သုခကမ္ဘာက ရှီဟောင် - Chapter - 1296 အလွန်အမင်း စိတ်ရှုပ်ထွေးရခြင်း
လူအုပ်ကြီးမှာ တစ်ယောက်ကိုတစ်ယောက် ဆွံ့အစွာ ကြည့်လိုက်ကြလေသည်။ ဒီကောင်က တစ်ခုခုပဲ .. သူက ဒီလိုမျိုးတောင်ပြောရဲတာလား..
သူ့မှာ ဘာအရည်အချင်းရှိနေလို့လဲ .. သူက ကောင်းကင်နတ်ဘုရားကျောင်းကိုတောင် မဝင်နိုင်ပဲနဲ့ ဒီလိုမျိုးလာလုပ်ပြနေသေးတယ်..”
“ကောင်းကင်နတ်ဘုရားကျောင်းထဲမှာ တပည့်အချင်းချင်းသတ်ဖို့ ခွင့်မပြုဘူး..” ဝမ်ရှီး အလွန်တည်ငြိမ်နေသည့်လေသံဖြင့်ပြောလိုက်သည်။
ရှီဟောင်သည် သူနားလည်ကြောင်း ခေါင်းညိမ့်ပြလိုက်လေ၏။ “ငါက တပည့်မဟုတ်ဘူးဆိုတော့ တစ်ယောက်၊ နှစ်ယောက်လောက် သတ်လိုက်လည်း ကိစ္စ မရှိဘူးမလား..”
အခြားသူများမပြောနှင့် ဝမ်ရှီးပင်လျှင် အနည်းငယ် ဆွံ့အသွားရ၏။ အခြားသူများကို သတ်၍မရကြောင်း ဤကောင်ကို ပြောပြချင်ခြင်းဖြစ်သော်လည်း အဆုံးသတ်တွင်တော့ နားလည်မှုလွဲသွားခဲ့သည်။
အခြားသူများမှာမူ မျက်နှာပျက်သွားကာ ရှီဟောင်ကို တကယ်ဒေါသထွက်လာကြလေ၏။
သူတို့မျက်လုံးထဲတွင် သူသည် အမှိုက်တစ်ခုထက် မပိုပေ။
“ငတုံးကောင် .. မင်းက ကောင်းကင်နတ်ဘုရားကျောင်းထဲကိုတောင် မဝင်နိုင်တာ .. မင်းမှာ ဘာအရည်အချင်းရှိလို့ ငါတို့ကို ဒီလိုမျိုးလာပြောနေတာလဲ..”
“မင်းဒီလိုမျိုးလုပ်လိုက်ရင် နာမည်ကြီးလာမယ်လို့ ထင်နေတာလား .. မင်း အကျိုးဆက် ဆိုတဲ့စကားလုံးကို သင်ဖို့လိုသေးတယ် .. အချိန်ကျလာရင် မင်းအသက်ကို ပြန်ပေးဆပ်ရလိမ့်မယ်..”
ဤလူများ မကျေမနပ်ဖြစ်သွားကြသည်။ သူတို့ကို လုထော်၊ ဖုန်းရှင်းထျန်နှင့် အခြားသူများသာ အထင်သေးပါက သူတို့နားလည်နိုင်သေးသည်။ သို့သော်လည်း ဤအရှုံးသမားက သူတို့ကို ဤကဲ့သို့ ဂုဏ်ချရဲသေးသည်။
“ငါ သူ့ကို ရှင်းလိုက်မယ် .. ကောင်းကင်နတ်ဘုရားကျောင်းထဲကို ရောက်လာရင် ဘယ်လိုမျိုး ပြုမူနေထိုင်သင့်လဲဆိုတာ သူ မသိသေးဘူး .. သူ့ကို သင်ပြပေးဖို့ လိုနေတယ် .. ငါသူ့ကို သင်ခန်းစာနည်းနည်းပေးလိုက်မယ်..” တစ်စုံတစ်ယောက်မှ ပြောပြီးလျှောက်လာလေသည်။
“ရှေးဟောင်းနတ်ဆိုးဝက်ဝံမျိုးဆက် .. ဒါကိုစားလို့ရလား ..” ရှီဟောင်သည် လျှောက်လာသည့်သူ၏မူလခန္ဓာကိုယ်ကို မြင်ပြီးနောက် ဝမ်ရှီးအား ဤကဲ့သို့ မေးလိုက်လေသည်။
လူအုပ်ကြီးမှာ ဆွံ့အသွားကာ ဘယ်လိုတုံ့ပြန်ရမလဲပင် မသိတော့..
နတ်ဆိုးဝက်ဝံကြီးမှာ အစက ဆွံ့အသွားသော်လည်း နောက်တော့ ဒေါသထွက်လာလေ၏။ ဒီကောင်က သူ့ကို သတ်စားချင်နေတာလား ..
ဤကောင်မှာ အနည်းငယ်ထူးဆန်းသည်ဟု တွေးမိပြီး လူများစွာမှာ ရယ်မောလိုက်ကြလေ၏။ သို့သော် အချို့သူများ၏မျက်နှာမှာမူ အေးစက်နေလေ၏။
“ရှင် တကယ်သတ်လို့ မရဘူး..” ဝမ်ရှီး သူ့အား ခေါင်းခါကာ ပြောလိုက်သည်။ ဤလူသည် ဤမျှမရိုးရှင်းသည်ကို သူကိုယ်တိုင်သာသိသည်။
“တကယ်ကိုပျင်းစရာကောင်းတာပဲ .. အဲဒီဝက်ဝံလက်တွေက အရမ်းကောင်းတာ .. မစားပဲနဲ့ကြည့်နေရတာက တကယ်နှမြောဖို့ကောင်းတာပဲ..” ရှီဟောင် ဝမ်းပန်းတနည်းပြောလိုက်လေသည်။
သောက်ခွေး..
သူ တကယ်မသိတာလား .. ဒါမှမဟုတ် ဟန်ဆောင်နေတာလား.. ထာဝရစွမ်းအင်ကျင့်ကြံထားသည့် နတ်ဆိုးဝက်ဝံကြီးကို ရင်ဆိုင်ရသော်လည်း သူက ဤကဲ့သို့ရိုင်းစိုင်းရဲသေးသည်။
နတ်ဆိုးဝက်ဝံကြီးသည် အလွန်ပင် ဒေါသထွက်လာသည်။ ဒီလူငယ်လေးကို စကားနဲ့ပြောနေမယ့်အစား သူ့ကို နှစ်ပိုင်းပဲ ဖြတ်ပစ်လိုက်တော့မယ်..
“ငါမင်းကို သတ်မယ်..” နတ်ဆိုးဝက်ဝံကြီးမှ ခုန်အုပ်လာလေသည်။
ရှီဟောင်သည် ဘေးဘက်သို့ ရှောင်တိမ်းလိုက်ကာ “ငါမင်းကို စားလို့မရဘူး .. ဒီနေရာက သတ်ဖြတ်တာကိုလည်း ခွင့်မပြုဘူး .. တကယ်စိတ်ဝင်စားဖို့ကို မကောင်းဘူး..”
အားလုံးမှာ ဘာပြောရမလဲပင် မသိတော့ .. သူသည် တပည့်များရှေ့တွင်ပင် မောက်မောက်မာမာပြောရဲနေသေးသည်။
နတ်ဆိုးဝက်ဝံကြီး၏ခန္ဓာကိုယ်မှ ခရမ်းရောင်အလင်းများ ထွက်ပေါ်လာလေသည်။ သူသည် လူသားပုံစံသာရှိသေးသော်လည်း သားရဲအော်ရာကို ထုတ်လွှတ်နေလေပြီ။
“ဒီနေရာကို ဘယ်သူအုပ်ချုပ်နေတာလဲ .. ဒီရူးနေတဲ့ ဝက်ဝံကြီးကို ဒီနေရာကနေ မြန်မြန်ဆွဲထုတ်လိုက်..” ရှီဟောင်ပြောလိုက်သည်။
“သူရဲဘောကြောင်သလို လုပ်နေတယ် .. ဘာလဲ ကြောက်နေပြီလား .. တိုက်တောင် မတိုက်ရဲတော့ဘူးလား..” ဘေးဘက်တွင်ရပ်နေသည့်သူများ သူ့အား လှောင်ရယ်လာကြလေသည်။
“ခင်ဗျားတို့လိုမျိုး ယင်ကောင်တွေကို ဘာကြောက်စရာရှိလို့လဲ..” ရှီဟောင်ပြန်ပြောလိုက်သည်။
ဤသည်မှာ ဤလူအားလုံးကို ချက်ချင်းပင် ဒေါသထွက်သွားစေသည်ပင်။ အားလုံးမျက်နှာပျက်သွားပြီး သတ်ဖြတ်လိုသည့်အငွေ့အသက်များကို ထုတ်လွှတ်လာလေသည်။
ရှီဟောင် ဤလူများကို အရေးမစိုက်ပဲ ဝမ်ရှီး၏ရောင်စုံအလင်းများ ထွက်ပေါ်နေသည့်ဂူထဲသို့ လျှောက်သွားလိုက်လေသည်။
ဝမ်ရှီး သူ့အား မကျေမနပ်ကြည့်လိုက်၏။ ဤကောင်က အရမ်းရင်းနှီသည့်ပုံလုပ်နေသည်။ ပိုင်ရှင်က ဤနေရာတွင်ရှိနေသေးသည်ကိုပင် သူက အထဲဝင်သွားသေးသည်။ နည်းနည်းလေးမှ ယဉ်ကျေးမှုမရှိ။
“မင်း .. ဒီကိုပြန်လာခဲ့..” နတ်ဆိုးဝက်ဝံကြီး အော်ဟစ်လိုက်၏။ သူသည် အလွန်ဒေါသထွက်နေသော်လည်း ဝမ်ရှီး၏ဂူထဲသို့ ဝင်မသွားရဲပေ။ အဘယ်ကြောင့်ဆိုသော် ထိုနေရာမှာ ကန့်သတ်ထားသည့်နေရာတစ်ခုပင်။ သူတို့အတွက်တော့ ဤသည်မှာ လုထော်နှင့် ယှဉ်နိုင်သည့် ကျွမ်းကျင်သူပင်။
“ခင်ဗျားက ပြန်လာဆိုတာနဲ့ ကျုပ်ကပြန်လာရမှာလား .. ခင်ဗျားနဲ့တိုက်လို့ ဘာကောင်းကျိုးရမှာလဲ .. ခင်ဗျားနဲ့တိုက်လို့ ကျုပ် ဘာအောင်မြင်မှုမှ မရနိုင်ဘူး .. အချိန်ကုန်တာပဲ အဖတ်တင်မယ်..” ရှီဟောင်၏စကားများမှာ အခြားသူများအတွက် နားခါးလှသည်ပင်။
“ဒါက မင်းတိုက်ရမယ့်ဟာပဲ .. မင်းက တစ်ခြားသူကို ပြန်ပေးစေချင်သေးတာလား..” နတ်ဆိုးဝက်ဝံကြီး၏မျက်လုံးများ အေးစက်နေလေပြီ။
“ခင်ဗျား ကျုပ်ကျေနပ်လောက်မယ့် ရတနာတစ်ခုကို ထုတ်ပေးရင်တော့ ကျုပ်ခင်ဗျားနဲ့ တိုက်ပေးမယ် .. မဟုတ်ရင်တော့ ဘေးဘက်သွားနေလိုက်တော့..” ရှီဟောင်ပြောလိုက်၏။
ဤလူများမှာ ဒေါသထွက်သွားရသည်။ သူနှင့်တိုက်ဖို့အတွက် သူတို့က ဆုကြေးပေးရဦးမည်.. သူတို့က ဤသည်ကို ဘယ်လိုလုပ် သည်းခံနိုင်မည်နည်း..
“ဒီမှာ .. ငါ့မှာ ကောင်းကင်နတ်ဘုရားအဆင့် လျှို့ဝှက်ရတနာနှစ်ခု ရှိတယ်..” နတ်ဆိုးဝက်ဝံမှ ပြောလိုက်သည်။
“ငါ့လက်သီးချက်က ကောင်းကင်နတ်ဘုရားအဆင့် လျှို့ဝျက်ရတနာတွေကို ဖောက်ခွဲပစ်နိုင်တယ် .. ငါက ဘာလို့ အဲဒီပစ္စည်းတွေလိုမှာလဲ .. ခင်ဗျားက ထာဝရစွမ်းအင်ကျင့်ကြံထားတဲ့ကောင်မဟုတ်ဘူးလား .. ဘာကောင်းကင်ပစ္စည်းမှ မရှိဘူးလား .. ဆင်းရဲမွဲတေနေလိုက်တာ..”ရှီဟောင်ပြောလိုက်သည်။
သူ၏အံ့အားသင့်နေသည့်မျက်နှာကိုကြည့်ကာ နတ်ဆိုးဝက်ဝံသည် သူ့မျက်နှာတစ်ခုလုံး ဖူးယောင်လာသည်အထိ ရိုက်ပစ်ချင်နေလေသည်။
“ခင်ဗျားတို့အားလုံး အဲဒီလောက်တောင် ဆင်းရဲတာလား .. ဖီးနှစ်သွေးအစစ်တို့၊ ထာဝရဆေးလုံးတို့၊ ကောင်းကင်ပညာအရိုးစာသားတို့ မရှိဘူးလား..” ရှီဟောင်မေးလိုက်သည်။
ဤသို့ပြောလိုက်သောကြောင့် ဤကောင်သည် တမင်သက်သက်လုပ်နေခြင်းဖြစ်ကြောင်း သိလိုက်ရလေပြီ။ သူက အရှက်တရားကင်းမဲ့လှပြီး မုန်းစရာကောင်းလွန်းလှသည်။
“ငါ့မှာ ခရမ်းရောင်နန်းတော်ဆေးရည်ရှိတယ်..”
ခရမ်းရောင်နန်းတော်ဆေးရည်မှာ ရှာတွေ့ရန်ခက်ခဲလှသည့် ကောင်းကင်နှင့် ကမ္ဘာမြေကြီးစွမ်းအင်ပင်။
သို့သော်လည်း ရှီဟောင်သည်နှုတ်ခမ်းကိုတွန့်လိုက်ကာ “ကျုပ်က မြင့်မြတ်တဲ့စတေးခြင်းနယ်ပယ်ရောက်နေပြီ .. ခရမ်းရောင်နန်းတော်ဆေးရည်က အဖိုးတန်တယ်ဆိုပေမယ့် ကျုပ်အတွက် အဲဒီလောက်အသုံးမဝင်ဘူး..”
“ခရမ်းရောင်နန်းတော်ဆေးရည် အမျိုးမျိုးရှိတယ် .. မင်းတွေ့ခဲ့တာက ခရမ်းရောင်အစက်အပြောက်နည်းနည်းပဲပါတဲ့ သာမန်ဟာဖြစ်လိမ့်မယ် .. တကယ်တမ်းက အဲဒီထက်အဆင့်မြင့်တဲ့ ခရမ်းရောင်နန်းတော်ဆေးရည်တွေ အများကြီးရှိတယ်..” နတ်ဆိုးဝက်ဝံပြောလိုက်သည်။
သူသည်စကားပြောနေရင်းဖြင့်ပင် ဆေးရည်ပုလင်းကို ထုတ်လာလေသည်။ ထိုဆေးရည်ပုလင်းထဲတွင် ခရမ်းရောင်နန်းတော်ဆေးရည်အပြည့် ရှိနေသည်ပင်။ သို့သော်လည်း ထိုဆေးရည်များမှာ အနည်းငယ်ထူးခြားသည်။ ခရမ်းရောင်အရည်တွင် ငါးရောင်စပ်မြူများ ထွက်ပေါ်နေလေ၏။
“ခရမ်းရောင်နန်းတော်ထာဝရမြူလား…” ရှီဟောင် ထိတ်လန့်သွားရသည်။
သီအိုရီမှတ်တမ်းများအရဆိုလျှင် ထာဝရစွမ်းအင်ရှိသည့် ခရမ်းရောင်နန်းတော်ဆေးရည်အချို့ရှိသည်။ သို့သော်လည်း ဤသည်မှာ ရှားပါးလှပြီး မြင်တွေ့နိုင်ရန် ခက်ခဲလှသည်။
နတ်ဆိုးဝက်ဝံ၏ ခရမ်းရောင်နန်းတော်ဆေးရည်မှာ ထူးခြားသော်လည်း ဒဏ္ဍာရီလာအဆင့်ထိ မဟုတ်သေး။ နည်းနည်းလိုသေးသည်။
“ကောင်းပြီလေ .. အဲဒါဆိုရင်လည်း တိုက်ကြတာပေါ့ .. ခင်ဗျားက ကျုပ်ကို ရိုးရိုးသားသားနဲ့ ဒီခရမ်းရောင်နန်းတော်ဆေးရည်ကိုပေးတယ်ဆိုတော့လည်း ကျုပ်ခင်ဗျားကို ခက်ခဲအောင် မလုပ်တော့ပါဘူး..” ရှီဟောင်သည် ခေါင်းညိမ့်ကာ အလွန်ကျေနပ်နေသည့်ပုံစံဖြင့် ပြောလိုက်လေ၏။
ရှီဟောင်သည် ဂူထဲမှ တရှိန်ထိုးထွက်ပြေးလာပြီး ပြိုင်ဘက်ကို အရင်တိုက်ခိုက်လိုက်သည်။
“ဒီလိုမျိုး လက်လွတ်စပယ်တိုက်ခိုက်နေတယ် .. တကယ်ကို သေချင်နေတာပဲ..”
“အပြောပဲရှိပြီး ဘာမှမလုပ်နိုင်တဲ့လူ…”
ဤလူအားလုံးသည် ရှီဟောင်အား အထင်သေးရှုံ့ချနေကြသည်ပင်။
သို့သော်လည်း ရှီဟောင်မှ တကယ်ကိုပင် မြန်ဆန်လွန်းလှသည်။ သူလက်မြှောက်လိုက်သည်နှင့် သင်္ကေတများထွက်လာလေသည်။ သူသည် နည်းလမ်းကြီးတစ်ခုခုကို ထုတ်သုံးတော့မည့်ပုံပင်။
တစ်ခဏခန့် တိုက်ခိုက်ပြီးသွားသည့်နောက် ရှီဟောင်စိတ်ထဲမှ သက်ပြင်းချလိုက်သည်။ ဤလူ၏အရှိန်မှာ သူ့ထက် မြန်နေသည်။ သူ လျှို့ဝှက်ပညာကို ထုတ်သုံးရန် ခက်ခဲနေသည်ပင်။
ဖုန်းး..
သူတို့နှစ်ဦးသည် အနီးကပ်ပင် တိုက်ခိုက်နေကြလေ၏။ သူတို့နှစ်ဦးကြားတွင် အလင်းများတောက်ပလာပြီး အရိုးစာသားများလည်း ထွက်ပေါ်လာလေသည်။
နတ်ဆိုးဝက်ဝံမှာ တစ်ချက်တည်းဖြင့်ပင် သွေးအန်သွားသော်လည်း သူတောင့်ခံထားလိုက်သည်။ အခြားသူများသာသိသွားပါက သူ့မျက်နှာ ဘယ်နားသွားထားရတော့မည်နည်း..
အားလုံးထိတ်လန့်သွားရလေ၏။ ဒါက ဘယ်သူလဲ .. သူက တကယ်ပဲ ကောင်းကင်နတ်ဘုရားကျောင်းကို ဝင်ဖို့ အရည်အချင်းမရှိဘူးလား..
“သူက နတ်ဆိုးဝက်ဝံနဲ့ တကယ်တိုက်နိုင်တာလား .. ဝက်ဝံကိုတောင် ဒဏ်ရာရအောင် လုပ်လိုက်သေးတာလား..” လူအချို့ ထိတ်လန့်တကြား အော်ဟစ်လိုက်သည်။
ဝုန်း..
နတ်ဆိုးဝက်ဝံ သူ၏လက်ကို လွှဲရမ်းလိုက်၏။ သူသည် ယခုအချိန်ထိ သူ၏မူလခန္ဓာကိုယ်ကို မပြသသေးပေ။ သူ့ဘေးနားပတ်လည်တွင်ရှိနေသည့် စွမ်းအင်များမှာ ပြင်းထန်ကာ စွမ်းအားကြီးလာသည်။
ထို့အပြင် သူသည် ထာဝရစွမ်းအင်တစ်ကြောင်းကိုပင် အသက်သွင်းလိုက်လေပြီ။
ရှီဟောင် ရှောင်တိမ်းလိုက်သည်။ နတ်ဆိုးဝက်ဝံပစ်လွှတ်လိုက်သည့် ထာဝရစွမ်းအင်သည် တဝူးဝူးဖြင့်ပင် သူ့ထံသို့ တရှိန်ထိုးရောက်လာလေ၏။ သာမန်လူသာဆိုလျှင် သူတို့ အစောကြီးကတည်းက ပိတ်မိနေလောက်လေပြီ။
ဤသည်မှာ ထူးဆန်းသည့်မြင်ကွင်းပင်။ သူတို့နှစ်ဦးသည် တစ်ယောက်နှင့်တစ်ယောက် တိုက်ခိုက်နေကြသော်လည်း မြင်ကွင်းမှာ ထင်ထားသည်ထက်ပင် ရိုးရှင်းနေသည်။ သူတို့နှစ်ယောက်ထိတွေ့သည်မှာ ရှားပါးသော်လည်း နတ်ခွန်အားမှာမူ အံ့အားသင့်စရာကောင်းလောက်သည်ပင်။
ရွှီး.
ရှီဟောင်၏လက်ချောင်းများ ရုတ်တရက်လှုပ်ရှားလာပြီး ထာဝရစွမ်းအင်ကို ဖြတ်ကျော်သွားလေသည်။
ဖုန်း..
ရှီဟောင်သည် အလွန်လျင်မြန်လှသည့် အရှိန်ဖြင့် နတ်ဆိုးဝက်ဝံအနားသို့ ရောက်သွားကာ ထိုဝက်ဝံအား ရိုက်ချလိုက်လေသည်။ ဝက်ဝံကြီးမှာ ကျန်းအနည်းငယ်ခန့် လွင့်ထွက်သွားပြီးနောက် သူခန္ဓာကိုယ်မြေပြင်ပေါ်သို့ ကျသွားသည်နှင့် သွေးများစွာ အန်ထွက်လာလေသည်။
ထိုတစ်ခဏတွင် အားလုံး ငေးကြောင်နေမိသွားကြသည်ပင်။
ဒါက ဖြစ်နိုင်ရဲ့လား .. ထာဝရစွမ်းအင်မကျင့်ကြံရသေးတဲ့သူက နတ်ဆိုးဝက်ဝံကြီးကို အနိုင်ယူလိုက်တာလား .. ဒါက အံ့ဩစရာကောင်းလွန်းတယ်..
ဝမ်ရှီးပင်လျှင် စိတ်လှုပ်ရှားသွားရသည်။ တရားဝင်တပည့်တစ်ယောက်က ဒီလိုမျိုးနဲ့ပဲ ရှုံးသွားတာလား .. ဒီကောင်က သူ့ရဲ့ ထာဝရစွမ်းအင်ကိုတောင် မသုံးပဲ လက်ဗလာနဲ့ပဲ တိုက်သွားတာ .. ဒါတောင်နိုင်သွားတယ် ..
“ဒီလိုလူမျိုးလည်းရှိသေးတာလား .. ထာဝရစွမ်းအင်ရှိတဲ့သူကို အနိုင်ယူသွားတာ..” တစ်စုံတစ်ယောက်မှ ရေရွတ်လိုက်သည်။
ဤသည်မှာ ကြီးမားသော အနိုင်ရရှိမှုကြီးပင်။
မျက်လုံးပေါင်းများစွာမှာ ရှီဟောင့်ထံသို့ ကျရောက်လာလေသည်။ ကောင်းကင်နတ်ဘုရားအဆင့်မှာ ငါးတစ်ကောင်က နဂါးတစ်ကောင်ဖြစ်နိုင်မယ့် အခွင့်အရေးရှိသေးတယ် .. ဒီကောင်က တစ်နေ့ကျရင်တော့ ကောင်းကင်ကို ဆန့်ကျင်နိုင်တဲ့သူ ဖြစ်လာမှာပဲ..
“အဲဒါဆိုရင် ဒီခရမ်းရောင်နန်းတော်ဆေးရည်က ကျုပ်ဟာပဲ..” ထိုသို့ပြောပြီးနောက် သူထိုဆေးရည်ကို ယူလိုက်လေသည်။
“စမ်းကြည့်ချင်တဲ့သူ ရှိသေးလား” ရှီဟောင်မေးလိုက်သည်။
“ဒီမှာရှိတယ်” တစ်စုံတစ်ယောက်မှ အော်ဟစ်လိုက်လေ၏။
“အဲဒါဆိုရင် ကောင်းကင်ရတနာတွေ ယူလာခဲ့ .. မဟုတ်ရင် ကျုပ် အချိန်ဖြုန်းမနေနိုင်ဘူး..” ရှီဟောင် တည့်တိုးပင် ပြောလိုက်၏။
ထို့နောက် ဤနေရာတစ်ခုလုံး နောက်တစ်ကြိမ် တိတ်ဆိတ်သွားပြန်လေသည်။
ဒါက အံ့အားသင့်စရာကောင်းတဲ့ပါရမီရှိတဲ့ ဂျီးနီးယပ်စ်လား .. ဒါမှမဟုတ် အရမ်းကို စိတ်ရှုပ်စရာကောင်းတဲ့လူလား .. အားလုံးမှာ အနည်းငယ် ငေးကြောင်မိသွားသည်။