သုခကမ္ဘာက ရှီဟောင် - Chapter - 1303 အနီရောင် ဒီရေ
ကြယ်ရောင်များတောက်ပနေကာ နီညိုရောင်မြေကြီးသည်လည်း အထီးကျန်သည့်ခံစားချက်များ ပေးနေလေသည်။
ဤနေရာမှာ အားလုံးထင်ထားသည်ထက်ပင် ပို၍ကြောက်စရာကောင်းနေသည်။ သူတို့ ယခုမှ စတင်ဝင်ရောက်ခြင်းဖြစ်သော်လည်း သေဆုံးသည့်သူများရှိနေလေပြီ။
အားလုံးသည် လက်လွတ်စပယ်မလုပ်ရဲကြတော့ပဲ သတိကြီးကြီးဖြင့်ပင် အတွင်းပိုင်းသို့ ဝင်သွားလိုက်ကြလေသည်။
ဝမ်ရှီးသည် ထာဝရစွမ်းအင်သုံးကြောင်းကို ထုတ်ထားပြီး ကြာပွင့်လေးယိမ်းနေသကဲ့သို့ပင် လျှောက်သွားလေ၏။ သူမသည် လရောင်အောက် ရွေ့လျားနေသည့် နတ်သမီးနှင့်ပင် တူလေသည်။
ရှီဟောင်သည် သိပ်အဝေးကြီးမသွားပဲ သူမနားမှနေ၍သာ စစ်မြေပြင်ထဲသို့ ဝင်သွားလိုက်သည်။
အခြားသူများသည်လည်း ဤကဲ့သို့ပင်။ တရားဝင်တပည့်များသည် သူတို့၏ နောက်လိုက်များကို ဘေးတွင်ထားကာ ကာကွယ်ပေးထားကြလေသည်။ ပြောရမည်ဆိုလျှင် နောက်လိုက်အနည်းဆုံးသူမှာ ဝမ်ရှီးပင်။ ရှီဟောင်တစ်ယောက်တည်းသာ ခေါ်လာလေ၏။
လုထော်၊ ရွှမ်ခွန်နှင့် အခြားသူများပင်လျှင် ၅ ယောက်၊ ၆ ယောက်ခန့် ပါကြသည်။ အားလုံးမှာ ကျွမ်းကျင်သူများပင်။
ခပ်ဝေးဝေးတွင် သွယ်လျကာ ကျက်သရေရှိသည့် အမျိုးသမီးတစ်ယောက်ရှိနေလေ၏။ ဤသည်မှာ မင်းသမီးယောင်ယွဲ့ပင်။ သူမသည် ဝမ်ရှီးကို ပြုံးပြလိုက်ကာ “အစ်မကြီး .. ဒါက အစ်မရဲ့ ‘အစေခံ’ မဟုတ်ပဲနဲ့ ‘တာအိုရောင်းရင်း’ ဆို .. စိတ်ဝင်စားစရာပဲ .. အစ်မတို့နှစ်ယောက် ဒီလိုလျှောက်လာတော့ တာအိုလက်တွဲဖော်တွေ ကျနေတာပဲ..”
သူမ၏စကားများမှာ အခြားသူများ၏ အာရုံကို ဆွဲဆောင်လိုက်နိုင်သည်။ လူကွဲသွားပြီဖြစ်သော်လည်း ကျင့်ကြံဆင့်မြင့်ကာ နားပါးသည့်သူများမှာ သူမ စကားများအား သေချာကြားလိုက်သည်။
ဒါက ရန်စတာလား .. သူတို့ အခုမှ စစ်မြေပြင်ထဲဝင်တာ … စပြီးတော့ ရန်ဖြစ်ကြတော့မှာလား..
ဤနေရာတွင် သင့်တော်သည့်တိုက်ပွဲများကို ခွင့်ပြုကြောင်း၊ သူတို့အသေးစိတ်စုံစမ်းမည်မဟုတ်ကြောင်း ကောင်းကင်နတ်ဘုရားကျောင်းမှ အကြီးအကဲများ အရိပ်အမြွက်ပြောထားပြီးသားပင်။ ဤသည်မှာ တရားဝင်တပည့်များ ဤနေရာကို လာကြခြင်း၏ အဓိကအကြောင်းရင်းတစ်ခုလည်း ဖြစ်သည်။
“ဝိုး .. မင်း မျက်လုံးတော်တော်ကောင်းတာပဲ .. တစ်ချက်ကြည့်လိုက်ရုံနဲ့သိတယ်ဆိုတော့..” ဝမ်ရှီး ဘာမှ ပြန်မပြောရသေးခင်မှာပင် ရှီဟောင်ပြောလိုက်လေသည်။
အချို့လူများမှာ ထိတ်လန့်သွားကြလေ၏။ ဒီကောင်က အရှက်မရှိလျှောက်ပြောတဲ့နေရာမှာ တကယ်တော်တာပဲ .. ဝမ်ရှီး သူ့ကို ရန်လိုလာမှာကို မကြောက်ဘူးလား..
သေချာပါသည်။ ဝမ်ရှီး၏အမူအရာ တောင့်တင်းသွားကာ သူမ၏မျက်လုံးများသည်လည်း အေးစက်နေသည့်ကြယ်များကဲ့သို့ပင် ရှီဟောင်အား စိုက်ကြည့်လာလေ၏။
“ငါက စတာပါ..” ရှီဟောင် အလောတကြီး ပြန်ရှင်းပြလိုက်လေ၏။
မင်းသမီးယောင်ယွဲ့သည် ငြင်သာစွာပင် ရယ်မောလိုက်လေ၏။ သူမသည် နှိုင်းယှဉ်၍မရနိုင်လောက်အောင်ပင် လှပလှသည်။
” တာအိုရောင်းရင်းတို့အတွက် တကယ်ကို ဂုဏ်ယူပါတယ် .. ကျောက်စိမ်းစုံတွဲက ဒီလိုမျိုးလှုပ်ရှားကြတော့ လူတွေက မနာလိုဖြစ်ကြတော့မှာပဲ..”
သူမသည် ပြောနေရင်းဖြင့်ပင် အခြားသူများအား လှည့်ကြည့်လိုက်လေသည်။ သေချာပါသည်။ လူများစွာမှာ ထူးဆန်းသည့်အမူအရာများဖြစ်နေကြလေ၏။ ဝမ်ရှီးမှာ မည်ကဲ့သို့သောလူဖြစ်သနည်း .. သူမသည် သက်ရှည်မိသားစု၏ ပုလဲလုံးလေးပင်။ သူမနှင့်ယှဉ်ကာ လျှောက်ရန်မှာ လူပေါင်းများစွာ နေ့နေ့ညညစိတ်ကူးယဉ်နေသည့်အရာပင်။
“မမလေး ဝမ်ရှီးက ထာဝရသက်ရှိ ပြန်ဝင်စားသလို ထက်မြက်တဲ့သူပါ .. ကျုပ်ကတော့ အတူတူခရီးသွားခွင့်ရတဲ့ ကံကောင်းတဲ့သာမန်လူပါပဲ..” ရှီဟောင် ပြောလိုက်၏။ ထို့နောက် သူသည် မင်းသမီးယောင်ယွဲ့ကိုကြည့်ကာ “တကယ်တော့ မမလေးနဲ့ကျွန်တော်က ပိုပြီးတော့ ကံပါတယ်ထင်တယ် .. ပုလဲလုံးနဲ့ကျောက်စိမ်းတို့ရဲ့ ပြီးပြည့်စုံတဲ့ ပေါင်းစည်းမှုပေါ့ .. နိမ့်ကျတယ်လို့ ခံစားရပြီးတော့ ရှက်နေစရာ မလိုပါဘူး..”
“ရဲတင်းလိုက်တာ..” မင်းသမီးယောင်ယွဲ့ဘေးတွင်ရှိနေသည့် လူငယ်လေးမှ အော်ဟစ်လိုက်သည်။
မင်းသမီးယောင်ယွဲ့ ဆွံ့အနေလေ၏။ ဒီကောင်က သူ့ကို ဒီလိုမျိုးလာပြောရဲတယ် .. သူက ဝမ်ရှီးကို မြှောက်ပြီးတော့ ငါ့ကို နှိမ့်ချချင်နေတာလား .. အရင်တုန်းက သူတို့နှစ်ယောက်ရဲ့ကျော်ကြားမှုက အတူတူပဲ .. အခု သူမက တစ်ဆင့်နိမ့်သွားပြီလား…
တစ်ခဏမျှဆွံ့အပြီးသည့်နောက်တွင် သူမသည် ရယ်မောလိုက်ကာ လက်ဝေ့ရမ်းပြီး ပြောလိုက်လေ၏။ “တာအိုရောင်းရင်းက အဲဒီလိုယုံကြည်ထားတာဆိုတော့ ဝမ်ရှီးကို စွန့်လွတ်ပြီးတော့ ကျွန်မနဲ့အတူတူသွားရင်ရော…”
“အဲဒါဆိုရင်တော့ နတ်သမီးဘေးက စိတ်တိုစရာကောင်းတဲ့သူတွေကို အရင်ဆုံးစွန့်ပစ်လိုက်ဖို့ မေးရတော့မှာပဲ..” ရှီဟောင် သူ့အား ဒေါသတကြီးစိုက်ကြည့်ကာ နှာခေါင်းရှုံနေကြသည့် သူများကို ဦးတည်လိုက်လေသည်။
မင်းသမီးယောင်ယွဲ့ နောက်လိုက်သည်။ ထိုစကားကိုကြားသည်နှင့် သူတို့ခန္ဓာကိုယ်မှ သတ်ဖြတ်လိုသည့်အငွေ့အသက်များ ထွက်ပေါ်လာလေသည်။
သူတို့အခုမှ စထွက်တာကို တိုက်ပွဲတစ်ခု ဖြစ်တော့မှာလား .. အားလုံးထိတ်လန့်သွားကြလေ၏။
တိုက်ပွဲများမှာ သူတို့၏အနာဂတ်နှင့်များစွာ သက်ဆိုင်နေသည်။ သူတို့အနိုင်ရလျှင် ရှေးဟောင်းစစ်မြေပြင်မှ အခွင့်အရေးများရမည့်အပြင် ကျောင်း၏ထောက်ပံ့မှုကိုလည်းရလိမ့်မည်။
သူတို့ရှုံးသွားပါက အရာအားလုံး ဗလာနတ္ထိဖြစ်သွားလိမ့်မည်။
ကျောင်းသားများကို လေ့ကျင့်ပေးမည့်နည်းလမ်းများမှာ အရမ်းငြင်သာနေမည်မဟုတ်ဘူးဟု သူတို့ကြားခဲ့ရသည်။ မဟုတ်ပါက ဤကဲ့သို့အန္တရာယ်များသည့်နေရာကို ပို့လိုက်မည်မဟုတ်ပေ။
အနာဂတ်မှာ အလွန်ရက်စက်မည်ဖြစ်သောကြောင့် သူတို့သည် တစ်ယောက်နှင့်တစ်ယောက်ကို တိုက်ခိုက်ရန်ဖိအားပေးပြီး စွမ်းအားအကြီးဆုံး သူအချို့ကိုသာ ချန်ထားမည်ဟု ကောလဟာလများ ကြားဖူးသည်။
“သွားကြစို့..” ဝမ်ရှီး ပြောလိုက်၏။ သူမ လူအများကြီးရှေ့တွင် သေချာပေါက် မင်းသမီးယောင်ယွဲ့နှင့် တိုက်ခိုက်မည် မဟုတ်ပေ။ ဤသည်မှာ လုထော်၊ ရွှမ်ခွန်နှင့် အခြားသူများအတွက်သာ အမြတ်ထွက်သွားလိမ့်မည်။
မင်းသမီးယောင်ယွဲ့သည်လည်း ဒေါသထွက်ခြင်းမရှိပဲ ရယ်မောနေလေသည်။ ထို့နောက် ရှီဟောင်အား လက်ဝေ့ရမ်းပြလိုက်ကာ သူမလူများနှင့် ထွက်သွားလိုက်လေသည်။
ဝုန်း..
ထို့နောက်တွင် ငလျင်လှုပ်လာကာ တောင်များတုန်ခါလာလေ၏။ ဤနီညိုရောင်မြေကြီးအတွင်းပိုင်းတွင် ထိတ်လန့်တကြားအော်ဟစ်သံများ ထွက်ပေါ်လာလေ၏။
ဒါက ဘာသံလဲ .. ဘာဖြစ်နေတာပဲ .. အားလုံးထိတ်လန့်သွားကြရသည်။
နောက်ဆုံးတော့ ရောက်လာလေပြီ။ အနီရောင်လှိုင်းကြီးဖြစ်ပေါ်လာပြီး သားရဲများမှာ နေရာတိုင်းတွင် ပေါ်လာလေသည်။ ထိုသားရဲအားလုံးမှာ ဤနေရာသို့ တရှိန်ထိုး ဦးတည်လာနေခြင်းပင်။
အားလုံး ခေါင်းကျိန်းသွားရ၏။ ဤသည်မှာ အနီရောင်အမွေးနှင့်သားရဲအုပ်ကြီးပင်။
တစ်ကောင်စီတိုင်းမှာ ရေကျွဲတစ်ကောင်အရွယ်အစားရှိပြီး ကြွက်နှင့်တူသည်။ သူတို့၏မျက်လုံးများမှာ နီရဲနေကာ အလွန်လျင်မြန်သည့်အရှိန်ဖြင့် ရောက်လာကြခြင်းပင်။
သူတို့က ဒီကောင်တွေကို ဘယ်လိုတိုက်ရမှာလဲ.. အားလုံး အေးခဲသွားရ၏။
သိထားရမည်မှာ ဤသည်မှာ သာမန်သားရဲများမဟုတ်ပဲ စစ်မြေပြင်၏ စွမ်းအင်မှဖြစ်ပေါ်လာသည့် သားရဲများပင်။ ထိုစွမ်းအင်များတွင် ထာဝရစွမ်းအင်လည်းပါဝင်နေသည်။
“ဒါက ပုံရိပ်ယောင် .. သူတို့အရေအတွက်က အဲဒီလောက် မများဘူး .. သူတို့ကို ခုခံလို့ရလောက်တယ်..” တစ်စုံတစ်ယောက်မှ အော်ဟစ်လိုက်၏။
သူတို့သာ ယခု သင်္ဘောကြီးထံသို့ ပြန်ဆုတ်သွားလိုက်ပါက ကျောင်းမှ အကြီးအကဲများ၏သူတို့အပေါ်အမြင်မှာ ထိုးကျသွားမည်ပင်။ သူတို့ ရှေးဟောင်းမြေထဲသို့ပင် မဝင်နိုင်လျှင် ဘာကို ယှဉ်ပြိုင်ဦးမည်နည်း..
ဤသားရဲများမှာ စွမ်းအားကြီးသည်ဟု ထင်ရသော်လည်း အရေအတွက်မှာ သူတို့ထင်ထားသလောက် မများမှန်း လူအချို့သိနေကြသည်။ အချို့မှာ အနီရောင်အလင်းနှင့်မြူအဖြစ်သာ ရှိသည်။ ထိတွေ့၍ရသည့်ခန္ဓာကိုယ် မရှိသေး။
ဝုန်း..
လျှပ်စီးများ ထွက်ပေါ်လာလေ၏။ အစိမ်းရောင်ဆံပင်နှင့် ချောမောကာ အရပ်ရှည်လျားသည့်လူတစ်ယောက်သည် ကောင်းကင်မိုးကြိုးကဲ့သို့ အသံကိုထုတ်လွှတ်ကာ အရှေ့ဘက်သို့ ပြေးကာ ဦးဆုံးတိုက်ခိုက်လိုက်လေသည်။
ဤသည်မှာ လုထော်ပင်။
သူ့အော်သံနောက်တွင် ထူးဆန်းသည့်သားရဲအတော်များများ ပျက်စီးသွားလေ၏။ သူသည် သိုးအုပ်ထဲသို့ ဝင်သွားသည့်ကျားတစ်ကောင်ကဲ့သို့ပင် သတ်ဖြတ်နေလေသည်။ သူ့နောက်လိုက်များလည်း သူ့နောက်သို့ လိုက်သွားကြလေသည်။
လုထော်သည် အတော်လေးကြမ်းတမ်းသည်ဟု ပြော၍ရသည်။ သူသည် ဓားတစ်လက်ကဲ့သို့ပင် သူ့အရှေ့ရှိ သားရဲအားလုံးကို နှစ်ပိုင်းဖြတ်ပစ်နေလေ၏။
ကြွက်နှင့်တူသည့်အကောင်များသည် ကြောက်စရာကောင်းလှသော စွမ်းအင်များဖြင့် ဖန်တီးထားခြင်းဖြစ်သော်လည်း သူ့အား မရပ်တန့်စေနိုင်ပေ။
ဤသည်ကို မြင်သည်နှင့် အခြားသူများလည်း စိတ်အားတက်ကြွလာသည်။ တရားဝင်တပည့်များ၏ ဦးဆောင်မှုအောက်တွင် သူတို့သည် စွမ်းအားကြီးသည့် နဂါးများကဲ့သို့ပင်။
စစ်ပွဲကြွေးကြော်သံများမှာ ကွင်းပြင်တစ်ခုလုံးကို တုန်ခါသွားစေလေ၏။ နီရဲနေသည့်သားရဲများသည် လှိုင်းလုံးကြီးတစ်ခုကဲ့သို့ရောက်လာသော်လည်း အားလုံးကို မကြောက်ရွံ့စေနိုင်ပေ။
ဂါး.. အနီရောင်အမွေးနှင့်သားရဲများနောက်တွင် ရွှေရောင်မကောင်းဆိုးဝါး၊ သွေးရောင်ဘီလူးကဲ့သို့သော ဘီလူးအချို့ပေါ်လာလေ၏။
“ငါတို့ ဒီနေရာကို ဖြတ်နိုင်တာနဲ့ ငြိမ်းချမ်းပြီ .. အားကုန်တိုက်ကြစို့..” ဖုန်းရှင်းထျန် ပြောလိုက်သည်။
အားလုံးအရှေ့သို့ ဦးတည်သွားကြကာ ပြင်းထန်စွာတိုက်ခိုက်ကြလေသည်။
တစ်နာရီကြာပြီးသည့်နောက်တွင် ရှီဟောင် ဝမ်ရှီးနှင့်လူကွဲသွားလေသည်။ သူ၏သူငယ်ချင်းဟောင်းများ တစ်ခုခုဖြစ်မည်စိုးသောကြောင့် သူတို့ထံသို့ သူဦးတည်သွားလိုက်သည်။
ဝုန်း..
တရှိန်ထိုးပြေးလာသည့် ၁၀ ကျန်းမြင့်သည့်ရွှေရောင်ကျားကြီးသည် ရှီဟောင်လက်သီးချက်ကြောင့် လွင့်ထွက်သွားလေ၏။ ထိုကျားကြီးသည် လေထဲတွင် ပေါက်ကွဲသွားကာ ရွှေရောင်မြူမှုန်ဖြစ်သွားလေ၏။
အားလုံး ထိတ်လန့်သွားကြရသည်။ ဤကဲ့သို့သော ပညာမျိုးကို လုထော်၊ ဝမ်ရှီးနှင့် အခြားစွမ်းအားကြီးသည့်သူများထံတွင်သာ တွေ့ဖူးခြင်းပင်။
ရွှေရောင်ကျားကြီးတွင် ထာဝရတာအိုစွမ်းအင် ရှိနေသောကြောင့် ဤသည်မှာ တရားဝင်တပည့်များအတွက်ပင် ရင်ဆိုင်ရန် ခက်ခဲသည်။ သို့သော်လည်း ရှီဟောင်သည် လက်သီးချက်တစ်ချက်တည်းဖြင့် ပေါက်ကွဲသွားအောင် လုပ်လိုက်ခြင်းပင်။
“ကျေးဇူးပဲ..” ဖုန်းဝူ ပြောလိုက်၏။
အဘယ်ကြောင့်ဆိုသော် ရှီဟောင်သည် စီရင်စုသုံးထောင်မှ ကျင့်ကြံသူများကို ကူညီလိုက်ခြင်းပင်။ သူတို့သည် အနည်းငယ်အားနည်းကြသည်။
စီရင်စုသုံးထောင်တွင် ထာဝရစွမ်းအင်ကျင့်ကြံသည့်သူ များများစားစားမရှိသောကြောင့် ရွေးချယ်သည့် စည်းမျဉ်းစည်းကမ်းများ အနည်းငယ်လျော့ခဲ့သည်။ ဖုန်းဝူ၊ ကျန်းဂူနှင့် အခြားသူများလည်း အနန္တကောင်းကင်ကို ဝင်နိုင်ခဲ့သည်။
သူတို့ ထာဝရစွမ်းအင်ကို မကျင့်ကြံကြသော်လည်း သူတို့ထံတွင် အရေးကြီးသည့် အခွင့်အရေးကြီးရှိနေ၏။ ဤသည်မှာ သူတို့ ကောင်းကင်နတ်ဘုရားအဆင့်၏ ထိပ်ဆုံးအဆင့်သို့ ရောက်နေခြင်းပင်။ ဤအဆင့်တွင် သူတို့ပြောင်းလဲမှုကို လုပ်နိုင်မလား မလုပ်နိုင်ဘူးလားဆိုသည်ကို စောင့်ကြည့်ရမည်။
စီရင်စုသုံးထောင်မှ လူများကို ထပ်တွေ့လိုက်ရသောကြောင့် ရှီဟောင် ထိုနေရာသို့ သွားလိုက်သည်။ ထို့နောက် သူ၏လက်ချောင်းဆယ်ချောင်းမှ နတ်အလင်းတန်းများ တစ်ခုပြီးတစ်ခု ထွက်လာကာ ထိုသားရဲများကို သတ်ပစ်လိုက်လေ၏။
“စီရင်စုသုံးထောင်က လူတွေက တကယ်ကို အားနည်းတာပဲ…”
အဝေးကြီးမှနေ၍ပင် အေးစက်ကာ အထင်သေးမှုအပြည့်နှင့် ဤအသံကို ကြားလိုက်ရသည်ပင်။ သူထိုနေရာသို့ လျင်မြန်စွာ သွားကြည့်လိုက်သည့်အချိန်တွင် ယွမ်ဖုန်းကို တွေ့လိုက်ရသည်။
ယွမ်ဖုန်းသည် ထာဝရစွမ်းအင် ၂ ကြောင်း ကျင့်ကြံထားခြင်းဖြစ်သောကြောင့် လုထော်နှင့်အခြားသူများမှလွဲလျှင် ထိပ်တန်းလူတစ်ယောက်ပင်။ သူ့ထံတွင် မောက်မာစွာ ပြောပိုင်ခွင့်ရှိသည်။ သို့သော်လည်း ဤသည်မှာ စီရင်စုသုံးထောင်မှ ကျင့်ကြံသူများ၏နားထဲတွင် ကန့်လန့်ဖြစ်နေ၏။ ဤသည်မှာ သူတို့သိက္ခာကို ထိခိုက်စေသည်ပင်။
“ထာဝရစွမ်းအင်မရှိတာတောင်မှ ဒီနေရာကို လာနေသေးတယ် .. တကယ်ကို အမှိုက်တွေ..” သူရင့်သီးစွာ ပြောလိုက်သည်။
အကြောင်းပြချက်အချို့ကြောင့် သူ့သွေးမျိုးဆက်မှာ စီရင်စုသုံးထောင်မှလူများအား အကောင်းမမြင်ကြပေ။ ယွမ်ချင်းလည်း ထို့အတူပင်။ ထို့ကြောင့်ပင် ယွမ်ချင်းသည် ရှီဟောင်အား ၁၀ နှစ် ဖိနှိပ်ရန် ဆုံးဖြတ်လိုက်ခြင်းပင်။
“မင်းတို့မတိုက်နိုင်ရင်လည်း ထွက်သွားလိုက်ကြတော့ .. ငါ့လမ်းကို လာပိတ်မနေကြနဲ့..” ယွမ်ဖုန်း အေးစက်စွာ ပြောလိုက်သည်။ သူ၏စကားမှာ ရင့်သီးလွန်းသောကြောင့် စီရင်စုသုံးထောင်မှလူများ အလွန်ကြည့်ရဆိုးလာလေသည်။
ရှီဟောင် ထိုလူများကို ကြည့်လိုက်၏။ ဤလူများမှာ သူ ရင်းနှီးသည့် သူငယ်ချင်းဟောင်းများ မဟုတ်။ သူ့သူငယ်ချင်းဟောင်းများမှာ အတော်လေး စွမ်းအားကြီးသောကြောင့် သူတို့ရှိနေလျှင် ဤမျှဆိုးမည်မဟုတ်ပေ။
“မင်း ဘယ်သူ့ကို အနိုင်ကျင့်ချင်နေတာလဲ..”
ရှီဟောင်၏ခန္ဓာကိုယ်တစ်ဝိုက်တွင် တောက်ပသည့်အလင်းများ ထွက်ပေါ်လာလေ၏။ သူသည် စစ်နတ်ဘုရားတစ်ယောက်ကဲ့သို့ပင် သင်္ကေတများတောက်ပလျက် ခြေလှမ်းကျယ်ဖြင့်ပင် ယွမ်ဖုန်းထံသို့ လျှောက်သွားလိုက်သည်။
“ငါက စီရင်စုသုံးထောင်က လူတွေကိုပြောတာ .. ဘာလဲ .. မင်း စပ်သွားတာလား..” ယွမ်ဖုန်း အေးစက်စွာ ရယ်မောလိုက်လေ၏။
“အားလုံးအမှိုက်တွေ..” ယွမ်ဖုန်းနောက်လိုက်မှ ပြောလိုက်သည်။
“သူတို့ရဲ့ကျင့်ကြံဆင့်နိမ့်နေတာက သပ်သပ်ပဲ . ဒါပေမဲ့ မင်းတို့ဒီလိုမျိုး လှောင်ပြောင်နေတာက ငါ့မျက်လုံးထဲမှာတော့ မင်းတို့အားလုံးလည်း အမှိုက်ထက် မပိုဘူး..” ရှီဟောင်ပြောလိုက်သည်။
သူ လက်သီးထိုးလိုက်သည်နှင့် ဝုန်းဟူသည့်အသံကြီး ထွက်ပေါ်လာလေ၏။
ဖူး..
ထို့နောက်တွင် ယွမ်ဖုန်း၏နောက်လိုက်များ ချက်ချင်းပင် ပေါက်ကွဲသွားလေ၏။
အချို့သွေးများမှာ ယွမ်ဖုန်းကိုယ်ပေါ်သို့ စင်သွားသောကြောင့် ယွမ်ဖုန်း ထိတ်လန့်သွားရသည်။ သူသည် ရှီဟောင်ကို ယခုမှ မြင်ဖူးသည့်သူကဲ့သို့ သူ့အား ငေးကြောင်ကြည့်နေလေသည်။