သုခကမ္ဘာက ရှီဟောင် - Chapter - 1297 ဖီးနှစ် သွေးစုစည်းခြင်း
ရှီဟောင်သည် ဝမ်ရှီး ဂူထဲသို့ ဝင်သွားလိုက်သည်။ သန့်ရှင်းသည့် အပြာရောင်ကျောက်တုံးကိုတွေ့သည်နှင့် ထိုင်ချလိုက်ကာ ထိုခရမ်းရောင်နန်းတော်ဆေးရည်ကိုလေ့လာလိုက်သည်။
ဤအရာတွင် ငါးရောင်စပ်မြူများဝေ့ဝဲနေလေ၏။ ဤသည်မှာ ထာဝရစွမ်းအင်မဟုတ်သော်လည်း သေချာပေါက် သာမန်မဟုတ်ပေ။
“ထာဝရစွမ်းအင်မဟုတ်တာ နှမြောစရာပဲ..” သူအနည်းငယ် မကျေမနပ်ဖြစ်သွားရသည်။
“ကျုပ်ခင်ဗျားနဲ့ တိုက်မယ်..” ငွေရောင်သင်းခွေချပ်တစ်ကောင် သူ၏မူလခန္ဓာကိုယ်နှင့် ပေါ်လာလေသည်။
“အဓိပ္ပာယ်မရှိတာတွေ လာမပြောနဲ့ .. နတ်ရတနာကိုအရင်ထုတ်လိုက် .. မဟုတ်ရင်တော့ ငါ မင်းနဲ့ဆော့ဖို့အချိန်မရှိဘူး..” ရှီဟောင် မည်သူ့ကိုမှ မျက်နှာသာပေးခြင်းမရှိပဲ ပြောလိုက်သည်။
တရားဝင်တပည့်များအမြင်တွင် ထာဝရစွမ်းအင်မရှိသည့်သူများမှာ အဆင့်နိမ့်သည့်သူများပင်။ ယခု ရှီဟောင်အနိုင်ရလိုက်ခြင်းမှာလည်း ကံကောင်းသွားသောကြောင့်ဟု မြင်နေကြလေသည်။
ယခု သူ ဤကဲ့သို့ ပြောလိုက်သည့်အချိန်တွင် လူများစွာကို မပျော်မရွှင်ဖြစ်သွားစေလေ၏။
မည်သို့ပင်ဖြစ်စေ ဤသည်မှာ သူတို့အမြင်တွင် ‘အစေခံ’ တစ်ယောက်ပင်။ ယခုတော့ သူသည် ရိုင်းစိုင်းစွာဖြင့်ပင် သူတို့ခေါင်းပေါ် တက်ချင်နေသည်။ လူများစွာမှာ ဤသည်ကို လက်မခံနိုင်ကြပေ။
သို့သော် ဝမ်ရှီးကတော့ ဤသို့မထင်ပေ။ အဘယ်ကြောင့်ဆိုသော် ဤလူငယ် ဘယ်လောက်ထူးခြားသည်ကို သူမ သိသည်။ သေချာပေါက် အဆင့်နိမ့်သည့်သူတစ်ယောက် မဟုတ်။ ဤလူငယ်လေးထံတွင် ထာဝရစွမ်းအင် ၂ ကြောင်းရှိနေသည်။
ထို့အပြင် သူမ ဤတိုက်ပွဲကို သေချာလေး စောင့်ကြည့်ခဲ့သည်။ ရှီဟောင်သည် ထာဝရစွမ်းအင်ကို မသုံးပဲ တိုက်ခိုက်သွားသည်မှာ သေချာသည်။
“ငါ့မှာ ဂိုဏ်းခေါင်းဆောင်တစ်ဝက်အဆင့် မှော်ပစ္စည်းရှိတယ်..” ငွေရောင်သင်းခွေချပ်မှ အံကြိတ်ကာ ပြောလိုက်သည်။
ဒီကျောင်းမှာ ဘယ် ‘အစေခံ’က တရားဝင်တပည့်တွေကို စိန်ခေါ်ဖူးလို့လဲ..
“သတိထား..” သူ့ဘေးမှလူများမှ သူ့အား သတိပေးလိုက်သည်။
“ဂိုဏ်းခေါင်းဆောင်တစ်ဝက်အဆင့်မပြောနဲ့ ဂိုဏ်းခေါင်းဆောင်ပစ္စည်းအစစ်ဆိုရင်တောင် မလုံလောက်သေးဘူး .. ကျုပ် နတ်ဆေးတွေ၊ ဖီးနှစ်သွေးတွေနဲ့ အဲဒီလိုမျိုးအဆင့်တူတဲ့ပစ္စည်းပဲလိုတာ .. ခင်ဗျားမှာ မရှိရင် ကျေးဇူးပြုပြီး ထွက်သွားပေးပါ..” ရှီဟောင် ပြောလိုက်သည်။
ဤကဲ့သို့သောလေသံ၊ ဤကဲ့သို့သော အမူအရာမှာ သင်းခွေချပ်နှင့် အခြားသူများကို အူယားစေသည်ပင်။
“ငါ့မှာ ဖီးနှစ်သွေးနည်းနည်းရှိတယ် .. ငါနဲ့တိုက်..” သင်းခွေချပ်မှ အော်ဟစ်လိုက်သည်။ ထို့နောက်တွင် သူသည် အထဲဘက်တွင် နီရဲနေသည့်သွေးများကို သိုလှောင်ထားသည့် လက်သီးအရွယ်အစားပုလင်းကြည်လေးကို ထုတ်လိုက်သည်။
လုထော်၊ ဖုန်းရှင်းထျန်၊ ဝမ်ရှီးနှင့် အခြားလူအနည်းငယ်သာ သွေးကန်ထဲဝင်ကာ စိမ်ခွင့်ရှိသည်။ ကျန်သည့်သူများမှာသနားသဖြင့်ပေးသည့် သွေးအနည်းငယ်သာ ရရှိခြင်းပင်။
“အဲဒါဆိုရင်လည်း လာခဲ့လေ..” ရှီဟောင် ကျယ်လောင်စွာ ရယ်မောလိုက်ပြီး သူ့မျက်လုံးလည်း တောက်ပနေလေသည်။ သူ့ထံတွင်လည်း ဖီးနှစ်သွေးအနည်းငယ်ရှိသည်။ သူ မူလရှေးဟောင်းမိုင်းတွင် ဂျီးနီးယပ်စ်အုပ်စုထံမှ ဓားပြတိုက်၍ရခဲ့ခြင်းပင်။
သူ နောက်ထပ်စုဆောင်းရန် ဆုံးဖြတ်လိုက်၏။ တစ်နေ့ကျလျှင်တော့ သူလည်း ဖီးနှစ်သွေးထဲစိမ်ကာ သူ့အသွေးအသားများကို သန့်ရှင်းပြီး ပြန်လည်မွေးဖွားနိုင်ရမည်။
“မင်း အသက်ကို စွန့်လွတ်လိုက်တော့..” ငွေရောင်သင်းခွေချပ်အော်ဟစ်လိုက်ကာ သူ့ပါးစပ်မှ ထာဝရစွမ်းအင်ထွက်ပေါ်လာပြီး သူ့တစ်ကိုယ်လုံးကို လွှမ်းခြုံသွားလေသည်။
“ဒါက သံမဏိ ခေါင်းပညာလား..” ရှီဟောင်သည် သင်းခွေချပ်ကလန်၏ မွေးရာပါနတ်စွမ်းရည်ကို သေမျိုးလောကမှ သာမန်ပညာတစ်ခုနှင့် နှိုင်းယှဉ်ကာ လှောင်ရယ်လိုက်လေ၏။
လေဟာနယ်ကြီး ပျက်စီးသွားလေသည်။ သင်းခွေချပ်မှာ မြန်ဆန်လွန်းလှပြီး သူသည် မြေပြင်မှသွားခြင်းမဟုတ်ပဲ လေဟာနယ်မှ သွားခြင်းပင်။ သူ၏ခန္ဓာကိုယ်မှာ နဂါးရိုင်းတစ်ကောင်ကဲ့သို့ပင် ရှီဟောင်ထံသို့ ချက်ချင်းရောက်သွားလေသည်။
ရှီဟောင်ဘေးဘက်သို့ရှောင်လိုက်သောကြောင့် သင်းခွေချပ်မှာ ရှီဟောင်အား ကျော်သွားလေသည်။ ထိုအချိန်တွင် သူသည်ငွေရောင်အမြှီးကိုလှုပ်ရမ်းလိုက်သောကြောင့် လေဟာနယ်ထဲတွင် အက်ကွဲကြောင်းများ ထွက်ပေါ်လာလေသည်။
ထို့အပြင် ထူးဆန်းသည့်သဘာဝဥပဒေသတစ်ခု ထွက်ပေါ်လာပြီး ရှီဟောင်အား ဝန်းရံသွားလေ၏။
ဝုန်း..
ထိုအချိန်တွင် ရှီဟောင်တစ်ကိုယ်လုံးတောက်ပလာကာ ထိုသဘာဝဥပဒေသကို ဖောက်ထွက်လိုက်လေသည်။ ရက်စက်သည့်သားရဲတစ်ကောင်ကဲ့သို့ပင် သူ လုပ်လိုက်သည့်အပြုအမူတိုင်းတွင် လွှမ်းမိုးနိုင်သည့်စွမ်းအားများပါဝင်လေသည်။
လေထဲတွင် ရှင်းလင်းကာ ကျယ်လောင်သည့်အသံတစ်သံ ထွက်ပေါ်လာလေသည်။ သူ့လက်ဝါးနှင့် သင်းခွေချပ်အမြှီး ရိုက်ခတ်သွားသည့်အချိန်တွင် မီးပွားများလွင့်စင်ထွက်လာပြီး သင်္ကေတနှင့် သဘာဝဥပဒေသများမှာ လေဟာနယ်ကို လှုပ်ခါသွားစေလေ၏။
အားလုံး၏အမူအရာ ပြောင်းလဲသွားသည်။ သင်းခွေချပ်မှာ သူတို့၏ ခွန်အားကြောင့် နာမည်ကြီးသည်။ ယခုတော့ သူ့ခန္ဓာကိုယ်ကို ထာဝရစွမ်းအင်လွှမ်းခြုံပြီး တိုက်နေသော်လည်း ထင်မှတ်မထားစွာဖြင့်ပင် ဤလူကို ဘာမှမလုပ်နိုင်ဖြစ်နေသည်။
“ဒီကောင်က နည်းနည်းကြောက်ဖို့ကောင်းတာပဲ .. သူက ခန္ဓာကိုယ်အရမ်းကြံ့ခိုင်အောင် ကျင့်ကြံနေတာလား..”
ထာဝရစွမ်းအင်လွှမ်းခြုံထားသည့် သင်းခွေချပ်၏ ခွန်အားကို ရင်ဆိုင်နိုင်ခြင်းမှာ ကြောက်စရာကောင်းလှသည်။
အော်ဟစ်သံတစ်သံ ထွက်ပေါ်လာပြီးနောက် သင်းခွေချပ်တစ်ကိုယ်လုံး ငွေရောင်တောက်ပလာလေ၏။ သူသည် ရှီဟောင်ထံသို့ တရှိန်ထိုးပင်ပြေးလာနေလေ၏။
ဤအခြေအနေ၌ ရှီဟောင် ထာဝရစွမ်းအင်သုံးပြီး ခုခံမည်ဆိုလျှင်ပင် သူ ရှုံးနိမ့်သွားလိမ့်မည်။ အဘယ်ကြောင့်ဆိုသော် သင်းခွေချပ်သည် စွမ်းအားအကြီးဆုံးအနေအထားဖြင့် တိုက်ခိုက်နေခြင်းပင်။
ဤနေရာတွင်ရှိနေသည့် လေဟာနယ်မှာ စုတ်ပြဲနေသည့် ပန်းချီကားချပ်တစ်ခုကဲ့သို့ပင်။ ရှီဟောင်အား ဤလေဟာနယ်ထဲ၌ ပိတ်ထားနေလေသည်။
ဒုန်း..
အားလုံး ထိတ်လန့်စေသည့်အရာတစ်ခု ဖြစ်ပျက်ခဲ့လေသည်။ ရှီဟောင်သည် လက်သီးတံဆိပ်ကို ပြုလုပ်လိုက်ကာ သံမဏိတုံးအား ရိုက်နေသကဲ့သို့ ထိုငွေရောင်အလင်းကြီးအား ဆက်တိုက်ပင် ထုရိုက်နေလေ၏။
“သူက အခုထိ ထိပ်တိုက်ရင်ဆိုင်နိုင်သေးတာလား..”
“မဟုတ်ဘူး .. သူ့တိုက်ခိုက်မှုတွေက သူသေချာလေး ရွေးလုပ်နေတာ .. သူရိုက်လိုက်တဲ့နေရာတိုင်းက သင်းခွေချပ်ရဲ့ အားနည်းတဲ့နေရာတွေကိုပဲ ထိနေတာ..”
အားလုံးထိတ်လန့်သွားရ၏။ သူက သင်းခွေချပ်ရဲ့ပညာတွေကို ဖောက်ထွင်းမြင်နိုင်နေတာလား .. သူ့ရဲ့ ခန္ဓာကိုယ်ထဲက အရိုးစာသားတွေရဲ့ လှုပ်ရှားမှုတွေကို နားလည်နေတာလား..
ရိုက်ချက်များမှာ တိကျလွန်းလှသည်။ ရိုက်ချက်များမှာ သင်းခွေချပ်၏ တိုက်ခိုက်မှုများအားလုံးကို ပြိုကွဲသွားစေပြီး သူ့ခန္ဓာကိုယ်ထဲတွင် ပေါက်ကွဲသွားစေလောက်သည့် စွမ်းအင်သစ်များ ထွက်ပေါ်လာလေသည်။
ဤသည်မှာ အနည်းငယ် ထိတ်လန့်စရာကောင်းလှသည်။ သူသည် အဖိုးတန်ပညာများကို အသုံးပြုခြင်းမဟုတ်ပဲ အရိုးရှင်းဆုံးနည်းလမ်းများကိုအသုံးပြုကာ သင်းခွေချပ်အား တိုက်ခိုက်နေခြင်းပင်။
ပို၍အရေးကြီးသည်မှာ သူသည် လက်ဗလာဖြင့် ထာဝရစွမ်းအင်အား တားဆီးနေခြင်းပင်။
ဤမြင်ကွင်းကိုမြင်လိုက်သည်နှင့် အားလုံး ဆွံ့အသွားရသည်။ ဒီကောင်က သင်းခွေချပ်အကြောင်းကို အားလုံးနားလည်နေပြီးတော့ တစ်ဖက်လူရဲ့ တိုက်ခိုက်မှုကို ချေဖျက်ဖို့ ပြီးပြည့်စုံတဲ့ ပညာကိုသုံးလိုက်တာလား..
ဖုန်း..
ရှီဟောင်သည် ဆက်တိုက်ပင် ရိုက်နှက်ကာ သင်းခွေချပ်အား လွင့်ထွက်သွားအောင် လုပ်လိုက်လေ၏။ ကြောက်စရာကောင်းသည့် လက်သီးတံဆိပ်များသည် သင်းခွေချပ်အကြေးခွံပေါ်သို့ တစ်ချက်ပြီးတစ်ချက် ကျရောက်လာကာ သူ့ခန္ဓာကိုယ်မှ သွေးများစီးကျလာလေ၏။
သင်းခွေချပ်သည် နာကျင်စွာအော်ဟစ်ကာ သူ့ခန္ဓာကိုယ်ကို ထာဝရစွမ်းအင်ဖြင့် ကာကွယ်လိုက်လေ၏။ ထို့နောက် ဒဏ်ရာပြင်းထန်စွာရရှိသွားသောကြောင့် မြေပြင်ပေါ်သို့လဲကျသွားလေသည်။
“ကျေးဇူးအများကြီးတင်ပါတယ် .. ငါဒီလိုမျိုး ဖီးနှစ်သွေးကို တကယ်လိုနေတာ..” ရှီဟောင် မြေပြင်ပေါ်သို့ ငြင်သာစွာဆင်းသက်လိုက်ပြီးနောက် အဖိုးတန်သွေးရှိနေသည့် ပုလင်းလေးကို ကောက်ယူလိုက်သည်။
“တစ်ခြားဘယ်သူရှိသေးလဲ..”
ရှီဟောင် လူအုပ်ကြီးကို ကြည့်လိုက်ပြီးနောက် အန္တရာယ်မရှိသည့်အပြုံးတစ်ခုကို ပြုံးပြလိုက်လေသည်။
” ကျုပ် အရင်ပြောထားလိုက်မယ် .. အခုကစပြီးတော့ ဖီးနှစ်သွေးပဲ လက်ခံတော့မယ် .. တစ်ခြားကောင်းကင်ရတနာပစ္စည်းတွေ မလိုချင်ဘူး..”
ဒီလူက သေချာပေါက်ကို ရူးနေတာပဲ .. လူအုပ်ကြီးသည် သူ့ကို ပြေးရိုက်ကာ တောအုပ်အနောက်ဘက်ရှိ ငရဲရေတွင်းထဲသို့ ပစ်ချကာ နှစ်ပေါင်းတစ်ရာလောက် ဖိနှိပ်ထားပစ်ချင်နေကြသည်။
အဘယ်ကြောင့်ဆိုသော် သူတို့သည် ယခုအချိန်ထိ သူ့အား ဝမ်ရှီး၏အစေခံအဖြစ် မြင်နေဆဲပင်။
အချို့လူများသည် မယုံကြည်ကြသောကြောင့် ထပ်မံတိုက်ခိုက်ကြလေသည်။ နောက်ဆုံးတွင်တော့ ရှီဟောင် ဖီးနှစ်သွေး နောက်ထပ် ထပ်ရလိုက်လေ၏။
သူတို့မကျေနပ်ကြသော်လည်း ထပ်တိုက်ရဲသည့်သူ အများကြီးမရှိတော့ပေ။
ထို့နောက် ဝမ်ရှီးစကားပြောကာ ကြောက်စရာကောင်းသည့် ခွန်အားကို ထုတ်လွှတ်လိုက်သည့်အချိန်တွင် ထိုလူများ တိတ်သွားကာ မည်သူမှ ဤနေရာတွင် မနေရဲကြတော့ပဲ ပြန်ထွက်သွားကြလေသည်။
သို့သော်လည်း ဤကိစ္စမှာ မပြီးသေးပေ။ မုန်တိုင်းမှာ ဆက်လက်တိုက်ခတ်နေဆဲပင်။
ဤသတင်းပျံ့သွားသည်နှင့် ရှီဟောင်အား စိန်ခေါ်သည့်သူများ ဆက်တိုက်ပင် ရောက်လာကြလေသည်။
ဤလူများ ရှီဟောင်အား မယှဉ်နိုင်သော်လည်း ဤကျောင်းမှ ကျွမ်းကျင်သူမရှိဘူးဟု ဆိုလိုခြင်းမဟုတ်ပေ။ ကျွမ်းကျင်သူအစစ်များမှာ သီးသန့်ကျင့်ကြံနေကြသောကြောင့်ပင်။ ယခုတော့ ဤလူများသည် ထိုလူများကို ထွက်လာရန် ဖိတ်ခေါ်လိုက်လေ၏။
“ထာဝရစွမ်းအင်နှစ်ကြောင်းရှိတဲ့သူတွေကို ဖိတ်စရာမလိုဘူး .. ရန်လုံ၊ မော့ကျိုနဲ့ တစ်ခြားသူတွေကိုသာ တိုက်ခိုက်လိုက် .. ထာဝရစွမ်းအင်တစ်ကြောင်းက သူ့ကို ဖိနှိပ်ဖို့လုံလောက်ပြီ..”
သူတို့ပြောကြသည့်သူအားလုံးမှာ ခေါ်နိုင်ရန် ခက်ခဲသည့် သီးသန့်ကျင့်ကြံနေကြသည့်သူများပင်။
သို့သော်လည်း အချို့သူများရောက်လာကြကာ ရှီဟောင်အား စိန်ခေါ်နေဆဲပင်။
ရှီဟောင်မှာ ပြတ်သားသည်။ ဖီးနှစ်သွေးမပါလျှင် မည်သူနှင့်မှ တိုက်ခိုက်မည်မဟုတ်ကြောင်း ပြောထားလေသည်။ သူနှင့်တိုက်ခိုက်ရန်အတွက် သူတို့သည် ဖီးနှစ်သွေးများကိုပင် ငှားရမ်းနေရသည်။
ရှီဟောင် ရှုံးသွားလျှင် ဖီးနှစ်သွေး သို့မဟုတ် ခရမ်းရောင်နန်းတော်ဆေးရည်အား ပြန်ပေးရမည်ဟုလည်း သူတို့ပြန်လည်တောင်းဆိုထားသည်။
နောက်ဆုံးတွင် .. ဤလူများမှာ ထပ်ခါတလဲလဲ ရှုံးနိမ့်နေဆဲပင်။
နှစ်ရက်တွင်းမှာပင် ရှီဟောင် ဖီးနှစ်သွေးအစစ် ၆ ပုလင်းကျော်ရလိုက်လေသည်။
“မုန်းစရာကောင်းလိုက်တာ .. ငါတို့က ဝမ်ရှီးရဲ့အစေခံတစ်ယောက်ကိုတောင် မနိုင်နိုင်ဘူးလား..” တစ်စုံတစ်ယောက်မှ အော်ဟစ်လိုက်လေသည်။
သူတို့အားလုံးမှာ သူတို့ကလန်များ၏ အထူးချွန်ဆုံးပါရမီရှင်များပင်။ သို့သော် ကောင်းကင်နတ်ဘုရားကျောင်းသို့ ရောက်ပြီးသည့်နောက်တွင် လုထော်၊ မင်းသမီးယောင်ယွဲ့၊ ဝမ်ရှီးနှင့် အခြားသူများ၏ လွှမ်းမိုးခြင်းကို ခံရသည်။
ယခု သူတို့ဝမ်ရှီး၏နောက်လိုက်ကိုပင် မယှဉ်နိုင်သောကြောင့် သူတို့စိတ်ထိခိုက်သွားရသည်။
ရှီဟောင်သည် ဖီးနှစ်သွေးပုလင်း ၁၀ ခုပြည့်တော့မည်ဖြစ်ပြီး ခရမ်းရောင်နန်းတော်ဆေးရည်တစ်ပုလင်းလည်း ရှိနေသောကြောင့် အလွန်ကျေနပ်နေလေသည်။ ယခု ကောင်းကင်ရတနာအချို့ရနိုင်သည့် နည်းလမ်းရှာပြီးနောက် သူ သီးသန့်ကျင့်ကြံတော့မည်။
ဝမ်ရှီးမှာ အတော်လေး ထိတ်လန့်နေလေသည်။ ဒီကောင်က ရောက်လာကတည်းက သူလုပ်ချင်တာ လုပ်နေတယ် .. နည်းနည်းမှ သက်တောင့်သက်သာ မခံစားရတာလည်း မရှိဘူး .. ယဉ်ကျေးမှုလည်းမရှိပဲနဲ့ သူမ ဂူထဲမှာပဲ တစ်ချိန်လုံးကျင့်ကြံနေတယ်..
ဤသည်မှာ ချန်နော့၊ စုလန်နှင့် ကျန်သည့်နှစ်ယောက်ကို ဆွံ့အသွားစေသည်။ ထို့အပြင် သူတို့ မကျေမနပ်လည်း ခံစားလိုက်ရသည်။ သူတို့သည် ပုံမှန်အားဖြင့် သူတို့၏နတ်တောင်တွင်သာ ကျင့်ကြံကြပြီး ဤဂူထဲသို့ လွယ်လွယ်မဝင်ကြပေ။
သို့သော်လည်း ဤကောင်ကတော့ နည်းနည်းလေးမှ အားနာနေခြင်း မရှိ။
“ရှင့်ခွန်အားက မဆိုးဘူး .. ဒီအခွင့်အရေးကိုသုံးပြီးတော့ ကျင့်ကြံလိုက် .. အချိန်နည်းနည်းကြာရင် ကျွန်မနဲ့တိုက်ပွဲမှာ ပါဝင်ပေး..” ဝမ်ရှီး ရှီဟောင်အား ပြောလိုက်သည်။
သူ ဘာနဲ့တိုက်ရမှာလဲဟု သူမေးရန် ပြင်ဆင်ထားပြီးသားပင်။ သို့သော်လည်း သူ ချက်ချင်းပြန်ထိန်းလိုက်လေ၏။
“ထာဝရတိုက်ပွဲလား..” ရှီဟောင် အလွန်ထိတ်လန့်စွာ မေးလိုက်သည်။
“လုထော်၊ ဖုန်းရှင်းထျန်နဲ့တစ်ခြားကျွမ်းကျင်သူတွေရော လူတွေခေါ်လာမှာလို့ ပြောချင်တာလား..”
ရှီဟောင် စိတ်လှုပ်ရှားသွားရသည်။ လူအချို့ကို ရှင်းပစ်ရန်အတွက် ထိုနေရာသို့ သွားသင့် မသွားသင့် သူစဉ်းစားနေခြင်းပင်။