သုခကမ္ဘာက ရှီဟောင် - Chapter - 1298 အားကောင်းသည့် တပ်ကူ
ထာဝရစစ်မြေပြင် .. ဤသည်မှာ ထာဝရသက်ရှိများ ပြင်းထန်စွာ တိုက်ခိုက်ခဲ့ကြသည့်နေရာပင်။ ခေတ်တစ်ခုကုန်ဆုံးသွားပြီဖြစ်သော်လည်း ထိုရှေးဟောင်းမြေတွင် ထူးဆန်းမှုများစွာ ရှိနေဆဲပင်။
ထူးဆန်းသည့် သက်ရှိများ လှည့်ပတ်သွားလာတတ်သည်အထိပင်။
ထိုနေရာကို ရှာဖွေတွေ့ရှိသွားသည်နှင့် ကျင့်ကြံသူပေါင်းများစွာသည် ထိုနေရာသို့သွားကာ စူးစမ်းလေ့လာကြသည်ပင်။
“အဲဒီမှာ ထာဝရတာအိုကျမ်းစာနဲ့ ထူးဆန်းတဲ့သက်ရှိတွေရှိတယ် .. စစ်ကွင်းပြင်က တစ်ခါတစ်လေကျရင် အေးချမ်းပြီးတော့ တစ်ခါတစ်လေကျရင်လည်း အရမ်းအန္တရာယ်များတယ်..” ဝမ်ရှီး ပြောပြခြင်းပင်။
ထိုနေရာတွင် ယခင်ကချိတ်ပိတ်ထားခဲ့သည့် အကြွင်းအကျန်များ ရှိနေပြီး မဖြေရှင်းရသေးသည့် ထူးဆန်းမှုများစွာ ရှိနေသည့်နေရာပင်။ စွမ်းအားကြီးသည့်သူဖြစ်စေ၊ သာမန်လူဖြစ်စေ ထိုနေရာသို့ဝင်သွားသည်နှင့် အခွင့်အရေးကောင်းများကို ပိုင်ဆိုင်နိုင်သည်။
သို့သော် ဤသည်မှာလည်း အန္တရာယ်မရှိပဲနှင့် မဟုတ်ပေ။
ရှီဟောင် အတော်လေးစိတ်ဝင်စားသွားကာ ထိုအကြောင်းများ ထပ်မေးလိုက်သည်။ အထူးသဖြင့် ထိုနေရာတွင် ထူးဆန်းသည့်သက်ရှိများ ရှိနေသည်ကို သိလိုက်ရသည့်အချိန်တွင် သူ ထိုနေရာအကြောင်းကို ပို၍အသေးစိတ် သိလိုသွားသည်။
“အဲဒီသက်ရှိတွေက တော်တော်လေး ထူးဆန်းတယ် .. သူတို့တွေက ငါတို့ ကောင်းကင်ဘုံကိုးခု၊ ကမ္ဘာမြေ ၁၀ ခုနဲ့ မသက်ဆိုင်သလိုပဲ” ဝမ်ရှီးပြောလိုက်သည်။
“ငါတို့ဘက်က မဟုတ်ဘူးလား .. အဲဒါဆိုတစ်ခြားတစ်ဖက်က ဧည့်သည်များလား..” ရှီဟောင် ထိတ်ခနဲဖြစ်သွားသည်။
“အဲဒီနေရာက နယ်ခြားစပ်လိုမျိုး တစ်ခြားလောကနဲ့ချိတ်ဆက်ထားတဲ့နေရာဖြစ်လိမ့်မယ်လို့ ငါ ယုံကြည်တယ်..” ဝမ်ရှီး ပြောလိုက်သည်။
ထိုနေရာရှိ လေဟာနယ်တွင် အက်ကွဲကြောင်းအနည်းငယ်ရှိနေသည်။ ထိုအက်ကွဲကြောင်းများကို ဖွင့်ရန် ကြိုးစားသည့်သူများရှိခဲ့သော်လည်း သူတို့ ဘာမှမမြင်ခဲ့ရပေ။ သို့သော်လည်း ထိုနေရာများမှာ မရိုးရှင်းဘူးဟု သံသယဝင်နေသည့်သူများ ရှိနေဆဲပင်။
“စိတ်ဝင်စားစရာပဲ” ရှီဟောင် ခေါင်းညိမ့်လိုက်သည်။
“ရှင် အခုချိန်မှာ ကျင့်ကြံထားသင့်တယ် .. အချိန်တစ်ခုကြာပြီးရင် ကျွန်မတို့ အဲဒီကို ထွက်သွားတော့မှာ..”
ဝမ်ရှီး ပြောလိုက်၏။ ထို့နောက် ရှီဟောင်ခေါင်းပေါ်မှ စိန်ခေါင်းပတ်ကို ကြည့်လိုက်လေသည်။ သူမသည် ‘တာအိုရောင်းရင်း’ အဖြစ် ဖိတ်ခေါ်ခဲ့သော်လည်း ဤမှော်ပစ္စည်းကြောင့် ဤလူငယ်လေးကို နောက်လိုက်တစ်ယောက်အဖြစ်သာ ခံစားမိနေလေသည်။
“မင်းတို့မှာ ကျမ်းစာတွေ ဒါမှမဟုတ် ကျင့်ကြံပုံတွေရှိလား..” ရှီဟောင် မေးလိုက်၏။ သူသည် ‘အပြင်လူ’ ကဲ့သို့ ပြုမူမနေတော့ပေ။
ကောင်းကင်နတ်ဘုရားကျောင်းသို့ ဝင်ပြီးသည်နှင့် ကျောင်းသားများသည် လျှို့ဝှက်ကျင့်ကြံခြင်းနည်းလမ်းများရနိုင်သည်ကို သူသိသည်။ ထိုထဲတွင် ထာဝရတာအိုကျမ်းစာများလည်း ပါဝင်နေမည်ပင်။
“ကျောင်းမှာ ထာဝရတာအိုကျမ်းစာတွေတော့ရှိတယ် … ဒါပေမဲ့ ကျွန်မအဲဒါတွေကို ဖတ်ဖို့အခွင့်အရေးမရှိသေးဘူး..” ဝမ်ရှီးပြောလိုက်သည်။
သူမ၏စကားများမှာစိတ်ဝင်စားစရာကောင်းလှသည်ပင်။
“ထာဝရတာအိုကျမ်းစာတွေကို ရချင်ရင် ကျောင်းကထုတ်ထားတဲ့ မစ်ရှင်တွေအားလုံးကို ပြီးဖို့လိုတယ် .. ဒါကို ကျွန်မတို့ကိုစမ်းသပ်တဲ့ စာမေးပွဲသဘောမျိုးလို့ ထင်တာပဲ..” ဝမ်ရှီး ထပ်ရှင်းပြုလိုက်သည်။
ရှီဟောင် ခေါင်းညိမ့်လိုက်၏။ ဤဂျီးနီးယပ်စ်များ ထိုထာဝရစစ်ကွင်းပြင်သို့သွားခြင်းမှာလည်း ကြမ်းတမ်းသည့်စစ်ဆေးမှုတစ်ခု ဖြစ်လိမ့်မည်မှန်း သူ နားလည်သွားလေပြီ။
ဝမ်ရှီးသည် ဤကိစ္စကို အတော်လေး အလေးထားသည်။ သူမသည် ကျောင်းမှ စွမ်းအားအကြီးဆုံးလူတစ်ဦးဖြစ်သောကြောင့် သူမ စွမ်းရည်များကို ပြသနိုင်မည့် ဤကဲ့သို့သော အခွင့်အရေးကောင်းကြီးကို လက်လွတ်မည် မဟုတ်ပေ။
“အဲဒီအချိန်ကျရင် ကျုပ်ကိုလည်း ထာဝရတာအိုကျမ်းစာပြပါဦး .. မင်း လူတစ်စုကို ရှင်းဖို့အတွက် ငါမင်းကို ကူညီပေးနိုင်တယ်..” ရှီဟောင် ဘာမှ ဖုံးကွယ်မထားတော့ပဲ တောက်ပနေသည့်မျက်လုံးများဖြင့်ပင် ပြောလိုက်လေသည်။
အားလုံးကို သတ်ဖို့လည်း သူ ဝန်မလေးပေ။ ဥပမာအားဖြင့် လေကလန် .. သူတို့ ယွမ်ချင်းအား ဤကဲ့သို့လုပ်ခိုင်းခဲ့ကြောင်း သေချာသွားပါက သူ ဖုန်းရှင်းထျန်ကို ထိုစစ်ကွင်းပြင်တွင် ရှင်းပစ်ရန် ဝန်လေးနေမည်မဟုတ်။
ထို့အပြင် ယွမ်ချင်း၏မျိုးဆက် .. ထိုလူကတော့ ပြောစရာပင် မလိုတော့ … သေချာပေါက် သူ၏ပစ်မှတ်ဖြစ်လာမည်ပင်။
ထိုအကြောင်းကို စဉ်းစားမိသည်နှင့် ရှီဟောင်အနည်းငယ် စိတ်လှုပ်ရှားလာမိသည်။ နောက်ဆုံးတော့ သူသည် ကောင်းကင်နတ်ဘုရားကျောင်းမှ ဂျီးနီးယပ်စ်များ မည်မျှစွမ်းအားကြီးသည်ကို သိရတော့မည်။
သို့သော်လည်း သူ ထိုရှေးဟောင်းစစ်ကွင်းပြင်ထဲသို့ ဝင်လိုက်သည်နှင့် သရဖူ ၁၀ ခုဘုရင်၊ နှယ်နှင်ဒဏ်ခံရသည့်ထာဝရသက်ရှိနှင့် နျင်ချွမ်းကဲ့သို့သော ပြိုင်ဘက်ဟောင်းများကို အရင်ဆုံးတွေ့ရမည်ပင်။
မင်းသမီးယောင်ယွဲ့၊ လုထော်ကဲ့သို့သော စွမ်းအားအကြီးဆုံးဂျီးနီးယပ်စ်များလည်း တိုက်ခိုက်လာကြမည်ပင်။
“ကျွန်မ ကျောင်းကနေ ငှားလာတဲ့ ကျမ်းစာတစ်ချို့တော့ရှိတယ် … သူတို့တွေက ထာဝရတာအိုကျမ်းစာတော့မဟုတ်ပေမယ့် အတော်လေးအဖိုးတန်တယ် .. အထူးသဖြင့် ဘိုးဘေးတွေရဲ့ အမြင်တွေကို ရေးထားတဲ့စာတွေ.. ရှင် ဒါတွေကို မှီငြမ်းလို့ရတယ်..”
သူမထံတွင် အရိုးစာသားအချိုု့ရှိသည်။ ဤအရိုးစာသားများမှာ မူရင်းများဖြစ်သောကြောင့် လေ့လာပြီးသည်နှင့် ပြန်ပေးရမည်ပင်။
ရှီဟောင် ထိုအရိုးအပိုင်းအစများ၊ ကျောက်စိမ်းချောင်းများကို ယူပြီးသည်နှင့် ဤပစ္စည်းများ၏တန်ဖိုးကို ချက်ချင်းနားလည်သွားရသည်။ ဤအရိုးစာသားများအားလုံးမှာ လူကိုယ်တိုင် ထွင်းထုထားခြင်းဖြစ်ပြီး မူလအစစ်အမှန်အဓိပ္ပာယ်များပါဝင်သည်။
ဤပစ္စည်းများတွင် အသန့်စင်ဆုံးစွမ်းအင်များပါဝင်ပြီး ဝိညာဉ်တံဆိပ်များပင် ကျန်နေသေးသည်။
ရှီဟောင် ထိုစာအုပ်များကိုတစ်ခုပြီးတစ်ခု သေချာဖတ်လိုက်သည်။ ကျမ်းစာတစ်ခုတွင် မှော်တံဆိပ်ပြုလုပ်ခြင်းနှင့်လောကကြီးတို့ကြားရှိ ဆက်သွယ်ချက်ကို ဖော်ပြထားပြီး အခြားတစ်အုပ်တွင် မူလဝိညာဉ်အားမည်ကဲ့သို့ ပျိုးထောင်ရမည်ကို ဖော်ပြထားသည်။ တစ်အုပ်တွင်တော့ ရှေးဟောင်းစစ်ပွဲများအားလုံးကို ဖော်ပြထားလေသည်။
ရှီဟောင် ဆက်တိုက်ပင် ခေါင်းညိမ့်နေလေ၏။ ဤသည်မှာ သူ့ရှေ့မှလူများ မှတ်တမ်းတင်သွားသည့်အရာများပင်။ ဤစာအုပ်များကို ဖတ်နေရင်းဖြင့်ပင် ဤစာကိုရေးနေသည့်အချိန်က ထိုသူများခံစားခဲ့ရသည့် စိတ်ခံစားချက်များကိုပင် သူအာရုံခံနေနိုင်သကဲ့သို့ပင်။
“ဟမ် … ဒီစာအုပ်က မဆိုးဘူး .. ပညာတစ်ခုကို ဘယ်လိုမျိုးဖန်တီးရမလဲဆိုတာ ပြောပြထားတယ်.. တကယ်ကို ပညာရတယ်..”
ရှီဟောင် ပျက်စီးနေသည့် အရိုးအပိုင်းအစလေးကို ကိုင်ထားကာ ထိုအရာကို သေသေချာချာလေးလေးနက်နက် ဖတ်နေလေသည်။
ဤကျောက်စိမ်းစာအုပ်ထဲတွင် စာနှစ်မျိုးရှိနေသည်။ တစ်မျိုးမှာ ထာဝရရှေးဟောင်းခေတ်မှ မူရင်းစာဖြစ်ပြီး ကျန်တစ်မျိုးမှာ ယနေ့ခေတ်ဘာသာစကားဖြင့် နောက်လူများ ပြန်ဖြည့်ထားခြင်းပင်။
အစအဆုံးဖတ်ပြီးသွားသည်နှင့် သူ စိတ်လှုပ်ရှားသွားရသည်။ အဘယ်ကြောင့်ဆိုသော် ဟိုးလွန်ခဲ့သည့် ရှေးကာလကတည်းက ထာဝရရှေးဟောင်းခေတ်ကြီး ပျက်စီးမသွားစေရန်၊ ရန်သူများကို အနိုင်တိုက်နိုင်ရန်၊ သူတို့ပိုပြီး သန်မာစေရန် ကျင့်ကြံခြင်းစနစ်အသစ်ကို တီထွင်ချင်သည့်သူများ ရှိခဲ့ကြသည်။
“တစ်နေ့ကျရင် ငါလည်းကျင့်ကြံခြင်းစနစ်အသစ်ကို တီထွင်ဖန်တီးနိုင်မှာလား..” ရှီဟောင် သက်ပြင်းချ၍ ပြောလိုက်သည်။
“ဟမ် .. ရှင့်မှာလည်း ဒီလိုရည်မှန်းချက်မျိုးရှိနေတာလား..” ဝမ်ရှီး ထိတ်လန့်သွားလေ၏။
” အရင်တုန်းက ကျောင်းက ကျွန်မတို့ကို မတူညီတဲ့လမ်းကြောင်းတွေ ဖောက်နိုင်ဖို့ အကောင်းဆုံးကြိုးစားပေးပါလို့တောင်းဆိုခဲ့တယ် .. အောင်မြင်မှုတစ်ချို့ရတဲ့သူကို သူတို့အများကြီးထောက်ပံ့ပေးမယ်လို့ ပြောခဲ့တယ်..” ဝမ်ရှီးဆက်ပြောလိုက်၏။
“ကျောင်းက ဘာဆုပေးမှာလဲ..” ရှီဟောင် မေးလိုက်သည်။
“အဲဒီလိုမျိုးလမ်းကြောင်းကို ဖန်တီးနိုင်ရင် ကျောင်းက စာကြည့်တိုက်တစ်ခုလုံးကို ရှင့်အတွက်ဖွင့်ပေးမှာ .. အဲဒီထဲမှာ အဖိုးတန်တဲ့ ထာဝရတာအိုကျမ်းစာတွေလည်း အများကြီးရှိတယ်..” ဝမ်ရှီး ပြန်ဖြေလိုက်သည်။
ဤစာကြည့်တိုက်အပြင် နတ်ဆေးမျိုးစုံ၊ ဖီးနှစ်သွေးနှင့် အခြားအရာများကိုလည်း တတ်နိုင်သလောက် ထောက်ပံ့မည်ပင်။
“ကျောင်းက ဒါကို အဲဒီလောက်တောင် လိုချင်နေတာလား..” ရှီဟောင် ထိတ်လန့်စွာ ပြောလိုက်သည်။
ဝမ်ရှီးသက်ပြင်းချလိုက်ကာ သူမ၏လှပသည့်မျက်နှာလေးမှာ အနည်းငယ် လေးနက်နေလေသည်။
“ငါတို့ရဲ့ ကျင့်ကြံတဲ့စနစ်ကို အဲဒီသက်ရှိတွေ လေ့လာပြီးသွားပြီ .. အဲဒီတော့ ငါတို့ တီထွင်ဆန်းသစ်မှုတွေ ပြောင်းလဲမှုတွေ လိုအပ်တယ်..”
အဲဒီသက်ရှိဆိုတာက ရန်သူကို ဆိုလိုချင်တာလား .. ရုတ်တရက်ပင် ရှီဟောင်စိတ်ထဲ လေးလံသွားရသည်။
သူသည် ထိုအကြောင်းမစဉ်းစားပဲ သူ့ကိုယ်သူ တည်ငြိမ်အောင် နေနေပါသော်လည်း နောက်ဆုံးနေ့ရက်များ၏ တိုက်ပွဲအငွေ့အသက်များက သူ့ကို လွှမ်းခြုံလာလေသည်။
ခဏကြာပြီးနောက် ဝမ်ရှီး ယူလာခဲ့သည့် စာအုပ်များကိုသာ သူ အာရုံစိုက်လိုက်တော့သည်။
စာအုပ်တစ်အုပ်တွင် ပြိုင်ဘက်ကင်းသည့် သွေးအစစ်ကို အသုံးပြုပြီး ခန္ဓာကိုယ်နှင့် မူလဝိညာဉ်ကို သန့်စင်သည့်ရှေးဟောင်းနည်းလမ်းအား မှတ်တမ်းတင်ထားလေသည်။
“မဆိုးဘူး ..ငါ ဒါကို ကိုးကားလို့ရလောက်တယ်..” ရှီဟောင် ထိုစာကို လေးနက်စွာဖတ်ပြီး ခေါင်းညိမ့်လိုက်၏။ အဘယ်ကြောင့်ဆိုသော် သူ့ထံတွင် ဖီးနှစ်သွေး ရှိနေလေပြီ။
စာအုပ်ထဲမှ မှတ်တမ်းအရဆိုလျှင် သူဆေးပင်မျိုးစုံကို ရှာရဦးမည်။ ဤဆေးပင်များနှင့်သာ အတူသုံးလိုက်ပါက အကျိုးသက်ရောက်မှုများ ပို၍ကြီးမားသည်။
“ငါ့ဆီမှာ ဖီးနှစ်သွေးတွေ သိပ်မရှိဘူးဆိုပေမယ့် ငါ အဲဒီဆေးပင်တွေနဲ့သုံးလိုက်ရင်တော့ လုံလောက်,လောက်ပါတယ်..” ရှီဟောင် ပြောလိုက်သည်။
အပြင်ဘက်တွင် ဆူညံသံများထွက်ပေါ်လာပြီး သူ့အားလာစိန်ခေါ်သည့်သူများ ထပ်ရောက်လာပြန်သည်။
ရလဒ်မှာ ထင်ထားသည့်အတိုင်းပင်။ ရှီဟောင် စိန်ခေါ်မှုကို လက်ခံကာ အနိုင်ထပ်ရပြီး ဖီးနှစ်သွေး နည်းနည်းထပ်ရလိုက်သည်။ သူသည်ပြုံးလိုက်ကာ စိန်ခေါ်မှုကို ဘယ်အချိန်မဆို လက်ခံကြောင်း ပြောလိုက်လေ၏။
နောက်ရက်များတွင် အလွန်ဒေါသထွက်နေသည့်သူများသည် ရှီဟောင်ကို ဖိနှိပ်ရန်အတွက် သီးသန့်ကျင့်ကြံနေသည့်သူများကိုပင် သွားခေါ်လာလေသည်။
ထာဝရစွမ်းအင် ၂ ကြောင်းရှိသည့်လူငယ်လေးသည် သီးသန့်ကျင့်ကြံရာမှ ထွက်လာကာ ရှီဟောင်နှင့် တိုက်ခိုက်ခဲ့သော်လည်း ရှုံးနိမ့်ခဲ့လေသည်။ ဤသည်မှာ ဝမ်ရှီးကိုပင် ထိတ်လန့်သွားစေလေ၏။ အဘယ်ကြောင့်ဆိုသော် ဤကောင်သည် ထာဝရစွမ်းအင်ကို မသုံးပဲ ထိုလူငယ်အား အနိုင်ယူခဲ့ခြင်းပင်။ ဤသည်မှာ မည်မျှပင် အံ့အားသင့်စရာကောင်းသနည်း.. သူသည် သူနှင့်ရွယ်တူများထက် အနည်းငယ်ပို၍ စွမ်းအားကြီးသည်။
အခြားပြောင်းလဲမှုအနည်းငယ်လည်း ရှိခဲ့သည်။ ရှီဟောင်၏အောင်မြင်မှုမှာ အတော်လေးပင် များပြားနေပြီဖြစ်ပြီး ယခုဆိုလျှင် ဖီးနှစ်သွေးပုလင်း ၁၄ လုံးပင် ရနေပြီဖြစ်သည်။
ထို့ကြောင့် လတ်တလောတော့ သူ့ကိုစိန်ခေါ်ချင်သည့်သူ မရှိတော့။ ရှီဟောင်သည် ကျွမ်းကျင်သူများကို အနိုင်ယူကာ ဖီးနှစ်သွေးများစွာရှိနေပြီဖြစ်သောကြောင့် လူအများစုမှာ ခေါင်းကိုက်နေကြရလေပြီ။
အချို့သူများသည်လည်း ထိုဖီးနှစ်သွေးများကို လိုချင်သောကြောင့် မည်သည့်နည်းလမ်းဖြင့် ပြန်ယူရမလဲဆိုသည်ကို စဉ်းစားနေကြလေ၏။
သူ ချင်းရီ၊ ချောင်ယုရှန်း၊ ချန်ကုန်းယန်နှင့် ယုန်ဖြူလေးတို့ကို သွားတွေ့သင့်မတွေ့သင့် စဉ်းစားနေမိသည်။ သို့သော်လည်း တစ်ချိန်ချိန်ကျလျှင် သူ ဖုန်းရှင်းထျန်နှင့် အခြားသူများကို သတ်မည်ဖြစ်ကြောင့် သူမည်သူမှန်း မပေါ်သွားရန် အရေးကြီးသည်။
“ကျွန်မဆီမှာ ဖီးနှစ်သွေး ၆ ခုရှိသေးတယ် .. ရော့ .. ရှင့်ကို ပေးလိုက်မယ်..” ဝမ်ရှီးသည် ရုတ်တရက် သူ့အား လက်ဆောင်ကြီးပေးလာလေသည်။
ပုလင်းလေးများအားလုံးမှာ လက်သီးအရွယ်အစားဖြစ်ပြီး ကြည်လင်တောက်ပနေသည်။
ရှီဟောင် ထိတ်လန့်သည့်အမူအရာဖြစ်သွားလေ၏။ သူတကယ်ကို အံ့အားသင့်သွားခြင်းပင်။ သူ့ခေါင်းပေါ်တွင်ရှိနေသည့် စိန်ခေါင်းပတ်မှာ သူ့အားဒေါသထွက်စေသောကြောင့် ဝမ်မိသားစုအား ဘယ်လိုမျိုး အကြွေးပြန်ဆပ်ရမလဲဟု သူ အမြဲတမ်းစဉ်းစားနေခဲ့ခြင်းပင်။
ဝမ်ရှီး သူ့အား ဤကဲ့သို့ အဖိုးတန်ဖီးနှစ်သွေးပေးလိမ့်မည်ဟု သူ လုံးဝထင်မထားခဲ့ပေ။
“ငါ့ကို မင်းရဲ့ဝမ်မိသားစုဝင်ဖြစ်ချင်စေချင်နေတာဆိုရင် မေ့လိုက်တော့ .. အများဆုံးမှ ငါမင်းကို ငါ့ဇနီးအဖြစ်ပဲ ယူလို့ရမှာ..” ရှီဟောင် ပါးစပ်ဟလိုက်သည်နှင့် ဤစကားထွက်လာလေသည်။
သတင်းတင်ပြရန် ရောက်လာသည့် စုလန်နှင့် ချန်နော့တို့မှာ ကြက်သေသေသွားရသည်။ ဘာဖြစ်နေတာလဲ .. ဒီကောင်က ရူးသွားပြီလား..
ဝမ်ရှီး၏အမူအရာ အေးခဲသွားလေ၏။ ထို့နောက်တွင်တော့ လှပသည့်မျက်နှာထက်တွင် မည်သည့်အမူအရာမှ မရှိတော့ပေ။ ဤကောင်သည် သူမအား တမင်သက်သက် လျှောက်ပြောနေခြင်းဖြစ်သည်ကို သူမ သိနေသောကြောင့်ပင်။
“ရှင့်ရဲ့ ကျင့်ကြံဆင့်ကိုပဲ မြန်မြန်တက်အောင်လုပ် .. အချိန်ကျလာရင် ရှင် စစ်ကွင်းပြင်ထဲကို ဝင်နိုင်ဖို့ မျှော်လင့်တယ် .. ရှင်တို့အားလုံး ကျွန်မကို ကူညီပေးနိုင်တာရှိတယ် .. လုထော်၊ ယောင်ယွဲ့၊ ရွှမ်းခွန်နဲ့ တစ်ခြားစွမ်းအားကြီးတဲ့သူတွေကို တားဆီးပေး..” ဝမ်ရှီးပြောလိုက်၏။
ထာဝရတာအိုကျမ်းစာရရန်၊ ကျောင်းမှ စွမ်းအားအကြီးဆုံးအထောက်အပံ့ရရန်အတွက် ရှေးဟောင်းစစ်ကွင်းပြင်တွင် သူမ အနိုင်ရရန်လိုအပ်သည်။ ထိုအတွက်လည်း ရှီဟောင်ကဲ့သို့သော စွမ်းအားကြီးသည့်သူထံမှ အကူအညီ လိုအပ်သည်။
ရှီဟောင်သည် ထာဝရစွမ်းအင်သုံးကြောင်းရှိသည့်သူများရှေ့တွင်ပင် ပြိုင်ဘက်ကင်းလိမ့်မည်ဟု သူမခံစားနေရသည်။
ရှီဟောင် ထိတ်လန့်သွားရသည်။ ဖီးနှစ်သွေးနှင့်ပေါင်းရန်အတွက် သူဆေးပင်အချို့လိုအပ်နေသည်။ ယခုတစ်ကြိမ်တွင်တော့ ဝမ်ရှီးက သူ့အား အဆုံးထိ ကူညီမည်ပင်။
ကြည့်ရသည်မှာ ထာဝရစစ်ကွင်းပြင်မှ ပြိုင်ပွဲမှာ ပေါ့သေးသေး မဟုတ်လောက်။ စွမ်းအားအကြီးဆုံးသူများကြားမှ ယှဉ်ပြိုင်မှုပင်ဖြစ်လိမ့်မည်။ ဝမ်ရှီး ဤပြိုင်ပွဲကို အလွန်အလေးထားနေသည်။
၁၀ ရက်ကြာပြီးသည့်နောက်တွင် ဤလှိုဏ်ဂူအတွင်းတွင်ရှိသည့် ကျောက်တုံးအခန်းလေးထဲမှ ရောင်စုံအလင်းများထွက်ပေါ်လာပြီး အက်ကွဲကြောင်းများလည်း ဖြစ်ပေါ်လာလေသည်။