သုခကမ္ဘာက ရှီဟောင် - Chapter - 1293 ကျောင်းထဲဝင်ခြင်း
တောင်ဂိတ်တံခါးထဲတွင် တောင်ထိပ်များတစ်ခုနှင့်တစ်ခု ဆင့်နေပြီး အဖြူရောင်မြူများလည်း ရစ်ဆိုင်းနေသည်။
ယခုအချိန်တွင် ယွမ်ချင်းကဲ့သို့ စွမ်းအားကြီးသည်သူပင်လျှင် စွမ်းအင်တစ်မျိုးမျိုးဖြင့် တိုက်ခိုက်ခံလိုက်ရသလို တုန်ယင်သွားလေသည်။ ထို့နောက် သူသည် တိုက်ခိုက်မှုကို ခုခံရန်အတွက် အဆုံးမရှိသည့် ရွှေရောင်အလင်းများကို ထုတ်လွှတ်လိုက်လေ၏။
“တော်ပြီ .. ယွမ်ချင်း .. ပြန်လာခဲ့တော့..”
ကျောင်းအတွင်းပိုင်းတွင် ကျောက်စိမ်းနန်းတော်များ၊ နတ်ကျွန်းများ ရှိနေသည်။ ထိုနေရာဘက်မှ အသက်ကြီးသည့်အသံတစ်သံထွက်ပေါ်လာပြီး သူ့အားခေါ်လိုက်လေသည်။
အသံကိုနားထောင်လိုက်သည်နှင့် ဤသည်မှာ ယွမ်ချင်းကို နှစ်သက်သည့်သူဖြစ်ကြောင်း သိနိုင်သည်ပင်။
ရွှီး..
ရောင်စုံအလင်းတန်းများ တောက်ပလာပြီးနောက် သူထိုနေရာမှ ပျောက်ကွယ်သွားကာ ကျွန်းတစ်ခုထဲသို့ ဝင်ရောက်သွားလေသည်။
တောင်ဂိတ်တံခါးအပြင်ဘက်တွင်ရှိနေသည့် သူများအားလုံး ဤမြင်ကွင်းကို မြင်လိုက်ရပြီး ထိတ်လန့်သွားကြလေသည်။
အချို့သူများမှာ ယွမ်ချင်းကိုသိနေကြသည်ပင်။ ဤလူသည် နာမည်ကြီးကာ အနန္တကောင်းကင်တွင် အထင်ကြီးစရာကောင်းသည့်လူတစ်ယောက်ပင်။
အခြားသူများမှာ သူယခုတလော ဘာလုပ်ထားသည်ကိုသိနေသည်ပင်။ သူသည် လေကလန်ကို ကူညီပြီး အဆင့်နိမ့်နယ်မြေမှ ဂျီးနီးယပ်စ် ဟွမ်ကို ၁၀ နှစ်ဖိနှိပ်ထားသည်ဟု ပြောကြလေသည်။ ဤသည်မှာ ကျောင်း၏ဆန္ဒကို ဆန့်ကျင်ပြီး လုပ်လိုက်ခြင်းပင်။
ပုံမှန်ဆိုလျှင် မည်သူက ဤကဲ့သို့ လုပ်ရဲမည်နည်း.. သို့သော်လည်း သူလုပ်ခဲ့သည်ပင်။ ထို့အပြင် သူသည် ဟွမ်ကို မူလရှေးဟောင်းမိုင်းတွင်းသို့ ပို့ခဲ့သေးသည်။ ဟွမ်မှာ ယနေ့ထိ ပြန်ရောက်မလာသေးပဲ သေသလား ရှင်သလားပင် မသိရတော့။
ဟွမ် အသက်မရှင်တော့ဘူးဟု အားလုံးယုံကြည်နေကြသည်အထိပင်။ သူ မူလရှေးဟောင်းမိုင်းတွင်းထဲသို့ ဝင်သွားသည်မှာ ရက်အတော်ကြာနေပြီဖြစ်သော်လည်း ပြန်ထွက်လာခြင်းမရှိသောကြောင့် အားလုံးက သူသေပြီဟု ယုံကြည်လိုက်ကြခြင်းပင်။
ပြောရမည်ဆိုလျှင် ယွမ်ချင်း၏ယုံကြည်မှုနှင့် စွမ်းအားမှာ အခြားသူများအား ကြောက်လန့်စေသည်သာ။ သူသည် အလားအလာကောင်းမွန်လှသည့် လူငယ်လေးကို သေတွင်းထဲပို့ခဲ့သော်လည်း သူသည် ဤကိစ္စအတွက် ဘာမှပြန်မပေးဆပ်ရပဲ ဤနေရာကို လွှမ်းမိုးနေနိုင်ဆဲပင်။
သို့သော် သိသည်ကသိသည်၊ ကြားသည်ကကြားသည်ပင်။ မည်သူမှ ဤအကြောင်းကိုပြောပြီး ယွမ်ချင်းအား ရန်မစရဲကြ။
“ယွမ်ချင်းက ဂျီးနီးယပ်စ်တစ်ယောက်ကို တားမြစ်ခဲ့တယ် .. သူကတစ်ခုခုပဲ .. ကြည့်ရတာ သူအပြစ်တောင် အပေးမခံရလောက်ဘူးထင်တယ်..”
ဝမ်ရှီး လူအုပ်ကြီးကို မျက်လုံးဝေ့ကြည့်ကာ ပြောလိုက်သည်။
ခဏကြာပြီးသည့်နောက်တွင် လေထဲ၌ ကျယ်လောင်သည့်အသံတစ်သံထွက်ပေါ်လာပြီးနောက် ယွမ်ချင်းပြန်ပေါ်လာလေသည်။ သူ၏မျက်နှာမှာ အနည်းငယ်ဖြူဖျော့နေသော်လည်း သူသည် အပြစ်ပေးခံခဲ့ရခြင်းမဟုတ်ပေ။
ထို့အပြင် သူခေါ်လာခဲ့သည့်တပည့်လေးမှာ ကျန်ခဲ့ပြီး မောင်းထုတ်ခြင်းမခံရပေ။
ရှီဟောင်ဤသည်ကို ကြည့်ပြီး ဒေါသထွက်လာရသည်။
ယွမ်ချင်းသည် သူ့အား လမ်းပျောက်သွားအောင်လုပ်ခဲ့ပြီး ယခုဆိုလျှင် အားလုံးမှာ သူသေသွားပြီဟု ထင်နေကြလေပြီ။ သို့သော် ယွမ်ချင်းသည် အပြစ်မပေးခံရသည့်အပြင် သူခေါ်လာသည့် တပည့်ကိုလည်း ကျောင်းမှ လက်ခံလိုက်သည်။
မတရားခံခဲ့ရသည့် ရှီဟောင်သည် တောင်ဂိတ်တံခါးအပြင်ဘက်တွင်ရှိနေဆဲဖြစ်သော်လည်း အပြစ်လုပ်ထားသည့်သူကတော့ ကျောင်းသားတစ်ယောက်ကိုခေါ်လာပြီး အဖိုးတန်သည့်နေရာတစ်နေရာကို ရသွားလေပြီ။
ထို့အပြင် နောက်ကျသည့်သူများကို လက်မခံတော့ဘူးဟု ပြောနေကြသဖြင့် ရှီဟောင် ကျောင်းထဲဝင်ခွင့်မရနိုင်တော့။
ဤကောင်းကင်နတ်ဘုရားကျောင်းကို ဝင်၍မရတော့သဖြင့် သူဤနေရာတွင် ရှိရန်မလိုတော့။ သူလှည့်ထွက်သွားရန်ပြင်လိုက်သည်။
သို့သော် ကျောင်းထဲသို့ ပို့ခံလိုက်ရသည့်သူမှာ ယွမ်ချင်းအချစ်ဆုံးမျိုးဆက်တစ်ယောက်ဖြစ်သည်ဟု ကြားလိုက်ရသည့်အချိန်တွင် သူ ရပ်တန့်လိုက်သည်။
ဤသည်မှာ သူ၏ရန်သူဖြစ်သောကြောင့် သူ တစ်ခုခုတော့ လုပ်ရမည်ပင်။ သူသည် ယွမ်ချင်းနှင့် သူ့ကိုစေခိုင်းသည့်သူအား မသတ်နိုင်သောကြောင့် သူတို့၏မျိုးဆက်မှ စရမည်ပင်။
ဤလူများ သူ့အား ၁၀ နှစ်ကြာဖိနှိပ်ထားလိုခြင်းမှာ ဤမျိုးဆက်အတွက် လမ်းကြောင်းဖောက်ရန်ဖြစ်သောကြောင့် သူတို့မျှော်လင့်ချက်များကို သူရိုက်ချိုးရမည်ပင်။
သူ ကောင်းကင်နတ်ဘုရားကျောင်းကို ဝင်စရာမလို။ သူဤနေရာတွင် အချိန်တစ်ခုထိနေပြီး ထာဝရတာအိုအရင်းအမြစ်များရနိုင်လျှင်လည်း မဆိုးပေ။
“ကောင်းပြီလေ .. ကျွန်မနောက်တစ်လှမ်းဆုတ်ပေးလိုက်မယ် .. ရှင့်ကို နောက်လိုက်အဖြစ်မခေါ်ပဲနဲ့ တာအိုလေ့လာဖို့ ဖိတ်ခေါ်တယ် .. ရှင် ဘယ်လိုထင်လဲ..”
ရှီဟောင် တိတ်ဆိတ်နေသည့်အချိန်တွင် နတ်သမီးဝမ်ရှီး ရုတ်တရက်ပင် ဤကဲ့သို့ပြောလိုက်လေ၏။
ဤသည်မှာ ဘယ်လိုလုပ် ပွက်လောမရိုက်ပဲ နေမည်နည်း.. ဒီအခြေအနေက အရမ်းကောင်းလွန်းတယ်လေ မဟုတ်ဘူးလား .. သူ့ကို အစေခံမပြောနှင့် နောက်လိုက်အဖြစ်တောင် မဖိတ်ခေါ်ပဲ တန်းတူထားတာ ဖိတ်ခေါ်လိုက်ခြင်းပင်။
ဝမ်ရှီးသည် နာမည်ကြီးသည့် နတ်သမီးတစ်ယောက်ဖြစ်ပြီး သက်ရှည်မိသားစုတွင်မွေးဖွားလာကာ ထာဝရသက်ရှိအစစ်၏မျိုးဆက်ဖြစ်သည်။ သို့သော် သူမသည် ဤကဲ့သို့နှိမ့်ချကာ ဤလူငယ်လေးကို ဖိတ်ခေါ်လိုက်ခြင်းကြောင့် အားလုံး ထိတ်လန့်သွားရလေသည်။
လူများစွာသည် ရှီဟောင်အား ရန်လိုစွာ ကြည့်လာကြလေ၏။ အပြင်လူများပင်မဟုတ် ကောင်းကင်နတ်ဘုရားကျောင်း၏ တပည့်များပင်လျှင် အလွန်မနာလိုစွာ ကြည့်လာကြလေသည်။
“ဒီငတုံးကောင်က ကျောင်းကိုဝင်ဖို့အရည်အချင်းတောင်မရှိဘူး .. သူက ထာဝရစွမ်းအင်ကိုတောင် မကျင့်ကြံထားတဲ့ဟာကို သူ့ကိုဘာလို့ ဒီလိုမျိုး ဆက်ဆံနေရတာလဲ..”
လူအုပ်ကြီးမှာ ဤသည်ကို လက်ခံနိုင်ရန် ခက်ခဲနေလေသည်။
“ဒီလိုမျိုးအရည်အချင်းမရှိတာကို သူက မမလေးဝမ်ရှိးနဲ့ဘာတွေ ဆွေးနွေးမှာလဲ .. သူက အဲဒီတာအိုကျမ်းစာတွေကို နားလည်နိုင်မှာမို့လို့လား..” တစ်စုံတစ်ယောက်မှ ပြောလိုက်သည်။
“ဟား ဟား..” လူတစ်ယောက်သည် ရယ်မောကာ ခေါင်းခါလိုက်ပြီးနောက် “မင်းတို့အားလုံးက တကယ်ကို ခေါင်းမာနေကြတာပဲ .. မင်းတို့ကြည့်တဲ့အမြင်ကိုပြောင်းကြည့်လိုက် .. အဲဒါဆိုရင် အားလုံးအဓိပ္ပာယ်ရှိသွားလိမ့်မယ်..”
“ခင်ဗျားဘာကိုဆိုလိုချင်တာလဲ…”
“ဒီလူရဲ့ အရည်အချင်းက မလုံလောက်သေးဘူး .. အဲဒီတော့ မမလေးဝမ်ရှိးက သူ့ဘေးနားမှာထားပြီးတော့ သူနဲ့တဖြည်းဖြည်းချင်း ရှင်းချင်တာ .. ဂုဏ်သရေကြီးမားတဲ့ သက်ရှည်မိသားစုက မမလေးက တစ်ခြားလူတစ်ယောက် သူ့ကိုငြင်းတာကို ဘယ်လိုလုပ်သည်းခံနိုင်မှာလဲ .. စောင့်ကြည့်နေလိုက် .. မကြာခင်မှာ ငါတို့ပြဇာတ်ကောင်းကောင်းကြည့်ရတော့မယ်..” ထိုလူအပြုံးလေးဖြင့် ပြောလိုက်သည်။
သူထိုကဲ့သို့ ရှင်းပြလိုက်သည်နှင့် အခြားသူများသည် ခေါင်းတညိမ့်ညိမ့်ပင် ဖြစ်သွားလေ၏။
ထို့ကြောင့် ဂိတ်တံခါးအတွင်းတွင်ရှိနေသည့် တပည့်များလည်း တည်ငြိမ်သွားကြကာ ရန်လိုသည့်အငွေ့အသက်ထုတ်လွှတ်ခြင်း မရှိတော့ပေ။ ထိုအစား သနားသည့်အရိပ်အယောင်များသာ ထွက်ပေါ်လာလေသည်။
ရှီဟောင်သည် တစ်ခဏခန့်စဉ်းစားပြီးနောက် သဘောတူလိုက်သည်။
“ဘုရားရေ .. မတရားလိုက်တာ .. သူ့ရဲ့တွန့်ဆုတ်နေတဲ့ပုံစံကို ကြည့်လိုက်ဦး .. ဒီကောင် တမင်သက်သက်လုပ်နေတာ..” အနီးအနားမှ လူများ ဒေါသတကြီး ပြောလိုက်ကြလေသည်။
သို့သော် ခဏကြာပြီးသည့်နောက်တွင် တပည့်များကြားမှ ပြောသည့်စကားများ ပျံ့လွင့်လာလေသည်။ သူတို့အားလုံးသည် ရှီဟောင်ကို အံ့အားသင့်စွာ ကြည့်လာကြလေသည်။
သူတို့ပြောနေသည့်စကားများကို ကြားလိုက်ရသည့်အချိန်တွင် ဝမ်ရှီးကိုမော့ကြည့်လိုက်သည်။ ဒီဝမ်မိသားစုက မမလေးက သူ့ကို နှိပ်စက်ချင်တာလား..
ဝမ်ရှီးသည် သူ့အား မရှင်းမလင်းပင် ပြုံးပြလိုက်လေ၏။
ရှီဟောင် သူမကိုကြည့်ကာ အနည်းငယ် စဉ်းစာလိုက်သည်။ တစ်ဖက်လူဤကဲ့သို့လုပ်နေသည်မှာ သူ့ခေါင်းပေါ်မှ စိန်ခေါင်းပတ်ကြောင့်ဖြစ်နိုင်သလို သူငြင်းလိုက်သောကြောင့်လည်း ဖြစ်နိုင်သည်။ မည်သို့ပင်ဖြစ်စေ သူမသည် သူ့အား အလွတ်ပေးမည်မဟုတ်ပေ။
ဒါက တိုက်ခိုက်ရုံပဲမလား .. ဒါမှမဟုတ် တစ်ခြားတိုက်ပွဲတစ်မျိုးပဲ မဟုတ်ဘူးလား .. ရှီဟောင်ဘာကိုမှမကြောက် .. သူနှိပ်စက်ခံရမည်ကိုလည်း သူကြောက်နေမည်မဟုတ်ပေ။
“အဲဒါဆိုလည်း သွားကြစို့..” ရှီဟောင်ပြောလိုက်သည်။
ဤသည်မှာ ဝမ်ရှီးနောက်မှ ချောမောခန့်ညားသည့်လူငယ်လေးကို မျက်မှောင်ကြုတ်သွားစေလေသည်။ ဘယ်သူက သခင်၊ ဘယ်သူက အစေခံလဲ ..
ဝမ်ရှီးနောက်မှ မိန်းမပျိုလေးလည်း အနည်းငယ်စိတ်ဝင်စားနေသည်ပင်။ မကြာခင် သူမပြဇာတ်ကောင်းကောင်းကြည့်ရတော့မည်ဟု ခံစားနေရသည်။ ဤလူငယ်လေးသာ ဝင်လိုက်ပါက လှုပ်ခတ်လာသည့်ကိစ္စများ သေချာပေါက် များစွာ ရှိနေမည်ပင်။
အခြားသူများမှာမူ ဆွံ့အနေကြလေသည်။
“ကျွန်မ နောက်ထပ်နောက်လိုက်နှစ်ယောက်ရွေးမယ်..” ဝမ်ရှီး၏အသံမှာ နူးညံ့ငြင်သာပြီး နားထောင်ကောင်းလွန်းလှသည်။
အနီးအနားတွင်ရှိနေသည့်လူများ လှုပ်လှုပ်ရှားရှားဖြစ်သွားလေသည်။
ခဏကြာပြီးသည့်နောက်တွင် ဝမ်ရှီး ယောက်ျားလေးနှင့် မိန်းကလေးတစ်ယောက်ကို လက်ညှိုးထိုးလိုက်သည်။ သူတို့သည် ထာဝရစွမ်းအင်မရှိရုံကလွဲလျှင် သူတို့၏ကျင့်ကြံဆင့်မှာ ကောင်းကင်နတ်ဘုရားကျောင်းတွင်ရှိနေသည့် သူများနှင့် ယှဉ်နိုင်သည်ပင်။
“ပြီးပြီလား..” ရှီဟောင်မေးလိုက်၏။
ဤသည်မှာ ဝမ်ရှီးကိုပင် ဆွံ့အသွားစေလေ၏။ ဒီကောင်က သူမကို သူနဲ့တန်းတူညီတူလို့ သဘောထားနေတာလား.. သူမက သူ့ကိုနည်းနည်းလောက်ယဉ်ကျေးပြလိုက်တာနဲ့ သူက တကယ်ထင်နေတာပဲ..
“ပြီးပြီ..” ယွမ်ရှီး ခေါင်းညိမ့်ပြလိုက်သည်။
ရှေးဟောင်းထင်ရှူးပင်များသည် ရှေးဟောင်းသားရဲများကဲ့သို့ပင်။ သူတို့၏သစ်ကိုင်းများမှာ မြေကြီးကိုပင် ထိတော့မည်။
ဤရှေးဟောင်းသစ်ပင်အားလုံး ရှိနေသည်မှာ နှစ်ပေါင်း ထောင်ပေါင်းများစွာရှိနေပြီဖြစ်သော်လည်း သူတို့ထံတွင် ဝိညာဉ်ဖြစ်တည်လာခြင်းမရှိပဲ သစ်ပင်များသာဖြစ်နေသည်။
အချို့လူများပြောကြသည်မှာ ယခင်ကစစ်ပွဲတွင် ကြွေကျလာသည့်ကြယ်များနှင့် ကျွမ်းကျင်သူများ၏သွေးများရောနှောသွားသောကြောင့် ဤရှေးဟောင်းသစ်ပင်များ ဝိညာဉ်မဖွံ့ဖြိုးနိုင်ခြင်းပင်။
“ညီမလေးဝမ်ရှီး .. ညီမလေးက နောက်လိုက်နှစ်ယောက်နဲ့ တာအိုရောင်းရင်းတစ်ယောက်ကို ဖိတ်ခေါ်ခဲ့တာလား..” ခပ်ဝေးဝေးမှ နူးညံ့သည့်ရယ်သံတစ်ခု ထွက်ပေါ်လာကာ မင်းသမီးယောင်ယွဲ့ပေါ်လာလေ၏။ သူမကို လရောင်များဝန်းရံထားကာ သူမအသားအရေလည်းနူးညံ့လှသည်။
သူမသည် ရှီဟောင်ကိုကြည့်ကာ ရယ်မောလိုက်ပြီးနောက် ဝမ်ရှီးကို ပြန်ပြောလိုက်သည်။ “နောက်နေ့ကျရင် တာအိုဆွေးနွေးဖို့ ဒီတာအိုရောင်းရင်းလေးကို ဖိတ်ချင်တယ်..”
“ရတာပေါ့..” ယွမ်ရှီးခေါင်းညိမ့်၍ပြောလိုက်သည်။
သက်ရှည်မိသားစုမှ မမလေးများကြားထဲတွင် ပြင်းထန်သည့် ယှဉ်ပြိုင်မှုများရှိနေသည်မှာ သိသာလှသည်။ သူတို့သည် နောက်လိုက်ရွေးချယ်လျှင်ပင် ယှဉ်ပြိုင်နေကြသည်သာ။
ထို့နောက် ရှီဟောင်က လုထော်ကို တွေ့လိုက်ရသည်။ ဤလူမှာ အလွန်ကြောက်စရာကောင်းလှသည်။ သူ၏အကြည့်တစ်ချက်ပင်လျှင် မိုးကြိုးပစ်ချခံလိုက်ရသကဲ့သို့ဖြစ်သွားသည်ပင်။
သို့သော်လည်း ရှီဟောင်သည် သူ့ကိုဂရုစိုက်မနေပဲ ဖုန်းရှင်းထျန်ကို ကြည့်လိုက်သည်။ ဤသည်မှာ လေကလန်မှ မျိုးဆက်လေးပင်။ ဤကလန်သည် သူ့အား ရှင်းချင်နေသောကြောင့် ဤလူနှင့် သူသေကိုယ်သေတိုက်ရလည်း ကိစ္စမရှိ။
အားလုံးမှာ ဤလူ မည်မျှကြောက်စရာကောင်းကြောင်း၊ ကောင်းကင်ဘုံကိုးခုနှင့် သူနှင့်ယှဉ်နိုင်သည့် အဆင့်တူသည့်သူကို ရှာတွေ့နိုင်ရန် ခက်ခဲကြောင်း ပြောနေကြသော်လည်း ရှီဟောင် မကြောက်ပေ။
တောင်ထိပ်များမှာ တစ်လုံးနှင့်တစ်လုံးဆင့်နေ၏။ အချို့မှာ အနက်ရောင်ဖြစ်ပြီး အချို့မှာ အနီရောင်အလင်းများထုတ်လွှတ်နေသည်။ အခြားတောင်များမှာမူ ခရမ်းရောင်စွမ်းအင်များ ထုတ်လွှတ်နေသည်။ ထိုတောင်များအားလုံး၏ တူညီသည့်အချက်မှာ ကောင်းကင်နှင့် ကမ္ဘာမြေကြီးဝိညာဉ်စွမ်းအင်များပြားသောကြောင့်ပင်။
ဤသည်မှာ အသန့်စင်ဆုံးကျင့်ကြံခြင်း နယ်မြေပင်။
ဤပုံစံဖြင့် ကောင်းကင်နတ်ဘုရားကျောင်းထဲသို့ ဝင်လာရလိမ့်မည်ဟု ရှီဟောင် မထင်ထားခဲ့ပေ။