သုခကမ္ဘာက ရှီဟောင် - Chapter - 1299 ကျိုးကြောင်း မဆီလျော်သည့်လူ
အခန်းတစ်ခုလုံး ရောင်စုံအလင်းများ ပြည့်နှက်နေလေသည်။ ရှီဟောင်သည် ထိုနေရာတွင် တည်ငြိမ်စွာထိုင်နေကာ ကျင့်ကြံခြင်းတွင် ဈာန်ဝင်နေလေသည်။
နောက်ဆုံးတွင်တော့ သူ သက်မချလိုက်သည်။ သူ၏ဒုတိယမြောက်တာအိုပန်းပွင့်မှာ အတော်လေးပြည့်စုံသွားလေပြီ။ ဤကောင်းကင်နှင့် ကမ္ဘာမြေကြီး ပေါင်းစည်းသွားသကဲ့သို့ အဆုံးမရှိသည့် စွမ်းအားများကို စုစည်းနိုင်လေပြီ။
ကံမကောင်းစွာဖြင့်ပင် ဤပန်းပွင့်မှ သက်ရှိတစ်ယောက် ထွက်မလာပေ။
ပထမပန်းပွင့်တွင် ဤပစ္စုပ္ပန်နှင့်မဆိုင်ပဲ အတိတ်တွင် နေထိုင်နေသည့် သက်ရှိတစ်ယောက်ရှိနေသည်။
ဒုတိယမြောက်တာအိုပန်းပွင့်လည်း သက်ရှိတစ်ယောက် ရှိလာမလားဟု ထိုအချိန်တုန်းက သူမျှော်လင့်ခဲ့သည်ပင်။ သို့သော်လည်း တစ်ယောက်မှ မမြင်ရသောကြောင့် သူ စိတ်ပျက်သွားရသည်။
ရှီဟောင် မတ်တပ်ရပ်ကာ သက်ပြင်းချလိုက်သည်။ သူယူဆတာတွေက မှားနေတာများလား..
“တစ်ခုခုတော့ မဟုတ်သေးဘူး .. အခွင့်အရေး ရောက်မလာသေးတာများလား..” ရှီဟောင် ပြောလိုက်သည်။ ပထမတာအိုပန်းပွင့် ပွင့်လာသည့်အချိန်ကို သူ ပြန်စဉ်းစားလိုက်သည်။ ထိုတုန်းကလည်း သက်ရှိတစ်ယောက် ချက်ချင်းပေါ်လာခြင်းမဟုတ်ပဲ မူလရှေးဟောင်းမိုင်းတွင်းထဲတွင်မှ ပေါ်လာခြင်းပင်။
“ဒီတစ်ခေါက်က ဖီးနှစ်သွေးတွေ အများကြီးမရှိတာ့ ငါအပြည့်အဝ မစိမ်လိုက်ရဘူး .. ဆေးပင်တွေရဲ့ စွမ်းအင်တွေနဲ့ပဲ လုပ်ခဲ့ရတာ .. ဆေးပင်တွေနဲ့က မလုံလောက်သေးဘူး..” ရှီဟောင် တီးတိုးပြောလိုက်သည်။
သူ့ထံတွင် ဖီးနှစ်သွေးပုလင်း ၂၀ ရှိသော်လည်း ဤသည်မှာ သူ့တစ်ကိုယ်လုံးစိမ်ရန်အတွက် မလုံလောက်သေးပေ။
လုထော်၊ ယောင်ယွဲ့၊ ရွှမ်းခွန်နှင့် အခြားသူများသည် ဖီးနှစ်သွေးကန်ထဲသို့စိမ်ကာ ဖီးနှစ်သွေး၏များပြားလှသည့် စွမ်းအင်များကို အသုံးပြုကာ ပြန်လည်မွေးဖွားခြင်းကို ပြုလုပ်ခဲ့ခြင်းပင်။
ကံကောင်းစွာဖြင့်ပင် ရှီဟောင်လည်း ရှေးဟောင်းမိုင်းတွင်းတွင် သက်ရှည်ဆေးရည်ကိုအသုံးပြုပြီး ပြန်လည်မွေးဖွားခြင်းကို ပြုလုပ်ခဲ့သောကြောင့် သူတို့ကြားမှ ကွာဟချက် သိပ်မရှိတော့..
သို့သော် ယခုတစ်ခေါက်ရလိုက်သည့်အကျိုးကျေးဇူးလည်း မဆိုးဘူး .. ဒုတိယမြောက်တာအိုပန်းပွင့်ကို ကျင့်ကြံနိုင်ခဲ့သည်။ သူ့ခွန်အားထပ်တိုးသွားပြီဟု ရှီဟောင်ခံစားနေရသည်။
ခဏကြာပြီးသည့်နောက်တွင် သူ ပြုံးလိုက်မိသည်။ သူလောဘကြီးမိနေလေပြီ။ နောက်ထပ် သက်ရှိတစ်ယောက်ကို မဖန်တီးနိုင်သည့်အတွက် သူ စိတ်ပျက်နေစရာအကြောင်း မရှိ။
အမှန်တကယ်တွင် ထိုသက်ရှိလေးသည် တိုက်ပွဲထဲတွင် ဘာမှမလုပ်နိုင်သကဲ့သို့ သူလည်း ထိန်းချုပ်၍ မရပေ။
“ရှင် သီးသန့်ကျင့်ကြံတာ ပြီးပြီလား..” ဝမ်ရှီး ကျောက်တုံးအခန်းအပြင်ဘက်တွင် ရပ်ကာ မေးလိုက်သည်။
ရှီဟောင်သည် ချက်ချင်းပင် သူ့အော်ရာကို ပြန်သိမ်းလိုက်ကာ တံခါးဖွင့်လိုက်သည်။
“ငါတို့ သွားတော့မှာလား..”
“စောင့်ရဦးမယ်..” ဝမ်ရှီး ပြောလိုက်သည်။
ယခုတလောတွင် ကောင်းကင်နတ်ဘုရားကျောင်းသည် ဤကိစ္စအတွက် ပြင်ဆင်နေကြသည်။ သူတို့သွားမည်မှာ ထာဝရစစ်ကွင်းပြင်ဖြစ်သည့်အတွက် တစ်ခုမှားလိုက်သည်နှင့် သူတို့ဆုံးရှုံးမှုကြီးမားမည်ပင်။ ထို့ကြောင့် သူတို့အကောင်းဆုံးပြင်ဆင်ထားရန် လိုအပ်သည်။
ဤရက်အတွင်းတွင် သီးသန့်ကျင့်ကြံနေသည့်သူများလည်း ထွက်လာကြလေ၏။
ကိုယ့်ကိုကိုယ် ထူးခြားသည်ဟု ထင်သည့်သူများအားလုံး ဤပြိုင်ပွဲတွင် ဝင်ရောက်ယှဉ်ပြိုင်မည်ပင်။ ကောင်းကင်နတ်ဘုရားကျောင်းတွင်ရှိနေသည့်သူများထဲတွင် မည်သူက သူတို့နယ်မြေတွင် အင်အားအကြီးဆုံး မဟုတ်သနည်း။
ထို့ကြောင့်ပင် လူများစွာ ပါဝင်လာကြလေသည်။
“သူတို့တွေ အထဲမှာ သေသွားမှာကို မကြောက်ကြဘူးလား..” ရှီဟောင် ရေရွတ်လိုက်၏။ သူတို့သာ အထဲတွင် အသတ်ခံလိုက်ရပါက ကောင်းကင်နတ်ဘုရားကျောင်း၏ ဆုံးရှုံးမှု ကြီးမားသွားမည်မလား..
“သူ့အတိုင်းအတာနဲ့သူတော့ ရှိပါတယ်..” ဝမ်ရှီး ပြောလိုက်၏။ ထို့နောက် ရှီဟောင်အား ကျင့်ကြံခိုင်းထားပြီး အချိန်ကျသည်နှင့် ထွက်သွားမည်ဟု ပြောလိုက်လေသည်။
“ငါ အခုမှ သီးသန့်ကျင့်ကြံတာကနေ ထွက်လာတာ .. အဲဒီတော့ အထဲဘက်မှာ ဆက်နေစရာမလိုတော့ဘူး .. ဒီရက်တွေက ချစ်ကြည်ရေး ပွဲ နည်းနည်းလောက် တိုက်ဖို့အတွက် အချိန်ကောင်းပဲ.. ” ရှီဟောင် စိတ်လှုပ်ရှားစွာ ပြောလိုက်လေသည်။
ချစ်ကြည်ရင်းနှီးရေးပွဲ.. ဝမ်ရှီး သူ့အား အမူအရာကင်းမဲ့စွာ ပြောလိုက်သည်။
ရှီဟောင်မှာ အလွန်အရေထူလှသည်။ သူသည် ဆရာတစ်ယောက်၏ဟန်ပန်နှင့်ပင် အပြင်ဘက်သို့ ထွက်သွားလေ၏။
ခဏကြာပြီးသည့်နောက်တွင် စုလန်နှင့်ချန်နော့တို့ တိုင်တန်းလာကြလေ၏။
“နတ်ဆေးခင်းကိုမေးပြီးတော့ ဘာလုပ်မလို့လဲ..” စုလန်သူ့အား မေးလိုက်သည်။
“အဲဒီလောက်ကြီး လေးနက်နေဖို့မလိုပါဘူး .. ငါက လှည့်ပတ်ကြည့်ချင်ရုံပါပဲ..” ရှီဟောင်သည် အန္တရာယ်မရှိသည့်ပုံဖြင့် လေးလေးနက်နက်ပင် ပြောနေလေ၏။
ချန်နော့ သူ့အားစိုက်ကြည့်နေလိုက်သည်။ သူ ရှီဟောင်အား မပြောပြချင်ပေ။
“နတ်ဆေးခင်းကို ကာကွယ်ထားတဲ့ စွမ်းအားကြီးတဲ့ အစီအရင်တွေရှိတယ် .. မင်းဆေးခင်းနားရောက်သွားရင်တောင် အထဲဘက်က ဆေးပင်တွေကို မြင်ရမှာမဟုတ်ဘူး..” ချန်နော့ပြောလိုက်သည်။
“အဲဒါဆိုရင် .. အထဲဘက်ကိုဝင်နိုင်မယ့်နည်းလမ်း မရှိဘူးပေါ့ .. နှမြောစရာပဲ..” ရှီဟောင် ခေါင်းခါ၍ပြောလိုက်သည်။
ဤသည်ကို ကြားလိုက်ရသည်နှင့် ချန်နော့နှင့် စုလန်တို့နဖူးထက်တွင် အနက်ရောင်လှိုင်းများ ဖြစ်ပေါ်လာလေသည်။ ဒီကောင်က အထဲဝင်သွားပြီးတော့ ဆေးပင်တွေကို တကယ်ခိုးချင်နေတာလား .. ဤလူသည် ပြဿနာရှာသည့်နေရာ၌ အလွန်တော်သောကြောင့် သူတို့ စိုးရိမ်နေသည့်သူပင်။
“အဟွတ် .. ငါက စတာပါ .. မင်းတို့နှစ်ယောက်က တကယ်ကြီး ထင်နေတာလား..” ရှီဟောင် ပြောလိုက်၏။
ဒါက ဟာသလား .. လုံးဝကို မရယ်ရဘူးနော် .. သူတို့နှစ်ယောက်အား သူ့အား မျက်လုံးလှန်ကြည့်လိုက်ပြီးနောက် သူ့အား အာရုံစိုက်မနေကြတော့ပေ။
“တကယ်တော့ ငါမင်းတို့ဆီကနေ သိချင်တာလေးတွေ ရှိတယ် .. ငါတစ်ခြားသူတွေနဲ့ ပညာတွေဖလှယ်ပြီးတော့ ရင်းရင်းနှီးနှီးတိုက်ခိုက်ချင်လို့ပါ” ရှီဟောင် အလွန်ရိုကျိုးစွာ ပြောလိုက်လေသည်။
သူတို့နှစ်ယောက် စိတ်ဝင်စားသွားရသည်။ ဒီကောင်က ပြောင်းလဲလာတော့မှာလား..
“ရှင် သူတို့တွေနဲ့ တိုက်ချင်တာက ကျွန်မတို့နဲ့ ဘာဆိုင်လို့လဲ..” စုလန် မေးလိုက်၏။
“မင်းတို့နှစ်ယောက်ကို လမ်းပြပေးဖို့ မေးချင်လို့ပါ .. ဒီကျောင်းမှာ ဘယ်သူဖီးနှစ်သွေးရှိသေးလဲ.. ဘယ်သူက ငါနဲ့ရင်းရင်းနှီးနှီးတိုက်ချင်သေးလဲဆိုတာ နာမည်စာရင်းလေး လိုချင်လို့ပါ..” ရှီဟောင် နှိမ့်ချစွာပင် ပြောနေလေသည်။
စုလန်နှင့် ချန်နော့တို့ ဆွံ့အသွားပြီးနောက် သူတို့ဒေါသထွက်လာကြသည်။ သူစိတ်ပြောင်းလဲသွားပြီဟု သူတို့ထင်နေကြသော်လည်း ဒီကောင်က သူ အရင်စစိန်ခေါ်နေခြင်းပင်။
ဤကောင်သည် အောင်မြင်မှုကို အရသာတွေ့နေပြီဆိုသည်မှာ သေချာသည်။ ယခု ဖီးနှစ်သွေးရှိနေသည့် အခြားသူများ၏တံခါးများကိုပင် သွားခေါက်ချင်နေလေပြီ။
“ဟေး …။ မင်းတို့ ဘာလို့ ဘာမှမပြောတော့ပဲ တိတ်ဆိတ်သွားတာလဲ .. ငယ်ငယ်လေးနဲ့တက်ကြွမှုမရှိတော့တာက ကောင်းတဲ့ကိစ္စ မဟုတ်ဘူးနော်..” ရှီဟောင်ပြောလိုက်သည်။
သူတို့နှစ်ယောက်မှာ သူ့စကားများကြောင့် တံတွေးသီးသွားမတတ်ပင်။ သူတို့သည် အစက ဤလူကို လျစ်လျူရှုထားချင်သော်လည်း သူတို့အား ဒေါသမထွက်,ထွက်အောင် လာလုပ်နေသည်။ ဝမ်ရှီးကို ပြဿနာပေးနေခြင်းအား ရပ်တန့်ရန် သူတို့ တင်းတင်းကြပ်ကြပ် သတိပေးလိုက်ကြလေသည်။
“ငါက သူ့နောက်လိုက်မှ မဟုတ်တာ .. ငါ့ကို တာအိုရောင်းရင်းအဖြစ် ဖိတ်ခေါ်ထားတာ .. အဲဒီတော့ ငါလုပ်ချင်တာ လုပ်လို့ရတယ် .. စိတ်လျှော့ပါ .. ငါတကယ် ရင်းရင်းနှီးနှီး ပညာဖလှယ်ချင်လို့ပါ..” ရှီဟောင် အရေထူစွာပင် ပြောလိုက်လေ၏။
“ရှင့်ရည်ရွယ်ချက်က တကယ် သန့်ရှင်းတယ်ဆိုရင် တစ်ခြားသူတွေနဲ့ ဖီးနှစ်သွေးအကြောင်း မပြောနဲ့..” သူတို့နှစ်ယောက် ဆူပူလိုက်လေသည်။
“အကျိုးအမြတ်မရှိပဲနဲ့ ဘယ်လိုလုပ် အပြည့်အဝ ပျော်နိုင်မှာလဲ .. ဘဝဆိုတာက အလင်းနောက်လိုက်နေရတာ .. ပန်းတိုင်တွေရှိမှ စိတ်အားတက်ကြွပြီး တိုးတက်မှုတွေလည်း ရှိလာမှာ..”
ရှီဟောင်က ထိုနှစ်ယောက်ကို သင်ခန်းစာ ပြန်ပို့ချနေလေသည်။
“ရှင့်ကို မနိုင်တော့ဘူး .. ဘာပဲဖြစ်ဖြစ် ကျွန်မတို့ ရှင့်ကိုကူညီမှာ မဟုတ်ဘူး .. တစ်ခြားလူ သွားရှာလိုက်..”
“မဖြစ်ဘူး..” ရှီဟောင် ခေါင်းခါလိုက်သည်။
” ဒီလိုဆိုရင်ရော .. ချစ်ကြည်ရေးပွဲတွေကို ထားလိုက်ပါတော့ .. ငါ့ကို ချောက်ချတဲ့ကောင်မလေးနာမည်က ဘယ်လိုခေါ်တာ .. ချီလင်းလား..”
ရှီဟောင်ပြောသည့်ကောင်မလေးမှာ သူ့အား ဝမ်ရှီးအိပ်ရာပေါ်တက်နေသည်ဟု အော်ကြီးဟစ်ကျယ် အော်ပြောခဲ့သည့်ကောင်မလေးပင်။
“ရှင်က ဘာလို့ သူ့ကိုရှာနေတာလဲ … သူက မင်းသမီးယောင်ယွဲ့ရဲ့ အကောင်းဆုံးသူငယ်ချင်း .. ရှင် လျှောက်မလုပ်နဲ့..” စုလန် သတိကြီးကြီး ပြောလိုက်သည်။
“စိတ်မပူပါနဲ့ .. တကယ်တမ်းတော့ ငါလည်း မင်းသမီးယောင်ယွဲ့ရဲ့ ရင်းနှီးတဲ့မိတ်ဆွေလို့ ပြောလို့ရပါတယ် … အဲဒီတော့ သူ့ရဲ့အမျိုးသမီးမိတ်ဆွေကို နည်းနည်းလောက် ရိုက်တာက ကိစ္စကြီး မဟုတ်ပါဘူး..” ရှီဟောင် အရှက်မရှိ ပြောနေဆဲပင်။
“ရှင် ဘာလို့ ဒီလိုမျိုးလုပ်နေတာလဲ .. ပြဿနာရှာနေတာတွေ ရပ်ပေးလို့ရမလား .. မင်းသမီးယောင်ယွဲ့ဆိုတာက ထာဝရမိသားစု၊ အင်ပါယာတရားရုံက ထာဝရစွမ်းအင်သုံးကြောင်း ကျင့်ကြံထားတဲ့သူ .. ရှင် လိုက်ရှုပ်မနေနဲ့တော့ . ရှင် ချီလင်းကို ထိစရာ မလိုဘူး..” စုလန် အနည်းငယ် စိုးရိမ်လာပြီဖြစ်သည်။
“ငါ့ ကိုယ့်အတိုင်းအတာကို ကိုယ်သိပါတယ် .. ဒီမိန်းကလေးပါးစပ်က တော်တော်လေးကြီးတယ် .. ငါ့ခွန်အားက လုံလောက်အောင် ကောင်းနေလို့သာ .. မဟုတ်ရင် တစ်ရက်ပြီးတစ်ရက် သူများတွေစိန်ခေါ်တာကို တိုက်နေရတာနဲ့ ငါ အသတ်ခံရပြီးလောက်ပြီလေ မဟုတ်ဘူးလား..” ရှီဟောင် မကျေမနပ်ပြောလိုက်သည်။
“အဲဒါက အရင်ကဖြစ်ခဲ့တာတွေ .. ထားလိုက်ပါတော့..” ချန်နော့အကြံပေးလိုက်သည်။
“ဘယ်လိုလုပ် ထားလိုက်နိုင်မှာလဲ .. သူက ငါ့သိက္ခာကို စော်ကားခဲ့တာ .. အဲဒီတော့ ငါ့ရိုးသားမှုကို ငါကာကွယ်ရမယ်..” ရှီဟောင် လူမှန်ကြီးလို ပြောလိုက်လေ၏။
သူတို့နှစ်ယောက်လုံးမှာ ဒေါသထွက်လွန်းသောကြောင့် ရယ်မောနေရုံသာ တတ်နိုင်တော့သည်။
” နင့်မှာ ဘာဂုဏ်သိက္ခာများရှိသေးလို့လဲ .. မမလေးတောင်မှ ဒီကိစ္စကို ဒေါသမထွက်သလို ဘာမှလည်းဆက်မလုပ်တော့တာကို ရှင်က ဘာလို့လက်မလွတ်နိုင်ဖြစ်နေတာလဲ .. ရှင့်ကိုယ်ရှင်လည်း ပြန်ကြည့်လိုက်ဦး .. ဒီလောက်လူတွေအများကြီးဆီက ဖီးနှစ်သွေးတွေ လုယူပြီးတာတောင်မှာ တစ်ခုခုကို ကာကွယ်တဲ့အကြောင်း ပြောရဲသေးတယ်ပေါ့..” သူတို့နှစ်ယောက်လှောင်ရယ်လိုက်ကြသည်။
“ကိစ္စတိုင်းမှာ သူ့အကြောင်းအရင်းနဲ့သူရှိတယ် .. အဲဒီကောင်မလေးက ငါ့ကို ချောက်ချပြီးတော့ ငါ့ဂုဏ်သိက္ခာကို ပျက်စီးစေခဲ့တာ .. ငါနဲ့မင်းတို့မမလေးကြား တကယ် တစ်ခုခုဖြစ်ခဲ့ရင် ထားလိုက်ပါတော့ .. ဒီလိုမျိုးအပြောခံရလည်း မျက်လုံးပိတ်လိုက်ပြီးတော့ ပြီးပြီးသားကိစ္စတွေကို ဒီတိုင်းပဲ ထားလိုက်မယ် .. ဒါပေမဲ့ ငါတို့နှစ်ယောက်ကြားမှာ ဘာမှဖြစ်ချိန်မရလိုက်ပဲနဲ့ သူက ဒီလိုမျိုးအော်ဟစ်နေတာလေ … ဒီကိစ္စကို ဒီလိုမျိုးမထားလိုက်နိုင်ပါဘူး .. ”
ရှီဟောင်၏အမူအရာမှာ အလွန်လေးနက်နေလေ၏။
သူတို့နှစ်ယောက်လုံး ဆွံ့အသွားရသည်။ ဒီကောင်က .. အရမ်းကို အရှက်မရှိတာပဲ .. သူ့စကားများအရ ဖြစ်ခဲ့သမျှကိစ္စများကို မှားယွင်းနေသည်ဟု သူ မမြင်သည့်ပုံပင်။
“မင်း..”
“မမလေးသာ ရှင့်စကားတွေကို ကြားလိုက်ရင် ရှင့်မိသားစုကို ရှင်းပစ်လိမ့်မယ်..”
သူတို့နှစ်ယောက် ဒေါသတကြီး အော်ဟစ်လိုက်ကြသည်။
“ငါနဲ့သူက မိသားစုတစ်ခုတည်းကပဲ မဟုတ်ဘူးလား..” ရှီဟောင် တည်ငြိမ်စွာ ပြောလိုက်လေသည်။
“ရှင့်လောက် ကျိုးကြောင်းမဆီလျော်တဲ့သူကို တစ်ခါမှ မတွေ့ဖူးဘူး..” စုလန်မှာ ဒေါသထွက်လွန်းသောကြောင့် တုန်ပင်တုန်နေလေပြီ။ ချန်နော့လည်း ဘာပြောရမှန်းပင် မသိတော့။
ဤသို့ ပြောခံနေရသော်လည်း ရှီဟောင် စိတ်ထဲမထားသည့်ပုံပင်။ ထိုအစား သူသည် ချဉ်းကပ်ပုံချဉ်းကပ်နည်းကို ပြောင်းလဲလိုက်လေသည်။
” ချီလင်းက ဝမ်ရှီးကို အပုပ်ချခဲ့တာပဲလေ ..မင်းတို့ မမလေး ကိုယ်တိုင်မလုပ်ဘူးဆိုတာက မသင့်တော်လို့ .. ဒါပေမဲ့ သူ့ရဲ့စိတ်သဘောထားကို မင်းတို့နှစ်ယောက် နားမလည်ဘူးလား .. ငါ တိုက်ခိုက်ချင်နေတာလို့ မင်းတို့ ဘာလို့ ထင်နေတာလဲ ပြောကြည့် .. တကယ်တမ်းက ဝမ်ရှီး ငါ့ကို တိုက်ခိုက်ခိုင်းစေချင်နေတာ..” ရှီဟောင် လေးနက်စွာပင်ပြောလိုက်လေသည်။
ဤစကားကိုကြားလိုက်သည်နှင့် သူတို့နှစ်ယောက်လုံး ဆွံ့အသွားရသည်။
“ရှင် အဓိပ္ပာယ်မရှိတာတွေ လျှောက်မပြောနဲ့တော့ .. ရှင့်ရဲ့ မကောင်းတဲ့ရည်ရွယ်ချက်တွေကို စကားလုံးလှလှလေးနဲ့ လာဖုံးမနေနဲ့..” စုလန် မယုံကြည်ပေ။
“ဒီကလေးက သင်လို့ကို မရဘူးပဲ..”
ရှီဟောင် ခေါင်းခါ၍ ပြောလိုက်သည်။
“ထာဝရစွမ်းအင်သုံးကြောင်းရှိတဲ့သူတွေကို ထူးခြားတဲ့ဂျီးနီးယပ်စ်တွေလို့ ခေါ်ကြတာမလား .. အဲဒီတော့ အဲဒီလူနည်းစုက ဘယ်လိုလုပ် လွယ်လွယ်ကူကူနဲ့တိုက်ကြမှာလဲ .. ဒီတစ်ခေါက်က မင်းတို့ကလန်ရဲ့မမလေး လှုပ်ရှားရတာ ပိုလွယ်ကူအောင်လို့ ငါတို့ရန်သူကို စည်းကျော်ရမယ် .. အဲဒီတော့မှသာ ငါတို့ဘက်က ပိုပြီးတော့ ကျိုးကြောင်းဆီလျော်မှာပေါ့ .. ငါ့တို့မှာ ရွေးချယ်စရာ မရှိဘူး..”
သူတို့နှစ်ယောက် တစ်ယောက်ကိုတစ်ယောက် ဆွံ့အစွာ ကြည့်လိုက်ကြသည်။
“ငါ့ကိုလမ်းပြ .. အဲဒါမှ ငါ အဲဒီနတ်သမီးကို ရိုက်လို့ရမှာ … နောက်ကျရင် မင်းတို့အားလုံး နားလည်သွားလိမ့်မယ်..” ရှီဟောင်ပြောလိုက်သည်။
စုလန်နှင့် ချန်နော့တို့ ဆွံ့အသွားကြ၏။ သို့သော်လည်း နောက်ဆုံးတော့ .. သူတို့သဘောတူလိုက်သည်။ ဘာပဲဖြစ်ဖြစ် စွန့်စားတာက ဒီကောင်ပဲလေ .. သူ့ကိုဖမ်းမိသွားရင်လည်း သူ ခံလိမ့်မယ်။