သုခကမ္ဘာက ရှီဟောင် - Chapter - 1301 ထွက်ခွာခြင်း
ယွမ်ဖုန်းသည် ငွေရောင်ချပ်ဝတ်တန်ဆာကို ဝတ်ဆင်ထားကာ ရှီဟောင်တို့ဘက်သို့ ကြည့်နေလေသည်။
သူ၏ဝိညာဉ်အာရုံများမှာ စူးရှလှသောကြောင့် တစ်စုံတစ်ခုရှိနေသည်ကို အာရုံခံမိသည်။ သူသည် ရှီဟောင်အား စိုက်ကြည့်နေလေ၏။
ရှီဟောင် ထိုနေရာသို့သွားကာ ဤလူကို သေချာပေါက် စိန်ခေါ်လိမ့်မည်ဟု စုလန်နှင့်ချန်နော့တို့ ထင်ထားခြင်းပင်။ သို့သော် ရှီဟောင်သည် တစ်ဖက်သို့လှည့်ကာ ပြန်ထွက်သွားလေ၏။
“ဒါက ခင်ဗျားပုံစံနဲ့မတူသလိုပဲ..” ချန်နော့ နားမလည်နိုင်တော့။
“ဒီကောင်က အခုမှ ကျောင်းကိုဝင်လာတာ .. သူ့မှာ ဖီးနှစ်သွေးရှိဦးမှာ မဟုတ်ဘူး … သူနဲ့တိုက်တာက ငါ့အချိန်တွေ ဖြုန်းသလိုပဲ ဖြစ်သွားမှာပေါ့ မဟုတ်ဘူးလား..” ရှီဟောင် နှုတ်ခမ်းကို တွန့်ကွေးကာ ပြောလိုက်သည်။
စုလန်နှင့် ချန်နော့တို့ အံ့အားသင့်သွားကာ သူ့အား ငေးကြောင်ကြည့်နေကြလေသည်။
ရှီဟောင် တစ်ဖက်သို့လှည့်လိုက်သည်နှင့် အေးစက်သည့်အလင်းတန်းတစ်ခု ဖြတ်သွားလေ၏။ အမှန်တကယ်တွင် သူသည် ဤလူကို စိန်ခေါ်ရန်လာခြင်းမဟုတ်။ သတ်ရန်လာခြင်းပင်။
သူ ယွမ်ချင်းကို အံ့အားသင့်အောင်လုပ်ပေးရမည်။
သူ ဤလူကိုသတ်မည်ဖြစ်သောကြောင့် ယခု ဘာမှမလုပ်ခြင်းပင်။ သူ ဤလူကို ထာဝရစစ်မြေပြင်တွင် သတ်ရမည်။
ထိုနေရာတွင် မည်သည့်ကန့်သတ်ချက်မှမရှိ၊ အကြီးအကဲများ ဝင်နှောက်ယှက်မည်ကိုလည်း စိုးရိမ်စရာ မလို၊ အပြစ်ပေးခံရမည်လည်း မဟုတ်။
“ရပ်လိုက်..” အနောက်ဘက်မှ အော်သံတစ်သံ ထွက်ပေါ်လာလေ၏။ ယွမ်ဖုန်း၏အမူအရာလည်း ငြင်သာနေသည် မဟုတ်ပေ။ သူသည် ရှီဟောင်တို့သုံးယောက်အား စိုက်ကြည့်နေလေသည်။
“ရှင်တစ်ခုခု လိုအပ်လို့လား..” စုလန် လှည့်မေးလိုက်သည်။
“မင်းတို့တွေက နတ်သမီးဝမ်ရှီးရဲ့နောက်လိုက်တွေလား..” သူကျောင်းသို့ ရောက်လာာသည်မှာ မကြာသေးသော်လည်း သတင်းတော်တော်များများ သိထားသည်ပင်။
“ဟုတ်တယ် .. အဲဒီတော့ ဘာဖြစ်လဲ..” စုလန်ပြောလိုက်သည်။
ထိုအချိန်တွင် ရှီဟောင်လည်း လှည့်လာကာ သူ့အားပြုံးကြည့်လာလေ၏။
“ဟက် .. မင်းက တစ်ခြားသူတွေနဲ့ ပြိုင်ရတာကို ကြိုက်တဲ့တစ်ယောက်လား .. ငါ့နေရာကို ရောက်လာပြီးမှ ဘာလို့ပြန်လှည့်ထွက်သွားတာလဲ..” ယွမ်ဖုန်း တောက်ပနေသည့်မျက်လုံးများဖြင့် ပြောလိုက်သည်။
“အိုး ..မင်းက ငါနဲ့တိုက်ချင်လို့လား..” ရှီဟောင်မေးလိုက်သည်။
“ငါတို့ ပညာဖလှယ်လို့ရတယ် .. စည်းမျဉ်းကတော့ မင်းအတိုင်းပဲပေါ့ .. ရှုံးတဲ့သူက ဖီးနှစ်သွေး ပေးရမယ်..” ယွမ်ဖုန်းပြောလိုက်သည်။
စုလန်နှင့် ချန်နော့တို့နှစ်ယောက်လုံး ထိတ်လန့်သွားရသည်။ ဤလူသည် ဖီးနှစ်သွေးအတွက် ရောက်လာခြင်းပင်။ သူသည် ‘ပညာဖလှယ်သည်’ ဟူသည့်စကားလုံးလှလှလေးကို သုံးနေသော်လည်း သူ့ရည်ရွယ်ချက်မှာ ရှီဟောင်နှင့် အတူတူပင်။
“ဖီးနှစ်သွေး .. ငါ့မှာ ဖီးနှစ်သွေး လေးလုံးရှိတယ် ..မင်းမှာရော ရှိလို့လား..” ရှီဟောင် တည်ငြိမ်စွာပင်မေးလိုက်ကာ သူ ချီလင်းထံမှ ယူလာသည့် ပုလင်းလေးများကို ထုတ်ပြလိုက်လေသည်။
ယွမ်ဖုန်း၏ မျက်ဝန်းမှ အရောင်များပိုမိုတောက်ပလာလေသည်။
“ငါ ရှုံးရင်ပေးဖို့ ဖီးနှစ်သွေးရှိတယ်..” ထို့နောက်တစ်ဖက်လူကို ကြည့်လိုက်ကာ “မင်း ငါနဲ့တိုက်ချင်ရင် ကျေးဇူးပြုပြီးတော့ မင်းရဲ့ဖီးနှစ်သွေးကိုလည်း ပြပေးပါ..”
“ငါ့မှာ အခုမရှိသေးဘူး .. ဒါပေမဲ့ ခဏနေရင်တော့ ရှိတော့မှာ .. ငါတို့ အရင်တိုက်လို့ရတယ် … ငါရှုံးရင် မင်းကိုပေးမယ်..” ယွမ်ဖုန်းပြောလိုက်၏။
သူ့မျက်လုံးများမှာ ရှီဟောင်လက်ထဲမှ ဖီးနှစ်သွေး ၄ ပုလင်းထံတွင်သာ ရောက်နေလေသည်။
“မင်းမှာ ဖီးနှစ်သွေးမရှိရင် မင်းက ဘာနဲ့လောင်းမှာလဲ .. မင်းက ဝံပုလွေလက်ထဲကနေ လက်ဗလာနဲ့ခိုးချင်နေတာလား..” ရှီဟောင် ချက်ချင်းပင် ငြင်းဆိုလိုက်သည်။
အမှန်တကယ်တွင် ရှီဟောင်ဤလူအား တိုက်ခိုက်ချင်နေသည်။ သို့သော်လည်း ဤသည်မှာ ကောင်းကင်နတ်ဘုရားကျောင်းဖြစ်နေသည်။ သူ့ကို အနိုင်ယူလိုက်ပါက အားလုံးအာရုံစိုက်လာလိမ့်မည်။ သူ့ကိုလည်း သတ်၍ရတော့မည် မဟုတ်။
ရှီဟောင် ဤနေရာမှ ထွက်ခွာကာ ဆက်လျှောက်လာလိုက်သည်။
“ခဏနေဦး..” ယွမ်ဖုန်း အနောက်မှ လိုက်လာလေသည်။ ရှီဟောင်သည် တရားဝင်တပည့်များကို အနိုင်ယူကာ ဖီးနှစ်သွေးများရထားသည်ကို သူ သိထားသည်။
သူသည် ယခုမှ ကျောင်းကို ဝင်လာခြင်းဖြစ်သောကြောင့် ဖီးနှစ်သွေးနှင့် အခြားအရာများကို လိုအပ်သည်။ ဤလူထံတွင် ဖီးနှစ်သွေးအချို့ရှိနေသည်ကို သိသောကြောင့် သူ ဤလူနှင့်တိုက်ခိုက်ကာ သွေးများကို လိုချင်နေသည်။
သို့သော်လည်း သူအကြောင်းပြချက်ကောင်းကောင်း လိုအပ်သည်။ လက်လွတ်စပယ်ခိုးယူလိုက်ပါက ပြဿနာများဖြစ်လာမည်။
“မင်းက ဝမ်ရှီးရဲ့နောက်လိုက်ထက် မပိုဘူး .. မင်းက တရားဝင်တပည့်မဟုတ်တာတောင်မှ ဝင့်ကြွားပြီးတော့ တရားဝင်တပည့်တွေကို စိန်ခေါ်ရဲတယ် .. ငါဒါကို ဒီအတိုင်းမထားလိုက်နိုင်ဘူး .. မင်းကို သင်ခန်းစာပေးရမယ်..” ယွမ်ဖုန်းသည် သူမှန်နေသလို ပြောလိုက်လေသည်။
“ကြောင်သူတော်ကြီး..” စုလန် နှုတ်ခမ်းများတွန့်ကွေးကာ ပြောလိုက်၏။ တစ်ဖက်လူမှာ သက်သက်အကြောင်းရှာခြင်းဖြစ်သည်ကို သူမပင် မြင်နိုင်နေသည်ပင်။
“မင်းက ဘာလို့ ငါနဲ့တိုက်ချင်နေတာလဲ..” ရှီဟောင် တစ်ဖက်လှည့်ကာ ပြောလိုက်သည်။
“တရားဝင်တပည့်တွေ မင်းကြောင့် အရှက်ကွဲမခံနိုင်ဘူး .. နောက်လိုက်တစ်ယောက်က ကျောင်းမှာ လျှောက်ပြေးလွှားနေလို့မရဘူးဆိုတာကို ငါ သူတို့အတွက် သက်သေပြပေးမယ် .. မင်းကို သင်ခန်းစာကောင်းကောင်းပေးရမယ်..” ယွမ်ဖုန်းသည် ပို၍ပင် ဖြောင့်မတ်သည့်ပုံစံ ပြောလာလေ၏။
ရှီဟောင် ကူကယ်ရာမဲ့သွားသလို ခံစားလိုက်ရသည်။
“ထားလိုက်တော့ .. ငါမင်းနဲ့တိုက်ဖို့ စိတ်မပါသေးဘူး..” ရှီဟောင်ပြောကာ ထွက်လာလိုက်သည်။
“မင်းက ဘယ်သွားချင်နေတာလဲ..” ယွမ်ဖုန်းသည် အော်ဟစ်ကာ ရှီဟောင်အား တားဆီးရန် တရှိန်ထိုးရောက်လာလေသည်။ သူ၏မျက်လုံးများမှာလည်း အသူရာချောက်နက်ကြီးကဲ့သို့ နက်မှောင်နေလေသည်။
သူတို့နှစ်ယောက် တိုက်ခိုက်လိုက်သည်နှင့် မိုးခြိမ်းသံများဆူညံလာလေသည်။ ရှီဟောင်သည် အားကုန်မသုံးပဲ အနည်းငယ် ထိန်းထားလိုက်သည်။
ယွမ်ဖုန်း၏တစ်ကိုယ်လုံးကို အရိုးစာသားများ ဖုံးလွှမ်းသွားလေ၏။ သူသည် ထာဝရစွမ်းအင် ၂ ကြောင်းကို အသုံးပြုကာ ရှီဟောင်အားဖိနှိပ်လိုခြင်းပင်။
“ဒီလောက်ပဲလား .. ငါက ဘာလို့ မင်းစွမ်းအားကြီးတယ်လို့ ခေါင်းရှုပ်ခံပြီး စဉ်းစားနေရတာလဲ..” သူအေးစက်စွာ ပြောလိုက်သည်။
သို့သော် ရှီဟောင် ပြန်ဆုတ်လိုက်နိုင်ပြီး ဖိနှိပ်မခံရပေ။
“ဒီပွဲကို ငါနိုင်ရင် သဘောတူထားတာကို လုပ်ပေးနိုင်မလား .. ငါ့ကို ဖီးနှစ်သွေးပေး” ယွမ်ဖုန်းအေးစက်စွာ ပြုံး၍ပြောလိုက်သည်။
“မင်း ဖီးနှစ်သွေးကို အရင်ထုတ်ပြရမယ်လို့ ငါပြောထားပြီးသား .. မဟုတ်ရင် ဒီတစ်ပွဲကို ထည့်မတွက်ဘူး..” ရှီဟောင် ခေါင်းခါ၍ပြောလိုက်သည်။
“အခုထိ ငြင်းချင်နေတုန်းလား .. လောင်းကစားလုပ်ရင် အရှုံးကိုလည်း လက်ခံနိုင်အောင် လုပ်ထားသင့်တယ်..” ယွမ်ဖုန်း အော်ဟစ်လိုက်သည်။ ရှီဟောင် ဖီးနှစ်သွေးပုလင်း ထုတ်လိုက်သည်ကို မြင်လိုက်ကတည်းက ဤပုလင်းများ သူ့အပိုင်ဖြစ်လာရမည်ဟု သူ ဆုံးဖြတ်ချက်ချပြီးသားပင်။
ဝုန်း..
နောက်တစ်ကြိမ်တိုက်ခိုက်ကြပြီးနောက် နှစ်ယောက်လုံး လွင့်ထွက်သွားလေသည်။ ရှီဟောင်သည် စုလန်နှင့် ချန်နော့ကိုခေါ်ကာ လှည့်ထွက်လာလိုက်သည်။
“မင်းကို ထွက်ပြေးခွင့်မပြုဘူး .. ဖီးနှစ်သွေးကို ထားခဲ့လိုက်..” ယွမ်ဖုန်း ရန်လိုလာလေသည်။
“ရှင့်ကိုယ်ရှင် ဘယ်သူလို့ထင်နေတာလဲ .. လောင်းကစားလုပ်တာ လောင်းကြေးမထည့်ပဲနဲ့ အနိုင်လိုချင်နေတာလား..” စုလန် သည်းမခံနိုင်တော့ပဲ ပြောလိုက်သည်။
“ပြီးတော့ မင်းနိုင်မယ့်ပုံလည်း မပေါ်ပါဘူး..” ချန်နော့လည်းပြောလိုက်သည်။ သူတို့ ရှီဟောင်ကို မကြိုက်သော်လည်း အပြင်လူရှေ့တွင်တော့ သူတို့ အတူတူပြန်ဆုတ်ရမည်ပင်။
ရှီဟောင်သည် ရပ်တန့်သွားခြင်းမရှိပဲ လျှပ်စီးတန်းတစ်ခုနှင့်အတူ ထွက်သွားလေ၏။ သူသည် ယွမ်ဖုန်းအား သူ၏မပြတ်သားမှုအတွက် နောင်တရအောင် လုပ်လိုခြင်းပင်။ သူသာ နည်းနည်းလေး ထပ်တိုးလာပါက သူအောင်မြင်သွားလောက်လေပြီ။
“သူ ထွက်ပြေးသွားပြီ .. သူသာ ဆက်တိုက်နေရင် သူ သေချာပေါက်ရှုံးမှာ..” ယွမ်ဖုန်း သူ့ကိုယ်သူ ပြောလိုက်သည်။ သူ့ထံတွင် မသုံးရသေးသည့်ခွန်အားများရှိနေသေးသောကြောင့် သူ့ကိုယ်သူ ယုံကြည်မှုရှိသည်ပင်။
ထို့နောက်တွင် အချို့လူများ သတင်းကြားကာ ရှီဟောင်အား စိန်ခေါ်နိုင်ရန်အတွက် ယွမ်ဖုန်းအား ဖီးနှစ်သွေး ငှားပေးကြလေသည်။
ထာဝရစွမ်းအင် ၂ ကြောင်းရှိသည့်သူမှာ အားလုံး၏အာရုံကို ဆွဲဆောင်နိုင်သည်။ အချို့လူများမှာ ယွမ်ဖုန်းအား ဆွဲထည့်ရန် ကြိုးစားနေကြလေသည်။
သူတို့ စိန်ခေါ်တော့မည်အချိန်၌ ကံမကောင်းစွာဖြင့်ပင် သူတို့ ထာဝရစစ်မြေပြင်သို့ သွားနိုင်ပြီဖြစ်ကြောင်း ကျောင်းမှ သတင်းထုတ်ပြန်လာသည်။
ဤသည်မှာ ကိစ္စကြီးတစ်ခုဖြစ်သောကြောင့် အကြီးအကဲများနှင့် တပည့်များအားလုံး သေချာအာရုံစိုက်ထားလိုက်ကြသည်။
သူတို့ ထာဝရစစ်မြေပြင်ကို ဝင်ခြင်းမှာ ကိုယ့်သဘောနှင့်ကိုယ်သာဖြစ်ပြီး သူတို့ကို ဖိအားပေးထားခြင်း မရှိ။
ထို့နေ့တွင် ကျောင်း၌ ကျယ်လောင်လှသည့် ဟစ်ကြွေးသံများကို ကြားနေရလေ၏။
“နောက်ဆုံးတော့ စတော့မှာလား..” ရှီဟောင်မျက်လုံးများ ပွင့်လာသည်။ သူသည် ဝမ်ရှီး၏ဂူထဲတွင် မတ်တပ်ရပ်လိုက်ကာ သူ့မျက်လုံးမှ တောက်ပသည့် နတ်အလင်းများ ထုတ်လွှတ်နေလေသည်။
သိပ်မဝေးသည့်နေရာတွင်ရှိနေသည့် ဝမ်ရှီးသည် အစောကြီးကတည်းက ထရပ်ပြီးသားပင်။ သူမသည် မြေကြီးထိရှည်သည့် ဝတ်ရုံရှည်ကို ဝတ်ဆင်ထားလေသည်။
ထိုနေ့တွင် လုထော်၏ ဟစ်ကြွေးသံလည်း ထွက်ပေါ်လာလေ၏။ သူလည်း သေချာပေါက် ထာဝရစစ်မြေပြင်ထဲသို့ သွားမည်ပင်။
ဖုန်းရှင်းထျန်၊ မင်းသမီးယောင်ယွဲ့၊ ရွှမ်းခွန်နှင့် အခြားသူများလည်း ထိုနေရာသို့ သေချာပေါက် သွားကြမည်ပင်။
“ငါကြားတာတော့ ဒီတစ်ခေါက် အဲဒီမှာ ကောင်းကောင်းလုပ်လာနိုင်ရင် ကျောင်းက ထာဝရအရိုးစာအုပ်တစ်အုပ်ပေးမှာတဲ့..” တစ်စုံတစ်ယောက်မှ အလွန်စိတ်လှုပ်ရှားစွာ ပြောလိုက်သည်။
“အဲဒီစစ်မြေပြင်မှာ ကောင်းကောင်းလုပ်နိုင်ရင် ကျောင်းက ဆုကို လိုဦးမှာလား .. အဲဒီမှာ လျှို့ဝှက်စာအုပ်တွေ၊ ရှေးဟောင်းထာဝရလက်နက်နဲ့ တစ်ခြားအဖိုးတန်တဲ့ပစ္စည်းတွေ အများကြီးရှိတယ်တဲ့..”
ထွက်မသွားရသေးခင်မှာပင် ဤလူများ အလွန်စိတ်လှုပ်ရှားနေကြလေပြီ။ သူတို့အခွင့်အရေးကောင်းများကို ရပြီး တိုးတက်လာဖို့ မျှော်လင့်နေကြသည်။
“ဝူး ဝူး..” အားလုံးကို ထွက်ခွာရန် နှိုးဆော်နေသကဲ့သို့ စစ်ခရာသံ ထွက်ပေါ်လာလေ၏။
ထိုနေ့တွင် ကျောင်း၌ လှေကြီးတစ်စီး စောင့်ဆိုင်းနေလေသည်။ အားလုံးတက်သွားပြီးနောက် ခပ်ဝေးဝေးရှိ ရှေးဟောင်းမြေတစ်ခုသို့ ထွက်ခွာသွားလေတော့သည်။
ရွှေရောင်လှေကြီးမှာ ကြီးမားလွန်းလှပြီး ကျွန်းကြီးတစ်ကျွန်းစာပမာဏပင်ရှိသည်။ ကုန်းပတ်ပေါ်တွင် လူများစွာရှိနေပြီး တောတောင်များ၊ မြစ်ချောင်းများကို ကြည့်နေကြလေ၏။
လှေပေါ်တွင် စုန်းမ၊ ချောင်ယုရှန်း၊ ချန်ကုန်းယန်၊ ယုန်ဖြူလေး၊ ချင်းရီနှင့် အခြားသူများကို တွေ့ခဲ့ရသည်။ သူတို့လည်း ရှေးဟောင်းမြေသို့ သွားရန် ရွေးချယ်ခဲ့ကြသည်ပင်။
သို့သော်လည်း သူတို့အား မခေါ်နိုင်သေး။ ယခုတစ်ခေါက်တွင် သူ သတ်ဖြတ်ခြင်းကို စတင်မည်ဖြစ်သောကြောင့် သူနှင့်ရင်းနှီးသည့်သူများကိုပါ သူ ဆွဲမထည့်ချင်။
စစ်သင်္ဘောကြီးသည် အရှိန်တင်တော့မည့်ပုံစံဖြင့် တောက်ပလာလေသည်။
“အဲဒါက ဘာကြီးလဲ..”
“ငါတို့ရောက်ခါနီးနေပြီ .. အဲဒီနေရာက အရင်တုန်းက ထာဝရသက်ရှိတွေ တိုက်ခိုက်ခဲ့ကြတဲ့ နေရာလား..”
ကြီးမားလှသည့်မုန်တိုင်းကြီး ရောက်လာတော့မည်။