သုခကမ္ဘာက ရှီဟောင် - Chapter - 1194 ကောင်းကင်နတ်ဘုရားသစ်ပင်
သူ တကယ်တွေ့သွားပြီ..
တောင်ထိပ်ပေါ်တွင်ရှိနေသည့် သစ်ပင်ကြီးကို မြင်လိုက်ရသည့်အချိန်တွင် သူစိတ်လှုပ်ရှားလာရသည်။
သူထိုနားသို့ တစ်လှမ်းချင်းတိုးသွားလိုက်သည်။ အဝေးမှပင်လျှင် ထူးခြားသည့် နတ်ဘုရားအော်ရာကို သူခံစားမိနေသည်။ သစ်ပင်ကြီး၏ ရွှေရောင်သစ်ရွက်များ၊ ပန်းပွင့်များ၊ အကိုင်းအခက်များနှင့် သစ်သီးများတွင် များပြားလှသည့် ဝိဉာဉ်စွမ်းအင်များ ရှိနေလေသည်။
ဤအပင်သည် အလွန်မြင့်သကဲ့သို့ အလွန်လည်း ကြီးမားလှသည်။ သစ်ခေါက်များမှာလည်း လက်ဝါးအရွယ်အစား အကြေးခွံများနှင့် တူနေသည်။
“လူငယ်လေး .. မင်းက ဒီနေရာထိရောက်အောင်လာနိုင်တာဆိုတော့ တော်တော်ကံကောင်းတာပဲ” ရှေးဟောင်းသစ်ပင်မှ ပြောလိုက်သည်။
ဤကောင်းကင်နတ်ဘုရားသစ်ပင်မှာ သာမန်ဆေးပင်မဟုတ်သည်မှာ သိသာလှသည်။ ဤသည်မှာ စွမ်းအားကြီးသည့်သက်ရှိပင်။ ဤအပင်မပြောနှင့် သူ၏အသီးတစ်လုံးပင်လျှင် ကောင်းကင်နတ်ဘုရားဖြစ်စေရန် လုံလောက်သည်။
“စီနီယာနဲ့ကျွန်တော်နဲ့က အရင်ကတည်းက သိခဲ့ကြတာပါ” ရှီဟောင် အလွန်ပင် ယဉ်ကျေးနေလေ၏။
သူ၏အရှေ့မှ သစ်ပင်သည် ရွှေရောင်ကောင်းကင်နဂါးတစ်ကောင်ကဲ့သို့ပင် သူ့အား စကားပြောလိုက်လေသည်။
“ဟူး .. ကောင်းကင်ကြီးက တကယ်ကို မတရားတာပဲ .. မင်းက ဒီလောက်အသက်ငယ်ငယ်လေးနဲ့တောင် ကောင်းကင်နတ်ဘုရားရဲ့ခွန်အားရှိနေပြီ .. ငါကကျတော့ နှစ်ပေါင်းများစွာ ကျင့်ကြံနေခဲ့တာတောင်မှ အခုထိ အဆင့်မတက်နိုင်သေးဘူး” သစ်ပင်ကြီးမှ သက်ပြင်းချကာ ပြောလိုက်သည်။’
ကောင်းကင်နတ်ဘုရားသစ်ပင်အနေဖြင့် သူသည် တာအိုသစ်သီးများကို ပြုလုပ်ပေးပြီး အခြားသူများ ကောင်းကင်နတ်ဘုရားဖြစ်လာအောင် လုပ်ပေးနိုင်သော်လည်း သူကိုယ်တိုင်ကမူ ကန့်သတ်ခံထားရပြီး ကျင့်ကြံရန်အတွက် အလွန်ခက်ခဲလေသည်။ သူ၏လမ်းဆုံးနေပြီဖြစ်ပြီး သူသည် ပြိုင်ဘက်ကင်းသည့်ကျွမ်းကျင်သူ ဖြစ်မလာနိုင်တော့ပေ။ ယခုအချိန်တွင် သူသည် ကောင်းကင်နတ်ဘုရားအဆင့်၏ အမြင့်ဆုံးအဆင့်သို့ ရောက်နေပြီး ဂိုဏ်းခေါင်းဆောင်အဆင့်သို့ ခြေတစ်လှမ်းသာ ရောက်သေးသည်။
သို့သော်လည်း ပြောရမည်ဆိုလျှင် သူသည် အခြားနတ်ဆေးပင်များထက် ကံကောင်းသည်သာ။
လေဟာနယ်ကောင်းကင်နတ်နွယ်ပင်၊ အတိဒုက္ခဖြတ်သန်းခြင်းနတ်ကြာပန်းနှင့် အခြားနတ်ဆေးပင်များ၊ ထာဝရသက်ရှိသယ်ဆောင်သည့်လိပ်ဖြူပင်လျှင် ဤအဆင့်ထိရောက်အောင် မကျင့်ကြံနိုင်ပေ။
“ကျွန်တော်တို့က ကျင့်ကြံနိုင်တယ်ဆိုပေမယ့် မွေးကတည်းက ကန့်သတ်ခံထားရတာပါ ..ကျွန်တော်တို့က အသက်ရှည်အောင်လုပ်လို့မရဘူး .. ဒါပေမဲ့ စီနီယာက ကောင်းကင်နတ်ဘုရားဖြစ်နေပြီးတော့ ရှေးကတည်းက ရှိခဲ့တာ .. ပါရမီရှိတဲ့သူတွေ တစ်ယောက်ပြီးတစ်ယောက် အဝါရောင်မြေကြီးအဖြစ် ပြောင်းသွားတာကို ကြည့်နိုင်ခဲ့တယ် .. တကယ်ကို အားလုံးထက် သာလွန်ပါတယ်ဗျာ” ရှီဟောင် ပြောလိုက်၏။
“မင်းက တော်တော်လေး စကားတတ်တာပဲ … ငါ့အခြေအနေက အဲဒီထက် ဘာမှမပိုပါဘူး .. အတိဒုက္ခမြေကြီးမှာ ပေါက်လာတာမဟုတ်ရင် ငါလည်း တစ်ခြားအပင်တွေလိုမျိုး နတ်ဆေးပင်အဖြစ် စိုက်ခံနေရလောက်ပြီ” ရွှေရောင်ရှေးသစ်ပင်ကြီးမှ ပြောလိုက်သည်။
“ဒါပေမဲ့ မင်းက ဒီကိုရောက်အောင်လာနိုင်တယ်ဆိုမှတော့ ငါတို့နှစ်ယောက်က ကံစပ်လို့ပေါ့ .. မင်းရဲ့တာအိုတည်ငြိမ်ပြီးတော့ ကောင်းကင်နတ်ဘုရားဖြစ်လာအောင်လို့ ငါမင်းကို ကောင်းကင်နတ်ဘုရားအသီးတစ်လုံး လက်ဆောင်ပေးမယ် .. ” ထိုအပင်မှ ပြောလိုက်သည်။
ရှီဟောင် စိတ်လှုပ်ရှားသွားရသည်။ သူသည်လည်း တတ်နိုင်သမျှမြန်မြန် အဆင့်တက်ချင်နေသည်သာ။ သူစွမ်းအားကြီးလေလေ ကောင်းလေလေပင်။ အဘယ်ကြောင့်ဆိုသော် ကပ်ဆိုးများရောက်လာတော့မည်ကို သူသိသည်။ ထိုအချိန်ကျလျှင် ကိုယ့်ကိုကိုယ်သာ အားကိုးရတော့မည်ပင်။
နောက်ထပ် အသီးနည်းနည်းလောက် ထပ်ရနိုင်မလားဟု သူမေးလိုက်သည်။ အဘယ်ကြောင့်ဆိုသော် အသီးများ တစ်လုံးနှစ်လုံးမကသည်ကို သူတွေ့လိုက်ရသောကြောင့်ပင်။
“ကံဆိုးတာပဲ .. မှည့်နေတဲ့အသီးက တစ်လုံးပဲရှိတယ် .. တစ်ခြားအသီးတွေက မမှည့်သေးဘူး .. မမှည့်သေးတဲ့အသီးတွေက ဘာမှအသုံးမဝင်ဘူး” ရွှေရောင်သစ်ပင်ကြီးသည် အကိုင်းအခက်များကို လှုပ်ခါကာ ပြောလိုက်လေ၏။
ကောင်းကင်နတ်ဘုရားအသီးကို စားပြီးလျှင် မည်ကဲ့သို့သော အကျိုးသက်ရောက်မှုများ ရှိလာမလဲဟု ရှီဟောင် နှိမ့်ချစွာပင် မေးလိုက်သည်။
“အနည်းဆုံးတော့ ကပ်ဘေးတစ်ရာကို ရှောင်လွှဲနိုင်တယ် .. ဖုန်မှုန့်နဲ့အငွေ့တွေ မင်းခန္ဓာကိုယ်ကို မကပ်နိုင်ဘူး” ရှေးသစ်ပင်ကြီးမှ ပြောလိုက်သည်။ ကောင်းကင်နတ်ဘုရားချက်ချင်းဖြစ်သွားသည့်အပြင် အံ့အားသင့်ဖွယ်ကောင်းသည့် ဆေးစွမ်းများလည်း ရှိနေသည်သာ။
“ကပ်ဘေးတစ်ရာကို ရှောင်လွှဲနိုင်တယ်ဆိုတာက ဘာကိုပြောချင်တာလဲ စီနီယာ” ရှီဟောင်မေးလိုက်သည်။
“သူက လျှပ်စီးကို ရှောင်နိုင်တယ်၊ မီးတောက်အတိဒုက္ခကို ရပ်တန့်နိုင်တယ် .. ရေကပ်ဘေးကို ခုခံနိုင်တယ်..” ကောင်းကင်နတ်ဘုရားသစ်ပင်မှ တစ်ခုပြီးတစ်ခု ရှင်းပြလိုက်သည်။
ထိုစကားကို ကြားလိုက်ရသည့်အချိန်တွင် ရှီဟောင်၏အမူအရာမှာ ချက်ချင်းပြောင်းလဲသွားလေ၏။ ဒါက လျှပ်စီးအတိဒုက္ခကို ရှောင်လွှဲနိုင်တာလား .. ဒါက ဘယ်လိုလုပ် အဆင်ပြေမှာလဲ .. ကျင့်ကြံဆင့်တစ်ခုစီတိုင်းအတွက် သူအတိဒုက္ခကို ဖြတ်ရမှာ..
“စီနီယာ .. အဲဒီ လျှပ်စီးအတိဒုက္ခဆိုတာက..”
“အိုး .. ငါမေ့သွားတာ .. ဒီခေတ်မှာ လျှပ်စီးအတိဒုက္ခတွေမရှိတော့ဘူးဆိုတော့ ဒီဆေးစွမ်းက ဘာမှအကျိုးသက်ရောက်တော့မှာမဟုတ်ဘူး .. မင်းစိတ်ပူစရာမလိုဘူး” သစ်ပင်ကြီး ပြောလိုက်သည်။
“ကျွန်တော်က ဘယ်လိုလုပ် မစိုးရိမ်ပဲနေရမှာလဲ .. ကျွန်တော် အတိဒုက္ခကို ဖြတ်ရမှာ” ရှီဟောင်ပြောလိုက်၏။
“ဘာ .. မင်းက ကောင်းကင်အတိဒုက္ခကို ဖြတ်သန်းတယ်လို့ ပြောလိုက်တာလား” ကောင်းကင်နတ်ဘုရားသစ်ပင် ထိတ်လန့်သွားရသည်။ သူထင်ထားသည်မှာ ရှီဟောင်သည် ကောင်းကင်အတိဒုက္ခကို ခုခံ၍ ရောက်လာခြင်းမဟုတ်ပဲ အပြင်ဘက်လောကမှကံကောင်း၍ရောက်လာခြင်းဟု ထင်ထားခြင်းပင်။
“ကျွန်တော် ကောင်းကင်အတိဒုက္ခကို သုံးခါဖြတ်ပြီးသွားပြီ” ရှီဟောင် ခေါင်းညိမ့်လိုက်၏။
ထိုအချိန်တွင် သူသည် စွမ်းအားကြီးသည့် နတ်အသိစိတ်တစ်ခု ပျံ့လွင့်လာသည်ကို ခံစားလိုက်ရပြီး ထိုရွှေရောင်သစ်ပင်ကြီး၏ အကိုင်းတစ်ခုမှာ သူ၏ပုခုံးပေါ်သို့ ကျလာလေသည်။
“စွမ်းအားကြီးလိုက်တဲ့ ခန္ဓာကိုယ် .. မူလဝိဉာဉ်လည်း ကောင်းကင်အတိဒုက္ခရဲ့ ဆေးကြောခြင်းကို တွေ့ကြုံပြီးသွားပြီ” ကောင်းကင်နတ်ဘုရားသစ်ပင်ကြီးသည် ရှီဟောင်ကို ထိလိုက်ည်နှင့် မတူညီသည့်အော်ရာကို ခံစားလိုက်ရလေ၏။
ရှီဟောင် ဤသစ်ပင်ကို မခုခံလိုက်ပေ။ အဘယ်ကြောင့်ဆိုသော် သူ၏ခွန်အားသည် ကောင်းကင်နတ်ဘုရားကို ယှဉ်နိုင်နေပြီဖြစ်သည်။ ထို့အပြင် ဤသစ်ပင်ကြီးထံမှ သတ်ဖြတ်လိုသည့်အငွေ့အသက်များကို သူမခံစားရပေ။
“စီနီယာ .. စီနီယာဒီမှာ နေနေတာ ကြာလှပြီ .. အပြင်လောကနဲ့တောင် မရင်းနှီးတော့ဘူး .. စီနီယာ ကျွန်တော်နဲ့ အပြင်လိုက်လာချင်လား” ရှီဟောင်မေးလိုက်သည်။
ဤကောင်းကင်နတ်ဘုရားသစ်သီးမှာ သူ့အတွက် အသုံးမဝင်တော့ဘူးဟု သူခံစားနေရသည်။ သို့သော်လည်း သူနှင့်ရင်းနှီးနေသည့်သူငယ်ချင်းများအတွက် အသုံးဝင်သေးသည်။
သူသည် အစကတည်းက ကောင်းကင်နတ်ဘုရားအဆင့်နှင့် ညီနေပြီးသားဖြစ်သောကြောင့် သူဤအသီးကို စားလိုက်လည်း သိပ်အများကြီး ပြောင်းလဲသွားမည်မဟုတ်ပေ။ ထို့အပြင် သူသာ ကောင်းကင်အတိဒုက္ခကို မဆင့်ခေါ်နိုင်လျှင် အလွန်ပြဿနာများသွားနိုင်သည်။
ထို့ကြောင့် ကိုယ့်ဘာသာကိုယ် ကျင့်ကြံတာက ပိုကောင်းလိမ့်မည်ဟု သူခံစားရသည်။ ရုတ်တရက်ကြီး ကောင်းကင်နတ်ဘုရားအဆင့်ရောက်သွားမည့်ခံစားချက်ကိုလည်း သူမကြိုက်ပေ။
သို့သော်လည်း ဤသစ်ပင်ကြီးမှာ စွမ်းအားကြီးလှသည်။ သူသာ ဤသစ်ပင်ကြီးကို ကျောက်တုံးကျေးရွာသို့ယူသွားပြီး ရွာသူကြီးဖိုးဖိုးကိုသာ ကောင်းကင်နတ်ဘုရားသစ်သီးတစ်လုံး စားခိုင်းလိုက်လျှင် ဖိုးဖိုး၏ တစ်နေ့တစ်ခြား အသက်ကြီးလာသည့် ပြဿနာကို သူစိတ်ပူစရာမလိုတော့ပေ။
ကျောက်တုံးကျေးရွာတွင် လူအများကြီးရှိသည်။ ဥပမာအားဖြင့် ထိုဦးလေးများနှင့် သူ၏အပေါင်းအဖော်များသာ ကောင်းကင်နတ်ဘုရားသစ်သီးကိုစားလိုက်ပါက သူတို့သည် ခွန်အားကြီးလာရုံသာမက သူတို့သည် တစ်ယောက်ကိုတစ်ယောက် စောင့်ရှောက်နိုင်ပြီး သူတို့ချစ်သည့်သူများ တစ်ယောက်ပြီးတစ်ယောက် အသက်ကြီးလာသည်ကိုလည်း ကြည့်နေစရာမလိုတော့ပေ။
သူ၏အဖိုးအရင်း နတ်ဆိုးနတ်ဘုရားမှာမူ သူကိုယ်တိုင် ကောင်းကင်နတ်ဘုရားအဆင့်ကို ရောက်အောင် ကျင့်ကြံနိုင်လိမ့်မည်ဟု သူယုံကြည်သည်။ အကယ်၍ သူမကျင့်ကြံနိုင်လျှင်လည်း ကောင်းကင်နတ်ဘုရားအသီးစား၍ရသည်။
ထို့ကြောင့်ပင် သူဤသစ်ပင်ကြီးကို စိုက်ကြည့်လိုက်သည်။ သူမသိလိုက်သည့်အချိန်မှာပင် သူ၏မျက်လုံးထဲမှ အစိမ်းရောင်အလင်းများထွက်လာနေလေပြီ။ သူဤအပင်ကို ချက်ချင်းပင် တူးယူလိုက်ချင်မိသည်။
“လူငယ်လေး ..မင်းဘာစဉ်းစားနေတာလဲ” ထိုသို့စိုက်ကြည့်ခံနေရသောကြောင့် ကောင်းကင်နတ်ဘုရားသစ်ပင်ကြီးမှာ တုန်ယင်လာလေသည်။ ဤလူငယ်လေးမှာ ကြင်နာတတ်သည့်သူမဟုတ်ဘူးဆိုသည်ကို သူအစကတည်းက ခံစားမိနေသည်သာ။
“စီနီယာ .. အပြင်ဘက်လောကက ဖရိုဖရဲတွေ ဖြစ်လာတော့မှာ .. ရှေးဟောင်းမိတ်ဖက်၊ နယ်စပ်ခြား၊ စွန့်ပစ်နယ်မြေ.. နေရာအားလုံးက ဖရိုဖရဲတွေ စဖြစ်လာတော့မှာ .. ဒီနေရာက သန့်စင်တဲ့မြေ ဖြစ်တော့မှာမဟုတ်ဘူး .. အခု ထာဝရရှေးဟောင်းမြေနယ်ခြားစည်းမှာ အက်ကွဲကြောင်းကြီးဖြစ်နေပြီ .. အပြင်လောကနဲ့ချိတ်ဆက်တော့မှာ .. စီနီယာပြင်ဆင်မှုတွေ လုပ်ထားဖို့လိုနေပြီ” ရှီဟောင်ပြောလိုက်သည်။
“မင်းဘာပြောလိုက်တာလဲ .. အပြင်ဘက်လောကမှာ ဘာဖြစ်နေတာလဲ” ကောင်းကင်နတ်ဘုရားသစ်ပင်ကြီးသည် လေးနက်သည့်အမူအရာအဖြစ် ပြောင်းလဲသွားလေ၏။
ရှီဟောင့်ထံမှ အပြင်လောကအကြောင်းများကို သိလိုက်ရသည့်အချိန်တွင် ပင်စည်တွင်ပေါ်နေသည့် မျက်မှာမှာ မှုန်မှိုင်းသွားလေ၏။
ထာဝရရှေးဟောင်းမြေပင်လျှင် ပျောက်ကွယ်တော့မည်။ ဤသည်မှာ ဤနေရာသည်လည်း စီရင်စုသုံးထောင်နှင့် ချိတ်ဆက်သွားကာ အပြင်လောကမှလူများ ဝင်နှောက်ယှက်တော့မည်ဟု ဆိုလိုခြင်းပင်။
“ထာဝရအသက်ရှည်ခြင်းကို သွားတဲ့လမ်းရှိရင်ကောင်းမှာပဲ” ကောင်းကင်နတ်ဘုရားသစ်ပင် သူ့ကိုယ်သူ ပြောလိုက်၏။ သို့သော် ဤသည်မှာ စိတ်ကူးယဉ်ဆန်လွန်းသည်ကိုလည်း သူ့ကိုယ်သူ သိသည်သာ။
“စီနီယာ .. ဒီလူငယ်မျိုးဆက်က လမ်းပြပေးချင်ပါတယ် .. အပြင်ကိုထွက်လာဖို့ စီနီယာကို ဖိတ်ပါတယ်” ရှီဟောင်ပြောလိုက်သည်။
“မင်းရဲ့ မြင့်မြတ်သည့်စတေးခြင်းနယ်ပယ်ခွန်အားလေးနဲ့ ငါ့ကို ဘယ်လိုကာကွယ်မှာလဲ .. အပြင်ဘက်မှာ ဂိုဏ်းခေါင်းဆောင်အုပ်စုတွေ ရှိနေမှာ သေချာတယ် .. အချိန်ကျလာရင် တစ်ယောက်ယောက်က ငါ့ကိုမင်းလက်ထဲက လုယူသွားပြီးတော့ ဆေးဥယျာဉ်ထဲမှာ သွားစိုက်ထားလိမ့်မယ်” ကောင်းကင်နတ်ဘုရားသစ်ပင်ပြောလိုက်သည်။
“စီနီယာ .. ကျွန်တော်က အသက် ၂၀ ပဲရှိသေးတာတောင်မှ ဒီကျင့်ကြံဆင့်ကို ရောက်နေပြီ။ တကယ်လို့ ကျွန်တော့်ကို နောက်ထပ်နှစ်နည်းနည်းလောက် ထပ်ပေးလိုက်ရင် ဘာဖြစ်လာမလဲ .. ရေရှည်ကို ကြည့်ဖို့လိုပါတယ် စီနီယာ” ရှီဟောင်ပြုံး၍ပြောုလိက်သည်။ ဤသစ်ပင်ကြီးကို ယူသွားရန် သူဆုံးဖြတ်ပြီးသွားလေပြီ။
ထို့နောက်တွင် ရှီဟောင်သည် ထိန်ချန်မနေတော့ပဲ သူ၏ထာဝရစွမ်းအင်ကြောင်းသုံးခုကို ထုတ်ပြကာ သူ၏ဦးခေါင်းထက်တွင် တာအိုပွင့်ဖတ်များ ပေါ်လာလေသည်။ နေနှင့်လစွမ်းအင်များ တောက်ပလာပြီး ကောင်းကင်နှင့် ကမ္ဘာမြေကြီး၏စွမ်းအင်များလည်း လှုပ်ရှားလည်ပတ်လာသည်။ ကောင်းကင်ဥပဒေသတာအိုများလည်း ထွက်ပေါ်လာလေသည်။
ကောင်းကင်နတ်ဘုရားသစ်ပင်ကြီးမှာ မတည်ငြိမ်နိုင်တော့ပေ။ သူသည် ချက်ချင်းပင် ထိတ်လန့်တကြားခုန်မိသွားလေ၏။ သူ၏သစ်ရွက်များလည်း ပြင်းထန်စွာပင် တုန်ခါနေလေသည်။
“ထာဝရစွမ်းအင်သုံးကြောင်း .. မင်းတကယ် ဒီအဆင့်တောင် ရောက်နေပြီလား .. အရင်ခေတ်တုန်းကတောင်မှ အဆင့်လွန်လူငယ်နည်းနည်းလောက်ပဲ ဒီလိုမျိုးလုပ်နိုင်တာ”
ကောင်းကင်နတ်ဘုရားသစ်ပင်ကြီး၏ သဘောထားမှာ ချက်ချင်းပင် ပြောင်းလဲသွားလေသည်။ သူ ဤလူငယ်လေးနောက်လိုက်သွား၍ရသည်ဟု သူခံစားနေရသည်။
ထို့နောက်တွင် လူအိုကြီးနှင့်လူငယ်လေးတို့ စတင်ဆွေးနွေးကြလေသည်။
ကောင်းကင်နတ်ဘုရားသစ်ပင်ကြီးသည် ယိမ်းထိုးနေပြီး ထိုရွှေရောင်သစ်ရွက်များသည် ဝိုင်၏ရနံ့သင်းပျံ့နေသည့် မြူအနည်းငယ်ကို ထုတ်လွှတ်လိုက်ကာ ရှီဟောင်ကို တစ်ခွက်သောက်ရန် ဖိတ်ခေါ်နေလေသည်။
“ဒါက လျှပ်စီးအတိဒုက္ခကိုတော့ မထိခိုက်စေဘူးမလား”
“မစိုးရိမ်ပါနဲ့ .. ဒါက ဝိုင်အဖြစ်လုပ်ထားတဲ့ ကောင်းကင်နဲ့ကမ္ဘာမြေကြီးရဲ့ မြူပဲ” သစ်ပင်အိုကြီး ပြောလိုက်သည်။
ဤမျှ ချောချောမွေ့မွေ့ဖြစ်သွားလိမ့်မည်ဟု ရှီဟောင် မထင်ထားခဲ့ပေ။ ဤသစ်ပင်အိုကြီးကို သူနှင့်ခေါ်သွားနိုင်ချေရှိနေလေပြီ။
သူသည် အလွန်မျက်စိပသာဒဖြစ်လွန်းသောကြောင့် သူသာ ရှီဟောင်နောက်လိုက်သွားလျှင် သူ့ကို လာလုမည့်ဂိုဏ်းများ ရှိနိုင်ကြောင်း ထိုသစ်ပင်မှ ရှီဟောင်အား ပြောလိုက်သည်။
သူသည် ကျုံ့ကာ မှော်ပစ္စည်းထဲသို့ ဝင်နိုင်သော်လည်း ဤသည်မှာ သူ၏ကြီးထွားနှုန်းကို ထိခိုက်နိုင်ပြီး ကောင်းကင်နတ်ဘုရားသစ်သီးများလည်း အလွယ်တကူ ကြွေကျလာနိုင်သည်။ ဤသည်မှာလည်း ကောင်းသည့်နည်းလမ်းမဟုတ်ပေ။
ရှီဟောင်မျက်မှောင်ကြုံ့ကာ ပြောလိုက်သည်။ “တစ်ခြားနည်းလမ်းမရှိတော့ဘူးလား”
ဤသစ်ပင်မှာ အကြီးကြီးဖြစ်နေသောကြောင့် နတ်နန်းဂိုဏ်း၊ ထာဝရနန်းတော် သို့မဟုတ် မြေအောက်လောကကဲ့သို့သော နေရာမျိုးတွင် စိုက်ပျိုးခြင်းမဟုတ်ပဲ သူ့လက်ထဲတွင် ထားပါက အခြားသူများ လောကတက်လာနိုင်သည်သာ။
“မင်း အလုံးစုံသက်ရှိမြေကြီးကို ရှာနိုင်ရင်တော့ ငါတစ်ပေလောက်ကျုံ့လိုက်ရင်တောင်မှ ငါ့ရဲ့တာအိုကို ရှေ့ဆက်သွားလို့ရအောင် လုပ်နိုင်တယ် .. အသီးတွေလည်း တစ်လုံးပြီးတစ်လုံး သီးအောင် လုပ်လို့ရတယ်”
“ကျွန်တော့်မှာ အလုံးစုံသက်ရှိမြေကြီးရှိတယ်” ရှီဟောင်ပြောလိုက်၏။ ကျွင်းသောက်ထံမှ သူထိုမြေကြီးရခဲ့သော်လည်း သူယုန်ဖြူလေးကို လက်ဆောင်အဖြစ် ပေးလိုက်လေပြီ။
ဤရှေးဟောင်းမြေ၏ အတွင်းပိုင်းတွင်လည်း အလုံးစုံသက်ရှိမြေကြီးရှိကြောင်း ကောင်းကင်နတ်ဘုရားသစ်ပင်မှ ရှီဟောင်အား ပြောလိုက်သည်။ ဤသည်မှာလည်း ယခင်ခေတ်မှ လျှို့ဝှက်ချက်တစ်ခုပင်။
ရှီဟောင် ထိုနေရာသို့ ဆက်သွားလိုက်သည်။ ထိုနေရာ၌ အလုံးစုံသက်ရှိမြေကြီးရှိနေသောကြောင့် သူဤအခွင့်အရေးကို လက်လွတ်မည်မဟုတ်ပေ။ သူသာ ထိုမြေကြီးကိုရှာနိုင်လျှင် အခြားသူများသိသွားမည်ကို စိတ်ပူစရာမလိုပဲ ဤသစ်ပင်ကြီးကို သယ်ထုတ်သွား၍ရလေပြီ။
သို့သော်လည်း ထိုနေရာသည် အလွန်အန္တရာယ်များပြီး သူပင် မသွားရဲကြောင်း ကောင်းကင်နတ်ဘုရားသစ်ပင်မှ ထပ်ခါထပ်ခါ သတိပေးလိုက်သည်။ လမ်းတစ်လျှောက်တွင် စွမ်းအားအကြီးဆုံး လျှပ်စီးအတိဒုက္ခရှိနေခြင်းပင်။
ရှီဟောင်ပြုံးလိုက်၏။ အခြားသူများအတွက် သေတွင်းဖြစ်သော်လည်း သူလုံးဝမကြောက်မိပေ။
ဤတောင်ကြောတွင် အချို့နေရာများမှာ အပင်များပေါများကာ ငြိမ်းချမ်းနေသော်လည်း အခြားနေရာများတွင်မူ မြေကြီးများမှာ မည်းတူးနေပြီး လျှပ်စီးများလည်း အဆက်မပြတ်ကျရောက်လာသည်။
ရှီဟောင် မျက်မှောင်ကြုတ်လိုက်၏။ ဤအတွင်းပိုင်းတွင်ရှိနေသည့် လျှပ်စီးအတိဒုက္ခမှာ တကယ်ပင် ကြောက်စရာကောင်းလှသည်။ လျှပ်စစ်တန်းများဖြင့် ဖြစ်လာသည့် သက်ရှိအချို့လည်း ရှိနေပြီး ထိုအကောင်များသည် သူ့ထံသို့ တရှိန်ထိုး ပြေးလာနေလေ၏။
ရက်ပေါင်းများစွာ သွားပြီးသည့်နောက်တွင် သန့်စင်သည့်မြေတစ်ခုကို ဆက်သွယ်ထားသည့် ကျောက်တံတားလေးကို သူတွေ့လိုက်ရသည်။ ထိုမြေထဲတွင်ရှိနေသည့် အပင်များမှာ ရောင်စုံအလင်းများ တောက်ပနေလေသည်။
ရှီဟောင်သည် အပြာရောင်ကျောက်တံတားပေါ်တက်လိုက်ပြီး အထဲဘက်သို့ ဆက်သွားလိုက်သည်။ နောက်ဆုံးတွင် သူမည်းတူးသွားသည်အထိ လျှပ်စီးတစ်ခု ကျရောက်လာလေသည်။ သာမန်လူသာဆိုပါက ဤနေရာတွင် ပေါက်ကွဲသွားလောက်လေပြီ။
အတော်လေးဝေးနေသေးသော်လည်း ထိုသန့်စင်သည့်မြေထဲမှ ပုံမှန်မဟုတ်သည့်မြင်ကွင်းများကို သူမြင်နေရလေပြီ။
“အလုံးစုံသက်ရှိမြေကြီး” ရှီဟောင် ပျော်ရွှင်စွာ အော်ဟစ်လိုက်သည်။
တစ်ချိန်တည်းမှာပင် သူအလွန်ပျော်ရွှင်သွားရသည်။ အဘယ်ကြောင့်ဆိုသော် အလုံးစုံသက်ရှိမြေကြီးမှ ထူးဆန်းသည့်မြင်ကွင်းများ ပြုလုပ်နေသောကြောင့်ပင်။
ထိတ်လန့်စရာအကောင်းဆုံးမှာ ရောင်စုံအလင်းများသည် ကြေးမုံတစ်ခုကဲ့သို့ဖြစ်လာပြီး အမျိုးသမီးတစ်ယောက်ပုံကို ပြနေလေ၏။
“ဘာလို့ ရင်းနှီးနေသလို ခံစားနေရတာလဲ” ရှီဟောင် ချက်ချင်းဆွံ့အသွားရ၏။ ဤလူကို ရင်းနှီးနေသည်ကို သူ ခံစားနေရသည်။