ရက်တွင် စိတ်လွတ်နီးပါးဖြစ်နေသည့် ဂိုဏ်းခေါင်းဆောင်တစ်ယောက်လာလည်ကာ သူ့အား အကူအညီတောင်းခဲ့သည်။ ယခုအချိန်တွင် သူ့ဘက်၌ ဂိုဏ်းခေါင်းဆောင်ငါးယောက် ရှိနေလေပြီ။
“ငါတို့သူငယ်ချင်းအဖြစ် ပြောင်းလို့မရနိုင်တဲ့ ဂိုဏ်းခေါင်းဆောင် နှစ်ယောက်၊ သုံးယောက်လောက်ရှိတယ် .. သူတို့တွေက ငွေရောင်သွေးနတ်ဆိုးသစ်ပင်လူမျိုးစုဘိုးဘေးရဲ့ သူငယ်ချင်းတွေ” လှပခြင်းလူမျိုးစု၏ နံပါတ်တစ်ကျွမ်းကျင်သူမှ ပြောလိုက်သည်။
ရှီဟောင် မျက်မှောင်ကြုတ်ကာပြောလိုက်သည်။ “ကျွန်တော် ဝိဉာဉ်ကျွန်းမှာပဲ မနေနေချင်ဘူး .. အဲဒီဂိုဏ်းခေါင်းဆောင်တွေ လာလို့မရတဲ့ နေရာတစ်ခုခုရှိလား”
“နေရာတစ်ချို့တော့ရှိပေမယ့် အရမ်းအန္တရာယ်များတယ်” ဝိဉာဉ်လူမျိုးစုဘိုးဘေးမှ ပြောလိုက်သည်။
သို့သော် ထိုနေရာများအကြောင်း ကြားလိုက်ရသည့်အချိန်တွင် ရှီဟောင်စိတ်လှုပ်ရှားသွားခဲ့ရသည်။ သူအခွင့်အရေးများကို ထပ်မံရှာဖွေလိုသည်။ ယခုအချိန်မှာ အကောင်းဆုံးအချိန်ပင်။
ထိုနေရာများသည် ကျင့်ကြံဆင့်အားလုံးအတွက် အန္တရာယ်များသည့်နေရာများပင်။
“အဲဒီမှာ ကောင်းကင်နတ်ဘုရားသစ်ပင်ရှိနေတာလား .. ကျွန်တော်သွားမယ်” ရှီဟောင်ပြောလိုက်သည်။
ထိုနေရာများထဲမှ တစ်နေရာတွင် ကောင်းကင်နတ်ဘုရားသစ်ပင်ရှိနေပြီး အခြားနေရာတစ်ခုတွင် ထာဝရလှိုဏ်ဂူတစ်ခုရှိနေကြောင်း သူသိလိုက်ရသည်။
မကြာခင်တွင် ထာဝရရှေးဟောင်းမြေမှ ထွက်သွားရတော့မည်ဟု သူခံစားနေရသည်။ မထွက်သွားခင် ဤနေရာတစ်ခုလုံးမှ ကံကောင်းမှုများကို သိမ်းကြုံးယူသွားချင်သေးသည်။
“ဟူး .. ကျွန်တော် ထာဝရဆေးပင်တစ်ပင်ကို တွေ့ဖူးသေးတယ် .. ထာဝရသက်ရှိကို သယ်ထားတဲ့လိမ်ဖြူလေး .. အဲဒီအပင်ကိုရရင် ဘယ်လောက်ကောင်းလိုက်မလဲ” ဤသည်မှာ ရှီဟောင်ဖြစ်ချင်သည့်ဆန္ဒပင်။
“ငါမင်းကို လျှို့ဝှက်ချက်တစ်ခု ပြောပြမယ် .. ဒီလောကမှာ ကောင်းကင်နတ်ဘုရားသစ်ပင် လေးပင်ရှိတယ် .. သူတို့ရဲ့စွမ်းရည်တွေမတူဘူး … အဲဒီသစ်ပင်လေးပင်ပေါင်းပြီးတော့ အပင်တစ်ပင်ထွက်လာနိုင်ရင် အဲဒီသစ်ပင်က သက်ရှည်ဆေးပင်ဖြစ်လိမ့်မယ်” လှပခြင်းလူမျိုးစု ဂိုဏ်းခေါင်းဆောင်မှ ပြောလိုက်သည်။
“ဘာ .. ဒီလိုမျိုးလည်း ရှိသေးတာလား” ရှီဟောင် ဆွံ့အသွားရသည်။
“ဟုတ်တယ် .. အဲဒါက မြေ၊ မီး၊ လေနဲ့ရေ ကွဲနေတာ .. အဲဒီကောင်းကင်နတ်ဘုရားသစ်ပင်တွေက အစက ပြိုင်ဘက်ကင်းတဲ့ ထာဝရဆေးပင်တစ်ပင်ပဲ .. နောက်ဆုံးတော့ တစ်ယောက်ယောက်ရဲ့မှော်စွမ်းအားကြောင့် လေးပိုင်းကွဲသွားတာ” အခြားဂိုဏ်းခေါင်းဆောင်မှ ပြောလိုက်သည်။
ရှီဟောင် တစ်ခဏခန့် စဉ်းစားကြည့်လိုက်သည်။ ယခင်က လိပ်ဖြူသယ်ထားသည့်ထာဝရသက်ရှိနှင့်အတူရှိနေသည့် ကောင်းကင်နတ်ဘုရားသစ်ပင်တစ်ပင်ကို မြင်ဖူးသည်။
ယခု ဤကဲ့သို့သော အချက်အလက်များကို သိလိုက်ရသည့်အချိန်တွင် သူဘယ်လိုလုပ် စိတ်မလှုပ်ရှားပဲနေမည်နည်း..
“ထာဝရရှေးဟောင်းမြေ ဖွင့်ခံလိုက်ရရင် အဲဒီလိပ်ဖြူ သေချာပေါက် ပေါ်လာမှာ .. အဲဒီလိပ်ဖြူဆီက သစ်ပင်ရနိုင်မယ့်နည်းလမ်းကို စဉ်းစားရဦးမယ်” ရှီဟောင်ပြောလိုက်သည်။
“သတင်းပို့ပါတယ် .. နျင်ချွမ်းရှိနေတဲ့နေရာကို သိပါပြီ .. အခုလောလောဆယ်တော့ သူ့ကို ကောင်းကင်နတ်ဘုရားတွေ အများကြီး လိုက်ဖမ်းနေပါတယ်” ရုတ်တရက်ပင် တစ်စုံတစ်ယောက်မှ ကျွန်းပေါ်သို့ ဆင်းလာပြီး သတင်းပို့လေသည်။
ရှီဟောင်သည် ထွက်သွားချင်နေပြီဖြစ်သော်လည်း ထိုသတင်းကြားလိုက်ရသည့်အချိန်တွင် အလွန်ပျော်ရွှင်စွာပင် ပြောလိုက်လေ၏။ “သူ့ကို အရင်ဆုံးရှင်းလိုက်ဦးမယ်”
နျင်ချွမ်းပင်လျှင် အမဲလိုက်ခံနေရသောကြောင့် လျှပ်စီးအတိဒုက္ခရည်၏အကျိုးသက်ရောက်မှုမှာ ကြီးမားလှပေသည်။